“Ki Wasen Mo u Pasen Ior Kwagh Kôron Ve ken Ishima”

SHA shighe ugen la, i er mkohol ugen u ior due ken ityar kposo kposo va zua hen gar u Porto Alegre, u a lu vegher u ken imbusutariyan i tar u Brazil la, sha u lamen sha mbamzeyol mba sha tar yô. Ior udubu imôngo mba ken ityar 135 za mkohol ne. Yange a due ahumbe yô, annongo u mbapasenkwagh u ken tiônnongo ugen hen Porto Alegre a za pase mba ve va mkohol ne loho u dedoo u Tartor u ken Bibilo la. Yange ve lam a ve nena?

Pania ugen, iti na ér Elizabete, a kaa ér: “Yange se yar tom a antakerada u Good News for People of All Nations la.” Shi a kaa ér: “Ior kpishi mba ve za mkohol ne lu hiin ve u ungwan loho u dedoo je la, kpa ve kegh ato a loho wase tsembelee. Se lam a ior mba ken tar u Bolivia man China man France man India man Iserael kua Najeria. Ior mbagenev yô, se lu a ityakerada i pasen Bibilo ken zwa ve, nahan doo ve kpishi u ngohol i.”

Ken tar u Mexico kpa, pania ugen, u i yer iti na ér Raúl yô, yange yar tom a antakerada ne, nahan kwagh u injaa due ker. Sha shighe ugen la, a pase orgen ken tar u Arabia, u kuman anyom 80 kwagh. Kwase u or ne sember saan ku. Or ne yange er peeji u ken takerada ne u i nger loho u Tartor ken zwa u Arabia her la yô, a haa mliam ma iemberegh ashe. Sha ci u nyi? Sha ci u ityendezwa i Aôndo i ken Mpase 21:3, 4, i i kaa ér ku ua kera lu ga la, bende a na kpishi shighe u ôr kwagh u i̱ ken zwa na yô. Sha shighe ugen la kpa, Raúl lu pasen kwagh u ian a due la, nahan a zua orgen u lamen zwa Portuguese. Or ne kpa wan na u nomso u doon un ishima saa ku. Raúl bugh peeji u antakerada la ape i nger loho u dedoo ken zwa Portuguese la na un ôr. Er been yô, a kaa ér un soo u fan kwagh u Bibilo seer, shi lumun ér i hen Bibilo a na.

Raúl yaren tom a antakerada u Good News for People of All Nations la sha u pasen ior mba lamen zwa Armenia man zwa China man zwa Buter man zwa Jamani man zwa Hindi man zwa Korea man zwa Persia man zwa Russia kua zwa Zapotec. A kaa ér: “M nenge er i doo u yaren tom a ikyagh ki tomough kin ken kwaghpasen yô. Ka mea fa zwa u ior mba m lu pasen ve kwagh la ga je kpa, ki wasem u pasen kwagh kôron ve ken ishima.”

Er ior kpishi ve lu seer a seer u yemen za lun ken ityar igen yô, se hemba mban a aan a zuan a ior mba ve lamen zwa ugen yô. Se fatyô u pasen ve loho u Tartor sha u yaren tom a antakerada u Good news for People of All Nations la. U zenden a antakerada ne kpa?

[Ufoto u sha peeji 32]

Raúl kôr antakerada u a wasen un u pasen ior kwagh kôron ve ken ishima la sha uwe