Wase Mbayev Mba Kiriki Ve Fa Kwagh u Nongo u Yehova Tsembelee

MBAYEV ka ve soo ér vea fa kwagh. Hen ase sha mbampin mba alaghga mbayev mba Iserael mba ken Igipiti yange vea lu a mi hen tugh mbu i er iniongo i paseka i hiihii la. Vea fatyô u pinen ér: ‘Er nan ve yange gba u iyôngo ia kpe?’ ‘Er nan ve Terem a lu shien awambe sha kpande hunda?’ ‘Ka han se lu yemene?’ Kwagh u Yehova kaa a uter mba ken Iserael ér ve er la tese ér mbampin mbara nahan lu mba sha ishima na. Yehova yange ôr uter mban kwagh sha kwagh u m-ember u iniongo i Paseka ken hemen, ér: “Aluer ônov enev vea pine ne er: Kwagh u ne eren ne yô, inja na nana? Yô, kaa nen ve ner: Ka nagh ku sôngon ku Paseka u TER, u yange aver ayou a Mbaiserael ken tar u Mbaigipiti, kar la, zum u A tsaha Mbaigipiti man gema yima ayou a ase la.” (Eks. 12:24-27) Shighe kar yô, Yehova umbur mbamaren mba ken Iserael er i lu hange hange u vea na ônov vev mlumun sha mbampin mba vea pine sha kwagh u ‘akaawan  man akaaôron a jirigh’ a Yehova na ve la yô.—Dut. 6:20-25.

Ikyav tese wang ér Yehova yange soo ér mbayev ve zua a mbamlumun mba kuman ve ken ato sha mbampin mba vea pine sha kwagh u mcivir u mimi yô; lu mbamlumun mba vea mgbegha ve u soon Yehova ér ka Aôndo ve man Oryiman ve yô. Nyian kpa, ka kwagh u Yehova a soo sha ci u mbayev asev je la. Gbenda môm u mbamaren vea na Yehova kua ior nav vea doo mbayev vev ishima yô, ka u wasen ve sha u ve fa kwagh u nongo u Yehova tsembelee shi ve kav iwasen i ve zuan a mi sha kwagh u nongo shon u eren sha ci wase la. Sha nahan yô, de se nenge nen sha igbenda igen i mbamaren fatyô u wasen mbayev sha er vea seer fan kwagh u nongo u Yehova yô.

Tiônnongo u hen Ityônya

Gba u mbayev ou vea fa tiônnongo u tsombor wou u nyer mkombo her la. Gba u ne mbamaren ne zaan hanma mkombo u Mbakristu vea mbayev enev, ve ne fatyô u eren kwagh ne ye. Aluer ne mba eren nahan yô, ne lu dondon kwagh u Yehova yange kaa ér Mbaiserael ve er ne, ér: “Kohol ior, nomso man kasev man mbayev mba kiriki . . . , ve̱ ungwa, ve̱ hen ve̱ cian TER, Aôndo wou, ve̱ waan akaaôron a tindi ne cii ikyo, ve̱ eren sha mi; ônov vev mba ve fe ga kpaa, ve̱ ungwa, ve̱ hen u cian TER, Aôndo wen.”—Dut. 31:12, 13.

Wanye nana fatyô u hii u henen kwagh u Mkaanem ma Yehova iyev je. Apostoli Paulu yange ôr kwagh u Timoteu ér: “Hii iyev je u kav icighanruamabera.” (2 Tim. 3:15) Mbayev mba kikiri je kpa, ka vea zaan mbamkombo hen  Iyou i Tartor yô, ve hii u kaven akaaôron shi fan atsam a Tartor tsembelee. Ken mbamkombo mba ve ze la, ka ve hen u yaren tom a Bibilo kua ityakerada i pasen Bibilo, shi tesen icivir sha mi. Kwagh ugen yô, ka vea za mbamkombo yô, ve nenge a dooshima u mimi, u a lu ikyav i í fe mbadondon mba Kristu mba mimi a mi la. Yesu kaa ér: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yoh. 13:34, 35) Dooshima man mkor u mimi u ka se nenge a mi ken Iyou i Tartor la una bende a mbayev shi una wase ve vea hingir u zan mbamkombo mba Mbakristu hanma shighe.

Aluer u ngu zan hen Iyou i Tartor tsuaa shi tamber her zum u i dugh mkombo kera yô, ônov ou vea zua a ian i kôron ijende a mbagenev. Kpa de kera den wer ve luun vea mbakov vev tseegh ga, wase ve ve fa anmgbianev mba nomso man mba kasev mbakaven ishigh kpaa. Aluer mbayev ou fa mbaganden yô, vea zua a kwaghfan kua mfe u ve lu a mi kpishi la. Er Sekaria u sha ayange a tsuaa, u̱ “tesen er i̱ civir Aôndo la” yange wase Ushia, wanye u lu tor u Mbayuda la nahan, kape nyian kpa mba ve er Yehova tom sha mimi anyom imôngo mbara cii ve wasen mbayev je la. (2 Kron. 26:1, 4, 5) Shighe u ú lu hen Iyou i Tartor yô, u fatyô u pasen mbayev ou kwagh u iyou i koson ityakerada man kpande u akaayôôn man akaa agen kpaa.

Nongo u Yehova sha Tar Cii

Gba u mbayev vea fa ér tiônnongo u ve nyer mkombo her la ngu môm ken atôônanongo a nongo u Yehova sha tar cii, a a hembe iyenge 100,000 la. Pase ve akaa a nongo u Yehova man er u eren kwagh la, kua tom u mbayev ve eren sha u suen nongo shon yô. Tese ve er i hii ve ka u veren ashe a mbamkohol mba kiriki man mbamkohol mba vesen kua mve u ortamen u sôron atôônanongo yô.—Nenge ngeren u a lu a itinekwagh ér  “Atineakaa a Timen sha mi ken Mcivir u hen Tsombor” la sha peeji 28.

Shighe u ian i dugh yô, lôhô mbakuran mba ningir sha shin mbamishen shin mba ve lu tsombor u Betel gayô mba eren tom u pasen kwagh hanma shighe mbagenev, ve va ya iwer hen ya wou. De henen wer mba a shighe sha ci u mbayev ga ze. Mba eren tom u pasen kwagh hanma shighe mban ka ve nôngo ér vea dondo Yesu, u yange a ngohol mbayev shi a lam a ve hanma shighe u vea va hen a na la. (Mar. 10:13-16) Aluer mbayev ou ungwa uvande-eren sha zwa u mbatomov mba Yehova mban shi ve nenge er i saan ve iyol ken icighan tom u ve eren la yô, ve kpa vea tsua u eren tom u pasen kwagh hanma shighe la.

Kanyi igen tsombor ua fatyô u eren sha er a wase mbayev vea seer fan kwagh u nongo u Yehovaa? Ka mbamhen mbagenev mba i dugh a mi je ne: Tôô nen shighe hen tsombor wen hen nen takerada u i yer ér Jehovah’s Witnesses—Proclaimers of God’s Kingdom la imôngo. Hemba pasen kwagh u gbashima man iyolhiden a mi ijime kua mtil sha mimi u mbatomov mba Yehova ve tese la. Tese er Yehova yange yar tom a ve sha u samber a loho u dedoo sha tar cii yô. Yar tom a icer i vidio i nongo u Yehova u er la sha u tesen akaa a yange er man a a lu eren hegen, a vea hen kwagh sha mi yô. Wea fatyô yô, za a ve hen afishi a branci man iyaagh ki Betel ki hen tar wou la shin ki ken ityar igen je kpaa. Aluer u za a mbayev ou sha ajiir ne yô, kwagh la una wase ve u fan er vegher u nongo u Yehova u shin tar, u ú lu sha ikyev i nongo u wanakiriki u jighjigh la, u eren akaa sha u kuran anmgbianev mba sha tar cii ken jijingi shi nan ve kwaghyan u ken jijingi kpaa, er sha derianyom u hiihii la kpa lu nahan.—Mat. 24:45-47; Aer. 15:22-31.

Tese Hanma Wanye Kwagh sha Mlu u Nan

Shighe u ú lu tesen mbayev ou kwagh yô, umbur gbenda u Yesu wa mbahenen nav kwagh la. A kaa a ve sha shighe ugen la ér: “Akaa shim kpishi a ma M er ne yô, kpa ne kôr a cio hegen ga.” (Yoh. 16:12) Yesu yange or  mbahenen nav akaa ngee kar ikyaa inya ga. Kpa yange tese ve akaa a mimi a hange hange kure kure, sha er vea kav a tsembelee yô. Nahan we kpa, de tesen mbayev ou akaa i ngeen i karen ikyaa inya ga. Aluer u ngu wasen ve u fan kwagh u nongo u Yehova cuku cuku, man u ngu eren nahan hanma shighe cii yô, a maa ve iyol shi a doo ve u henen kwagh u tiônnongo u Kristu. Aluer sar mbayev ou u fan seer yô, u fatyô u hiden kimbir kwagh u ú vande tesen ve la shi seer ugen sha mi.

Tiônnongo u Kristu ka ijiir i vesen i se zough a iwasen i yan ikyar a Yehova kangenaa yô, nahan mbayev mba ve eren ityom i ken tiônnongo sha gbashima yô, vea hemba zuan a agee a hendan a ieren i tar u Satan ne. (Rom. 12:2) Se mba a vangertiôr ser aluer u wase mbayev ou mba kiriki u fan kwagh u nongo u Yehova tsembelee yô, u zua a iember kpishi. Yehova a wase mbayev ou ve za hemen u varen a Aôndo u lun a dooshima u se civir la sha mimi kua nongo na kpaa.

[Ngeren u kiriki/Foto u sha peeji 28 la]

 Atineakaa a Timen sha mi ken Mcivir u hen Tsombor

U fatyô u timen sha atineakaa agen a a gbe a zough vea akaa a nongo u Yehova, a se tese heen ne ken Mcivir u hen Tsombor u ú eren aikighe la.

▪ Time sha yiase i tiônnongo u hen ityônya. Lu hanma shighe i ver unu, man yange hii nena? Ka Ayou a Tartor kposo kposo a me yange tiônnongo shon er mkombo kere? Er nan u lehe orgen u nan tse hen tiônnongo la kpishi yô wer nana va hen ya wou nana va na mbayev ou mba kiriki mbamlumun sha mbampin vev ga?

▪ Pase ve awashima u mbamkombo mba tiônnongo man mbamkohol shi pase er mbayev vea fatyô u zuan a mtsera ken mbamkohol man mkombo mban yô.

▪ Time sha awashima u imakeranta kposo kposo i nongo u Yehova u ver la. Ôr uvande-eren mba ve tese akaa a dedoo a mba ve bee imakeranta ne ve lu eren la.

▪ Wase mbayev mba kiriki ve nenge er i lu a inja u vea hingir mba pasen loho u dedoo hanma shighe yô. Tese ve er ve kpa vea fatyô u eren kwagh u á nger ken ibaver i tar sha won cii, ken Yearbook u Mbashiada mba Yehova yô.

▪ Time sha ityom kposo kposo i pasen kwagh hanma shighe, i agumaior aa fatyô u eren ken nongo u Yehova yô. Ityough ki sha 10 ki takerada u Organized to Do Jehovah’s Will la pase kwagh ne tsembelee.

▪ Wase mbayev mba kiriki ve fa er i hii ve ka i gba u a dondo igbenda igen keng ve a er akaa ken tiônnongo yô. Pase ve er i hii ve akaa a kiriki je kpa, i doo u vea undu nongo u Yehova vea eren a sha tseeneke ve ga yô. Tese ve er vea dondon kwaghwan u mbatamen ve vea na a eren kwagh ken tiônnongo sha inja sha inja yô.

[Foto]

Mbayev ou vea zua a mtsera sha u yan ikyar a mbatomov mba ve er tom u pasen kwagh ica i gbe yô

[Ufoto u sha peeji 26]

Nyian kpa, mbayev ka vea pine mbampin sha kwagh u nongo u Yehova yô, mbamaren ve nôngo u nan mbamlumun mba kuman ve ken ato, er ken tar u Iserael u tsuaa la kpa i eren nahan