Anmgbianev, Lôô Nen Ken Jijingi Shi Ker Nen U Eren Ityom Ken Tiônnongo!

“[Or] u nana lôô ken Jijingi yô, shi ka di sha Jijingi nana sunda uma u tsôron ye.”—GAL. 6:8.

1, 2. Mateu 9:37, 38 ngu kuren hegen nena, man kwagh ne va a mgbe u nyi ken atôônanongo?

 NE MBA nengen akaa a vesen nga eren, man ka akaa a aa hungur ne mayange ga, zan zan ken tar u he kpa ne za hemen u umbur a gbem sha won yô! Zege tom u Yesu tsengaôron kwagh na la mba eren un hegen torough torough je. Yesu yange kaa ér, “Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.” (Mat. 9:37, 38) Yehova ngu ungwan amba msen la sha gbenda u kpilighyol kpen kpen. Ken inyom i tom i 2009 la, atôônanongo a mba Mbashiada mba Yehova seer ingyegh kuma 2,031 kohol hingir atôônanongo 105,298 tar sha won cii. Aluer i kar kwar yô, i lu eren iorov 757 batisema hanma iyange ken inyom la!

² Mseer ne na yô, kwagh gba sha anmgbianev mba ve kom u vea hemen sha u tesen shi lun mbakuran ken atôônanongo yô. (Ef. 4:11) Yehova ver ior mba ve kom yô ér ve nenge sha mbamgbe mba iyôngo na, a er kwagh ne upuembaanyomov imôngo hegen, shi se mba a vangertiôr ser una za hemen u eren nahan kpaa. Kwaghôron u profeti u i nger ken Mika 5:5 la na se ibumun ér ken ayange a masejime yô, ior mba Yehova vea lu a “mbakuranilev utaankaruhar man mbatarev ken ior anigheni,” inja na yô, vea lu a ior kpishi mba ve kom u vea hemen ve yô.

3. Pase inja i u ‘lôôn ken jijingi’ la.

³ Wea lu Orshiada u Yehova u i er u batisema yô, kanyi ia wase u ve u ker u eren ityom ken tiônnongoo? Kwagh u vesen u ú er yô, ka u ‘lôôn ken Jijingi.’ (Gal. 6:8) U lôôn ken jijingi la ka u eren kwagh u nan icighan jijingi u Aôndo ian wer a hemen we. Kange ishima wer mayange je u “lôô ken iyol” ga. De deen wer akaa amba er uma u yôughyôugh, man ahumbe a man kua iemberyolough ve tule isharen i ú lu a mi i nan iyol you sha u eren tom ken mcivir u Aôndo la ga. Mbakristu cii ve̱ “lôô ken Jijingi,” nahan shighe a va kuman yô, nomso mba ve er nahan la cii vea fatyô u aren sha iaven i eren ityom ken tiônnongo. Er kwagh a gbe sha udiakon man mbatamen nyian kpishi yô, ngeren ne hemba ngun sha ci u Mbakristu mba ve lu nomso la. Sha nahan yô, se mba taver ne, anmgbianev mba nomso ishima ser, time nen sha ngeren ne shi er nen msen sha mi kpaa.

Ker u Eren Tom u Dedoo

4, 5. (a) Mba taver nomso mba i er ve batisema la asema ér ve ker u eren ityom i nyi ken tiônnongoo? (b) Or ka nan ker ér nana er ityom i ken tiônnongo nena?

⁴ Orkristu nana gba teman tsô maa nana hingir orkuran ga. Gba u nana ker a ker “tom u dedoo” u orkuran ne. (1 Tim. 3:1) Kwagh ne wa u eren akaa sha ci u mbananjighjigh shi nengen sha mbamgbe vev sha mimi la ker. (Ôr Yesaia 32:1, 2.) Or u nan keren ityom i eren ken tiônnongo a ishima i wang yô, u ngu wer kwagh hange nan a hange yum ga. Kpa, gema sar nan kpishi u wasen mbagenev a iyoltangen shio.

⁵ Or ka nan ker ér nana kuma u lun diakon  shi aren sha iaven i lun orkuran la sha u nôngon sha afatyô u nan cii lun a aeren a i tese ken Ruamabera ér orkuran shin diakon nana lu a mi la. (1 Tim. 3:1-10, 12, 13; Titu 1:5-9) Aluer u ngu nomsoor u ú tsegh iyol you yô, pine iyol you wer: ‘M ngu eren tom u pasen kwagh la a iyoltangen shio shi wasen mbagenev mer ve kpa ve eren er m eren nahan kpa? M ngu maan mba se civir Aôndo imôngo la ken jijingi sha u tesen ve mer kwagh ve gbam ishima sha mimi kpa? I fam ér m ngu or u henen Mkaanem ma Aôndo sha gbashima kpa? Mkaanem am ken mbamkombo ma doon seer a seer kpa? Mbatamen ka vea wam tom sha ikyev nahan m er u sha ishima i veren man sha gbashima kpa?’ (2 Tim. 4:5) Doo u se time sha Mbampin mban zulee.

6. Ka kwagh u vesen u nyi or a er ve nana kuma u a seer nan ityom ken tiônnongoo?

⁶ Gbenda ugen ú u kar ve u kuma u eren ityom i ken tiônnongo yô, ka u ‘taver lun a agee sha Jijingi [u Aôndo] ken uma u ken semayolough.’ (Ef. 3:16) Ka sha ishangen i haan man i tsuan or ér nana lu diakon shin ortamen ken tiônnongo u Kristu ga. Ka nan taver ken jijingi ve nan kuma u a tsua nan ér nana lu diakon shin ortamen ye. Or a fatyô u taver ken jijingi nena? Gbenda môm u ú fatyô u eren kwagh ne yô, ka u ‘zenden sha Jijingi’ shi nôngon umen ityamegh nagh. (Gal. 5:16, 22, 23) U nguren tesen mbamlu mba ken jijingi mba i gbe u or a lu a mi ve nana kuma u a seer nan ityom ken tiônnongo, shi u ungwan kwaghwan u una wase u u̱ seer sôron mlu wou yô, “ior cii vea nenge mzehemen wou.”—1 Tim. 4:15.

Kwagh Gba sha Ieren i Tangen Iyol Ga La

7. U eren tom sha ci u mbagenev la wa nyi kere?

⁷ U eren tom sha ci u mbagenev la wa u eren tom sha gbashima shi lun a ieren i tangen iyol ga la kpa ker. Er Mbakristu mba ve lu mbakuran la ve lu mbakuran mba ken jijingi yô, kwagh gbe ve sha mbamzeyol mba iyôngo kpen kpen. Nenge ase er ityom i kuran iyôngo la yange i bende a apostoli Paulu yô. Yange kaa a  mbananjighjigh mba ken Korinte ér: “Er m nger ne yô, m lu ken ican kpishi je, m ya ican ken ishima tsung kpaa, m lu a mliam ashe kpishi kpaa, lu sha u nan ne ishima i vihin ga, kpa lu sha u ne̱ fa dooshima u ne doom ishima tsung la.” (2 Kor. 2:4) Ikyav tese ér Paulu yange eren tom na u pasen kwagh la a ishima na cii.

8, 9. Ter akav ken Bibilo a tesen er yange ior nengen sha mbamgbe mba ior mbagenev yô.

⁸ Ieren i tangen iyol ga la ka kwagh u i fe mba ve eren tom sha ci u mbacivir Yehova a mi yô. Ikyav i tesen yô, taver kpishi u henen ér Noa yange kaa a mbagenev hen tsombor na ér: ‘Á bee tso yô kaam nen sha er me va nyôr a ven imôngo yô.’ Mose kaa a Mbaiserael ken Igipiti ér: ‘Yem nen sha hanma gbenda u ne soo cii, me va kohol ne hen Zegemnger u Nyian’ ga. Mayange Yosua kaa ér: ‘Girgar u Yeriko una yôhôr yô kaam nen’ ga. Shi Yesaia gema dugh uwegh sha orgen kaa ér: ‘Nenge via ngura! Tindi un’ ga.—Yes. 6:8.

⁹ Or u se tese ikyav sha a nan tseer tseer ser yange nan lumun ér jijingi u Aôndo a mgbegha nan u eren un tom yô, ka Yesu Kristu. Yange lumun a ishima na u eren tom u paan uumace la. (Yoh. 3:16) Doo u dooshima u Yesu u tangen iyol ga la una mgbegha se u se kpa eren kwagh a iyoltangen shio ga he? Zum u ortamen ugen u a er tom u ortamen ica i gbe lu pasen er ka i lu un ken ishima a iyôngo yô, a kaa ér: Mkaanem ma Yesu ôr a Peteru ér kuran anyôngom av la, ka ma taver mo ishima tsung. Ken anyom a m er tom u ortamen ne cii, m nenge er an-iliam u doon shin erdoo u cuku ngu a taver or ishima yô. Tom u kuran iyôngo la doom kpen kpen.—Yoh. 21:16.

10. Kanyi i a mgbegha Mbakristu mba nomso ve vea dondo ikyav i Yesu i eren tom sha ci u mbagenev laa?

¹⁰ Sha kwagh u nengen sha ikyumuile i Aôndo yô, mba ve tsegh ayol a ve ken tiônnongo sha ci u Aôndo la ka ve kange ishima ér vea tese ieren i Yesu, un u a kaa ér: “Mo Me na ne mmem” la. (Mat. 11:28) Jighjigh u Mbakristu mba nomso ve ne Aôndo la man mdoo u tiônnongo a doo ve ishima la ngu a mgbegha ve u keren tom u dedoo ne, mba henen ér tom la ua na akaa aa saa ve kpishi, shin u yuhwa yum ga. Nahan kpa, aluer orgen nan soo u keren tom la ga di ye? Anmgbian u nomso nana fatyô u lun a isharen i eren tom sha ci u tiônnongo la kpa?

Lu a Isharen i Eren Tom

11. Or a fatyô u lun a isharen i eren tom sha ci u mbagenev nena?

¹¹ Aluer u ker tom ne ga sha ci u ú ishima ngi nyian we er u fatyô u eren u ga shin u ngu a aeren a a kom u eren u ga yô, doo u ú sôn icighan jijingi. (Luka 11:13) Jijingi u Yehova una wase u u hemba hanma ishimanyian i u lu a mi sha kwagh u tom ne cii. Ka Aôndo a ne isharen i eren tom ken or ye, sha ci u ka jijingi u Yehova ngu a mgbegha or u keren ér nana er Aôndo tom ye. Shi ka jijingi ngu a na or agee a eren Aôndo tom kpaa ye. (Fil. 2:13; 4:13) Sha nahan yô, doo u ú sôn Yehova a wase u u̱ lun a isharen i lumun aan a tom.—Ôr Pasalmi 25:4, 5.

12. A er nan man or a zua a kwaghfan a kuma u nana er ityom i í we nan sha ikyev ken tiônnongo la?

¹² Alaghga Orkristu ugen nana ker tom ne ga sha ci u nan nenge ér mbamgbe mba ikyumuile mbara wa kpelegh kpelegh shi u nengen sha a ve la ka tom u yuhwan yum. Gayô, alaghga nana nenge ér nan ngu a kwaghfan kuma u eren ityom shon ga. Aluer kwagh ngu nahan yô, alaghga nana fatyô u zuan a kwaghfan sha u henen Mkaanem ma Aôndo kua ityakerada yase i pasen Bibilo la sha gbashima. Shi doo u nana pine iyol i nan ér, ‘M tee shighe m henen Mkaanem ma Aôndo, shi m eren msen mer a nam kwaghfan kpa?’ Orhenen Yakobu nger ér: “Aluer kwaghfan una yina mô wen yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je.” (Yak. 1:5) U na jighjigh a mkaanem ma jijingi a ne i nger man kpa? Er Aôndo ungwa msen u Solomon yô, a na un “ishima i fan kwagh man i kaven kwagh,” i̱ yange wase un u paven perapera a ifer shighe u ôron ijir yô. (1 Utor 3:7-14) Ka mimi, kwagh u Solomon yange lu kposo. Nahan kpa,  se fatyô u lun a vangertiôr ser Aôndo una na nomso mba a we ve ityom sha ikyev ken tiônnongo la kwaghfan sha er vea fatyô u nengen sha iyôngo na tsembelee yô.—Anz. 2:6.

13, 14. (a) Pase er “dooshima u Kristu” yange bende a Paulu la. (b) Doo u “dooshima u Kristu” una bende a vese nena?

¹³ Kwagh ugen u una wase se ve se lu a isharen i eren tom sha ci u mbagenev yô, ka u henen sha kwagh u Yehova man wan na ve er sha ci wase la zumbee. U tesen ikyav yô, time ase sha 2 Mbakorinte 5:14, 15. (Ôr.) “Dooshima u Kristu ngu mgbeghan se” nena? Dooshima u Kristu a tese sha u nan uma na sha ci wase er Aôndo a soo la a kpilighyol je, ka sea zuan a mkav sha mi sea seer shi sea seer lun a iwuese sha kwagh ne nahan, i tsuwe se ken ishima kpen kpen. Lu dooshima u Kristu la mgbegha Paulu u eren akaa ye. Nahan dooshima la yange un u eren kwagh tangen iyol shi wase un u geman mbamhen nav cii haren sha u eren Aôndo tom kua uumace mba ken tiônnongo man mba ken won cii.

¹⁴ U gbidyen kwar sha mdoo u ior ve doo Yesu ishima la ngu a mgbegha se u wuese un. Kwagh ne na yô, se kav ser a vihi kpishi, aluer se “lôô ken iyol” sha u tsuan u eren akaa a ase tseegh shi kuren asaren a ase yô. Ka se gema se sôr uuma asev sha er se hemba veren ishima sha tom u Aôndo a ne se ér se er ne a ityom igen cii yô. Mdoo u anmgbianev asev ve doo se ishima la ngu a mgbegha se u ‘eren tom’ sha ci ve ye. (Ôr Mbagalatia 5:13.) Aluer se mba nengen ayol a ase ser se mba mbatomov mba hiden a iyol ijime mba eren tom sha ci u mba civir Yehova mba ve tsegh ayol a ve sha ci na la yô, se eren kwagh a ve sha icivir. Mayange je se dondo ieren i puun ior shin ôron mbagenev ijir, i̱ Satan a samber a mi la ga.—Mpa. 12:10.

Iniôngon I Tsombor Cii

15, 16. Kanyi mba hen tsombor u or vea er ve nana kuma u tsuan nan diakon shin ortamena?

¹⁵ Aluer anmgbian ngu a kwase man mbayev yô, á time sha mlu u hen tsombor u nan zum u i soo u fan aluer nan kuma u lun diakon shin ortamen yô. Sha kpôô yô, u tsuan nan diakon shin ortamen la har sha mlu u ken jijingi u tsombor u nan la man kwagh u tsombor la u eren i fe la. Kwagh ne tese er tsombor u lu a tom u vesen, u wasen nom shin ter shighe u nan lu keren tom u diakon shin ortamen ken tiônnongo yô.—Ôr 1 Timothy 3:4, 5, 12.

¹⁶ Mba ve lu hen icombor i Mbakristu la ka vea eren kwagh ken ijoughave yô, i doo Yehova a ve. (Ef. 3:14, 15) Gba u nom nana er kwagh akuma akuma ve nana kôrcio u eren ityom i ken tiônnongo shi nengen sha ya u nan “dedoo” ye. Sha nahan yô, gba kpee u ortamen shin diakon nana henen Bibilo vea kwase u nan kua mbayev sha er ve cii vea fatyô u zuan a mtsera ken Mcivir u hen Tsombor hanma sati yô. Nana duen kwaghpasen vea tsombor u nan hanma shighe. Sha vegher ne kpaa, gba kpee u mba hen tsombor vea sue iniôngon i orhemen ya ve la.

Ú Hide Ú Er Tom Kpa?

17, 18. (a) Aluer anmgbian kera kuma u eren ma tom ga yô, kanyi i gbe u nana ere? (b) Ka mnenge u nyi anmgbian u yange nan lu ortamen shin diakon nana fatyô u lun a mini?

¹⁷ Alaghga yange u vande lun ortamen shin diakon, kpa hegen u kera ngu eren tom sha ian la ga. Yehova doo u ishima shi u fa dedoo wer ngu nengen sha a we doo doo. (1 Pet. 5:6, 7) Yange i kaa a we ér doo u sôr mbamlu ou mbagenev shinii? Kegh iyol u lumun ibo shi  Aôndo a wase u u̱ eren tom sha mi. Palegh u vihin ishima. Lu orfankwagh, nahan tese ieren i dedoo. Ortamen ugen u yange er tom anyom imôngo kpa va kera lu ortamen ga yô kaa ér: “Yange m kange ishima mer me zaan mbamkombo shi me duen kwaghpasen shi me henen Bibilo; me eren akaa ne vough vough shi me eren tom u ortamen kpaa, man kwagh u m tsua ne yange m fatyô u eren un kpaa. Yange m hen u wan ishima sha ci u m lu henen mer me hide me lu sha iantom yam ken atô u inyom i môm shin anyom ahar, kpa tsa nôngo u kuman anyom ataankarahar cii ve m kuma u shi hiden eren tom u ortamen ye. Hen shighe la, kwagh u i wam ér m de yen ishima ga kpa m gema m za hemen u keren tom ne la wasem kpishi.”

¹⁸ Wea lu anmgbian u yange u lu ortamen man u va kera kuma u eren tom la hegen ga yô, iyol i de kpeen we ga. Time sha iveren i Yehova a lu veren tom wou man ya wou cii doo doo la. Sue tsombor wou u vese ken jijingi, za sôron mbauangev shi taver mba iyol i kpe ve la asema. Kwagh u hemban cii yô, er tom wou u Orshiada u Yehova u wuese Aôndo shi yôôn loho u dedoo u Tartor la sha gbashima. *—Ps. 145:1, 2; Yes. 43:10-12.

Hide Gbidye Kwar

19, 20. (a) Mba taver nomso mba ve er batisema cii asema ér ve er nyi? (b) Kanyi se lu timen sha mi ken ngeren u dondon laa?

¹⁹ Kwagh gba sha mbakuran man udiakon hegen hemba ave a tse. Sha nahan yô, se mba taver nomso mba ve er batisema cii asema ser ve sôr ve nenge sha mbamlu vev, nahan ve pine ayol a ve ér, ‘Mea lu diakon shin ortamen ga yô, er nan ve m lu eren tom sha iantom i ortamen shin diakon ga?’ Jijingi u Aôndo a wase u u̱ lun a mnenge u vough sha ikyaa i vesen ne.

²⁰ Mba ken tiônnongo cii vea zua a mtsera ken iniôngon i civir Aôndo tangen iyol ga, i anmgbianev vev mba ken Kristu la. Ka sea eren akaa sha erdoo man a iyoltangen shio yô, se zua a iember i i ve ken tom u eren sha ci u mbagenev man u lôôn ken jijingi la. Nahan kpa, er ngeren u a dondo ne una tese nahan, gba u se vihi icighan jijingi u Aôndo ishima ga. Se palegh kwagh la nena?

[Ngeren u shin kpe]

Ú Na Mlumun Wer Nyi?

• Kwaghôron u profeti u i nger ken Mika 5:5 la na se ibumun ér nyi?

• Ieren i tangen iyol ga la wa nyi man nyi kere?

• Or a er nyi ve nana lu a isharen i eren tom sha ci u mbageneve?

• Aluer or soo u eren tom u diakon shin ortamen yô, ijoughave i tsombor u nan la ngi hange hange nana?

[Mbampin Mba Ngeren u Henen]

[Ufoto u sha peeji 25]

U er nyi ve u fatyô u eren ityom ken tiônnongoo?