Ne Agumaior, Mkaanem Ma aôndo Ma Hemen ne
Ne Agumaior, Mkaanem Ma aôndo Ma Hemen ne
“Zua a kwaghfan, zua a mkav.”—ANZ. 4:5.
1, 2. (a) Kanyi yange i wase apostoli Paulu u nôngon a mbamtaver mba tagher a mi laa? (b) U fatyô u zuan a kwaghfan man mkav nena?
“KA A saren mo u eren kwagh u dedoo yô, kwaghbo kpaa a lu a mo her.” U fa or u yange nan ôr mkaanem mara kpa? Lu apostoli Paulu. Shin er Yehova doo Paulu ishima nahan kpa, ashighe agen i taver un eren kwagh u shami. Paulu nenge zayol na ne nena? A nger ér: “Kpe ahii, mo or u gban kera nee!” (Rom. 7:21-24) U fatyô u kaven er lu Paulu ken ishima la kpa? Ashighe agen ka i taver we u eren kwagh u shamii? Kwagh la ka a na ishima i vihi u kpishi er Paulu nahanaa? Aluer kwagh ngu nahan kpa, de yen ishima ga. Paulu yange nôngo a mtaver la hemba un, nahan we kpa u fatyô.
2 Paulu yange hemba mtaver la sha ci u a de “kwaghôron u dedoo” hemen un. (2 Tim. 1:13, 14) Kwagh la na yô, a zua a kwaghfan man mkav u nôngon a mbamtaver shi tsuan akaa a una er la sha inja. Yehova Aôndo una fatyô u wasen we u zuan a kwaghfan man mkav. (Anz. 4:5) A na se kwaghwan u hemban doon cii ken Bibilo i i lu Mkaanem nam la. (Ôr 2 Timoteu 3:16, 17.) Nenge ase er u fatyô u zuan a iwasen ken atindiakaa a ken Ruamabera la shighe u ú lu eren kwagh a mbamaren ou man shighe u i gbe u ú vihi inyaregh man shighe u ú lu tswen yô.
Mkaanem Ma Aôndo Ma Hemen We hen Tsombor
3, 4. Alaghga a taver we u kuran atindi a mbamaren ou sha ci u nyi, kpa mbamaren ou mba we u atindi sha ci u nyi?
3 Ka i taver we u dondon atindi a mbamaren ouwee? Kwagh a fatyô u lun nahan sha ci u nyi? Ityôkyaa i môm yô, alaghga a lu sha ci u sar u u̱ seer eren akaa sha ishima you. Isharen ne ngi ken hanmaor. Ka i̱ taver ken or shighe u nan lu wan a wa ikyondo la. Nahan kpa, shighe u ú lu hen ya la, gba keng u ú ungwan imo i mbamaren ou.—Ef. 6:1-3.
4 Aluer u kav er i hii ve mbamaren ou ve we u atindi yô, a hemba lun we zange u kuran a. Alaghga ashighe agen a lu u ken ishima er lu gumkwase ugen u lun anyom 18, u i yer iti na ér Brielle la nahan. * A ôr kwagh u mbamaren nav ér: “Hungur ve kpum kpum er yange ve lu er mo nahan ve lu ve la. Ve soo ér m ôr mnenge wam sha kwagh shin m tsua kwagh u m soo shin m eren kwagh sha inja i organden kpaa ga.” Alaghga u nenge wer mbamaren ou mba nan we ian i eren kwagh sha ishima you cuku tseegh, er Brielle kpa hen nahan. Nahan kpa, jighilii yô, mbamaren ou mba we u atindi sha ci u kwagh wou gba ve ishima. Heela tseegh ga, mbamaren mba ken Kristu fa er i gbe u vea pase Yehova kwagh sha gbenda u ve nengen sha a we la yô.—1 Tim. 5:8.
5. Aluer u ngu ungwan imo i mbamaren ou yô, a wase u nena?
5 Jim yô, u ungwan mbamaren ou la ka er u kimbin injô i u gbe hen ma banke nahan; aluer u ngu kimbin injô vough vough yô, a hemba lun banke la ican ga u nan we injô kwa gen kpaa. Kape mbamaren ou kpa u lu ve a injô i icivir man i ungwan imo ve je la. (Ôr Anzaakaa 1:8.) Aluer u ngu ungwan imo i mbamaren ou yô, a hemba lun ve ican ga u nan we ian i eren akaa sha ishima you. (Luka 16:10) Nahan kpa, aluer u zer eren akaa a ve vende a we yô, i de kpiligh we iyol shighe u mbamaren ou ve vende u nan we “injô” kuaa la ga.
6. Mbamaren vea fatyô u wasen agumaior u ungwan imo ve nena?
6 Gbenda môm u mbamaren vea wase mbayev vev u dondon atindi a ve we ve la yô, ka sha u veren ve ikyav. Gba u vea ungwan imo Yehova, nahan vea tesen ér atindi a Aôndo nga a inja. Kwagh ne una wase agumaior aa nengen ér atindi a mbamaren vev ve we ve la kpa nga a inja. (1 Yoh. 5:3) Heela tseegh ga, Bibilo ter ashighe a Yehova yange na mbacivir un ian i ôron mnenge ve sha akaa agen yô. (Gen. 18:22-32; 1 Utor 22:19-22) Ashighe agen nga, a mbamaren vea fatyô u nan mbayev vev ian i pasen mnenge ve sha akaa kposo kposo yôô?
7, 8. (a) Ka mtaver u nyi agumaior agen ka a tagher a mini? (b) Kanyi u fa ve a wase u u̱ zuan a mtsera ken tsaha?
7 Shi alaghga agumaior aa nenge ér mbamaren vev mba puun ve a ityôkyaa shio. Alaghga ashighe agen a lu u er lu gumor ugen u i yer iti na ér Craig la nahan, a kaa ér: “Ngôm yange lum er ka ordasenda u hanma shighe yô ka nan tôvon ér nana fa akaa a m er shami ga la nahan.”
8 Ashighe kpishi ka a tsaha se shin a kôôm se yô, i lu se er mba puun se nahan. Bibilo pase ér ka a kôôm or sha inja vough je kpa, í taver nan u lumun mkôôm shon. (Heb. 12:11) Kanyi ia wase u ve u zua a mtsera sha tsaha u i ne u laa? Kwagh u hange hange u i gbe u ú umbur yô, ka mdoo u ú doo mbamaren ou ishima la ngu a na ve ve wa u kwagh ye. (Anz. 3:12) Ve soo ér vea kura u sha aeren a bo shi vea wase u u̱ lu a aeren a dedoo. Mbamaren ou fa ér aluer ve kôôm we ga yô, a tese ér ve kôr u ihyom! (Ôr Anzaakaa 13:24.) Shi fa wer or ka nana henen a hen kwagh yô, nan tsumen. Nahan shighe u i kôôm we yô, er nan u ker u zuan a kwaghfan ken mkôôm la ga? “Gadia [kwaghfan] hemba doon a . . . azurfa, mtser na kpaa hemba zenaria u wang.”—Anz. 3:13, 14.
9. Doo u agumaior aa hemba veren ishima sha kwagh u i lu ve inja er i er a ve shami ga la ga, kpa aa gema aa er nyi?
9 Nahan cii kpa, mbamaren mba tsum. (Yak. 3:2) Shighe u ve lu tsahan we yô, ashighe agen vea fatyô u lamen bagenaa. (Anz. 12:18) Kanyi ia na ve mbamaren ou vea er kwagh nahana? Alaghga kwagh una lu zan ve iyol ken ishima hen shighe la, gayô vea nenge ér ve er tom ve u mbamaren tsembelee ga ve, u er kwagh shami ga ye. Doo u ú zeren henen sha kwagh u ú hen wer i er a we shami ga la ga, kpa gema tese iwuese sha isharen i ve lu a mi tsung i wasen we la. Aluer u ngu lumun tsaha yô, shighe u ú va gande kpa kwagh la una wase u.
10. U er nan ve u hemba fan u dondon atindi a mbamaren ou shi lumun mkôôm ve?
10 U soo wer i de luun we ican u lumun atindi a mbamaren ou kua mkôôm ve gaa? Aluer wea soo yô, a gba u ú seer fan gbenda u lamen a ve. U fatyô u eren kwagh ne nena? Gbenda u hiihii yô, ka u keghen ato a ve. Bibilo kaa ér: “Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa.” (Yak. 1:19) De ne iyol you ishô fese je ga, kpa gema kundu ishima, hen sha kwagh u mbamaren ou ve lu ôron la. Hen sha kwagh u ve er la, i de lu sha gbenda u ve er kwagh shon la ga. Maa tese mbamaren ou wer u lumun kwagh u ve er la sha u lumun ibo. U er nahan yô, vea fa je ér u ungwa kwagh u ve kaa la. Man aluer u soo u nan ityôkyaa i i ne ve u ôr kwagh shin u er ma kwagh di ye? Ashighe kpishi a hemba doon u ú ‘kusu zwa wou’ zan zan u kar eren awashima u mbamaren ou. (Anz. 10:19) Mbamaren ou vea nengen ér u ungwa imo ve yô, ve kpa a hemba soon u keghen ato a we. Aluer u er kwagh sha icivir nahan yô, a tese ér Mkaanem ma Aôndo ma hemen we.
Mkaanem ma Aôndo Ma Hemen We Shighe u Ú Lu Eren Kwagh a Inyaregh Yô
11, 12. (a) Mkaanem ma Aôndo taver se ishima ér se er nyi sha kwagh u inyara, man ka sha ci u nyi? (b) Mbamaren ou vea tese u gbenda u vihin inyaregh sha inja nena?
11 Bibilo kaa ér ‘inyaregh ki kor or sha kwagh u vihin’. Kpa ivur shon i môm tese ér kwaghfan ngu a inja hemba inyaregh. (Orpa. 7:12) Mkaanem ma Aôndo wa se kwagh ér se lu a mnenge u vough sha kwagh u inyar, ér ki doo se a doo ishima ga. Er nan ve i gbe u inyaregh kia doo de ishima ga? Hen ase sha injakwagh ne: Ihyô i esen ka ikyagh ki tomough ki injaa ken uwegh ku orfaniwer. Kpa a na or u veren ishima sha kwagh ga ihyô shon yô, ia fatyô u vihin nan iyol kehelee je. Inyaregh kpa, aluer i er kwagh a ki sha inja yô, kia fatyô u lun a iwasen. Nahan kpa “mba i sar ve pe lun mbanyarev yô,” ka ve kera lu a shighe sha ci u azende a ve man icombor ve ga, shi ve vihi mlu ve vea Aôndo je kpaa. Sha nahan yô, ka ve “kuma ayol a ve sha atsan atô kposo kposo.”—Ôr 1 Timoteu 6:9, 10.
12 U er nan ve u hen u eren kwagh a inyaregh sha injaa? Er nan u pin mbamaren ou wer ve tese u er u bur inyaregh you sha akaa a i gbe u ú er a ki la vough vough ga? Solomon yange nger ér: “Orfankwagh nana̱ ungwa nana̱ seer mhen, orkavenkwagh kpaa nana̱ ar sha mbamhen mba mimi.” (Anz. 1:5) Gumkwase ugen u i yer un ér Anna yô, yange pine mbamaren nav ér ve wase un mhen. A kaa ér: “Terem yange tesem er me veren inyaregh ki vihin sha akaa vough vough yô, shi tesem er i lu hange hange u eren kwagh sha inja shighe u ú lu eren kwagh a inyaregh ki tsombor yô.” Ngô u Anna kpa tese un kwagh u wasen un kpen kpen. Anna kaa ér: “Yange tesem er i lu a inja u tôvon ishe i kwagh sha ajiir kposo kposo cii ve masen yamen kwagh shon yô. Kwagh ne wase Anna nena? A kaa ér: Hegen m ngu nengen sha inyaregh yagh iyol yam. M palegh u̱ vihin inyaregh sha ibume, nahan kwagh la nam mmem ken ishima sha ci u m kera gbe anzô dang dang ga.”
13. U er nan ve u kôr iyol tsaha sha kwagh u inyaregh ki vihini?
13 Aluer u ngu yamen kwagh sha ci u ú nenge a mi a doo u, shin wer azende ou a nenge i doo a yô, alaghga u nyôr ken anzô fese. Kanyi ia wase u u̱ palegh uhôn mbana? A gba u ú hen u kôron iyol you tsaha sha kwagh u inyaregh ki vihin. Ka kwagh u Ellena, gumkwase ugen u hemban anyom 20 kpuaa a eren je la. A kaa ér: “Ka mea duen geri vea azende am yô, m vande wan iyol shi m ver inyaregh ki me vihi yô. . . . Shi m nenge mer doo u me zaan kwaghyamen vea azende am a a vihin inyaregh sha inja la man a aa wasem u kperan ishekwagh sha ajiir kposo kposo, gban yamen kwagh u m hii nengen a mi la ga la tseegh.”
14. Er nan ve i gbe u ú wa ikyo sha kwagh u “icugh i inyara”?
14 U zuan a inyaregh shi eren kwagh a mi la ka kwagh u hange hange ken uma. Nahan kpa, Yesu kaa ér “mba ve lu mbaibanave ken jijingi la,” a saan ve iyol sha mimi. (Mat. 5:3) A ta icin ér “icugh i inyar” ia fatyô u imbishi isharen i or lu a mi sha akaa a ken jijingi la. (Mar. 4:19) Sha nahan yô, nenge i lu hange hange u ú de wer Mkaanem ma Aôndo ma hemen we, nahan u lu a mnenge u vough sha kwagh u inyar sha wono!
Mkaanem ma Aôndo Ma Hemen We Shighe u Ú Lu Tswen Yô
15. Ka hanma shighe a hemba karen jighjigh wou u nan hen Aôndo ciilii?
15 Ka hanma shighe u hen wer a hemba karen jighjigh wou u nan hen Aôndo ciilii, ka shighe u ú lu vea mbagenev la shin ka shighe u ú lu tswen la? Shighe u ú ze makeranta shin u yar tom yô, ka u hemba lun tsevaa sha u yangen akaa a aa fatyô u vihin mlu wou u ken jijingi cii. Ka shighe u ú lu memen, u kera lu tsevaa ga la, u ngôôr gban ken imeen ga ye.
16. Shighe u ú lu tswen je kpa, gba u ú ker u ungwan imo i Yehova sha ci u nyi?
16 Er nan ve i gbe u ú ker u ungwan imo i Yehova shighe u ú lu tswen je kpaa? Umbur wer: U fatyô u vihin Yehova ishima ker shin u na a saan un iyol. (Gen. 6:5, 6; Anz. 27:11) Kwagh u ú eren la ngu a bende a Yehova sha ci u “ka Un A lu koson [we] ye.” (1 Pet. 5:7) A soo ér we u ungwa imo na sha er u zua a mtsera yô. (Yes. 48:17, 18) Shighe u mbacivir Yehova mbagenev ken tar u Iserael u tsuaa la kera dondo atindi a na ga yô, ve na ishima vihi un ker. (Ps. 78:40, 41) Kpa, kwagh u profeti Daniel gema doo Yehova ishima tsung, gadia ortyom yila un ér “or u doon ishima tsung.” (Dan. 10:11) Sha ci u nyi? Daniel za hemen u suur sha Aôndo ken igbar tseegh ga, kpa suur sha a na shighe u yange una lu tswen kpaa.—Ôr Daniel 6:10.
17. Ka mbampin mba nyi u fatyô u pinen iyol you shighe u ú lu tsuan iemberyolougho?
17 Saa u tsaase ‘mkav wou u ken ishima . . . u paven kwagh u dedoo a kwagh u bo,’ shi u “er tom sha mkav” la sha u eren kwagh u ú fe wer ngu shami la ve u za hemen u civir Aôndo sha mimi shighe u ú lu tswen kpaa ye. (Heb. 5:14) U tesen ikyav yô, shighe u ú lu tsuan ityogholough mbi u ungwa shin fiim i nengen shin ijiir i sha Intanet i u za her yô, mbampin mba ve dondo mban ve wase u u̱ palegh kwagh u a lu shami ga yô. Pine iyol you wer: ‘Kwagh ne una wasem u lun a mhôônom ma zungwen tsung shin una na me ember ‘sha bocan u oro’? (Anz. 17:5) ‘Una na ‘kwaghdedoo una doom ishima’ shin una na a hingir mo ican u ‘kôron kwaghbo ihyomo’?’ (Amo. 5:15) Kwagh u ú eren shighe u ú lu tswen la tese kwagh u a lu u a inja jim jim yô.—Luka 6:45.
18. Wea vanden eren kwaghbo ken myer yô, kanyi i gbe u ú ere, man ka sha ci u nyi?
18 Wea lu vanden eren kwagh u ú fe wer ngu shami ga ken myer yô, kanyi i doo u ú ere? Umbur wer, “Or u nan cir akaabo a nan yô, nana zua a iveren ga, kpa u nan pase a, shi nan undu a yô, nana zua a mhôônom ma zungwen.” (Anz. 28:13) A vihi kpishi, aluer u za hemen a ieren i vough ga, nahan u ngu ‘vihin Icighan Jijingi u Aôndo ishima’ yô! (Ef. 4:30) Gba u ú pase Aôndo asorabo ou shi u pase mbamaren ou kpaa. U er nahan yô, u zua a iwasen. “Mbatamen mba nongo u Kristu” vea wase u sha gbaa ne kpishi je. Orhenen Yakobu kaa ér: “Ve̱ shighe [or u nan er kwaghbo la] mkurem ken iti i Ter. Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan.” (Yak. 5:14, 15) Ka mimi, alaghga kwagh ne una va due ken kunya man adooga kwaghbo je kpa una due ker. Kpa aluer u taver ishima u ker iwasen yô, u palegh kwaghbo u seer vihin mlu wou la nahan u zua a mpever u imoshima i wang i ve a mi la.—Ps. 32:1-5.
Na i Saan Yehova Iyol
19, 20. Kanyi Yehova a soo sha ci wouwe, kpa kanyi i gbe u ú er keng-ne?
19 Yehova ka “Aôndo u saan saan,” man a soo ér i saan we iyol. (1 Tim. 1:1, NW) Kwagh wou gba un ishima kpishi je. Aluer orgen môm nenge a iniôngon you i ú lu nôngon wer u er kwagh u shami la ga je kpa, un yô, a nenge a mi. Kwagh môm kpa ngu myer sha ishigh na ga. Ngu kenger we, ka sha u una zua u a ibo sha ma kwagh ga, kpa ka u suen we sha iniôngon i ú lu nôngon wer u er kwagh u dedoo la. “Ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.”—2 Kron. 16:9.
20 Sha nahan yô, de Mkaanem ma Aôndo ma hemen we, shi dondo kwaghwan na kpaa. U er nahan yô, u zua a kwaghfan man mkav u una wase u u̱ hemban mtaver u vesen yô, shi u tsua akaa a u er ken uma wou la sha kwaghfan. U lu eren kwagh u doon Yehova man mbamaren ou tsô ga, kpa u ember uma u mimi u nan or msaanyol.
[Ngeren u shin kpe]
^ Ka ati ve kpôô kpôô ga.
U Na Mlumun Wer Nyi?
• Agumaior aa fatyô u lumun atindi man mkôôm u mbamaren vev shi zuan a iwasen ker nena?
• Er nan ve i lu hange hange u lun a mnenge u vough sha kwagh u inyara?
• U er nan ve u civir Aôndo sha mimi shighe u ú lu tswenee?
[Mbampin mba ngeren u henen]
[Foto u sha peeji 6]
Ú za hemen u civir Aôndo sha mimi shighe u ú lu tswen kpa?