De Vihin Jijingi U Yehova Ishima ga
De Vihin Jijingi U Yehova Ishima ga
“De vihin nen Icighan Jijingi u Aôndo ishima ga u i ver ne ikyav sha a Na . . . la.”—EF. 4:30.
1. Kanyi Yehova a er sha ci u ior umiliôn imôngoo, man kanyi i gbe u vea ere?
YEHOVA er kwagh u injaa tsung sha ci u ior umiliôn mba ve lu shin botar ne la. A na hingir u vea fatyô u kporom ikyua a na sha ikyev i Yesu Kristu, Wan na u môm môm la. (Yoh. 6:44) Aluer u tsegha iyol you sha ci u Aôndo shi u ngu eren kwagh sha iceghzwa you la yô, a tese ér we kpa u ngu môm ken ior mban. Er u lu or u i er nan batisema ken iti i icighan jijingi yô, gba u ú eren kwagh ken mzough vea jijingi shon.—Mat. 28:19.
2. Ka mbampin mba nyi se time sha mini?
2 Se mba se ‘lôôn ken Jijingi yô,’ se haa orhe iyol. (Gal. 6:8; Ef. 4:17-24) Kpa, apostoli Paulu wa se kwagh ér se de vihin jijingi u Aôndo ishima ga. (Ôr Mbaefese 4:25-32.) Hegen se time nen sha avur ne vighe vighe. Shighe u Paulu lu ôron kwagh u vihin jijingi u Aôndo ishima la, lu nyi jim lu ôronoo? Ka sha nyi gbenda nahan or u nan tsegh iyol i nan sha ci u Yehova nana fatyô u vihin jijingi na ishima? Man se palegh u vihin jijingi u Yehova ishima nena?
Kwagh u Paulu Lu Ôron Jim La
3. Ú pase inja i mkaanem ma i nger ken Mbaefese 4:30 la wer nyi?
3 Hiihii yô, time ase sha mkaanem ma Paulu ma i nger ken Mbaefese 4:30 la. A nger ér: “De vihin nen Icighan Jijingi u Aôndo ishima ga u i ver ne ikyav sha a Na sha ci u iyange i mpaa la.” Paulu yange soo ér mbananjighjigh a na imôngo mba doon un ishima mbara ve er kwagh u una vihi mlu ve u dedoo vea Yehova ga. Lu sha jijingi u Yehova i ‘ver ve ikyav sha ci u iyange i mpaa’ ye. Icighan jijingi u Aôndo yange lu ikyav sha shighe la, shi hegen kpa ngu ikyav shin “ibumun” hen mbacivir sha mimi mba i shigh ve mkurem la. (2 Kor. 1:22) Ikyav la tese ér ve mban mba kwagh u Aôndo shi vea va ngohol uma u tsôron sha. Mba i ver ve ikyav la cii mba iyenge 144,000.—Mpa. 7:2-4.
4. Er nan i gbe hange hange u se palegh u vihin jijingi u Aôndo ishima?
4 U vihin jijingi ishima la una fatyô u lun kwagh u hiihii, u una na ve tahav mbu tomov mbu Aôndo mbua kera er tom ken uma u Orkristu ga kuaa yô. Se nenge a ikyav i tesen ér jijingi u Aôndo una fatyô u undun se kuaa la ken kwagh u Davidi ôr shighe u a er isholibo vea Betesheba la. Davidi vaa afanyô, zamber a Yehova ér: “De tem kera sha ishigh Yough ga, shi de ngohol Icighan Jijingi Wou her a mo kera ga.” (Ps. 51:11) Ka mba i shigh ve mkurem mba ve “lu jighjigh, [ve] ar ken ku” la tseegh vea ngohol “tsar” u uma u kpen ga la sha ye. (Mpa. 2:10; 1 Kor. 15:53) Mbakristu mba ve lu a ishimaverenkeghen i va lun uma shin tar la kpa, gba u vea lu a icighan jijingi ve vea civir Aôndo sha mimi, shi vea va ngohol iyua i uma sha jighjigh u ve ne nagh ku ipaan ku Kristu la ye. (Yoh. 3:36; Rom. 5:8; 6:23) Nahan, gba hange hange u se cii se palegh u vihin jijingi u Yehova ishima.
Orkristu Nana Fatyô u Vihin Jijingi Ishima Nena?
5, 6. Orkristu nana fatyô u vihin jijingi u Yehova ishima nena?
5 Er se lu Mbakristu mba se tsegh ayol a ase sha ci u Aôndo yô, se fatyô u palegh u vihin jijingi ishima. Se fatyô u eren kwagh ne aluer se za hemen u ‘zenden sha Jijingi yô,’ nahan asaren a yolough aa kera ngohol se ga, shi se kera eren aeren a bo kpaa ga. (Gal. 5:16, 25, 26) Nahan kpa, kwagh la una fatyô u geman. Se fatyô u vihin jijingi u Aôndo ishima sha u eren akaa a Mkaanem ma Aôndo ma vende la kure kure, man alaghga je yô, fan tsô kpa se fa ser se mba eren akaa ne ga.
6 Aluer hanma shighe yô se mba eren kwagh u a kaha kposo a kwagh u icighan jijingi a tese yô, se lu vihin un ishima kua Yehova u a lu Imbor i jijingi shon la kpaa. Aluer se time sha Mbaefese 4:25-32 vighe vighe yô, se fa kwagh u se er ve se palegh u vihin jijingi u Aôndo ishima yô.
Er Se Palegh u Vihin Jijingi u Aôndo Ishima Yô
7, 8. Pase er i hii ve i gbe u se ôron kwagh sha mimi keng yô.
7 Saa se ôron kwagh sha mimi. Paulu nger ken Mbaefese 4:25 ér: “Nahan yô, dugh nen aie kera, hanma or nana̱ ôron kwagh sha mimi a or u nan we ndor a nan yô gadia se mba alegh ayol a ase.” Nahan, er se zough, se lu “alegh ayol a ase” yô, doo u se nyighen mbacivir Aôndo a vese imôngo shin se tsumen a ve sha apera ga, gadia u eren nahan la a lu kwagh môm a u eren ve aie. Antior u nana hanger sha imba ieren la yô, nana hingir ityough gondo a Aôndo.—Ôr Anzaakaa 3:32.
8 Mkaanem man aeren a sha anyighe aa fatyô u vihin mzough u ken tiônnongo la. Nahan yô, doo u se lu er profeti u jighjigh, Daniel, u yange mbagenev fatyô u zuan a ityôkyaa i bo shin ifer kpaa ken a na ga la nahan. (Dan. 6:4) Shi gba u se umbur kwaghwan u Paulu wa Mbakristu mba ve lu a ishimaverenkeghen i yemen sha la, ér hanma ilyeegh ki “iyol i Kristu” yô ki sha ci u alegh agen la, man gba u kia lu ken mzough vea mbadondon Yesu mba mimi mba i shigh ve mkurem la. (Ef. 4:11, 12) Aluer se mba veren ishima u va lun uma ken Paradiso shin tar yô, se kpa saa se ôron kwagh sha mimi sha er anmgbianev asev sha tar cii vea lu ken mzough yô.
9. Er nan ve i doo u se dondo kwaghwan u ken Mbaefese 4:26, 27 laa?
9 Saa se hendan a Diabolo, se na un ian cuku ser a vihi mlu wase u ken jijingi ga. (Yak. 4:7) Icighan jijingi wasen se u hendan a Satan. U tesen ikyav yô, se fatyô u eren kwagh ne sha u palegh ishima i nyoon za karen ikyaa inya la. Paulu nger ér: “Nyoon nen ishima, kpa de eren nen isholibo ga, iyange i̱ de been ne a ishima i vihin her ga. De ne nen diabolo ian ga.” (Ef. 4:26, 27) Aluer ishima vihi se ker ka sha inja je kpa, msen u eren ave ave ving la una wase se u lun a “ishima i dem dem,” nahan kôron iyol tsaha, kera eren kwagh u una vihi jijingi u Aôndo ishima ga. (Anz. 17:27) Nahan se kera de ser se lu ken ishima i vihin gbem sha er se na Satan ian i meen se u eren ifer ga. (Ps. 37:8, 9) Gbenda môm u se hendan a Satan yô, ka u himen iyongo fese, er Yesu wa se kwagh nahan.—Mat. 5:23, 24; 18:15-17.
10, 11. Gba u se ii shin se er kwagh sha anyighe ga sha ci u nyi?
10 Mayange se gba nen ken imeen i eren kwagh sha anyighe shin iin ga. Paulu nger sha kwagh u iv mbu iin ér: “Or u iin nana̱ de kera shi iin ga, kpa guda yô nana̱ nôngo tsung, nana̱ er tom u mimi sha ave a nan, tsô nana lu a kwagh u panden nan orgen u kwagh a gbe nan yô.” (Ef. 4:28) Aluer Orkristu u nan tsegh iyol i nan nan ii yô, nana ‘ter iti i Aôndo gbilin,’ nana va a ilyahan sha i. (Anz. 30:7-9) Ibanave je kpa ka ityôkyaa i nan or za iin ga. Mba Aôndo a doo ve ishima kua orwanndor a ve yô, ve kav er ityôkyaa i môm kpa i lu i or a ii ve nana lu a ishô iyol ga yô.—Mar. 12:28-31.
11 Paulu ter di a ter kwagh u se er tsô ga, kpa a tese kwagh u se er yô. Aluer se mba zenden sha jijingi yô, se er tom taveraa sha er se kôrcio u nengen sha tsombor wase shi se lu a “kwagh u panden nan orgen u kwagh a gbe nan yô.” (1 Tim. 5:8) Yesu man mbahenen nav yange ve ver inyaregh ki wasen mbaatsanev a mi, kpa or u nengen mker, Yuda u Isekarioti dughun kigenegh ker. (Yoh. 12:4-6) Jijingi u Aôndo yange hemen un ga je ka u henen a hen ga. Se mba jijingi u Aôndo a hemen se yô, se mba “zenden tsembelee sha akaa cii” er Paulu eren nahan. (Heb. 13:18) Nahan se mba palegh u vihin jijingi u Aôndo ishima.
Igbenda Igen i Se Palegh u Vihin Jijingi u Aôndo Ishima Yô
12, 13. (a) Er i tese ken Mbaefese 4:29 nahan, ka imba kwaghôron i nyi i doo u se palegha? (b) Doo u iliam yase ia lu nena?
12 Gba u se wa ikyo sha kwaghôron wase. Paulu kaa ér: “Ma kwaghôron u dang a̱ de dugh ken zwa wen ga, saa di u doon u una fatyô u maan a maa kwagh ape kwagh a gbe sha mi yô, nahan mba vea ungwa kpaa vea zua a mlumun u sha mhôôn.” (Ef. 4:29) Heen kpa, apostoli ne kaa se a kaa kwagh u se̱ de eren ga la di tsô ga, kpa a ôr se kwagh u se̱ eren yô. Sha tahav mbu jijingi u Aôndo yô, se ôr kwagh ‘u doon u una fatyô u maan a maa kwagh, nahan mba vea ungwa kpaa vea zua a mlumun u sha mhôôn.’ Heela tseegh ga, doo u se de ser “kwaghôron u dang” a̱ due ken zwa wase ga. I yar tom a ishember i ken zwa Grika i í gem ér “u dang” la sha u ôron kwagh u ityamegh ki kon shin ishu shin inyam i hôôn. Er ka sea nenge a akaayan a hôôn a ngan ve ishima i ndôhôr se nahan, kape kwaghôron u Yehova a nenge ér ka u dang la kpa i doo u se kôr un ihyom je la.
13 Doo u kwaghôron wase una lu u wang man u doon man u “i we bar sha mi yô.” (Kol. 3:8-10; 4:6) Gba u ior vea kav ér se mba kposo zum u ve ongo iliam yase yô. Nahan yô, de se wase nen mbagenev sha u ôron kwagh ‘u maan ve a maa.’ Shi i lu se ken ishima er Orpasalmi u a wa icam nahan la, ér: “Akaaôron a ken zwa wam man mhen wam u ken ishima, ve̱ lu kwagh u kuman We ishima, TERE, Vande wam man Orpaan wam.”—Ps. 19:14.
14. Mbaefese 4:30, 31 tese ér saa se dugh nyi ken a vese kera?
14 Gba u se dugh hanma ishima i yuan man iyugh man ityuhwanev kua hanma inja i dang kpaa. Paulu te se icin ér se de vihin jijingi u Aôndo ishima ga, been yô, a nger ér: “Dugh nen hanma ishima i yuan man ishima i nyoon man iyugh man u zôhôn genger genger man ityuhwanev ken a ven kera kua hanma inja i dang kpaa.” (Ef. 4:30, 31) Er se lu uumace mba yinan yô, se cii gba u se er tom taveraa ve se kôr ayol a ase tsaha sha aeren a ase man mbamhen asev ye. Aluer se de ser se lu a “ishima i yuan man ishima i nyoon man iyugh” yô, se lu vihin jijingi u Aôndo ishima. Shi aluer se wa kwaghbo u or nan er se la ken ishima, se mba yuwen nan je se venda u himen iyongo la yô, heela kpa se lu vihin jijingi u Aôndo ishima. Aluer se hii a hii u undun kwaghwan u Bibilo kpa, alaghga se hingir u lun a aeren a aa na se er jijingi isholibo yô, man akaa a vihin tsung aa fatyô u duen ken kwagh ne.
15. Aluer or er se kwaghbo yô, kanyi i doo u se eree?
15 Gba u se luun sar sar shi se lu mba zungwen mhôônom shi den mbagenev kwaghbo. Paulu nger ér: “Lu nen sar sar ayol a en, zungwen nen mhôônom, de nen ayol a en kwaghbo, er Aôndo kpaa A de ne ken Kristu nahan.” (Ef. 4:32) Aluer or er se kwagh u a vihi se tsung je kpa, se de nen nan er Aôndo kpa a eren nahan. (Luka 11:4) Aluer or u nan jighjigh a vese imôngo nan lam sha a vese dang, nahan se za hen a nan sha u za himen iyongo shon, man nan vaa afanyô yô, se de nen nan. Kpa se er kwagh a hemba di u den nan tseegh tsô la. Levitiku 19:18 kaa ér: “De oron iyev ga, shi de we ishima boogh a ônov mba ior ou ga, kpa or u nan we ndor a we nana̱ doo u ishima er we iyol you nahan; ka Mo TER.”
Gba u Se Lu Per
16. Ôr kwagh u a tese ér alaghga a gba u se sôr uuma asev sha er se vihi jijingi u Yehova ishima ga yô.
16 Shighe u se lu ken iuv je kpa, a fatyô u meen se ér se er kwagh u vihin Aôndo. U tesen ikyav yô, alaghga anmgbian nana lu ungwan tser u ú doo sha ci u Mbakristu ga yô. Nahan ken masejime yô, imoshima i nan ia gba zan nan iyol sha ci u nan we ikyo sha kwaghwan u ken ityakerada i “wanakiriki u jighjigh man u fan kwagh” ga yô. (Mat. 24:45) Alaghga nana er msen sha zayol u nan la, nahan nana umbur mkaanem ma Paulu ma i nger ken Mbaefese 4:30 la. Maa nana kange ishima ér mayange nana er ma kwagh u vihin jijingi u Aôndo ishima ga, nahan nana tsua ér, hii hen shighe la yem ken hemen, nana palegh icer i bo cii. Yehova una ver ieren i anmgbian la doo doo. Nahan yô, de se lu nen per hanma shighe sha er se vihi jijingi u Aôndo ishima ga yô.
17. Aluer se mba kuran shi eren msen ga yô, kanyi ia fatyô u eren se?
17 Saa se lu per shi se eren msen, gayô, se gba ken imeen i eren kwagh u wang ga shin kwaghbo u una vihi jijingi u Aôndo ishima yô. Shi er icighan jijingi a wasen se u lun a aeren a Ter wase u sha la yô, shighe u se vihi i ishima yô, ka un je se vihi un ishima ye, man se soo u eren imba kwagh la ga. (Ef. 4:30) Mbangeren mba Mbayuda mba sha derianyom u hiihii la yange ve er isholibo sha u kaan ér uivande mba Yesu eren la lu sha tahav mbu Satan. (Ôr Marku 3:22-30.) Mbaihyomov mba Kristu mbara “tuhwa Icighan Jijingi,” nahan ve er isholibo i a fatyô u den ve ga yô. Mayange se lu nen er ve nahan ga!
18. Se er nan ve se fa ser se er isholibo i a fatyô u den se a mi ga ze?
18 Er se soo u zan ikyua a isholibo i a fatyô u den se ga la tsô kpaa ga yô, doo u se umbur kwagh u Paulu ôr ér se de vihin jijingi u Aôndo ishima ga la. Kpa, aluer se er isholibo i vesen di ye? Aluer se gema ishima, mbatamen kpa wase se yô, se fatyô u kuren ikyaa ser Aôndo de se isholibo yase la, , nahan se er icighan jijingi isholibo ga. Sha iwasen i Aôndo yô, se kpa se fatyô u palegh u vihin jijingi ishima.
19, 20. (a) Ka akaa agen a nyi i gbe u se palegha? (b) Se kange ishima u eren nyi?
19 Aôndo taver dooshima man mlu u sar sar man mzough u hen atô u ior nav la sha icighan jijingi na. (Ps. 133:1-3) Nahan yô, se palegh nen u vihin jijingi ishima sha angereke a samber a mi shin alam a aa pande icivir i mba jijingi a tsough ve u lun mbakuran la. (Aer. 20:28; Yuda 8) Gba u se keren mzough shi se naan ayol a ase icivir ken tiônnongo. Sha mimi yô, doo u se tsua a tsua ior mbagenev ken ior mba Aôndo, se kôr azende a ve, se hemban zuan kwagh a ve ga. Paulu nger ér: “M ngu zamber a ven anmgbianev, ken iti i Ter wase Yesu Kristu mer: Ne cii, lu nen zwa môm, mbampav ve̱ de lu her a ven ga, kpa zua nen, lu nen ishima i môm man mhen môm kpaa.”—1 Kor. 1:10.
20 Yehova una fatyô u wasen se, shi a kegh iyol u wasen se sha er se palegh u vihin jijingi ishima yô. De se za nen hemen u sônon ser a na se icighan jijingi shi se kange ishima ser se vihi un ishima ga. Nahan yô, se za nen hemen u ‘lôôn ken jijingi,’ se keren gbendatesen na sha gbashima, hegen man gbem sha won.
Ú Na Mlumun Wer Nyi?
• Inja i u vihin jijingi u Aôndo ishima la ér nyi?
• Or u nan tsegh iyol i nan sha ci u Yehova kpa nana fatyô u vihin jijingi na ishima nena?
• Se fatyô u palegh u vihin icighan jijingi ishima sha nyi igbenda?
[Mbampin Mba Ngeren u Henen]
[Foto u sha peeji 30]
De ngôôr u himen iyongo ga
[Foto u sha peeji 31]
Ka ityamegh ki kon ki hana ki hembe tesen er iliam you i lu?