Ú Umbur Kpa?

U ôr Iyoukura mba i sember gberen la nahan ve doo u kpa? Nenge ase aluer u fatyô u nan mlumun sha mbampin mban yô:

• Ka hanma ortyom Aôndo yange tindi un ér a hemen Mbaiserael gbenda shighe u lu duen a ve ken Igipiti laa? (Eks. 23:20, 21)

Ka a inja u nan jighjigh ér ortyom u ‘iti i Yehova lu ken a na’ la lu Waniunda u Aôndo, u yange va hingir Yesu la.—9/15, peeji 21.

• Ka atôakyaa a nyi nahan ior ve ne sha u vendan mcivir u mimi, kpa Aôndo a lumun a a ga?

‘Tom la taver yum. M soo u eren u ga. M ngu a ian ga. M fa kuma ga. Or er kwagh u a vihim kpishi yô.’ Atôakyaa er angara nahan ka atôakyaa a injaa a aa yange or u dondon atindi a Aôndo ga.—10/15, peeji 12-15.

• Ka sha igbenda igen i nyi nahan u fatyô u eren kwagh u una na mbamkombo mba Mbakristu vea maa u ken jijingi kua mbageneve?

Vande wan agoyol. Zaan mbamkombo nduuluu. Zaan sha shighe. Va a ityakerada i a yar tom a mi ken mkombo la. Palegh akaa a danen or. Waan zwa ken mbamkombo. Ôr kwagh tiônôô. Er ityom i í ne u yô. Wuese mba ve lu a ci ker la. Zende sugh ior.—10/15, peeji 22.

• Mcie u Aron cia mkighir u mbakov la tese se nyi?

Shighe u Mose lu her ga la, Mbaiserael kumbur a Aron ér a er ve an-aôndo. Yange cia er kwagh u ve kaa ér a er la. Kwagh ne tese ér ka agumaior tseegh a tagher a mkighir u mbakov ga. Mbaganden mba ve soo u eren kwagh u vough je kpa, mkighir u mbakov una fatyô u benden a ve. Gba u se hendan a mkighir u mbakov u una vihi mlu wase la.—11/15, peeji 8.