Jijingi Ne Se Tahav Mbu Hendan A Imeen Shi Wan Ishima A Iyolkpen
Jijingi Ne Se Tahav Mbu Hendan A Imeen Shi Wan Ishima A Iyolkpen
“Né va ngohol agee shighe u Icighan Jijingi Una va sha a ven yô.”—AER. 1:8.
1, 2. Ka iwasen i nyi Yesu yange tôndo zwa ér una na mbahenen nava, man gba u a na ve iwasen la sha ci u nyi?
YESU yange fa er mbahenen nav vea fatyô u kuran akaa a un we ve kwagh sha mi la sha tahav vev tseegh ga yô. Er tom ve u pasen kwagh la gba ave shi mbaahendanev vev lu a tahav, man mbahenen gema lu ken iyol i inyam i i yen kpishi ne yô, ikyav tese wang ér gba u vea lu a tahav mbu mbu hembe mbu orumace ve, vea kôrcio u eren tom la ye. Sha nahan yô, cii man Yesu mase kôndon yemen sha yô, a taver mbahenen nav ishima ér: “Né va ngohol agee shighe u Icighan Jijingi Una va sha a ven yô, man né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.”—Aer. 1:8.
2 Ityendezwa la hii u kuren sha mi sha shighe u Pentekosti u inyom i 33, shighe u icighan jijingi na mbadondon Yesu tahav u ivin Yerusalem cii a ityesen ve la. Ma mhendan fatyô u yangen kwaghpasen ve la ga. (Aer. 4:20) Hingir torough torough u mbadondon Yesu mba jighjigh, kua se kpaa, se lu a tahav mbu shon môm, mbu Aôndo a ne la, “ayange ayange zan zan mkurtar je.”—Mat. 28:20.
3. (a) Pase mkposo u icighan jijingi man agee. (b) Agee a Yehova a ne se la aa wase se u eren nyi?
3 Yesu yange tôndo zwa a mbahenen nav ér ‘vea va ngohol agee shighe u icighan jijingi una va sha a ve yô.’ Ishember i “agee” la kaha a ishember i “jijingi” la. Jijingi u Aôndo, u a lu tahav mbu tomov nav la ka tahav mbu ka mbu er tom ken ior shin ken akaa sha u kuren awashima u Aôndo yô. Agee di gema ka “tahav mbu eren kwagh shin nan kwagh eren.” Agee aa fatyô u lun ken or girgir zan zan a va gba u nana er kwagh a mi. Sha nahan yô, se fatyô u tôôn icighan jijingi karen sha usu u latriki u ka u na bateri tahav la; agee di gema nga er tahav mbu usu la ka u na bateri shon, mbu lu ker girgir la nahan. Agee a Yehova a ne mbatomov nav sha icighan jijingi la mbu ne hanmô wase tahav mbu hendan a akaa a vihin mlu wase u dedoo la shighe u i gbe u se er nahan yô, shi nga wasen se u eren kwagh u tesen ér se tsegha ayol a ase sha ci u Aôndo.—Ôr Mika 3:8; Mbakolose 1:29.
4. Kanyi se time sha mi ken ngeren ne man ka sha ci u nyi?
4 Agee a icighan jijingi a ne se la ka a tese ken a vese nena? Icighan jijingi una fatyô u mgbeghan se u eren kwagh ken mbamlu kposo kposo nena? Er se lu nôngon ser se civir Aôndo sha mimi ne, se mba tagher a mbamtaver kpishi, mba Satan shin tar na shin myen wase a ve a mi sha avese yô. Er se lu Mbakristu yô, ka hange hange u se hemba mbamtaver mbara sha er se taver ishima, se pasen kwagh hanma shighe shi se za hemen u yan ikyar a Yehova kangenaa yô. De se nenge nen er icighan jijingi a wasen se u hendan a imeen shi wan ishima a ivôron man iyolkpen yô.
Icighan Jijingi Ne Se Tahav Mbu Hendan a Imeen
5. Msen una fatyô u nan se tahav nena?
5 Yesu yange tese mbadondon un ér ve sôn ér: “De ze a vese hen ape imeen i lu ga, kpa yima se sha [ikyev i orbo, NW].” (Mat. 6:13) Yehova una kende mbatomov nav mba mimi mba ve sônon un kwagh ne la ga. Sha shighe ugen la, Yesu kaa ér “Ter wen u A lu Sha Una . . . Na mba ve sen Un la Icighan Jijingi.” (Luka 11:13) Ka kwagh u taver se ishima kpishi er Yehova a tende zwa u nan se tahav mbun sha u se er kwagh sha inja nahan! Nahan kpa, u ngu wer Yehova una yange ér i de meen se ga ze. (1 Kor. 10:13) Kpa shighe u se tagher a imeen yô, ka shighe u i gbe u se hemba eren msen tsusee je la.—Mat. 26:42.
6. Yesu yange suur sha nyi ve hendan a ameen a Satan laa?
6 Shighe u Diabolo lu meen Yesu la, Yesu lu ôron un avur a Ruamabera. Yesu yange fa Mkaanem ma Aôndo wang, ka nahan ve kaa ér: “I nger er . . . i shi i nger er . . . Yem kera, Satan, gadia i nger er: Civir Ter, Aôndo wou, ka Un tseegh er Un tom ye.” Mdoo u Yehova doo Yesu ishima kua Mkaanem nam la mgbegha Yesu u vendan akaa a saren a Ormee lu van un a mi sha ishi la. (Mat. 4:1-10) Er Yesu tile dông, hendan a imeen la acin imôngo yô, Satan undu un.
7. Bibilo wasen se u hendan a imeen nena?
7 Er Yesu suur sha Ruamabera sha u hendan a ameen a Diabolo yô, hemba gban u se har sha mi cii ga he? Sha kpôô yô, saa se vande kangen ishima ser se fa atindiakaa a Aôndo shi se dondo a kpilididi ve se fatyô u hendan a Diabolo man mbatomov nav ye. Ior kpishi mba ve hen Ruamabera shi ve nenge ér kwaghfan u Aôndo man perapera na ngu a inja yô, ve hingir u dondon atindiakaa a Bibilo ken uuma vev. Sha mimi yô, “mkaanem ma Aôndo” ma a tahav mbu karen “mbamhen kua mbaawashima kpaa.” (Heb. 4:12) Er or nan lu ôron Ruamabera shi gbidyen kwar sha mi seer a seer la, kape nana lu hemban ‘wan mimi u Yehova ikyo’ je la. (Dan. 9:13) Er i lu nahan yô, doo u se gbidyen kwar sha avur a Ruamabera a a er kwagh a ter mbamyen asev jighilii la.
8. Se er nan ve zua a icighan jijingii?
8 Yesu yange kôrcio u hendan a imeen sha ci u a fa Ruamabera tseegh ga, kpa shi a “iv a Icighan Jijingi.” (Luka 4:1) Aluer se kpa se soo u lun a tahav man agee imba la yô, a gba u se kporom hen Yehova sha u eren tom a akaa a a ne sha u wasen se u ivin a jijingi la cica cii. (Yak. 4:7, 8) Akaa ne agen yô, ka Bibilo i henen man msen man u kohol vea mbananjighjigh a vese imôngo. Ior kpishi zua a iwasen sha u eren ityom i Mbakristu cica cii la, man kwagh ne ka a wase ve u henen sha akaa a maan ve a maa.
9, 10. (a) Ka akaa a nyi nahan i hembe meen ior sha mi hen ijiir youwe? (b) Aluer u ngu eren msen shi gbidyen kwar sha kwagh yô, kwagh la una wase u u̱ hendan a imeen shighe u iyol i kpe u nena?
9 Ka ameen a nyi i gbe u ú hendan a mi? Í lu nahan u tagher a imeen i hian a or u ú vese nan ga vee? Wea lu kwav yô, i gbe nahan er u ken ishima er u̱ sôôr or u nan ne jighjigh ga vee? Shighe u Mbakristu ve lu nengen televishen shin eren akaa sha Intanet yô, alaghga vea tagher a imeen igen gaegh i nengen kwagh u wang ga. Aluer imba kwagh la vande eren we yô, yange u er nena? Doo u se gbidye kwar se nenge er alaghga kwagh môm u se er shami ga la una na a gba u se er kwagh ugen u shami ga, u una fatyô u nan se eren kwaghbo u vesen je kpaa yô. (Yak. 1:14, 15) Hen er u er isholibo i vesen ve a vihi Yehova man tiônnongo kua tsombor wou la. Nahan kpa, ka sea dondon atindiakaa a Aôndo sha mimi yô, se lu a imoshima i wang. (Ôr Pasalmi 119:37; Anzaakaa 22:3.) Shighe u ú tagher a ameen er angan nahan cii, kange ishima wer u sôn Aôndo, a na u tahav mbu hendan a a.
10 Kwagh ugen kpa ngu u i doo u se umbur sha ameen a Diabolo yô. Satan yange za hen Yesu shighe u hôr kwaghyan ken taaikyôngo ayange 40 yô. A shi nan kpa, Diabolo hen ér ihyongo la lu “shighe” u injaa u karen mtil sha mimi u Yesu je la. (Luka 4:13) Satan keren ashighe a injaa a karen mtil sha mimi wase kpaa. Nahan gba hange hange u se taver ken jijingi. Ashighe kpishi Satan ka a ta num sha or zum u a nenge ér nan hemba vôron cii la. Nahan hanma shighe u iyol i kpe se cii, ka shighe u i doo u se hemba kangen ishima ser se sôn Yehova a kura se, shi a na se icighan jijingi je la.—2 Kor. 12:8-10.
Jijingi Ne Se Tahav Mbu Wan Ishima a Ivôron man Iyolkpen
11, 12. (a) Ior kpishi iyol kpe ve nyian sha ci u nyi? (b) Kanyi ia na se tahav mbu hendan a iyolkpene?
11 Er se lu uumace mba yinan yô, ashighe agen iyol ka i kpe se. Alaghga iyol ia hemba kpen se ayange ne cii, sha ci u shighe u se lu ker ne ka shighe u ican kpishi. Se mba ken shighe u hemban taver cii, u i gbe je uumace ve lu a nyôr ker ga yô. (2 Tim. 3:1-5) Er Armagedon a lu mgbôghom ne, mbamtaver mba sha kwagh u inyar man mba ken ishima kua mbagenev kpaa mba seer a seer. Nahan yô, i de kera kpiligh se iyol er i lu hemban taver mbagenev u nengen sha icombor ve shi kuren mbamgbe mba icombor ve la ga. Ve vôr, mba shalegh gbeer azer shi gboron ave, je yô hemba mbagenev iyol kuaa je. Aluer kape kwagh wou a lu la yô, u nôngo a mtaver ne nena?
12 Umbur wer, Yesu yange taver mbahenen nav ishima ér una na ve orwasen, ka icighan jijingi u Aôndo je la. (Ôr Yohane 14:16, 17.) Ka tahav mbu hemban sha won cii je ne. Yehova una fatyô u nan se agee sha icighan jijingi na “je á hemba kwagh u se sen” la, sha er se wa ishima a nyityô mtaver u se tagher a mi cii yô. (Ef. 3:20) Apostoli Paulu kaa ér, aluer se suur sha tahav mbun yô, a̱ “eren se ican sha hanma ian” je kpa, se lu a “agee a hemban la.” (2 Kor. 4:7, 8) Yehova tôndo zwa ér una kar a mtaver kera ga, kpa a taver se ishima ér una na se agee sha jijingi na sha er se wa ishima a mi yô.—Fil. 4:13.
13. (a) Gumkwase ugen zua a tahav mbu wan ishima a mlu u taver nena? (b) U fa mbagenev mba imba kwagh la i er ve yôô?
13 Nenge ase ikyav i pania u keke ugen, u lun anyom 19, u i yer un ér Stephanie yô. Shighe u lu anyom 12 la, a gba angev mbu kpen alegh shi mura mhirinim. Hii shighe la je, i pav un kwa har shi i sôr un sha gbenda u sôron angev, u i yer ér radiation la, shi angev mbu kpen alegh mbura hide kôr un kwa har, nahan kera lu a tahav ken vegher na u ken imese la kpishi ga, shi kera nengen tsembelee kpaa ga. Nahan Stephanie ngu kuran agee na sha u eren akaa a á nenge wener hemba ngan a inja yô, er u zan mbamkombo mba Mbakristu man u duen kwaghpasen nahan. Nahan cii kpa, a nenge wener jijingi u Yehova ngu wasen un u wan ishima sha igbenda kpishi. Shighe u ka una ure yô, ityakerada i pasen Bibilo i i er akaa a a er Mbakristu mbagenev la, ka i na un ishimataver. Anmgbianev mba nomso man mba kasev ka ve sue un sha u tindin un a uwashika shin lamen a na kundu kundu cii man shighe u mkombo kua shighe u i dugh mkombo kpaa. Ior mba lun a isharen kpa, ve tese iwuese sha kwagh u Stephanie a lu tesen ve la sha u zan hen ya na za henen Bibilo. Stephanie wuese Yehova kpishi sha kwagh ne cii. Ivur i ken Ruamabera i i hembe doon un cii yô, ka Pasalmi 41:3, sha ci u a nenge wener ivur la kure sha a na.
14. Kanyi i gbe u se palegh shighe u iyol i kpe se, man ka sha ci u nyi?
14 Shighe u se hingir u vôron shin i lu kighir se yô, doo u mayange se hen ser gbenda u se nôngo a mtaver la yô, ka u den ityom i ken jijingi igen ga. Ka kwagh u a hembe vihin u se er je la. Sha ci u nyi? Sha ci u ka sha ityom er kwaghhenen u sha tseeneke man u hen tsombor man kwaghpasen man mbamkombo mba zan nahan, icighan jijingi a ne se tahav mbu hiden taver ye. Ityom i Mbakristu ngi ne se mkunduyol hanma shighe cii. (Ôr Mateu 11:28, 29.) Ashighe kpishi anmgbianev ka ve va nyôr ken mbamkombo i tume ve iyol, kpa a va kuman shighe u yemen ken ya yô, i lu inja er i hide ve a agee ve her, bateri ve u ken jijingi hide zua a tahav nahan!
15. (a) Yehova tôndo zwa ér una er Orkristu nana lu a ican iyol shioo? Na mpase ken Ruamabera. (b) Kanyi Aôndo a tende zwa ér una na se, man kwagh la due a mpin u nyi?
15 Nahan kpa, u ngu wer u lun Orkristu ka kwagh u peesa ze. Cii ve or nan lu Orkristu u mimi yô, a gba u nana nôngo kwagh tsung. (Mat. 16:24-26; Luka 13:24) Nahan kpa, Yehova una fatyô u nan or u nan ver la agee sha jijingi na. Profeti Yesaia yange nger ér: “Mba ve veren ashe sha TER yô, vea hide a agee a ve her; vea kôndo sha sha akper er ugafa nahan; vea yevese, kpa vea vôr ga; vea zende, kpa iyol ia kpe ve ga.” (Yes. 40:29-31) Sha nahan yô, doo u se pine ayol a ase ser, Er nan jim ve m nengen ityom i ken jijingi la mer ka ikyav mbi yuhwana?
16. Se fatyô u eren nyi sha u been a akaa a nan ivôron man iyolkpene?
16 Mkaanem ma Yehova wa se kwagh ér se kar se “fa akaa a a hembe lun a inja yô.” (Fil. 1:10) Shighe u jijingi mgbegha apostoli Paulu ve tôô uma u Orkristu kar sha ayem a gban sha angahar yemen ica la, a wa kwagh ér: “Sé shir nen hanma ikyav . . . , sé gba nen ayem sha ishima i taver tsung sha gesa u ayemegh u i ver se sha ishi la.” (Heb. 12:1) Kwagh u lu ôron yô wener, gba keng u se palegh u zendan agbilinakaa, se palegh ikyav mbi gbilinigh mbi vôron se la. Alaghga a lu sha ci u se mbagenev se mba nôngon u seer akaa kpishi sha ityom i se vande lun a mi kpishi la. Nahan aluer ashighe kpishi ka u vôr shi i tume u iyol yô, alaghga a lu u a iwasen u hiden timen sha shighe u ka u na sha u eren tom u uke shin ikwa i ka u za zende sha u zuan a msaanyol shin gbashima u ka u eren anumbe shin iemberyolough igen a mi la. A doo u se er kwagh sha kwaghfan shi se de iyol hiden a mi ijime ia mgbegha se u nengen a mbamyen asev, nahan panden akaa a gbilinigh a se eren la.
17. Iyol ia fatyô u kpen mbagenev sha ci u nyi, kpa ka ibumun i nyi Yehova a ne se sha kwagh nee?
17 Alaghga iyol wa kpen mbagenev ken a vese sha ci u mkur u tar ne va fele er yange se ver ishima la ga yum. (Anz. 13:12) Nahan kpa, or u i lu nan ken ishima nahan yô, nana fatyô u zuan a ishimataver ken mkaanem ma ken Habaku 2:3 la, ma kaa ér: “Mpase u sha mnenge ne ngu keghen shighe na, ngu zan fefa sha u kuren, una er aie ga; shin er una ngôôr kpaa, kegh un, gadia una va kpee, una bunde ga.” Yehova bum a vese ér mkur u tar ne una va sha shighe u un ver la vough!
18. (a) Ka uityendezwa mba nyi ka ve na u agee? (b) Ngeren u a dondo ne una wase u nena?
18 Sha kpôô yô, mbacivir Yehova sha mimi cii, mba veren ashe a shighe u ivôron man iyolkpen ia kera lu ga, ve hanma or nana “hide nana hingir er sha ayange a nan lu iyev la.” (Yobu 33:25) Hegen je kpa, aluer se nyôr iyol ken ityom i ken jijingi, i nan se tahav yô, se fatyô u taver ken atô kere kere, sha tom u icighan jijingi a eren la. (2 Kor. 4:16; Ef. 3:16) De den wer mtumeyol a na averen a tsôron la a kar u ga. Nyityô ican i u nyer ker sha ci u imeen shin ivôron gayô iyolkpen cii ia kar kera, a lu hegen ga yô, a lu ken tar u he u Aôndo una va a mi la. Ken ngeren u a dondo ne, se lu timen sha gbenda u icighan jijingi a ne Mbakristu tahav mbu hendan a mtev u sha ican man mkighir u mbakov shi wan ishima a atsan agen atô kposo kposo la.
U Na Mlumun Wer Nyi?
• Bibilo i ôron ne se agee nena?
• Msen u eren kua kwargbidyen sha kwagh mba ne se agee nena?
• U fatyô u karen a akaa a aa fatyô u nan we iyolkpen la kera nena?
[Mbampin mba ngeren u henen]
[Foto u sha peeji 24]
Mbamkombo mba Mbakristu vea fatyô u taver se ken jijingi