Er u Wa Ishima a Ieren i Dang i Kwase Wou Shin Nomou Yô

MARGARITA vea nom na Raúl yange ve er Yehova tom u pasen kwagh hanma shighe la anyom imôngo. * Kpa mba va maren wan ve u hiihii la, ica i gbe ga yô, Raúl maa hii u ndôhôr ken jijingi. Ken masejime yô, Raúl nyôr u eren ijimba, nahan i dugh un ken tiônnongo kera. Margarita kaa ér, “Zum u kwagh ne erem yô, lum er me kpe nahan. Yange m ule kpishi, m fa kwagh u mer er ga.”

Jane yange er nom ica gba ga cii tsô, nom na nzughul a na, shin er a na un jighjigh shi a soo un kpishi nahan kpaa. Nom na yange hii u gbidyen un dang dang. Jane kaa ér, “Kwa u hiihii u yange tam iju la, kpiligh mo iyol je kondo, ishima vihim shi m hee kpaa. Yange zamber a mo ér m de un kwaghbo, kpa hingir ikye na u zeren gbidyen mo hiden va zamber ér m de un kwaghbo. Yange m nenge mer, er m lu Kwasekristu yô, gba u me deen ior kwaghbo hanma shighe shi me hungur a mi kpaa. Shi m nenge mer, aluer m ôr ma or kwagh sha zayol wase yô, a̱ lu mbatamen mba ken tiônnongo wase je kpa, me lu tesen mer m soo nomom ga. Orya wam zer nzughul a mo anyom anyom shi mo kpa m lu den un kwaghbo nahan gbem. Hen shighe ne cii, m lu henen kwagh u me er ve me doo nomom ishima yô. Yange va masen  yemen undun mo vea wan wase u kwase yô, m nenge mer m er sha mi ga, yange ma m er kwagh ma hemba nahala sha er ivaa yase ia vihi ga yô.”

Alaghga we kpa kape u lu yan ican ken ishima shi u lu ken ican i inyar shi mlu wou u ken jijingi kpa a kera taver ga sha ci u nomou goom we anbyôr udam, er Margarita man Jane, mba se ter kwagh ve sha heen la nahan je la. Shin alaghga u ngu nom u ú zough a ityough ki nanden kpishi sha ci u kwase wou er idya yô. Er Bibilo i tsengeôron nahan, se mba ken “ashighe a ican” je ka ashe tugh ga. Kwaghôron u profeti ne tese ér ken “ayange a masejime yô,” icombor ia tagher a mbamzeyol sha ci u dooshima una kera lu ga kuaa. Mbagenev vea senge ér ve mba mbacivir Aôndo, kpa aeren a ve aa tese ér ve fa un ga. (2 Tim. 3:1-5) Mbakristu mba mimi kpa mbamzeyol mban tswer ve ga; nahan, aluer ikyar u er a we dang yô, kanyi ia wase ú u wan ishima?

Nengen Iyol You Er Yehova a Nengen We La

Alaghga sha hiihii la u hen wer or u doon we ishima nahan nana fatyô u eren we kwagh u vihin tsung imba la ga. Je yô, alaghga u hii u nan iyol you ibo sha isholibo i nan er la.

Kpa umbur wer, Yesu u lu or u vough la je kpa yange orgen er a na dang, man lu or u doon un ishima, u a na nan jighjigh yô. Cii man Yesu tsua mbaapostoli mba ve luun a na ikyooso ikyooso la yô, vande henen sha kwagh shon shi er msen sha mi zumbee. Sha nahan yô, mbatomov mba Yehova mba 12 mbara cii lu mba a fatyô u nan ve jighjigh yô. Nahan, er Yuda va “hingir or u nengen mker” yô, lu kwagh u vihin, u Yesu zungwe sha mi tsung yô. (Luka 6:12-16) Nahan kpa, Yehova na Yesu ibo sha akaa a Yuda er la ga.

Jighilii yô, nom shin kwase môm u lun vough hegen kpa nan ngu ga. Ve cii vea fatyô u eren akaa sha lan. Orpasalmi ugen, u jijingi mgbegha un yô, nger ér: “TERE, aluer Wea we aferakaa ikyo yô, ka an ma nan til sha, Tere?” (Ps. 130:3) Doo u nom man kwase vea deen ayol a ve kwaghbo er Yehova kpa a den ve nahan.—1 Pet. 4:8.

Nahan kpa, “hanmô wase nana va ôr [Aôndo] kwagh u nan iyol i nan.” (Rom. 14:12) Aluer hingir ieren i ikyar u ken ivese u tuhwan ugen la shin nzughul a nan yô, ka ikyar u nan er sha mi ga la nana ôr Yehova kwagh u nan kpee ye. Yehova venda ipila kua ityuhwanev, nahan mayange ma ityôkyaa ngi i kwase shin nom nana nzughul a ikyar u nan tsung shin nana hee nan ga. (Ps. 11:5; Ef. 5:33; Kol. 3:6-8) Jighilii yô, aluer Orkristu shin Kwasekristu zer nyoon ishima gbem man nan de inja la ga yô, a dugh nan ken tiônnongo u Kristu kera. (Gal. 5:19-21; 2 Yoh. 9, 10) Ikyar u ken ivese nana de nengen ér, aluer nan za ôr mbatamen kwagh sha imba ieren i ior mba ken tar ne yô, nan er sha mi ga ze. Mimi je, mhôônom ma ker Yehova a mba i nzughul a ve nahan la.

Aluer nom shin kwase er idya yô, ka ikyar u nan, u a lu a ishô iyol la tseegh nan er nan kwaghbo ga, Yehova kpa nan er un kwaghbo. (Mat. 19:4-9; Heb. 13:4) Aluer ikyar u ken ivese ngu vanden nôngon ér una eren kwagh sha atindiakaa a Bibilo yô, ityôkyaa ngi i nana ya ibo ken ishima sha isholibo i ikyar u nan u nan er idya la ga.

Umbur wer, Yehova fa er i lu u ken ishima la. A pase iyol na ér un ngu nom u ikyurior i Iserael, shi Mkaanem nam ma a asember a tesen er yange ikyurior la ia undu un ia yem u civir mbaaôndo mbagenev ve, a tôô ican ken ishima yô. (Yes. 54:5, 6; Yer. 3:1, 6-10) Aluer ikyar u u̱ ken ivese nan nzughul a we sha ma gbenda yô, fa wer Yehova kegh ato zulee ngu ungwan mliam ou. (Mal. 2:13, 14) A fa er i gbe u a sur u ishima shi a taver we ishima yô.

Gbenda u Yehova a Surun Se Asema La

Môm ken igbenda i Yehova a surun se asema yô, ka ken tiônnongo u Kristu. Jane yange zua a imba iwasen la. A kaa ér, “Ortamen u sôron atôônanongo yange va u sôron tiônnongo wase sha shighe u ishima vihim ker tsung yô. Yange fa er m ule sha ci u nomom za nger takerada u paven ivaa a mo yô. Nahan a tôô shighe  a wasem u henen sha avur a Ruamabera, er 1 Mbakorinte 7:15 nahan. Avur a Bibilo la man mkaanem nam ma kundu kundu mara wasem u nengen er lu ibo yam ga yô, nahan ishima pever mo.” *

Margarita, u se vande teren kwagh na la kpa yange nenge er Yehova a ne iwasen ken tiônnongo u Kristu sha mbamgbe asev mba ayange ayange yô. A kaa ér: “Yange m va fe mer nomom kegh iyol u geman ishima ga yô, m kura ônov av m yem a ve hen gar ugen. M za nyer yô, m zua a ya maa m kimbi inyaregh sha arum ayough ahar. Kpernan sev mbu aven yô, m lu dughun ikyav ken akpa a ase, ishima lu vihin mo tsung, maa or va mande uwegh sha hunda. M lu henen mer a lu kwaseya, u hunda na dondo a u wam la. Kwagh ka a er i kpilighyol yô, gema lu anmgbian u kwase u yange hen Bibilo a ngôm shi wase tsombor wase u fan mimi la. Yange vande fan ér un ngu va zuan a mo hen ya la ga, kpa va sha u henen Bibilo a kwaseya u m kôr haya hen ya na la. Kwagh ne doom je, mer me vaa ga kpa m fatyô ga. M pase un mzeyol wam heregh, tsô se cii se gba vaan. Her ave ave je, maa a ker gbenda ér se za mkombo sha iyange la. Tiônnongo la yange ngohol se doo doo, shi mbatamen ker gbenda u wasen mo u nengen sha tsombor wam sha akaa a ken jijingi.”

Er Mbagenev Vea Fatyô u Wasen Yô

Igbenda ngi kpishi i Mbakristu mba ken tiônnongo vea fatyô u nan iwasen sha mbamgbe mba hange hange yô. Ikyav i tesen yô, yange gba u Margarita una zua a tom. Tsombor ugen ken tiônnongo tsua u wasen un u nengen sha mbayev nav shighe u i dugh makeranta man i gbe u a nenge sha a ve yô.

Margarita kaa ér, “kwagh u ka a nam iember jim jim yô, ka shighe u anmgbianev mba nomso man mba kasev ve dugh vea mo kua ônov av u za pasen kwagh la.” Er Mbakristu mba ken tiônnongo ve ne mbagenev iwasen sha imba gbenda ne nahan yô, mba ‘wasen ikyav ayol a ve,’ nahan mba eren sha “tindi u Kristu” vough.—Gal. 6:2.

Mba ve ye ican sha ci u asorabo a mbagenev la ka ve wuese imba iwasen i nengen sha mbamgbe vev ne. Kwase ugen, iti na ér Monique, nom na yange yevese undu un a injô iyol, i kuman (inyaregh ki Amerika) udola 15,000 kua mbayev unyiin, u nomso môm, mba kasev utar, mba u una koson yô. A kaa ér: “Anmgbianev av mba nomso man mba kasev mba ken Kristu yange ve wam ikyo kpishi. Luun er ka iwasen ve ga yô, m fa kwagh u yange ma m er ga. M nenge mer ka Yehova yange na anmgbianev mba doon ishima tsung, mba ve nenge  sha mbayev av mbara la ye. Doom kpishi u nengen er imba iwasen ve la i ne mbayev av ve vie ken jijingi nahan. Yange mea keren kwaghwan yô, mbatamen ve nam iwasen. Shi mea soo u lamen a or kpa, nan kegh ato a mo.”—Mar. 10:29, 30.

Mimi je, ijende i lun a dooshima ia fa shighe u i doo u hiin iliam sha kwagh u vihin tsung u a er ijende i nan la ga yô. (Orpa. 3:7) Margarita kaa ér: “Ashighe kpishi, yange i doom u lamen vea anmgbianev mba kasev mba ken tiônnongo u m yem her la sha kwagh u tom u pasen kwagh man Bibilo i henen a ior man kwagh u mbayev kua akaa agen, kpa mbamzeyol av yô, m ôron ve ga. Yange m wuese er ve de ér mo m de u umbur akaa a ken ijime la shi ve wasem u hiin uma u he nahan.”

De Lun a Isharen i Oron Iyev Ga

Ashighe agen yô, u nenge wer ka we u ne ikyar u nan eren asorabo ga, kpa alaghga ishima a vihi u er asorabo a nan la a ve u ican kpishi yô. Aluer u de wer ishima i vihi u zan zan yô, ia fatyô u yangen we u civir Yehova sha mimi. U tesen ikyav yô, alaghga a tsuwe u ken ishima u gba keren igbenda i oron iyev sha ikyar u u̱ a er isholibo la.

Aluer u nenge wer isharen i oron iyev la ngi jiren ken a we yô, u fatyô u gbidyen kwar sha ikyav i Yosua man Kalebu la. Ior mba jighjigh mban yange ve cihi ku u za nengen mker ken Tar u Ityendezwa. Mbamkerev mbagenev mbara ban a jighjigh, nahan ve mgbegha ior hemba Yehova ato. Zum u Yosua man Kalebu lu nôngon ér vea taver ikyurior i Iserael ishima ve za hemen u suur sha Yehova yô, mbagenev soo u tan ve awen. (Num. 13:25–14:10) Aeren a Mbaiserael la na yô, gba u Yosua man Kalebu vea hide a tsa ken taaikyôngo anyom 40 sha ishima ve ga, lu ibo ve ga, kpa lu ibo i mbagenev.

Shin er alaghga lan Yosua man Kalebu ishima nahan kpa, ve de ér asorabo a anmgbianev vev la a na ve ishimavihin ga. Yange ve hemba veren ishima sha tom u Yehova u ve lu eren la. Anyom 40 a ve tsa ken taaikyôngo la nga been yô, i na Yosua man Kalebu vea Mbalevi cii injar, gadia kov la cii kpe kera, lu ve tseegh ve war, ve nyôr ken Tar u Ityendezwa la ye.—Num. 14:28-30; Yos. 14:6-12.

Alaghga aeren a ikyar u u̱ a undu u la aa na u ya ican shighe gôgônan. Ivaa yen yô ia kure, kpa alaghga u ya ican ken ishima shi u nyôr ken ican i inyar. Nahan kpa, de hembe henen sha akaa a nan we ishimavihin ga, gema umbur wer Yehova hemba fan kwagh u una er a mba ve de u dondon atindiakaa a na sha apera la, er se nenge ikyav sha kwagh u yange er a Mbaiserael mba ve undu un ken taaikyôngo la nahan.—Heb. 10:30, 31; 13:4.

U Fatyô u Wan Ishima!

De deen wer mbamhen mba kpeegh ve na u ule ga, kpa gema iv vanger wou a mbamhen mba Yehova. Jane kaa ér, “Er m lu ungwan icer i Iyoukura man Awake! yô, wasem u wan ishima. Shi yange m zua a agee sha u zan mbamkombo. Er m luun a ci ken mbamkombo yô, kwagh la wasem u tôôn ishima yam sha mbamzeyol av kera. Kape tom u pasen kwagh kpa u wasem vough je la. Er m lu wasen mbagenev u nan Yehova jighjigh yô, jighjigh wam u nan seer taver. Shi er m lu wasen mba m lu henen Bibilo a ve yô, kwagh ne wasem u veren ishima sha akaa a a hembe lun a inja la.”

Monique u se vande teren kwagh na la kaa ér: “Er m ze mbamkombo hanma shighe shi ashighe kpishi ka m pasen kwagh er m fetyô la yô, m fatyô u wan ishima. Mba hen tsombor wam hemba mban kôôsôô a ayol a ve kua tiônnongo. Mlu wam u ican la wasem u fan mbamyen av. M tagher a ikyaren, kpa sha iwasen i Yehova yô, m fatyô u wan ishima.”

We kpa kape u fatyô u wan ishima a ameen a mbagenev kpa ve tagher a mi la vough je la. Aluer ikyar u u̱ ken ivese nzughul a we, ishima ia vihi u kpishi kpa, nôngo sha afatyô wou cii dondo kwaghwan u Aôndo na Paulu nger ne, ér: “Sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô.”—Gal. 6:9.

[Ngeren mba shin kpe]

[Foto u sha peeji 31 la]

Mba kasev shin noov vev ve undu ve la ka ve wuese mba ve wasen ve u pasen kwagh ken igbar la