Zua A Mmem Sha U Eren Akaa A Ken Jijingi

“Tôô nen igbur Yam sha ayol a en . . . , tsô né zua a mmem ken asema a en.”—MAT. 11:29.

1. Yehova yange er nyi sha Uwo u Senai, man lu sha ci u nyi?

 SHIGHE u i na Tindi u ikyuryan sha Uwo u Senai la, mkor u kuran Iyange i Memen ken hanma sati la kpa lu ken tindi shon. Yehova yange wa ikyurior i Iserael tindi sha ikyev i Mose ér: “Er tom wou ayange ataratar, sha iyange i ataankarahar la mem, sha er bua wou kua jaki you kpaa ve mem, wan u kpankwase wou kua shiror kpaa, i̱ yôhôr ve iyol” yô. (Eks. 23:12) Mimi je, Yehova yange ver iyange i memen sha ci u ior nav sha dooshima ér “i yôhôr ve iyol,” sha ci u tesen ikyo i wan na sha a ve mba ve lu sha ikyev i Tindi shon la.

2. Mbaiserael yange ve zua a mtsera sha u wan Iyange i Memen ikyo nena?

² Iyange i Memen yange i lu sha ci u memen iyol tseeghlee? Ei, yange i lu kwagh u vesen ken mcivir u Mbaiserael civir Yehova la. Mbaiserael yange vea mem iyol sha Iyange i Memen yô, kwagh la a wase mba hemen icombor u tesen mbayev vev u ‘wan gbenda u TER ikyo shi eren perapera’ Kpaa. (Gen. 18:19) Shi kwagh la yange a wase icombor man azende u zuan imôngo henen sha aeren a Yehova shi ember mzough ve ayol a ve. (Yes. 58:13, 14) Kwagh u vesen yô, Iyange i Memen la i lu tsengan tesen kwagh u Mmem u mimi, u una va lu ken hemen sha ikyev i Hemen u Kristu u Anyom Dubu la. (Rom. 8:21) Kpa sha ayange a ase ne di ye? Ka han Mbakristu mba i gbe ve ishima u dondon igbenda i Yehova la vea zua a imba mmem laa, man vea zua a mi nena?

Zua a Mmem sha u Lun Imôngo Vea Mbakristu Mbagenev

3. Mbakristu mba sha derianyom u hiihii la yange ve wasen ayol a ve nena, man lu nyi i due kere?

³ Apostoli Paulu yange yila tiônnongo u Kristu ér “ityôgh man imagh ki mimi a suur sha mi yô.” (1 Tim. 3:15) Mbakristu mba sha derianyom u hiihii la yange ve zua a iwasen kpishi sha u taver ayol a ve asema shi maan ayol a ve sha dooshima. (Ef. 4:11, 12, 16) Shighe u Paulu lu ken Efese la, anmgbianev mba ken tiônnongo u Korinte za un inya, nahan a zua a ishimataver. Nenge ase er mze ve la yange bende a Paulu yô, a kaa ér: “Sefana man Fortunatu kua Akaiku za va nahan m ember je gadia ve va seer kwagh u a yen ken a mo er ne lu a mo ga la. Gadia ve taver jijingi wam.” (1 Kor. 16:17, 18) Kape Titu kpa yange zua a ishimataver ken jijingi je la. Shighe u a za ken Korinte u za wasen anmgbianev mba ve lu ker la, Paulu hide nger washika hen tiônnongo la ér: “Ne cii ne yôhôr un ishima.” (2 Kor. 7:13) Nyian kpa, Mbashiada mba Yehova mba zough a mmem u mimi sha u lun imôngo vea Mbakristu mbagenev.

4. Mbamkombo mba tiônnongo mba ne se iember nena?

⁴ U vande fan er mbamkombo mba tiônnongo ve lu kwagh u nan msaanyol u vesen yô. Ka i “taver se asema . . . sha jighjigh wase u nan ayol a ase” la ken mbamkombo mban. (Rom. 1:12) Anmgbianev asev mba nomso man mba kasev mba ken Kristu mba er ior mba se fe ve a fa tseegh, mba kwagh a fe zuan se a ve ga, mba  ka se zua a ve se kar se yem kwagh wase la nahan ga. Anmgbianev asev mba azende a ase a mimi, ka ior mba doon se ishima mba se ne ve icivir yô. Se mba zough a iember kua msurshima kpishi sha u kohol a ve imôngo hanma shighe ken mbamkombo asev.—File. 7.

5. Se fatyô u zuan a msaanyol sha mbamkohol mba vesen man mba kiriki nena?

⁵ Shi se mba zough a msaanyol sha mbamkohol mba vesen man mba kiriki mba se eren hanma inyom la. Mbamkohol mban mba ne se mngerem ma umam ma mimi ma ma dugh ken mkaanem ma Aôndo la tseegh ga, kpa mba ne se ian i “bughun ishima” ken mbamzough mba se zough ayol a ase la. (2 Kor. 6:12, 13) Kpa aluer se mba cian ashe shi ka taver se u lun imôngo a ior ye? Gbenda môm u se hoghol a anmgbianev asev mba nomso man mba kasev yô, ka u nan ayol a ase sha u wasen mbagenev sha mkohol u vesen. Zum u anmgbian u kwase ugen za na iyol na u wasen sha mkohol u ityar ityar ugen yô, a kaa ér: “Dugh tsombor wam man azende am agen kpuaa kera yô, yange m fa ior hen mkohol la kpishi ga. Kpa yange m wasen sha u esen tembe yô, m zua vea anmgbianev mba nomso man mba kasev kpishi. Yange saan mo iyol kpen kpen!”

6. Ka gbenda môm u nyi se fatyô u zuan a iember shighe u se lu ken memyoloo?

⁶ Hanma inyom yô, Mbaiserael yange ve za ken Yerusalem kwa tar ve za er uiniongo mba civir Aôndo. (Eks. 34:23) Ashighe kpishi yange i gba u vea undu ishule ve kua ikpenga ve vea yem angahar sha igbenda i lun ihyuundu ihyuundu. Nahan kpa, yange vea za nyôron hen ape tempel lu la yô, ve zua a “iember kpishi,” nahan mba ve lu her cii ‘ve wuese TER.’ (2 Kron. 30:21) Nyian kpa mbacivir Yehova kpishi ka vea mough a icombor ve vea za shin Betel, afishi a branci a Mbashiada mba Yehova a a lu ikyua a ve la yô, ve zua a iember kpishi. U fatyô u sôron ian veren sha er shighe u tsombor wou u lu ken memyol yô, ne za shin Betel kpa?

7. (a) Uiniongo vea fatyô u wasen se nena? (b) Kanyi se er ve iniongo yase ia doo shi ia maa se a maa?

⁷ Aluer se mba kohol imôngo vea tsombor wase man ahuraior a ase sha u ember ma iniongo  yô, a saan se iyol kpen kpen. Tor u fan kwagh, Solomon yange kaa ér: “Kwaghdoon ugen ngu ga, saa u or nana̱ ya kwagh nana̱ ma kwagh man á kpe uma u nan iyol ken tom u nan u sha ican la.” (Orpa. 2:24) Uiniongo mba ne se iember tseegh ga, kpa ka sea seer fan mba ve lu Mbakristu a vese imôngo la yô, m doo u se doo ayol a ase la a hemba taver cii. Aluer se soo ser se er iniongo yase i doo shi i maa se a maa yô, doo u se lôhô ior kpuaa shi se nenge sha i dedoo, hemban je yô zum u i ne ior msôrom her yô.

Tom u Pasen Kwagh Ngu Ne Se Mmem ken Ishima

8, 9. (a) Tese mkposo u loho u Yesu a loho u Mbangeren man Mbafarishi. (b) Ka sea pasen mbagenev kwagh nahan i wase se nena?

⁸ Yesu yange tsee ishima sha tom u pasen kwagh la, shi taver mbahenen nav asema ér ve kpa ve tsee ishima sha u vough er un nahan. Mkaanem nam man tesen ikyav sha kwagh ne, ma kaa ér: “Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.” (Mat. 9:37, 38) Loho u Yesu pasen la lu u van ammem jim jim; lu “Loho u Dedoo.” (Mat. 4:23; 24:14) Loho ne yange u kaha kposo a atindi a yuhwan a Mbafarishi kighir ior ér ve dondo la.—Ôr Mateu 23:4, 23, 24.

⁹ Ka sea pasen ior loho u Tartor yô, se wase ve u zuan a mkom sha akaa a ken jijingi. Heela tseegh ga, se ayol a ase kpa ka se seer zuan a mfe sha akaa a mimi a ken Bibilo a wasen se tsung, shi se hemban wuese Yehova sha mimi cii. Orpasalmi yange ôr mkaanem ma zuan sha kwagh ne ér: “Wuese TER, gadia doo u wan atsam wuese Aôndo wase, gadia ka kwagh u doon tsung.” (Ps. 147:1) U fatyô u seer iember i u zough a mi sha u wuese Yehova hen mbawanndor a we la kpa?

10. Mzehemen wase ken tom u pasen kwagh la har sha u ior keghen ato a loho wase shinii? Ta iwanger.

¹⁰ Ka mimi, sha ajiir agen yô, ior ka ve hemba keghen ato a loho u dedoo a ior mba sha ajiir agen. (Ôr Aerenakaa 18:1, 5-8.) Aluer u ngu hen ijiir i ior ve fe keghen ato a loho u Tartor ga yô, nôngon u pendan ishima sha kwagh u dedoo u ú lu eren ken tom u pasen kwagh la. Umbur wer tom u ú lu eren ngeegh je sha u yôôn iti i Yehova la ngu gbilin ga. (1 Kor. 15:58) Shi fa wer, ior vea kegh ato a vese shin vea kegh ga kpa, ka kwagh u mzehemen wase ken tom u pasen kwagh a har sha mi la ga. Se fatyô u lun a vangertiôr ser Yehova una nenge ér mbaasemaamimi cii zua a ian i ungwan loho u dedoo u Tartor.—Yoh. 6:44.

Mcivir u hen Tsombor Ne Mmem

11. Yehova wa mbamaren tom u nyi, man vea er u nena?

¹¹ Mbamaren mba cian Aôndo mba a tom u tesen ônov vev kwagh u Yehova man igbenda na. (Dut. 11:18, 19) Wea lu ormaren yô, u ver shighe u tesen ônov ou kwagh u Ter wase u sha, u doon ishima la kpa? Yehova na kwaghyan u maan we ken jijingi mgbeghaa ken ityakerada man umagazin man uvidio man icer i ungwan a ungwa je ér a wase u u̱ eren tom u vesen ne shi nengen sha mbamgbe mba tsombor wou mba ken jijingi.

12, 13. (a) Icombor ia fatyô u zuan a iwasen ken Mcivir u hen Tsombor u aikighe la nena? (b) Kanyi Mbamaren vea fatyô u eren sha er mcivir ve u hen tsombor la una va tsombor ve a mmemshima?

¹² Shi kwagh ugen yô, wanakiriki u jighjigh man u fan kwagh ver shighe u eren Mcivir u hen Tsombor aikighe. Ka aikighe u i tsough sha ci u henen Bibilo vea tsombor ken hanma sati yô. Ior kpishi nenge ér Mcivir u hen Tsombor zua icombor ve shi a wase ve u seer doon ayol a ve, shi a taver mlu ve u ken jijingi kpaa. Kpa kanyi mbamaren vea fatyô u eren sha er mcivir ve u hen tsombor la una va tsombor ve a mmemshima?

¹³ Doo u Mcivir u hen Tsombor u aikighe la una lu shighe u kighir mbayev shin eren un sha inja i a due ve ishima a mi ga. Kera kpa, se mba civir “Aôndo u saan saan,” shi a soo ér i saan se iyol u civir un. (1 Tim. 1:11, NW; Fil. 4:4) Ka sea timen sha akaa a injaa a ken Bibilo aikighe nahan se zua a iveren kpen kpen. Mbamaren vea fatyô u geman gbenda u ve tesen ônov vev la sha u duen a mbamhen mba  hev man igbenda i he i tesen mbayev. U tesen ikyav yô, wanye ugen u kuman anyom pue, iti na ér Brandon, tsombor na yange u na un ian ér a pase mfe na ken kwaghôron u lun a itinekwagh ér “Er Nan Ve Yehova Tôô Iyô Ver sha Ityough ki Satana?” Er Brandon soo Kwagh u iyô yum yô, kwagh ne na un ican kpishi, shi ishima za un iyol er i zough iyô vea Satan yô. Icombor igen yô, ashighe agen ka i er iniumbe sha akaa a ken Bibilo, nahan hanma or hen tsombor nan er vegher u nan, nan ôr vegher-iniumbe u nan la ken Bibilo, shin tôôn kwagh u a vande eren yô, eren iniumbe sha mi. Igbenda i tesen mbayev ne cii ngi sha ci u hômon a hôm kwagh tsô ga, kpa ia na yô, ônov ou kpa vea luun a ci ken kwaghhenen, nahan atindiakaa a ken Bibilo aa tema ve ken ishima. *

Palegh Kwagh u Una Na U Ishimanyian Yô

14, 15. (a) Ishimanyian man m-ban u mkor seer ngeen ken ayange a masejime ne nena? (b) Ka akaa a seer nan se ishimanyian a nyi alaghga se tagher a mini?

¹⁴ Er tar u bo ne u lu ken ayange a u a masejime yô, akaa a nan ishimanyian nga seer a seer shi m-ban u mkor kpa ngu seer a seer. Ior umiliôn imôngo mba a ityom i eren ga shi mbagenev mba ken ican i inyar. Mba ve eren tom je kpa, ashighe kpishi ka a kimbi ve inyaregh kpa i lu ve er ve wa inyaregh ki shon ken akpa a peven aan kpishi yô, ki kuma u wasen icombor ve ga. (Nenge Hagai 1:4-6.) Er mbapatii man mbahemenev mbagenev ve lu nôngon ér vea bee a ipila i eren sha tar kua akaa agen a van a kwaghbo nahan cii kpa, ikyav tese ér vea kan shio. Ior kpishi mba yan ican ken ishima sha ci u mbamyen vev.—Ps. 38:4.

¹⁵ Mbakristu mba mimi kpa mbamzeyol kua haghelaa u tar u Satan ne tswer ve ga. (1 Yoh. 5:19) Alaghga ashighe agen mbahenen mba Kristu yange ve tagher a akaa a seer nan ve ishimanyian zum u vea nôngo kpoghuloo ér vea er ishima i Yehova yô. Yesu kaa a ve ér: “Lu vea tôvom a ican yô, ne kpaa vea tôv ne a ican je.” (Yoh. 15:20) Nahan cii kpa, zum u i lu “tôvon se a ican” je kpa, i “ta se kera ga.” (2 Kor. 4:9) Er nan ve kwagh a lu nahana?

16. Kanyi ia wase se ve se lu a iember here?

¹⁶ Yesu kaa ér: “Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem.” (Mat. 11:28) Aluer se na nagh ku ipaan ku Kristu la jighjigh yô, se fatyô u kaan ser se wa ayol a ase sha ikyev i Yehova. Se eren nahan yô, se zua a “agee a hemban la.” (2 Kor. 4:7) Icighan jijingi u Aôndo ka “Orsurunshima” shi ngu a taver jighjigh wase u nan sha gbenda u vesen, sha er se fatyô u wan ishima a ameen man atsan a se tagher a mi la, shi se lu a iember her yô.—Yoh. 14:26; Yak. 1:2-4.

17, 18. (a) Ka ieren i nyi i doo u se palegha? (b) Aluer se hemba veren ishima sha akaa a taregh a nan msaanyol la yô, kanyi ia due kere?

¹⁷ Nyian ne, gba u Mbakristu mba mimi vea palegh u lun a isharen i taregh, i ka i na ior ve hingir u keren mkpeyol sha hanma gbenda cii la. (Ôr Mbaefese 2:2-5.) Aluer ve palegh ga yô, se gba ken imeen i “isharen i iyolough, man isharen i ashee man ihyagh i uma ne.” (1 Yoh. 2:16) Shin alaghga se na jighjigh sha lan ser aluer se kure asaren a ase a iyolough yô, se zua a mmem. (Rom. 8:6) U tesen ikyav yô, ior mbagenev nyôr u man mcimbim ma bov shi man msôrom hunden shi nengen ufoto mba ijimbagh shi vihin shighe sha anumbe a eren kpoghuloo shin u eren aferakaa atô kposo kposo sha u vea nôngo  yô, i lu ve iyol yagh yagh. “Ayom” a Satan ne cii ka a meen ior a mi sha u ve lu a mnenge u kpeegh sha kwagh u msaanyol yô.—Ef. 6:11.

¹⁸ Aluer se mba yan kwagh shin man msôrom shin eren iemberyolough akuma akuma yô, kwaghbo ngu sha mi ga. Nahan kpa, se mba den ser ambaakaa la a ya tor ken uma wase ga. Kpa gema ka hange hange u eren akaa ne akuma akuma shi kôron iyol yase tsaha, hemban je yô ken ashighe a se lu ker ne. Aluer se mba zendan asaren a taregh yô, aa fatyô u nan se ishimanyian je se hingir “gbilin shin se kera lu mbaumen atam ken mfe u se fe Ter wase Yesu Kristu la ga.”—2 Pet. 1:8, NW.

19, 20. Se zua a mmem u mimi nena?

¹⁹ Aluer se mba a mnenge u Yehova sha akaa yô, se kav er iember i tar ne i lu i sha anyangem kpeghee tseegh yô. Mose yange fa kwagh ne, shi se kpa se fa nahan. (Heb. 11:25) Jighilii yô, se mba zough a mmem u mimi, u a ne se iember man mkom u tsôron la sha u eren ishima i Ter wase u sha la.—Mat. 5:6.

²⁰ Se za nen hemen u zuan a mmem sha akaa a ken jijingi. Aluer se mba eren nahan yô, se “venda mwe u i wa Aôndo ikyo ga la man asaren a taregh kpaa . . . se̱ keghen ishimaverenkeghen i dedoo, ka m-ande u iengem i Aôndo wase u A vese yum ne man Oryiman wase Kristu Yesu.” (Titu 2:12, 13) Nahan yô, de se kange nen ishima u tôôn igbur i Yesu sha u wan ayol a ase sha ikyev i hemen na shi dondon gbendatesen na kpaa. Aluer se er nahan yô, se zua a msaanyol man mmem u mimi!

[Ngeren u shin kpe]

Ú Na Mlumun Wer Nyi?

• Ior mba Yehova mba zough a mmem nyian nena?

• Tom u pasen kwagh la ngu ne se kua mba se pasen ve kwagh la mmem nena?

• Kanyi mbamaren vea fatyô u eren sha er mcivir ve u hen tsombor la una na tsombor ve mmeme?

• Ka akaa a nyi nahan ka a ne se vôr ken jijingii?

[Mbampin Mba Ngeren u Henen]

[Ufoto u sha peeji 26 la]

Aluer se tôô igbur i Yesu sha ayol a ase yô, se zua a igbenda kpishi i nan se mmem