Doo u Se Naan Mbaganden Icivir sha ci u Nyi?

KON ugen hen kpeifi u kpentar u California ken tar u Amerika, mba yer u ér Lone Cypress. Kon ne ngu môm ken ikyon i i hembe tôôn i foto sha tar cii yô. I kaa ér kon ne tsa kuma anyom 250. Er i fe u kpuun ér ka kon u u tse kpishi yô, i ver ishima sha u sha igbenda kposo kposo. U tesen ikyav yô, i sue u shin tine sha awen a hweegh shi i ta ikyor sha u i zer kera.

Kon u Lone Cypress la ua fatyô umbur se kwagh u Mbakristu mba ve lu mbaganden hen atô wase, mba ve lu a ishimawan kpishi la. Gbenda môm u ka ve tese ishimawan yô, ka sha u pasen loho u dedoo. Profeti Yoel yange tsengaôron ér “mbatamen” vea yôôn loho u Bibilo. (Yoel 2:28-32; Aer. 2:16-21) Hide hen ase sha ahwa imôngo a mbaganden mban ve vihin sha u wasen mbagenev ve hen kwagh u “Loho u Dedoo u tartor” la! (Mat. 24:14) Mbaganden mba ve pasen kwagh u Tartor la mbagenev wa ishima a mtev u sha ican shin mbamtaver mbagenev anyom imôngo. Aluer kon u cypress di nahan kpa i fa ishimawan i u shi i sue u sha awen a hweegh shi i ta ikyor sha mi i zer kera yô, mbaganden mba ve lu hen atô wase la a gema a fa ve shi a na ve icivir nan sha wono?

Yehova Aôndo yange wa ior nav mba sha ayange a tsuaa la tindi ér: “Mough tile sha, sha ishigh ki or u menden ivu, civir ishigh ki tamenor.” (Lev. 19:32) Ken mba civir Yehova nyian kpa, se nenge a ikyav i doon tsung i mbananjighjigh mba ve lu “zenden vea Aôndo” upuembaanyomov imôngo hegen la. (Mika 6:8) Er ve ze hemen u dondon akaawan a Ruamabera yô, ivu ve i sha ityough la  ka “tsar u sha ityou u icivirigh” jim jim.—Anz 16:31.

Apostoli Paulu yange wa gumor Timoteu kwagh ér: “De zehe a organden ga.” Kpa yange lu u Timoteu una “wa a wa nan kwagh er ka ter nahan” shi una eren a “kasev mba ganden kpaa er ka ungô nahan.” (1 Tim. 5:1, 2) Lu u Timoteu una ‘moughon a tilen sha’ sha ishigh ki tamenor. Nahan tese wang je ér Yehova soo ér kwaghôron wase a tese imba icivir la.

“Mbaromanu 12:10 kaa ér, “hemen nen sha u nan ior icivir.” Mbatamen mba ken tiônnongo mba ne Mbakristu mba ve lu mbaganden la icivir. Kpa gba u se cii se hemen sha u nan ior icivir.

Sha mimi yô, mba hen tsombor mba a kwagh u injaa u vea eren a mbamaren vev kua mbamaren vev mba vesen kpaa yô. Sha kwagh u kon u Lone Cypress yô, ior ker igbenda i kuran u ér u lu her, shi mba kuran u her kpaa. Sha nahan yô, doo u se ker igbenda i ia wase se u zan hemen u nan mbamaren asev mba ve ze gighir mbara icivir kua mbamaren asev mba vesen kpaa kpee je. U tesen ikyav yô, aluer se mba keghen ato a ve tsembelee yô, kwagh la una wase se u palegh ieren i hanger ser se eren akaa er se nenge i doo se, a u wan mbamhen vev sha ada ga la.—Anz. 23:22; 1 Tim. 5:4.

Mbaganden mba ve lu hen atô wase la mba Yehova a inja kpen kpen. Undun ve ga. (Ps. 71:18) Aôndo u mimi ka a sue ve ér ve za hemen u civir un sha mimi. De se kpa se za nen hemen u suen mbaganden shi nan ve icivir kpaa.

[Ufoto u sha peeji 7]

Er i gbe u a sue kon u Lone Cypress nahan, kape mbaganden kpa i doo u a eren a ve sha icivir je la

[Ngeren u pasen orngeren]

American Spirit Images/age fotostock