Nenge Iti I I Lu Shin Pev La

U VANDE ungwan iti i i yer ér St. Moritz la vee? Alaghga u vande ungwan, sha ci u ka ijiir i i ze gwa sha tar kpishi, i ior ve ze memyol her, i i lu shin Pev u i yer ér Engadine, u a lu ken tar u Switzerland la. Kpa St. Moritz ka di ijiir i môm i i urugh ior anyom imôngo, i ze a ve hen pev u doon ashe, u a lu hen atô u iwo i taven, i senou a cir sha mtom ma i, i lu vegher u ken imbusutarimese i tar u Switzerland, ikyua a ikighir i tar u Italia ne yô. Shi ka hen ijiir ne kpa tar u Switzerland u tsegh anijiir u doonashe, u i yer ér Swiss National Park, ape imendenev man inyamtoho atô kposo kposo i lu wuese Yehova, Orgban wase u hemban cii la. (Ps. 148:7-10) Kape aeren a uter agen, a yange i eren ken atô u derianyom u sha 17 la kpa a lu wuese Yehova her je la.

Ayou a hen pev ne kpishi, aluer u nenge mlu u a vindi vindi yô, a doo u kenger. Zan zan nyian kpa, u fatyô u nengen a iti i Aôndo sha ishigh ki iyough, er sha hunda nahan. Ken  uderimbaanyomov mba karen la, ior eren hwe sha ayou a ve sha u ngeren akaa sha kpekpeyou u ken won, ashighe agen ve nger akaa ne sha penta shin ve kômbo a kômbo kwaghngeren sha mi, gayô ve tsehe a tsehe kwaghngeren sha iwen. Nenge ase foto u iyou igen hen angar ugen u i yer ér Bever la shin heen. I gema kwagh u i nger sha iyou shon la ér: “I maa iyou ne ken inyom i 1715 la. Yehova ngu mhii, shi Yehova ngu mkur kpaa. A Aôndo yô, se fatyô u eren akaa cii, kpa a na shio yô, se kôrcio u eren ma kwagh ga.” Sha mimi yô, kwaghngeren u tse, u i nger sha iyou la ter iti i Aôndo kwa har.

U fatyô u nengen a kwaghngeren u tsan hemban ngun sha iyou igen hen angar u i yer ér Madulain la. Inja i kwaghngeren ne ér: “Pasalmi 127. Aluer Yehova una maa iyou ga yô, ka gbilin tsô mbamaan i la ve eren tom kpoghuloo ye. Lucius Rumedius. I maa iyou ne ken inyom i 1654 la.”

Er nan ve i nger iti Aôndo ken igbar sha ayou a hen pev ne nahana? Hii sha shighe u nongo u Mbaprotestanti due ken kwaghaôndo u Mbakatoliko la je, i gber Bibilo ken zwa ugen u i yer ér Romansh, u i lamen hen Engadine yô. Lu takerada u hiihii u i gema ken zwa la je ne. Er kwagh u ior mba hen ijiir la ôr ken Mkaanem ma Aôndo la kôr ve ken asema yô, lu ati a ve tseegh ve nger ken won u ukpekpe mba ayou ve ga, kpa shi ve nger avur a Bibilo agen a yange lu a iti i Aôndo kpôô kpôô la kpa sha ayou a ve.

Sha mimi yô, er i nger akaa ne sha ayou ne i tse anyom uderi uderi nahan kpa, ungeren mban mba yôôn iti i Yehova shi wuese un zan zan nyian. Mbayaav mba hen pev ne kua mba van a va cii ka i lôhô ve ér ve za hen iyou igen i i yer i sha iti i Yehova yô, ka Iyou i Tartor i Mbashiada mba Yehova i hen Bever je la, ve za seer zuan a mfe sha kwagh u Yehova, Aôndo u hembancii la.

[Ape i zough a foto ne yô u sha peeji 7]

© Stähli Rolf A/age fotostock