Ne Agumaior, Ne Er Nyi A Uma Wene?
Ne Agumaior, Ne Er Nyi A Uma Wene?
“M ngu tan azu er or u tan ahumbe dang nahan ga.”—1 KOR. 9:26.
1, 2. Er u lu vesen yemen u za wan ikyondo ne, kanyi ia wase u u̱ zan ikyura?
ALUER u ngu zan zende sha gbenda u ú fe u ga yô, alaghga u soo wer ma u lu a or u tesen we gbenda kua ngeren u tesen ajiir. Ngeren u tesen ajiir la una wase ú u fan ape u za nyer cii yô, kua ijiir i u soo u zan jighilii la kpaa. Or u tesen gbenda di una wase u sha er u tsume ga yô. Nahan cii kpa, aluer u fa ape u lu zan la ga yô, ngeren u tesen ajiir man or u tesen we gbenda la cii vea lu u a iwasen kpishi ga. Aluer u soo wer u tsume u saa toho ga yô, gba u ú fa ape u lu zan la jighilii.
2 Kape mvese u ú lu vesen yemen u za wan ikyondo la kpa a lu je la. U ngu a ngeren u tesen ajiir u injaa man or u tesen we gbenda u a fe ahia tsembelee yô. Bibilo ka ngeren u tesen ajiir, u una wase u u̱ fan gbenda u uma u vough, u ú za sha mi yô. (Anz. 3:5, 6) Aluer u tsaase imoshima you tsembelee yô, ia wase u kpishi u eren kwagh u vough. (Rom. 2:15) Ia fatyô u eren tom er or u tesen gbenda la nahan. Nahan kpa, shi gba u ú fa ape u lu zan la ve u za ikyura ken uma wou ye. Gba u ú fa akaa a u soo u eren ken uma wou la wang.
3. Ka averen a nyi Paulu a ter ken 1 Mbakorinte 9:26 a or nana zua mi sha u tsuan akaa a nana eree?
3 Apostoli Paulu ôr kwagh u averen a se zua a mi sha u tsuan akaa a se er ken uma wase shi nôngon ser se ar sha mi la cii ér: “M ngu yevese bema be bema ga, m ngu tan azu er or u tan ahumbe dang nahan ga.” (1 Kor. 9:26) Aluer u ngu a akaa a u we ishima u eren yô, u yevese bema be bema ga. Ica a gba ga tsô, a gba u ú tsua akaa a vesen agen a u er sha kwagh u mcivir u Aôndo man kwagh u tom man kwagh u ivesegh man kwagh u tsombor kua akaa agen. Ashighe agen yô, alaghga a lu u er akaa a u tsough u eren la ngee yum, shi a wa ker nzughul nzughul kpaa nahan. Kpa aluer u tsua akaa a u soo u eren la tsuaa, u dondo akaawan a ken Mkaanem ma Aôndo man mimi u ma la yô, u kera nômbo ikyôr yemen sha gbenda u bo la ga.—2 Tim. 4:4, 5.
4, 5. (a) Aluer u tsua akaa a u we ishima u eren la ga yô, kanyi ia fatyô u erene? (b) Doo u isharen i u lu a mi i eren ishima i Aôndo la ia wase u u̱ tsuan akaa a u we ishima u eren ken uma la sha ci u nyi?
4 Aluer u tsua akaa a u er iyol you ga yô, alaghga mbakov wou man atica a ou aa tuur we ken ityô ér u er kwagh u a nenge ér ka u vough sha ci wou la. Ka mimi, aluer u fa akaa a u soo u eren la wang je kpa, alaghga mbagenev vea pase u mbamnenge vev. U ungwan mbamhen vev mbara yô, pine iyol you wer, ‘Akaa a ve wem la aa wasem u umbur Orgban wam er m lu iyev ne shin aa danem a dan u eren nahana?’—Ôr Orpasenkwagh 12:1.
5 Doo u isharen i u lu a mi i eren ishima i Aôndo la ia wase u u̱ tsuan akaa a u we ishima u eren ken uma la sha ci u nyi? Ityôkyaa yô, hanma kwagh u dedoo u se lu a mi cii, ka Yehova a ne se. (Yak. 1:17) Sha kpôô yô, doo u hanmaor nana wuese Yehova sha kwagh u a er sha ci u nan la. (Mpa. 4:11) Gbenda ugen u hemban doon u ú tese iwuese hen Yehova yô ngu ga, saa u umbur un shighe u ú lu tsuan akaa a u er ken uma la. De se time ase nen sha akaa a a doo u eren yô, man kwagh u ú er keng ve u fatyô u eren akaa shon la.
Ka Akaa a Nyi U Fatyô u Tsuan Wer U Ere?
6. Ka kwagh u vesen u nyi u fatyô u tsuan u erene, man ka sha ci u nyi?
6 Er se ter ken ngeren u a kar la nahan, kwagh u vesen u ú fatyô u tsuan wer u er yô, ka u we iyol you karen fan er kwagh u i er ken Bibilo la a lu u mimi yô. (Rom. 12:2; 2 Kor. 13:5) Alaghga mbakov wou vea na jighjigh a ityesen i akaa cii gba duen tsô la, shin vea lumun a atesen a kwaghaôndo u aiegh kposo kposo sha ci u mbagenev kaa a ve ér ka kwagh u i doo u vea na jighjigh a mi je la. Nahan cii kpa, doo u ú gba nan jighjigh a ma kwagh tsô wer mbagenev soo ér u na jighjigh a mi ga. Umbur wer, Yehova soo ér u civir un a ishima you cii. (Ôr Mateu 22:36, 37.) Ter wase u sha soo ér we u na jighjigh a kwagh u ikyav i tese ér ka u mimi yô.—Heb. 11:1.
7, 8. (a) Ka akaa a nyi nahan u tsua u eren hegen ve aa wase u u̱ taver jighjigh wou u nana? (b) Aluer u er akaa agen a u tsough u eren hegen ne yô, aa wase u nena?
7 Aluer u soo u taver jighjigh u nan wou yô, tsua a akaa a u er hegen yô. Kwagh môm u ú fatyô u eren yô, tsua wer u eren msen hanma iyange. Aluer u soo wer u zeren kimbir mbamsen ga shi u sônon kwagh u a gbe u la jighilii yô, nger akaa a a er u ken iyange la shin inya, gayô fa akaa shon lu a mi ken ishima. Ver ishima, sha er u ter mbamtaver mba u tagher a mi la tseegh ga, kpa shi u ter akaa a doon a u zough a mi la kpaa yô. (Fil. 4:6) Kwagh ugen u ú fatyô u tsuan wer u er yô, ka Bibilo i ôron hanma iyange. U fa er aluer u ngu ôron Bibilo upeeji unyiin ken hanma iyange yô, u ôr i cica cii u bee ken inyom i môm tseegh kpa? * Pasalmi 1:1, 2 kaa ér: ‘I saan or u atindi a TER a lu kwagh u gban nan ishima, shi atindi a Na nan zeren henen a ken ishima tugh kua tetan kpaa la iyol.’ (Ps. 1:1, 2)
8 Kwagh u sha utar u ú fatyô u tsuan wer u er hegen yô, ka u wan iyol sha er u na mlumun ken hanma mkombo u tiônnongo yô. Sha hiihii la, alaghga u fatyô u ôron a ôr mlumun shi ôron ma ivur Bibilo. Shighe a karen yô, u fatyô u tsuan wer u naan mlumun ken mkaanem ou. Jighilii yô, hanma kwa u ú ne mlumun cii yô, u ngu nan Yehova iyua. (Heb. 13:15) Aluer u er akaa agen a u tsough u eren ne yô, vangertiôr wou una seer kua iwuese i u lu a mi sha Yehova la, nahan u tsua akaa a u va er ken hemen yô.
9. Aluer u ngu a lu orpasenkwagh u Tartor ga yô, ka akaa a nyi i doo u ú tsua u va eren ken hemene?
9 Ka akaa a nyi i doo u ú tsua u va eren ken hemene? Aluer u ngu a hii u yôôn loho u dedoo ken igbar ga yô, u fatyô u tsuan wer u hingir orpasenkwagh u Tartor. U kuren kwagh u injaa u ú we ishima u eren ne yô, a doo u ú fa kwaghpasen tsembelee shi u pasen kwagh nduuluu, mayange u de uwer môm u kar, a u we pasen kwagh shio ga. Shi a doo u ú hen u yaren tom a Bibilo shighe u ú dugh kwaghpasen yô. U eren nahan yô, alaghga tom u pasen kwagh la ua seer doon we. Nahan u fatyô u seer shighe wou u pasen kwagh sha uya uya la, shin u nôngo u hen Bibilo a or je kpaa yô. Er u lu orpasenkwagh u nan lu a er batisema ga yô, hemban doon u ú nôngo sha er u kuma u a er u batisema, nahan u hingir Orshiada u Yehova Aôndo, u nan tsegh iyol i nan shi nan er batisema yô.
10, 11. Ka akaa a nyi agumaior a a er batisema aa tsua u va eren hemene?
10 Aluer u vande ngun Orshiada u nan er batisema yô, ka akaa agen a u fatyô u tsuan wer u va er ken hemen je ne. Ashighe agen u fatyô u za wasen atôônanongo agen u pasen kwagh hen haregh u i fe pasen kwagh her ga yô. Shi u fatyô u yaren tom a tahav ou kua gbong gbong wou sha u eren tom u ishuen pania shin pania u keke. Ior udubu imôngo mba ve lu eren tom u pania yô vea kaa a we ér, u pasen kwagh hanma shighe la ka gbenda u dedoo u umbur Orgban wou er u lu iyev la. Ka akaa a u fatyô u eren shighe u lu hen ya vea mbamaren ou je se ter sha heen ne. Aluer u er a yô, a wase tiônnongo wou kpaa.
11 Akaa agen a u tsough u va eren ken hemen la aa na yô, a lu tiônnongo wou u hen ityônya la tseegh u lu un a iwasen ga. Ikyav i tesen yô, u fatyô u wan ago iyol a za eren tom ijiir igen shin ken tar ugen ape kwagh a hembe gban sha mbapasenkwagh yô. Alaghga u soo wer u na iwasen sha u maan Ayou a Tartor shin afishi a branci a ken ityar i ken won. U fatyô u za eren tom u Betel shin hingir ormishen je kpaa. Nahan cii kpa, kwagh u i gbe u ú er cii ve u kuma u eren akaa kpishi a se ter heen ne yô, ka batisema. Aluer u ngu a er batisema ga yô, hen sha kwagh u ú er ve u kôr cio u eren kwagh u hange hange ne ken uma wou yô.
Kwagh u U Er ve U Kuma u A Eren U Batisema Yô
12. Ka atôakyaa a nyi ka a na mbagenev ve er batisemaa, man atôakyaa shon ka a injaa ga sha ci u nyi?
12 U pase awashima u batisema u eren wer nyi? Alaghga mbagenev vea hen ér a er ve batisema yô, vea kera gba ken isholibo ga. Mbagenev vea nenge ér doo u vea er batisema sha ci u mbakov ve kpa er batisema. Agumaior agen aa soo u eren batisema sha u i doo mbamaren vev yô. Nahan kpa, batisema ka kwagh u yangen we u eren akaa a u soo u eren ken myer ga; shi doo u ú er batisema sha ci u mbagenev tor u ahumbe ityô yum ga. Doo u ú er batisema shighe u ú kav inja i u̱ lun Orshiada u Yehova la wang yô, kua shighe u ú fe tsembelee wer u kuma, shi u soo u eren batisema yô.—Orpa. 5:4, 5.
13. Gba u ú er batisema sha ci u nyi?
13 Ityôkyaa i môm i i gbe u se er batisema yô, ka sha ci u Yesu kaa a mbadondon un ér ve ‘gema akuraior a hingir mbahenen, i eren ve batisema.’ Shi un iyolna kpa yange ver ikyav sha u eren batisema. (Ôr Mateu 28:19, 20; Marku 1:9.) Heela tseegh ga, batisema ka kwagh u hange hange u mba ve soo u waren cii vea er yô. Apostoli Peteru yange teren kwagh u tso u Noa gba ve un man tsombor na ve war zegemnger ker la yô, a kaa ér: “Ma tese ikyav sha batisema u ne kpaa ne lu waren sha mi hegen yô; . . . sha mnder u Yesu Kristu shin ku.” (1 Pet. 3:20, 21) Nahan kpa, u ngu wer batisema u eren hingir ibumun ér or nana va zua a myom shighe u kwagh a gbe nan a mi cii ga. Kpa, or ka nan er batisema sha ci u Yehova doo nan ishima shi nan soo u civir un a ishima i nan cii man a uma u nan cii man a mfe u nan cii kua sha agee a nan cii.—Mar. 12:29, 30.
14. Alaghga a taver mbagenev u eren batisema sha ci u nyi, kpa ka ibumun i nyi u lu a mini?
14 Alaghga a taver mbagenev u eren batisema sha ci u mba cian ér a va dugh ve ken mimi kera. We kpa u ngu cian nahanaa? Aluer ka nahan yô, imba mcie la ka kwaghbo keng ga. Mciem mara ma tese ér u nenge kwagh u hingir Orshiada u Yehova la wer ka beerkwagh ga. Alaghga ityôkyaa igen kpa ngi shinii? Adooga tsô u ngu a na jighjigh wer u kuran atindi a Aôndo la ka kwagh u hemban doon cii u or nana er ken uma ga. Nahan, aluer u hen sha kwagh u ka a er mba ve vende atindi a Bibilo la yô, kwagh la una wase u u̱ tsuan kwagh u ú er yô. Sha vegher ugen yô, alaghga u soo atindi a Aôndo, kpa u na iyol you jighjigh wer u kôr cio u kuran atindi shon ga. Aluer kwagh ngu nahan yô, ka ikyav i dedoo i tesen ér u ngu or u hiden a iyol ijime. Kera kpa, Bibilo kaa ér ishima i uumace mba lun vough ga ne cii i wa atseregh. (Yer. 17:9) Nahan kpa, aluer hanma shighe u ngu ‘wan mkaanem ma Aôndo ikyo’ yô, u za ikyura. (Ôr Pasalmi 119:9.) A lu atôakyaa a nyi je aa lu yangen we u eren batisema kpa, a gba u ú ker gbenda u been a ambaakaa la. *
15, 16. U er nan ve u fa wer u kuma u eren batisemaa?
15 Nahan kpa, u er nan ve u fa wer u kuma batisemaa? Kwagh u hiihii yô, pine iyol you mbampin er mban nahan, wer: ‘Me fatyô u pasen mbagenev kwagh u atesen a Bibilo a a taver ga la kpa? M dugh kwaghpasen shighe u mbamaren av ve dugh la tseeghlee? M nenge u zan mbamkombo mba Mbakristu cii kpa? Me fatyô u umbur ashighe a yange m hendan a mkighir u mbakov la kpa? Aluer mbamaren av man mbaaboki av de u civir Yehova nahan, me za hemen u civir un kpa? M er msen sha kwagh u ikyar i m ye vea Aôndo la kpa? Shi m er msen hen Yehova, m tsegha iyol yam sha ci na kpa?’
16 Batisema ka kwagh u a gem uma u or yô, nahan doo u or a nenge un er ka beerkwagh ga. U via kuma u ú er kwagh u vesen ne vee? Mvie u or vian la hemba di u nan mbamlumun ken mkombo tsembelee shin nan akaaôron sha tsembe a doon u ungwan la. Gba u or nana er tom a mkav u nan lu a mi sha atindiakaa a ken Bibilo la sha u tsuan akaa a nana er yô. (Ôr Mbaheberu 5:14.) Aluer u ngu sha ian i u fatyô u eren nahan yô, u ngu a ian i civirigh i hemban cii, i civir Yehova a ishima i môm shi eren kwagh u a tese ér u tsegha iyol you sha ci na sha mimi yô.
17. Kanyi ia wase u u̱ wan ishima a mbamtaver mba u tagher a mi shighe u ú er batisema kera laa?
17 Alaghga shighe u ú er batisema ica a lu a gba ga la, a tsue u ken ishima kpishi u civir Aôndo. Kpa ica a gbaan ga yô, adooga u tagher a mbamtaver mba vea kar jighjigh u nan wou man ishimawan you yô. (2 Tim. 3:12) De henen wer gba u ú nôngo a mbamtaver mban tswen ga. Ker kwaghwan hen mbamaren ou. Pine mbagenev ken tiônnongo mba ve vie ken jijingi yô ve wase u. Kôr ijende a mba vea sue u yô. Mayange de hungur er kwagh wou a gbe Yehova ishima ga, shi una na u tahav mbu nôngon a hanma mlu u ú nyer ker cii.—1 Pet. 5:6, 7.
U Kure Mbaawashima Ou Nena?
18, 19. Aluer u time sha akaa a a hembe lun we a inja la yô, u zua a mtsera nena?
18 Shin er u lu a mbaawashima mba injaav nahan kpa, ka i lu u er shighe ngu yinan we u eren kwagh u ú soo u eren shi i gbe u ú er laa? Aluer kwagh ngu nahan yô, doo u ú time sha akaa a a hembe lun we a inja la. Ikyav i tesen yô, tôô bokoti u robaa, kura awen haa shimi kpishi. Maa kura inya haa shin bokoti shon i iv. Hegen bokoti wou la iv a awen man inya shimi ve. Gema awen man inya i í u haa shin bokoti la kur inya, kpa de awen man inya la i lu her. Kwa ne di, kura inya la hii haan shin bokoti la, maa mase awen la sha. Ian ia kera lu i awen la aa nyôr shin bokoti la ga. Aa kera nyôr ga sha ci u ú hii haan inya shin bokoti la yum.
19 Kape gbenda u ú vihin shighe wou la kpa u lu je la. Aluer ambaakaa er iemberyolough nahan hingir kwagh u hiihii yô ken uma wou yô, mayange u lu a ian i eren akaa aa a hembe lun we a injaa la ga, ka akaa aa a bende a mcivir u Aôndo je la. Kpa aluer u dondo kwaghwan u Bibilo u a kaa ér se “fa akaa a a hembe lun a inja” la yô, u fatyô u lun a shighe u civir Yehova shi eren iemberyolough kpa akuma akuma.—Fil. 1:10.
20. Aluer ishima ngi nyian we shi akperan nga u ken ishima er u ú lu nôngon wer u kure mbaawashima ou ne yô, kanyi i gbe u ú ere?
20 Er u lu nôngon wer u er akaa a u we ishima u eren, kua batisema kpaa la, alaghga ashighe agen ishima ia nyian we shin u lu a akperan ken ishima. Shighe u kwagh a er u nahan yô, “haa akaa a zan we iyol cii sha TER, tsô Una taver we.” (Ps. 55:22) Hegen ne, u ngu a ian i eren tom u ú hembe lun a inja shi u hembe nan msaanyol cii yô, ka tom u pasen ior kwagh sha tar cii shi tesen ve je la. (Aer. 1:8) U fatyô u tsuan wer mbagenev ve eren tom ne we u kenger a kenger shin we kpa u nyôr iyol ker cor cor. De vende u yaren tom a mfe wou sha u civir Yehova shi suen akaa a Tartor na ga. Mayange u vaa afanyô u civir “u A gbe u la sha ayange a iyev ou” ga.—Orpa. 12:1.
[Ngeren mba shin kpe]
^ Nenge Iyoukura (zwa Buter) i Agusutu 1, 2009, peeji 15-18.
^ Aluer u soo u seer zuan a mfe sha kwagh ne yô, ôr takerada u Questions Young People Ask—Answers That Work, Tihi u sha 2, ityough 34 la.
Ú Na Mlumun Wer Nyi?
• Doo u ú tsua akaa a u er yô sha ci u nyi?
• Ka akaa agen a nyi i doo u ú tsua u erene?
• U kuren awashima wou u eren batisema la wa nyi kere?
• U timen sha akaa a a hembe lun we a inja la una wase ú u kuren mbaawashima ou nena?
[Mbampin mba ngeren u henen]
[Foto u sha peeji 13]
U tsua wer u ôron Bibilo hanma iyange kpa?
[Foto u sha peeji 15]
Kanyi ia wase u ú kure awashima wou u eren batisema laa?
[Foto u sha peeji 16]
Foto ne tese u nyi?