Er Nagh Ku Ipaan Ku Yem Se la
Er Nagh Ku Ipaan Ku Yem Se la
“[Or] u nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan.”—YOH. 3:36.
1, 2. Lu ityôkyaa i nyi i na ve i hii u gberen Iyoukura i í yilan ér Zion’s Watch Tower laa?
MGBER u sha unyiin u Iyoukura i ken uwer u Oktoba 1879 la kaa ér: “Aluer or kpe iyol hen Bibilo yô, nana nenge er ku u Kristu la u lu kwagh u vesen yô.” Ngeren la kure sha kwaghwan u hange hange ne, ér: “Gba u se venda hanma kwagh u a tese ér ku u Kristu ka nagh shin ipaan sha ci u isholibo ga la cii.”—Ôr 1 Yohane 2:1, 2.
2 Ityôkyaa i môm i yange i na ve i hii u gberen Iyoukura i í yilan ér Zion’s Watch Tower la ken uwer u Julai, 1879 yô, lu sha u paase ityesen i Bibilo iyol sha kwagh u nagh ku ipaan la. Ngeren mba ken Iyoukura la yange ve na ior ‘kwaghyan sha shighe vough,’ gadia ken m-bee u kwavanyom u sha 1800 la, ior kpishi mba ve senge ér mba Mbakristu yô hii u nyiman ér Yesu kpe sha u paan se sha asorabo ga. (Mat. 24:45) Hen shighe la, mbagenev kpishi hii u ngohol ityesen i or gba duen tsô la, man mhen ne nyiman mimi u a tese ér uumace gba ken isholibo, nahan kera mba vough ga la. Mba ve lumun a ityesen i or gba duen tsô la ka ve tese ér uumace mba sôron mlu ve ayol a ve sha gbaaôndo, nahan ityôkyaa ngi i paan ve ga. Sha nahan yô, apostoli Paulu wa Timoteu kwagh ér: “Kuran kwagh u i we u sha ikyev la. Palegh ayôôso a dang a gbilinigh la man anyimanakaa a i eren aie sha mi er ka kwaghfan la. Mbagenev lumun akaa ne ve pase a je nahan ve tsume gbenda sha kwagh u jighjigh u nan” ve.—1 Tim. 6:20, 21.
3. Ka mbampin mba nyi se lu timen sha mini?
3 U kange ishima wer mayange u “tsume gbenda sha kwagh u jighjigh u nan” wou ga je ka u henen a hen ga. Sha nahan yô, doo u ú time sha mbampin mban: Er nan ve i gbe u a na nagh ku paan mo? Yehova vea Yesu yange ve er nyi sha u nan nagh ku shono, man kwagh la bende a ve nena? Me zua a mtsera sha nagh ku dedoo ku kua na me war iyugh i Aôndo la nena?
Se Fatyô u Waren Iyugh i Aôndo
4, 5. Kanyi i tese ér iyugh i Aôndo ngi sha tar u Satan ne here?
4 Bibilo man yiase i uumace tese ér hii shighe u Adam er isholibo la je, iyugh i Aôndo ngi sha uumace zan zan nyian. (Yoh. 3:36) Ku u hanma orumace ka nan kpe la tese mimi u kwagh ne. Mtemtor u Satan u a hendan a Aôndo la kpa kan shio u yiman uumace sha ikyev i akaabo a a lu zan hemen shin tar hegen ne, shi ma gomoti u uumace môm kpa fatyô u eren akaa a a tende zwa ér una er sha u kuren mbamgbe mba hange hange mba ior mba ve lu sha ikyev na la ga. (1 Yoh. 5:19) Nahan uumace mba yan ican sha ci u ityav mbi nôngon man ipila kua ibanave her.
5 Sha nahan yô, iveren i Yehova ngi sha tar ne ga je ka ashe tugh ga. Paulu kaa ér: “Ka Sha man i lu pasen iyugh i Aôndo sha hanma mvende u i lu vendan Aôndo” la ye. (Rom. 1:18-20, NW) Sha nahan yô, mba ve ze hemen u eren akaa a vihin Aôndo sha apera la cii vea war mtsaha sha ieren ve la mayange ga. Nyian ne, mba pasen iyugh i Aôndo sha loho u ijirigh, u i lu samber a mi sha tar u Satan ne er ka atsan la, man ka ken ityakerada yase i pasen Bibilo la je i pase imba loho la ye.—Mpa. 16:1.
6, 7. Ka tom u nyi Mbakristu mba i shigh ve mkurem mbara ve lu hemene, man ka ian i nyi i shi her sha ci u mba ve lu sha ikyev i tar u Satan laa?
6 Kpa, kwagh ne tese ér hegen shighe kar u ior asange asange vea osough sha ikyev i Satan vea va ya ikyar a Aôndoo? Ei, ian ngi her gbanger gbanger i hiden yan ikyar a Yehova. Mbakristu mba i shigh ve mkurem, ve lu “mbaôron kwagh sha ci u Kristu” la mba hemen ken tom u pasen kwagh ken igbar la, man ka sha loho shon kpaa i lu lôhôn akuraior cii ér: ‘a̱ hime aa Aôndo’ ye.—2 Kor. 5:20, 21.
7 Apostoli Paulu kaa ér Yesu ‘yima se sha iyugh i i lu van la.’ (1 Tes. 1:10) Iyugh i masetyô i Yehova a mba ve vende u geman ishima sha asorabo a ve la ia va a mtim u tsôron sha ve. (2 Tes. 1:6-9) Ka an nana wara? Bibilo kaa ér: “[Or] u nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan.” (Yoh. 3:36) Kape a lu vough je la, mba vea lu uma shi vea na Yesu jighjigh kua nagh ku ipaan yô, zum u mkur u tar ne una va la vea war sha iyange i masetyô i iyugh i Aôndo la.
Er Nagh ku Ipaan Ku Eren Tom La
8. (a) Adam man Ifa yange ve lu veren ishima keghen kwagh u dedoo u nyi? (b) Yehova yange tese ér un ngu Aôndo u ôron ijir sha mimi nena?
8 Yange i gba Adam man Ifa ve lu a isholibo ga. Luun er yange vea hembe Aôndo ato ga yô, tar ma iv a tsombor ve u lun saan saan a ve imôngo ken Paradiso hegen. Nahan kpa, kwagh gema er vihi yô, mbamaren asev mba hiihii mbara hemba Aôndo ato sha apera. Nahan gba u a tsaha ve sha ku u tsôron shi i zenda ve ken Paradiso u hiihii la kera. Shighe u Adam man Ifa hii u maren ônov la nahan, isholibo vande vihin tsombor u uumace kera, ken mase ijime yô, nomsoor u hiihii man kwase u hiihii la bee iyol, kpe kera. Kwagh ne tese ér kwaghôron u Yehova ka u mimi. Heela tseegh ga, ngu Aôndo u ôron ijir sha mimi. Yehova vande tan Adam icin ér una ya kon la yô una kpe, nahan er Adam ya kon la yô, a kpe kpee je.
9, 10. (a) Tsombor u Adam ngu kpen sha ci u nyi? (b) Se er nan ve se war ku u tsôron laa?
9 Er se lu tsombor u Adam yô, i mar se a iyol i lun a mshi, i i ngôôr eren isholibo ga shi ka i va kpe kpaa yô. Zum u Adam er isholibo la, se fatyô u kaan ser, se lu ken awambe a na. Nahan se kpa mtsaha u kuugh la bende a vese. Luun er Yehova una bundu ku u se lu kpen ne a u kimbin injar i nagh ku ipaan sha mi shio yô, kwaghôron na la ma a kera lu u mimi ga. Sha nahan yô, zum u Paulu ôr mkaanem man la, a ôr ma sha ci wase cii, ér: “Se fa atindi ka kwagh u ken jijingi, kpa mo yô, ka ken iyol m lu ye, i teem, isholibo i yamem. Kpe ahii, mo or u gban kera nee! Ka an nana shi yimam sha ikyev i iyol i kuugh nee?”—Rom. 7:14, 24.
10 Ka Yehova tswen a kom u nan ityôkyaa i una fatyô u den se asorabo ase shi paan se sha ikyev i mtsaha u ku u tsôron la ye. Yange er kwagh ne sha u tindin Wan na u ishima ishima u vande lun sha vea na, u i va mar un shin tar lu orumace u vough, u una fatyô u nan nagh ku ipaan a uma na sha ci wase la. Adam lu orisholibo, kpa Yesu lu a isholibo iyol ga. Jighilii yô, Yesu “er ma isholibo ga.” (1 Pet. 2:22) Nahan Yesu kuma u veren tsombor u uumace mba lun vough. Nahan kpa, Yesu de ér mbaihyomov mba Aôndo ve wua un sha er una ngohol ônov mba Adam mba i mar ve ken isholibo mbara, nahan una na sha er mba ve ne un jighjigh la ve zua a uma u tsôron yô. Ruamabera pase ér: “Aôndo ngu môm tsô, Orhimen u her atô u Aôndo a ior kpaa ngu môm, ka or, ka Kristu Yesu u A ne iyol Na hingir ipaa sha ci u ior cii” la.—1 Tim. 2:5, 6.
11. (a) Se pase er nagh ku ipaan ku eren tom la nena? (b) Ka unô nagh ku ipaan ku tee isholibo ve kera?
11 Se fatyô u tôôn kwagh u ior mba ve we inyaregh vev ken banke ve banke shon a nyighe ve, inyaregh ki ve koso cii ki saa la pasen er nagh ku ipaan ku eren tom yô. Ijir kôr mbabanke mbara, nahan gba u a wuhe ve anyom anyom. Kpa mba i nyighe ve la di ye? Er ve nyer ken ibanave, ve kera lu a gbenda u vea due ken ican sha ga yô, saa ornyar u lun a erdoo nana yam banke la, nana hide ve mba inyaregh ki saa ve la cii a inyaregh vev, nahan vea due ken ican kera. Kape Yehova Aôndo vea Wan na u ishima ishima la kpa ve yam tsombor u Adam shi ve kimbi injô i isholibo ve la sha awambe a Yesu a i hee inya la je la. Ka nahan ve Yohane u Eren Batisema yange ôr kwagh u Yesu nahan ye, ér: “Nenge Waniyôngo u Aôndo u A tee isholibo i tar kera ne, Ngura” ye. (Yoh. 1:29) Uumace mba i tee isholibo ve kera la ka mba ve lu uma la tseegh ga, kua mbakpenev kpaa.
Ican i Yehova Ya Vea Wan Na sha Kwagh u Nagh ku Ipaan La
12, 13. Mlumun u Aberaham lumun u nan nagh sha Isaka la tese se nyi?
12 Se fa ican i Ter wase u sha la vea Wan na u ishima ishima yange ve ya sha kwagh u nagh ku ipaan kura jighilii ga. Kpa Bibilo ôr akaa a aa wase se u gbidyen kwar sha ikyaa shon yô. Ikyav i tesen yô, hen ase er yange a lu Aberaham ken ishima shighe u lu yemen ken Moria, zende u ayange atar u za eren kwagh u Aôndo kaa ér a er ne yô, Aôndo kaa ér: “Tôô Isaka wan wou u môm môm u a doo u ishima la, yem ken tar u Moria, za na nagh ku nanden a mi sha uwo ugen u Me tese u yô.”—Gen. 22:2-4.
13 Aberaham za mase nyôron hen ijiir i Aôndo tese un la. Hen er yange kunya a kôr Aberaham kpishi u kangen wan na ave kua angahar, pendan un sha atse a nanden nagh, a Aberaham maa sha ave a na la yô. Nenge er yange ishima ia za Aberaham iyol tsung u kôron ihyô sha uwegh nagh ér una sôngo wan na la sha wono! Hide hen er yange a lu Isaka ken ishima shighe u yav sha atse a nanden nagh, lu keghen er a sôngo un, a nyoon un zan zan una kar kpen la yô. Aberaham yange tsough ihyô u una sôngo Isaka nahan maa, ortyom u Yehova kaa a na ér a de. Kwagh u Aberaham man Isaka yange ve er la wase se u kaven er yange a lu Yehova ken ishima shighe u de ér mbatomov mba Satan ve wua Wan Na la. Mlumun u Isaka lumun u eren hanma kwagh u ter na kaa un la tese er Yesu yange lumun u yan ican shi kpen sha ci wase yô.—Heb. 11:17-19.
14. Lu nyi Yakob tagher a mi ken uma na i wasen se u fan ican i Yehova ya vea Wan na sha kwagh u nagh ku ipaan laa?
14 Kwagh u vihin ugen, u yange er Yakob ne kpa se fatyô u tesen ikyav sha mi, er Yehova vea Wan na yange ve ya ican sha kwagh u nagh ku ipaan yô. Ken ônov mba Yakob cii, Yosev yange hemba doon un ishima. Kpa kwagh er vihi yô, anngôôv mba Yosev mba nomso gba un iyuhe shi kôr un ihyom kighir sha mi. Nahan kpa, Yosev lumun ér Ter na a tindi un una za nenge er anngôôv nav lu yô. Hen shighe la, ve mough hen Heberon, ape ya ve lu la, ve yem vegher u ken imbusutarimese, ve gba ica a ya ve kuma er ukilomita 100 nahan, ve za lu her ve lu kuran iyôngo i Yakob. Hen er yange a lu Yakob ken ishima zum u ônov nav hide a riga u Yosev a awambe sha mi la yô! Yange vaa kaa ér: “Ka riga u wan wam je ne! Ka ma inyamikyume je, i ye un ye; i kôr Yosev javer javer, mnyiman ngu ga.” Kwagh ne yange bende a Yakob tsung, nahan a zungwe ku u wan na ayange kpishi. (Gen. 37:33, 34) Yehova eren kwagh sha mbamzeyol nav er uumace mbaasorabo ve eren la ga. Nahan kpa, aluer se gbidye kwar sha kwagh u Yakob yange tagher a mi ken uma na la yô, se war kaven er yange a lu Aôndo ken ishima zum u i nzughul a Wan na u ishima ishima shi i wua un ku u pilagh shighe u lu shin tar ne ken mlu u orumace la.
Er Se Zua a Mtsera sha Nagh ku Ipaan La
15, 16. (a) Yehova yange tese ér un lumun a nagh ku ipaan kura nena? (b) Ú zua a mtsera sha Nagh ku ipaan kura nena?
15 Yehova Aôndo yange nder Wan na u jighjigh la shin ku, gema na un uma a iyol i iengem i ken jijingi. (1 Pet. 3:18) Yesu u Yehova nder un shin ku ne hide tsa shin tar ayange 40, lu anden hen mbahenen nav, taver ve asema shi wan ve agoyol u va eren tom u vesen u ivangeli ken hemen. Been yô, a kôndo a yem sha. Yemen sha yô, a za na Aôndo kwagh u dedoo u awambe a na a i hee inya la a er yô, sha u i yar tom a mi sha ci u mbadondon un mba mimi, mba ve ne jighjigh a kwagh u nagh ku ipaan ku á ne la ku er sha ci ve la. Yehova yange tese ér un lumun a nagh ku ipaan ku Kristu na la sha u wan Yesu tom ér a haa icighan jijingi sha mbahenen nav mba ve kohol imôngo ken Yerusalem sha iyange i Pentekosti u inyom i 33 la.—Aer. 2:33.
16 Ave ave la je, mbadondon mba Kristu mba i shighe ve mkurem sha jijingi mbara maa hii u torough a uumace mbagenev ér ve yevese iyugh i Aôndo sha u eren batisema ken iti i Yesu Kristu sha ci u mde u asorabo a ve. (Ôr Aerenakaa 2:38-40.) Hii sha iyange i ikyaa la je, ior umiliôn umiliôn mba duen ken akuraior cii va yan ikyar a Yehova kôôsôô sha u nan nagh ku ipaan ku Yesu kura jighjigh. (Yoh. 6:44) Nahan hegen yô, gba u se seer timen sha mbampin uhar, ve yô ka: I na mô wase ishimaverenkeghen i zuan a uma u tsôron la sha ci u tom u dedoo u se eren yôô? Ishimaverenkeghen i dedoo i se zough a mi ne ia fatyô u hiden saanaa?
17. Doo u ú nenge iveren i vesen i lun ikyar u Aôndo la nena?
17 I zungwe se a zungwe mhôônom ve i ne nagh ku ipaan kura sha ci wase ye. Kpa er ior umiliôn imôngo ve ne nagh kura jighjigh nyian yô, ve hingir akar a Aôndo, nahan mba a ishimaverenkeghen i va zuan a uma u tsôron ken paradiso shin tar. Er se hingir akar a Yehova nahan kpa, se fatyô u vihin ikyaryan yase vea na. Gba u se za hemen u tesen a ishima yase cii ser “mpaa u a lu ken Kristu Yesu la” ka se kwagh u vesen.—Rom. 3:24; ôr Mbafilipi 2:12.
Za Hemen u Nan Nagh ku Ipaan Kura Jighjigh
18. U nan nagh ku ipaan jighjigh la wa nyi kere?
18 Yohane 3:36, u ngeren ne a har sha mi la tese ér, u nan Ter Yesu Kristu jighjigh la wa u ungwan imo na kpa ker. Iwuese i se lu a mi sha nagh ku ipaan la i mgbegha se u eren akaa a Yesu a tese la, kua akaa a a tese se sha kwagh u aeren a wang la kpaa. (Mar. 7:21-23) ‘Iyugh i Aôndo ngi van’ sha mbara mba ve vende u geman ishima, den ijimba i eren man asenge a doon ga kua “hanma inja i hôngorough,” í ieren i zeren nengen ufoto mba ijimbaa kpa i̱ lu ker la.—Ef. 5:3-6.
19. Ka sha igbenda i dedoo i nyi nahan se fatyô u tesen ser se na nagh ku ipaan jighjigh?
19 Mnenge u se nengen nagh ku ipaan ser ka kwagh u vesen la a wase se u “civir Aôndo” hanma shighe cii. (2 Pet. 3:11) Se ver nen shighe kpishi sha u eren msen sha gbashima shi henen Bibilo sha tseeneke wase shi zan mbamkombo shi eren mcivir u hen tsombor hanma shighe shi eren tom u pasen kwagh u Tartor sha ishima i tseen kpaa. Shi “u eren dedoo man shi u panden karen ior a̱ de hungur se ga, gadia anza a iniav mbin ne doo Aôndo.”—Heb. 13:15, 16.
20. Ka iveren i nyi mba ve ne nagh ku ipaan jighjigh cii vea fatyô u veren ashe a mi ken hemene?
20 Zum u iyugh i Yehova ia yegh sha tar u ifer ne la, nenge er a saan se iyol sha er se ne nagh ku ipaan ku Yesu jighjigh shi se ze hemen u tesen iwuese sha mi la yô! Ken tar u he u Aôndo a tende zwa a vese la, se wuese un sha kwagh u injaa u a ne sha ci u se war iyugh i Aôndo la gbem sha won.—Ôr Yohane 3:16; Mpase 7:9, 10, 13, 14.
Ú Na Mlumun Wer Nyi?
• Er nan ve i gbe u a na nagh ku paan se?
• Yehova yange ya ican vea Wan na sha kwagh u nagh ku ipaan nena?
• Ka mbamtsera mba nyi se zough a mi sha nagh ku ipaan laa?
• Se na nagh ku ipaan ku Yesu kura jighjigh nena?
[Mbampin Mba Ngeren u Henen]
[Foto u sha peeji 13]
Ian ngi her gbanger gbanger i hiden yan ikyar a Yehova
[Ufoto u sha peeji 15]
Aluer se mba gbidyen kwar sha akaa a vihin a yange er Aberaham man Isaka man Yakob la yô, se fa er yange Yehova ya ican vea Wan na sha kwagh u nagh ku ipaan kpishi yô