Mbampin mba Mbaôron Takerada Ne Ve Pin La

Yehova venda eev mbu civir, man er nan ve yange tsaha Aron sha ci u wanbua u zenaria u a er la ga?

Shighe u Aron er wanbua u zenaria, er i nger ken Ekesodu ityough 32 la, yange per tindi u Aôndo wa ér i de civir eev ga la. (Eks. 20:3-5) Kwagh la na yô, “Ishima vihi TER a [Aron] tsung je er Una tim un yô, [kpa Mose] er msen sha ci u Aron hen shighe la kpaa.” (Dut. 9:19, 20) Msen u orperapera Mose er tsung la yange lu a “agee kpishi” sha ikyaa i Aron je he? (Yak. 5:16) Een, a shi nan kpa Yehova yange ungwa msen u Mose, nahan kera tsaha Aron ga sha ci u zamber la kua atôakyaa agen ahar.

Ityôkyaa i hiihii yô, lu mtil u Aron tile sha mimi sha ashighe a ken ijime la. Shighe u i tsua Mose ér a za sha ishigh ki Farao shi a due a Mbaiserael ken Igipiti kera la, Yehova tsua Aron ér a za a Mose imôngo, a za lam sha ci na. (Eks. 4:10-16) Nomsombaiorov mba uhar mban za sha ishigh ki tor u Igipiti er Yehova kaa ve nahan, shi ve nyôr ken ican sha ci u ishimacighir i Farao la kpaa. Er ve lu ken Igipiti her la je, Aron tile sha mimi, lu civir Yehova sha jighjigh.—Eks. 4:21.

Shi nenge ase kwagh u yange na ve Aron er wanbua u zenaria la kpaa. Mose lu sha uwo u Sinai ayange 40. Tsô er “ior nenge er Mose tsa sha uwo, kera hungwa ga yum yô,” ve kumbur a Aron ér a er ve aôndo. Aron nagher iyol ga, maa er eev mbu wanbua. (Eks. 32:1-6) Nahan kpa, ieren i Aron ken hemen va tese ér yange lumun a mcivir u eev mbura keng ga. A shi nan kpa, lu mkighir u i kighir un la yange cia er wanbua la ye. U tesen ikyav yô, shighe u Mose kaa ér hanma or nana wua anngô u nan u nan civir eev la, ônov mba Levi cii, kua Aron kpaa, ta ikyaa a Yehova dông. Ve wua iorov dubu utar, mba lu ve je ve na ior nyôr iyol ken mcivir u aiegh la.—Eks. 32:25-29.

Ka been heela yô, Mose kaa a ior ér: “Ne er isholibo” i vesen je. (Eks. 32:30) Nahan, lu Aron tswen ya ibo sha kwaghbo la ga. Un kua ior cii ve zua a iwasen sha mhôônom ma vesen ma Yehova zungwe ve la.

Ikyaa i wanbua u zenaria la ngi karen kera yô, Yehova na zwa ér i ver Aron a lu pristi u tamen. Aôndo kaa a Mose ér: “Haa Aron uicighanmbaakondov, shighe un mkurem, tsegha un, a̱ eren Mo tom u pristi.” (Eks. 40:12, 13) Kwagh ne tese wang je ér Yehova yange de Aron isholibo na la. Ken ishima yô, Aron lu or u suen mcivir u mimi, lu or u hendan kwagh, u civir eev ga.