Shighe Kar u Civir Aôndo Ga

Hen gar u Málaga, u a lu ken imbusutariyan i tar u Spain la, sha iyange i Disemba 19, 2009, i er ngô ugen batisema vea wan na u kwase, mba yer ve cii ér Ana. Ve lu ken iorov 2,352 mba i er ve batisema ken tar u Spain ken inyom i 2009 la yô. Kpa, kwagh u lu kwagh u vesen sha kwagh u ngô ne man wan na yô, lu anyom a ve la. Ngô ne lu anyom 107, wan na gema lu anyom 83!

Lu nyi i na ve, ve za tese ikyav i iyoltseghan ve sha ci u Yehova sha batisema u erene? Ken mhii u kwavanyom u 1970 la, orwanndor ugen yange a lôhô Ana, wan u ngô la ér a za mkombo u Takerada u Henen ken Tiônnongo, u yange i nyôron hen ya u Orshiada yô. Ana zaan mkombo ne ashighe ashighe. Nahan kpa, tom u uke na yô, Ana kera za ikyura hemba nahan ga.

Anyom nga karen er pue nahan yô, ônov mba Ana mbagenev hii u henen Bibilo, shighe kar yô, ve hingir mbacivir Yehova. Wan u Ana u môm, u i yer un ér Mari Carmen la maa hide nder gbashima u ngô na lu a mi sha kwagh u mimi u Bibilo la, shi wase un lumun u henen Bibilo. Maa ngô u Mari Carmen u tamen, ka Ana u vesen la je la, kpa hii u tesen isharen sha kwagh u Bibilo. Ken masejime yô, iorov pue hen tsombor na va er batisema.

Sha iyange i i lu eren Ana u tamen la batisema vea wan na u kwase, Ana u kiriki la, saan ve mba uhar mban iyol kpishi. Ana u lu anyom 107 la kaa ér: “Yehova er a mo doo je, a nam ian i fan un.” Wan na u kwase la maa tsôrough keera ér: “Cii man Paradiso a va yô, m soo u civir Yehova shi eren ishima na shi pasen loho u dedoo sha afatyô wam cii.”

Kwagh u a ne kasev mba côgholov mba uhar mban iember i hemban cii yô, ka mbamkombo mba ve ze la. Ortamen ugen hen tiônnongo ve kaa ér: “Mkombo môm kpa karen ve ga. Ka ve kegh iyol u nan ikyar ken hanma mkombo u Iyoukura i Henen cii.”

Ikyav i ve tese sha kwagh u mtil sha mimi la umbur se kwagh u kwasecôghol ugen, u i yilan un ér Ana, u yange “undun tempel ga, civir Aôndo sha kwaghyan u hôron man msen u eren” la. Kwagh ne yange na yô, a zua a ian i nengen a wanikyundan, Yesu sha ashe a na. (Luka 2:36-38) Ana yange bee iyol kar u civir Yehova ga. Kape nyian kpa, kasev mba uhar mba ve ye iti ér Ana, mba se ter kwagh ve heen ne ve bee iyol i kar u civir Yehova ga je la.

U ngu a anmgbianev mba ve soo u ungwan loho u Bibilo yôô? Shin u zua a ma orbeenyol u lun a isharen, u nan soo u keghen ato a we shighe u ú ze hen ya u nan yôô? Amba la nahan aa fatyô u hingir er Ana mba uhar mba se er kwagh ve sha heen ne nahan, gadia shighe ngu a kar u vea hii u civir Yehova, Aôndo u mimi la ga.

[Mkaanem ma sha peeji 25]

‘Yehova er a mo doo je’

[Mkaanem ma sha peeji 25]

‘Cii man Paradiso a va yô, m soo u civir Yehova’