“Ityesen I Erdoo” I Kura Nombor wou

“Nan bugh zwa u nan sha kwaghfan, ityesen i erdoo kpaa i lu sha nombor u nan.”—ANZ. 31:26.

1, 2. (a) Ka ieren i nyi i taver mbacivir Yehova asema ér ve lu a mini? (b) Kanyi se hen ken ngeren nee?

 LOHO u vesen u ngô u Tor Lemuel u sha ayange a tsuaa tindi hen a na la yange u lu a kwagh u hange hange ugen ker, u kwase nana er ve nana lu kwase u injaa yô. Ngô u Tor la kaa a na ér: “Nan bugh zwa u nan sha kwaghfan, ityesen i erdoo kpaa i lu sha nombor u nan.” (Anz. 31:1, 10, 26) Gba u kwase u fan kwagh kua hanmaor u nan soo u eren ishima i Yehova cii nana lu a erdoo sha nombor u nan. (Ôr Anzaakaa 19:22.) Doo u iliam i mbacivir Aôndo sha mimi cii ia tese ér mba a erdoo.

² Kanyi i lu erdoo? Ka unô i doo u a tese ve erdoo? Kanyi ia wase se ve se lu a “ityesen i erdoo” sha nombor wase? Aluer se mba eren kwagh ne yô, una bende a gbenda u se lamen a mba hen tsombor wase man anmgbianev asev mba ken Kristu la nena?

Dooshima Mgbeghan Se u Tesen Mbagenev Erdoo

3, 4. (a) Kanyi i lu erdoo? (b) Erdoo u a har sha dooshima la kaha a erdoo u i tesen hanmaor cii la nena?

³ Erdoo wa ieren i kundu kundu man i sha dooshima kpa ker. Or u lun a ieren i kundu kundu nan we ikyo sha akaa a mbagenev, man ka nan er kwagh ne sha u nan ve iwasen sha akaa shi lamen a ve doo doo kpaa. Shi er dooshima kpa a lu ityôkyaa i se eren erdoo a mbagenev yô, gba u kwagh u ior una gba se ishima sha ci u mdoo u ve doo se ishima la. Nahan kpa, ishember i ken zwa Heberu i i̱ er kwagh u erdoo la i ôr kwagh hemba di u eren kwagh a ior kundu kundu sha ci u ve doo se ishima la. Erdoo ka ieren i kundu kundu i or ka nan tese hen orgen a ishima i nan zan zan nan kar kuren kwagh u nan we ishima u eren a or shon yô.

⁴ Erdoo kaha a ieren i kundu kundu sha gbenda ugen kpaa. Mbavannya je kpa a fatyô u eren a ve kundu kundu, kpa a lu sha ci u dooshima ga. Ior mba hen icile i Melita yange ve er a apostoli Paulu man mbagenev 275 mba tso ur a ve la kundu kundu, shin er mayange ve vande fan ve ga nahan kpaa. (Aer. 27:37-28:2) Sha vegher ugen di yô, ior ka vea tese mbagenev erdoo yô, i lu sha ci u ikyar i ve vande yan a ve kôôsôô la. * Lu imba erdoo u Mbakeni tese hen ‘Mbaiserael zum u ve due ken tar u Igipiti’ je la.—1 Sam. 15:6.

Kwargbidyen man Msen Mba Hange Hange

5. Kanyi ia wase se u kôron nombor wase tsaha?

⁵ U tesen erdoo ken iliam yase la ka kwagh u ican. Shighe u orhenen Yakobu lu ôron kwagh u nombor la, a nger wener: “Ma or u umace môm nan fatyô u kôôm u ga, ka ifer i memen mayange ga, u iv a megh ku bogh.”  (Yak. 3:8) Er i lu ican u kôron nombor wase tsaha nahan kpa, kanyi ia wase se u kôron u tsaha? Mkaanem ma Yesu ôr a mbahemenev mbaaduav mba sha ayange a na la ma a wase se u zuan a mkav sha kwagh ne. A kaa ér: “Ka sha m-iv u ken ishima man zwa u er kwagh ye.” (Mat. 12:34) Aluer se soo u tesen erdoo ken iliam yase yô, gba u se lu a erdoo ken ishima yase. De se nenge er kwargbidyen man msen vea wase se u eren kwagh ne yô.

6. Doo u se gbidyen kwar sha erdoo u Yehova a iwuese sha ci u nyi?

⁶ Bibilo kaa ér Yehova ka Aôndo u “mgboughon a erdoo.” (Eks. 34:6, NW) Orpasalmi wa icam ér: “Tar iv a erdoo Wou, TERE.” (Ps. 119:64) Ruamabera ôr akaa kpishi a Yehova er sha u tesen mbacivir un erdoo yô. Aluer se ker shighe se gbidye kwar sha “aeren a [Yehova]” a iwuese yô, kwagh la una wase se u lun a ieren i Aôndo ne.—Ôr Pasalmi 77:12.

7, 8. (a) Kanyi erdoo Yehova yange tese Loti man tsombor na? (b) Davidi yange nenge erdoo u Aôndo tese un la nena?

⁷ Ikyav i tesen yô, hen sha gbenda u Yehova yima wan u anmgbian u Aberaham, Loti kua tsombor na, shighe u A tim gar u Sodom u ve lu ker la. Shighe la va zurum yô, mbatyomov mba ve va hen Loti la kumbur a na ér a due vea tsombor na ken gar la sha fele fele. Bibilo kaa ér: “Kpa a er zô zô; [mbatyomov] mbara kôr un sha uwe kua kwase na man ônov nav mba kasev uhar, gadia Aôndo lu zungwen un mhôônom; ve due a na, ve ver un ken akôngo a gar.” Ka sea gbidye kwar sha myom u Yehova ne nahan, kwagh shon ngu a bende a asema a ase, a mgbegha se u lumun ser myom la tese erdoo u Aôndo ga he?—Gen. 19:16, 19.

⁸ Shi time sha ikyav i Tor Davidi u Iserael u tsuaa la kpaa. Yange wa icam ér: “[Yehova] de u aferakaa a ou cii, A bee u angev ou cii.” Nenge er yange a doo Davidi er Yehova de un isholibo i er a Batesheba la sha wono! Yange wuese Yehova kaa ér: “Er Sha a gbe ca a kar tar sha nahan, kape erdoo Na kpaa a kehe a mba ve cie Un la.” (Ps. 103:3, 11) Aluer se gbidye kwar sha avur ne man agen kpaa yô, asema a ase aa iv a iwuese sha ci u erdoo u Yehova la, shi kwagh ne una mgbegha se u nan un icivir shi sughun un kpaa. Aluer asema a ase nga ivin a iwuese seer a seer yô, a hemba saren se u hingir mbakaven Aôndo u mimi la.—Ef. 5:1.

9. Ka ityôkyaa i vesen i nyi mbacivir Yehova ve lu a mi u tesen erdoo ken akaa a ve eren ayange ayange laa?

⁹ Akav a ken Ruamabera tese ér Yehova eren erdoo, shin tesen dooshima kua ieren i mimi hen mba ve vande yan ikyar a na kangenaa la. Gema mba ve ye ikyar a Aôndo u uma kangenaa ga la di ye? Yehova ngu a vihi ishima a ve shin a er a ve dang-naa? Mayange ga. Luka 6:35 kaa ér: “[Aôndo] eren dedoo a mba ve lu a ishughun ga kua mbabov kpaa.” Aôndo “ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mbaperapera ga kpaa.” (Mat. 5:45) Cii ve se̱ hen mimi shi se̱ dondo un yô, Aôndo vande tesen se erdoo na u a tesen uumace cii la. Nahan kpa, er se lu mbacivir un yô, a tese se dooshima man ieren na i mimi, ka erdoo na u kpegher sha won ga je la. (Ôr Yesaia 54:10.) Se mba a ishughun sha kwagh ne kpishi je! Man kwagh ne ka ityôkyaa i vesen i tesen erdoo ken iliam yase kua ken akaa agen a se eren ken uma wase ayange ayange la.

10. Er nan ve msen a lu kwagh u hange hange u wasen se geman erdoo hingir ieren yase?

¹⁰ Kwagh u hange hange ugen u una wase se ve se lu a erdoo yô, ka msen. Ityôkyaa yô, erdoo ngu ker avegher ahar, ka dooshima man sar sar, u a lu ieren i kundu kundu la. Akaa a ahar ne nga vegher u ityamegh ki icighan jijingi u Yehova. (Gal. 5:22) Aluer se de ser jijingi la a kôôm se yô, se fatyô u maan erdoo ken asema a ase. Gbenda u u hembe lun jighilii u se fatyô u zuan a icighan jijingi  u Yehova yô, ka u sônon jijingi shon ken msen. (Luka 11:13) Doo u hanma shighe se sônon Aôndo jijingi na shi se lumun gbendatesen na. Aluer se soo ser ityesen i erdoo i lu sha nombor wase yô, gba hange hange u se gbidyen kwar shi se eren msen.

Er Nom man Kwase Vea Tese Erdoo sha Gbenda u Ve Lamen Ayol a Ve la Yô

11. (a) Er nan se fe ser Yehova soo ér noov ve tesen kasev vev erdoo? (b) Ka sha nyi gbenda nahan ityesen i erdoo ia wase nom nana kura nombor u nana?

¹¹ Apostoli Paulu wa noov kwagh ér: “Kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan.” (Ef. 5:25) Paulu shi umbur ve kwagh u Yehova ôr Adam man Ifa la. Apostoli la nger wener: “Or nana undu ter u nan kua ngô u nan, nana gema nana var a kwase u nan man ve uhar yô, vea lu iyôgh i môm je.” (Ef. 5:31) Ikyav tese wang ér Yehova soo ér noov ve lu a kasev vev kôôsôô, ve tesen ve erdoo hanma shighe. Nom u dooshima a kor nombor u nan yô, nan ponon mbamyen mba kwase u nan ken igbar ga shin nan lamen sha a nan dang dang kpaa ga. Ka i doo nan u wuese kwase u nan. (Anz. 31:28) Kpa aluer ma kwagh ugen na zayol nyôr hen atô ve yô, nom u lun a erdoo nana kôr nombor u nan tsaha sha er nana heen kwase u nan sha iliam i nan ga yô.

12. Kwase nana fatyô u tesen sha iliam i nan ér ityesen i erdoo ngi sha nombor u nan nena?

¹² Doo u ityesen i erdoo ia lu sha nombor u kwase kpaa. Gba u iliam i nan ia tese ér jijingi u taregh ngu hemen nan ga. Kwase u ‘cian nom u nan’ ka nan lam sha a nan doo doo hen mbagenev, shi nan na icivir i adooga mbagenev vea vande lun a mi sha nom u nan la i seer. (Ef. 5:33) Er nan soo ér nana pande icivir i mbayev vev ve lu a mi sha ter ve la ga yô, ka nan palegh u nyiman kwagh a nan shin puun kwagh u nan soo u eren la sha ishigh ki mbayev vev. Ka nan lam a nan sha ambaakaa la ken hua. Bibilo kaa ér: “Hanma kwase u fan kwagh ka nan maa iyou i nan.” (Anz. 14:1) Ya u nan ngu a doo shi a lu ijiir i kundu kundu sha ci u tsombor u nan cii.

13. Ka han jighilii i doo u ityesen i erdoo ia wa amise, man a fatyô u eren kwagh ne nena?

¹³ Shighe u nom man kwase ve shi hen ya ve uhar tseegh je kpa, gba keng u vea za hemen u yaren tom a nombor ve sha gbenda u tesen ér ve mba ne ayol a ve icivir. Paulu nger wener: “Dugh nen akaa ne kera; iyugh man [ishima] i nyoon man ifer man ityuhwanev man kwaghôron u dang ken zwa wen.” Shi a kaa ér: “Haa nen mhôônom ma kôron tsung iyol, man shi ieren i dedoo man iyol i gengese ga, man ishima i legh legh man ishima i wan. . . . Haa nen dooshima iyol, ka kwagh u maghen mlu u vough je la.” (Kol. 3:8,12-14) Mbayev ka vea ungwan mbamaren vev vea lamen ayol a ve kundu kundu shi vea tesen dooshima yô, ka i doo ve a doo tseegh ga, kpa shi ka ve hemban nôngon ér vea kav gbenda u mbamaren vev ve lamen la.

14. Mbayaav vea yar tom a nombor ve sha u surun mba ve lu sha ikyev ve la asema sha nyi gbenda?

 ¹⁴ Orpasalmi nger kwagh sha kwagh u Yehova ér: ‘Erdoo Wou a̱ shi hingir kwagh u surun mo ishima.’ (Ps. 119:76) Gbenda u vesen u Yehova a surun ior nav asema yô, ka sha u wan ve kwagh shi kôôm ve. (Ps. 119:105) Mbayaav vea zua a mtsera sha ikyav i Ter wase u sha a ver la shi vea yar tom a nombor ve u surun mba ve lu sha ikyev ve la asema nena? Vea er kwagh ne sha u kôôm ve shi taver ve ishima. Nenge er Mcivir u hen Tsombor u aikighe la a lu ian i dedoo i zuan a mfe u injaa u ken Bibilo la sha wono!—Anz. 24:4.

Tese Mbananjighjigh a Vese Imôngo Dooshima

15. Mbatamen man mba ve vie ken jijingi la vea fatyô u yaren tom a nombor ve sha u kuran mbagenev ken tiônnongo nena?

¹⁵ Tor Davidi yange er msen ér: “Erdoo Wou man mimi Wou ve̱ kuram gbem.” (Ps. 40:11) Mbatamen mba ken Kristu man mbagenev ken tiônnongo mba ve vie ken jijingi la vea fatyô u dondon Yehova sha imba gbenda ne nena? Aluer se mba yaren tom a nombor wase sha u ôron ior kwagh u i nger ken Ruamabera yô, a tese ér se mba a erdoo.—Anz. 17:17.

16, 17. Ka igbenda igen i nyi nahan se fatyô u tesen ser se mba a ityesen i erdoo ken iliam yase?

¹⁶ Aluer se nenge Orkristu nan ngu nôngon u za eren kwagh u atindi a Bibilo a vende yô, kanyi i doo u se ere? Erdoo una mgbegha se se yar tom a nombor wase sha u kôôm nan ga he? (Ps. 141:5) Aluer or u nan ne jighjigh a vese imôngo nan er isholibo i se fe kwagh sha mi yô, erdoo una mgbegha se u taver nan ishima ér nana “yila mbatamen mba nôngo u Kristu” sha er vea er “msen sha ci u nan, vea shighe nan mkurem ken iti i Ter” yô. (Yak. 5:14) Aluer orsholibo la venda u zan hen mbatamen, shi se kpa se kera pase mbatamen ga yô, se lu tesen erdoo ga. Alaghga ishima ia yina mbagenev ken a vese shin mtswenem kôr ve gayô mba nengen ayol a ve ér ve gba kwagh ga shin ishima ngi vihin ve sha akaa a ve kanshio u eren yô. Gbenda u dedoo u se tese ser ityesen i erdoo ngi sha nombor wase yô, ka u ‘taver mba ve yen ishima la asema.’—1 Tes. 5:14.

¹⁷ Zum u mbaihyomov mba Aôndo ve lu ôron akaa a aiegh sha anmgbianev asev yô, doo u se er nena? Doo u se lu a akperan ken ishima sha kwagh u jighjigh u anmgbianev asev ga. Aluer orihyom nan ôr ma kwagh sha anmgbianev asev yô, gba u se lumun a kwagh la ga shi zwa kpa se bugh sha mi ga;  kpa aluer nan ngu a fee shin ishima yô, se fatyô u pinen nan nana fa kwagh la a kuma nan yô. Aluer mbaihyomov mba ior mba Aôndo soo u fan ape anmgbianev asev mba ken Kristu ve lu sha u vea er ve kwaghbo yô, se pase ve ga sha ci u dooshima u se lu a mi sha anmgbianev asev la.—Anz. 18:24.

Or u ‘Erdoo Nana zua a Uma’

18, 19. Shighe u se eren kwagh a mba se civir Yehova a ve imôngo yô, gba u ityesen i erdoo ia bee sha nombor wase ga sha ci u nyi?

¹⁸ Doo u se tesen ken hanma kwagh u se eren a mbacivir Yehova a vese imôngo la cii ser, se mba a dooshima. Shighe u i taver u eren nahan je kpa, doo u ityesen i erdoo ia za hemen u lun sha nombor wase her. Zum u erdoo u ônov mba Iserael hingir “er avure a ka a ndoor kera fese yô,” doo Yehova ga. (Hos. 6:4, 6) Kpa, ka sea tesen erdoo hanma shighe yô, i doo un kpishi. Nenge ase er ngu a ver mba ve tesen erdoo la doo doo yô.

¹⁹ Anzaakaa 21:21 kaa ér: “Or u nan dondo sha perapera kua erdoo yô, nana zua a uma man perapera kua icivir.” Môm ken averen a imbaor ne nana zua a mi yô ka uma, kpa a lu uma u lun anyangem kpuaa tseegh tsô ga, a lu uma u lun gbem sha won. Yehova una wase nan nana “kôr ave sha uma u a lu uma jim la.” (1 Tim. 6:12, 19) Yô, de se nôngo sha afatyô wase cii se ‘tese erdoo, hanma or a anngô u nan.’—Sek. 7:9.

[Ngeren u shin kpe]

Ú Fatyô u Pasen Kpa?

• U pase inja i erdoo wer nena?

• Kanyi ia wase se ve se lu a ityesen i erdoo sha nombor wase?

• Nom man kwase vea tese dooshima ken iliam ve nena?

• Shighe u se eren kwagh a mbananjighjigh a vese imôngo yô, kanyi ia tese ér se mba a ityesen i erdoo sha nombor wase?

[Mbampin Mba Ngeren u Henen]

[Foto u sha peeji 23]

Davidi wuese erdoo u Yehova

[Foto u sha peeji 24]

U eren Mcivir u hen Tsombor u aikighe la hanma shighe kpa?