Angwe U Vesen U Ken Tar U Bulgaria Za Ikyura

“Sunda ngee je, kpa mbasundan yô, mba di kpeghee tsô. Nahan yô, sôn nen Ter u sunda, A̱ tindi mbatomov ken sunda Na.” —MAT. 9:37, 38.

MKAANEM ma Yesu mara zua sha mlu u ken tar u Bulgaria vough. Tar ne ngu ken icile i doonashe i í yer ér Balkan la, vegher u sha ityoughkitaregh ki imbusutariyan i Yuropa. Kwagh gba sha mbatomov kpishi sha u ve za a loho u dedoo hen ior mba ve lu ken tar la, mba ve hembe er miliôn ataratar nahan la. Mbapasenkwagh mba ken tar u Bulgaria kuma 1,700, kpa ve yina u pasen kwagh tseren haregh ve cii. Sha nahan yô, Mbahemenev mba Shin Tine yange ve na ian ér i lôhô Mbashiada mba lamen zwa Bulgaria mba ken ityar i ken Yuropa kposo kposo ve za yôô angwe u vesen ken inyom i 2009 la. Yange i yôô angwe la ukasua utaankaruhar sha shighe u fam, nahan i mase kuren un sha mkohol u vesen u “Kuran Nen,” u i kumba hen Sofia, gartamen u Bulgaria sha uwer u Agusutu 14-16, ken inyom i 2009 la.

Ior Za Je Kpilighyol

Anmgbianev mba hen afishi a branci a hen Sofia la yange ve fa iyenge ior i ia va ken tar u France man u Jamani man u Grika man u Italia man u Poland man u Ishpania jighilii ga. Yange gba u hanmaor u nan lu zan ken Bulgaria cii nana za ken ikpa i nan, shi nana tôô shighe u memyol u nan la nana za pasen kwagh a mi. Lu kwagh u saan iyol kpishi er ingyegh ki mba ve er apelekeshen u zan la lu seer hanma kasua zan zan va kuma 292 nahan! Er ior za kpishi yô, i fatyô u tindin ve hen ugeri mba Bulgaria kposo kposo utar. Ugeri mba shon yô lu Kazanlak man Sandanski kua Silistra. Mbatamen mba sôron atôônanongo mba ken Bulgaria lôhô upania mba hen ityônya man mbapasenkwagh ér ve kpa ve sue angwe la. Ken masejime yô, iorov 382 mba ve na ayol yô, ve lu pasen kwagh sha gbashima hen uharegh mba i faan pasen loho u dedoo her ga yô.

Yange i vande tindin anmgbianev mba ken atôônanongo a a lu ikyua yô sha u ve za ker ajiir atsan. Nahan ve za kôr ayou haya shi ve kimbi inyaregh sha uhôtel mba taver ishe ga. Anmgbianev mba hen ityônya mban lu eren tom dông sha u wasen mba ve na ayol a ve, mba ve lu nyôron la ér ve tema i kpe ve iyol, tsô vea mase zan hemen u nengen sha mbamgbe vev ayol a ve. Sha ugeri mba utar mbara cii, i kôr a kôr haya sha ajiir aa gba u a kumban her yô. Yange i kongoso iyol sha er anmgbianev mba van a va mbara vea hemen mbamkombo mba tiônnongo yô. Lu kwagh u sagher iyol kpishi er mbapasenkwagh 50 lu kohol sha u wuese Yehova sha ajiir a Orshiada môm tsô lu her ga yô.

Gbashima u mba ve mough ken ityar igen ve va sha ci u angwe la yange kpilighyol. Ka a lu inyom yô, i tsee iyol ken Bulgaria je i hemba udigirii 40 sha ikyaren i Centigrade la. Nahan kpa, kwagh môm fatyô u yangen anmgbianev mba nomso man mba kasev mban tom ga. Yange i pase kwagh hen Geri u Silistra, u a lu hen kpeifi u Danube, ior ve lu her je i hemba 50,000 la, i tser cica cii ken atô u kasua utar mba hiihii mbara. Sha nahan yô, anmgbianev samber a loho u dedoo la nyôr ken angarev mba ve lu ikyua la, zan zan ve ar ken angar u Tutrakan, ua lu vegher u shin ityôtar i gar u Silistra, i gbe ica i kom ukilomita 50 la je kpaa. Ve hiin kwaghpasen ahwa  9:30 pepe. Vea zaan ahumbe atetan vea hiden yô, ashighe kpishi ve er tom zan zan ahwa 7:00 aikighe, shin i hemba nahan. Gbashima u kpilighyol u mba ve na ayol a ve mban tese la, na yô, angwe u i yôô ken gar u Kazanlak man u Sandanski la kpa samber nyôr a angarev man ugeri mba ve lu ikyua yô.

Lu Nyi i Due Kere?

Ken atô u ukasua mba utaankaruhar mbara, yange i pase kwagh er gba je i lu a vande pasen ga yô. Mba ve lu ken agar ne yange vea fatyô u kaan ér, ‘Ne iv se gar a ityesen yen,’ er ior mba sha ayange a mbaapostoli la kpa kaa nahan. (Aer. 5:28) Mbashiada mba ve za kwaghpasen la, ve na ior umagazin je kuma er 50,000 nahan, shi ve hii Bibilo i henen a iorov 482. Doo se kpishi er sha iyange i Setemba 1, 2009 la nahan, i bugh tiônnongo hen Silistra, shi i ver iniongo i kiriki hen Kazanlak man Sandanski nahan. Ka kwagh u kundun iyol kpishi u nengen a ior mba lu hiin ve u ungwan loho u dedoo sha shighe u angwe ne vesen ken jijingi.

Ken kasua u i hii angwe u yôôn la, anmgbian u kwase ugen u lu marnya u tar u Bulgaria, kpa lu ken tar u Ishpania shi lu ikpur pania yô, pase Karina kwagh; Karina lu kwase u ken Silistra u teen upipambaabaver sha godobi yô. Karina yange tese isharen shi va mkombo. A lumun ngase ér i hen Bibilo a na. Nom na, na jighjigh ér Aôndo ngu ga, nahan a kaa ér i za henen Bibilo a na hen ijiir igen i ior memen her yô. Ônov nav mba kasev mba uhar mbara kpa i lu henen Bibilo a ve. Gba Daniela, wan na u vesen la ishima u fan mimi u Bibilo je gande. Yange ôr takerada u Bibilo Tese la ken kasua môm bee, shi fele je maa a er kwagh u Bibilo i kaa ér i de yaren tom a ieev ken mcivir ga la. Tsô a hii u pasen azende na mimi u fa la. Yange za mkombo u tiônnongo na u hiihii la, ukasua utar mba kar yô, a kaa a anmgbian u kwase u henen kwagh a na la ér: “Kam er m ngu môm ken aven nahan. Kanyi me er ve mo kpa me fatyô u hiin kwaghpasene?” Daniela ngu vesen ken jijingi doo doo vea ngô na man anmgbian na u kwase u kiriki la.

Ken Kazanlak di, anmgbian ugen u a lu marnya u tar u Bulgaria yô, iti na ér Orlin, yange mough ken Italia va sha u va yôôn angwe ne. Zum u lu zenden angahar hiden hen ijiir na i tsan shighe u bee kwaghpasen yô, a nenge agumaior ahar tema sha benci hen ijiir igen i memen, nahan a pase ve kwagh. A na ve kôpi u takerada u Bibilo Tese la môm shi sôr ian ver, i kpernan hiden za sôron ve. Orlin hidi za sôron ve yô, a hii Bibilo i henen a Svetomir, shi kpernan ve za hemen a mi. Orlin hen kwagh a Svetomir kwa anigheni ken atô u ayange ataankaranyiin. Svetomir pase wener: “Yange m er msen hen Aôndo mer a wasem me fa un, ayange kar ahar cii m zua a we ye. Shi m tôndo zwa a na mer  aluer a wasem yô, me tsegha uma wam sha ci na.” Orlin hidi yemen ken Italia yô, anmgbianev mba hen ityônya za hemen u henen kwagh a Svetomir, shi ngu yaren tom sha kwagh u a lu henen la kpaa.

Averen Nga sha ci u Mba Ve Ne Ayol a Ve la Kpishi

Ka i lu mba ve tee shighe ve u memen shi ve vihi inyaregh vev ve yem ken tar ugen sha u za pasen loho u dedoo la ken ishima nena? Ortamen ugen u eren tom ken tar u Ishpania nger wener: “Angwe ne na anmgbianev mba ve lu marnya u Bulgaria, mba ve lu ken Ishpania la ve hingir u lun kôôsôô a ayol a ve. Angwe ne bende a anmgbianev mba ve yôô un la sha gbenda u vesen.” Orgen vea kwase na ve nger ér: “Uwer ne lu u hemban doon cii ken uma wase!” Shi ve kaa ér: “Angwe ne gema uma wase! Hegen mlu wase ngu kposo.” Or ne vea kwase na ve hii u henen sha kwagh u yemen twev ken Bulgaria sha u za eren tom ape kwagh a hembe gban sha mbapasenkwagh yô. Carina ka Kwaseshiada u a lu pania u keke shi a lu kwav, u yange sue angwe u ken Silistra la yô. Angwe la been yô, a de tom na u ken tar u Ishpania la, nahan a mough a yem ken Bulgaria sha u una za sue tiônnongo u he u ken Silistra la yô. Yange koso inyaregh kuma u una fatyô u lun ken tar u Bulgaria inyom i môm yô. Carina ôr kwagh sha kwagh u tsua u eren ne wener: “Doom kpishi er Yehova a nem ian i eren tom ken Bulgaria yô, shi m ver ishima mer mea fetyô yô, ma m lu heen shighe gôgônan. M ngu henen Bibilo a iorov utaan, mbautar mba van mbamkombo.”

Anmgbian u kwase ugen ken Italia yange soo u va yôôn angwe ne, kpa er hii tom ica lu a gba ga yô, lu a ayange a memyol ga. A de ga, a sôn ian uwer môm ér i de kimbin un inyaregh ker ga, shi wa iyol kegh a kegh ér aluer i venda u nan un ian la yô, una de tom na la. Kwagh er u kpiligh un iyol yô, or u tôô un tom la kaa ér: “Ka shami, kpa saa u er kwagh môm: A gba u tindim a kaade u tesen wer u nyôr ken tar u Bulgaria.” Anmgbian u kwase ne kav wang ér Yehova ungwa mbamsen nav.

Gumkwase ugen ken Kristu, u i yer iti na ér Stanislava, a lu ken gar u Bulgaria u i yer ér Varna la, yange eren tom ugen u i kimbin un inyaregh kpishi yô, kpa tôô ian za yôô angwe ne ken Silistra. Shighe u nenge a msaanyol u upania kpishi mba ve mough ica ve va ken tar na u va pasen loho u dedoo yô, a haa mliam a ashe. A hii u henen sha kwagh u lu eren a uma na, sha u eren tom u uke la. Yange hidi hen ya, kasua uhar mba kar yô, a de tom na la, a hingir pania u keke. Hegen saan un iyol kpishi, er a lu umbur Orgban na sha iyev nav yô.—Orpa. 12:1.

Nenge er tom u eren Yehova kpoghuloo la u lu a mtsera ker sha wono! Kwagh môm u ú er ve a hemba u we nan shighe wou man tahav ou sha u eren tom u injaa u tesen shi pasen loho u dedoo la je kpa ngu ga. Igbenda ngi i we iyol you u fatyô u seer eren tom u waren uma ne yôô? Alaghga ajiir nga ken tar wou ape kwagh a hembe gban sha mbapasenkwagh yô. U fatyô u moughon yemen hen imba ijiir la kpa? Shin alaghga u tsua u henen zwa ugen sha er u wase ior mba ken tar wou mba imura i mimi u Bibilo i ker ve yô. Nyityôkwagh i u fatyô u nyôôso ken uma wou sha er u seer eren tom u pasen kwagh cii, fa wer Yehova una na u iveren kpishi.—Anz. 10:22.

[Ngeren u kiriki/Foto u sha peeji 32 la]

Iyange i Hungur Mayange Ga

Mbakpishiv mba yange ve mough ken ityar i Yuropa ve va u va yôôn angwe u vesen u ken Bulgaria ne, yange ve wa iyol i zan Mkohol u Vesen u “Kuran Nen” la hen gar u Sofia. Anmgbianev mba nomso man mba kasev mba hen ityônya yange ve zua imôngo vea mbakpishiv mba ve mough ken ityar igen ve va la, nahan ishima hemba taver ve cii. Yange saan iorov 2,039 mba ve va mkohol la iyol kpishi, zum u Anmgbian Geoffrey Jackson, u a lu môm ken Mbahemenev mba Shin Tine la, due a Bibilo i New World Translation of the Holy Scriptures la jimin cii ken zwa u Bulgaria yô! Mba ve za mkohol Tomataan la cii ve tese iwuese a ishima ve i môm sha u kuren ave taver taver shighe gôgônan. Mbagenev kpishi doo ve je ve vaa. Bibilo i í gem vough, sha gbenda u a taver or u ôron kaven ga ne, ia wase mbaasemaamimi mba ken tar u Bulgaria u fan Yehova.

[Foto u tesen ijiir u sha peeji 30, 31]

(U soo u ôron ngeren ne cii yô, nenge takerada u)

BULGARIA

SOFIA

Sandanski

Silistra

Kazanlak

[Ufoto u sha peeji 31]

Ken atô u ukasua mba utaankaruhar mbara, yange i pase kwagh er gba je i lu a vande pasen ga yô