Iniôngon Yase Ia Due Gbilin Ga!

ALUER ka u a ‘yese mbayev sha mkôôm man kwaghwan u Ter’ yô, gba hange hange u a henen Bibilo a ve hen tsombor. (Ef. 6:4) Wea lu ormaren yô, u fa er kwagh a ngôôr duen mbayev ishima ga yô. U wase ve u veren ishima nena? Time ase sha kwagh u mbamaren mbagenev ve er yô.

Ormaren ugen hen kpentar u California, ken tar u Amerika, iti na ér George, a kaa ér: “Shighe u ônov asev lu vesen a vese la, kwase wam man mo se nôngo sha er Bibilo i henen hen tsombor la ia gba ve ishima yô. Ashighe agen se wuha iyol er ior mba i er kwagh ve ken Bibilo la nahan, shi sea nguren ôron kwagh u i nger ken Takerada Wam ú Akaaôron a Bibilo la yô, se er inumbe sha mi. Yange se lu a ikyav mbi eren inumbe a mi, er usanker man igbough man akese kua akaa agen nahan. Shi se er inumbe i haren sha Bibilo, i i yer ér ‘kaam or u m lu yô’ la, shi se nger mbampin mba taver man mba taver ga sha kpande u se gba sha ci u eren inumbe i i har sha Bibilo la. Yange se na ve ityom kposo kposo, er u kpelan tso u Noa shin ngeren ashighe kposo kposo a akaa ken Bibilo yange er nahan. Ashighe kpishi se yar tom a ian i kpelan akaa la sha u kpelan ior mba ken Bibilo shin akaa a ken Bibilo a yange er yô. Hegen yô, se mba wan agoyol u eren tom u kpelan ikyav mbi utyaav mbi ken jijingi, mbi i er kwagh u mbi ken Mbaefese 6:11-17 la, nahan hanma wase nana pase kwagh u ma ikyagh ki utyaav ki til sha mi yô. Igbenda ne na yô, Bibilo yase i henen hen tsombor la maa se iyol.”

Ngô ugen hen kpentar u Michigan, ken tar u Amerika, iti na ér Debi, a kaa ér: “Yange lu nomom man mo ican kpishi u wasen wan wase u kwase shighe u lu anyom atar la sha u a veren ishima zum u sea henen kwagh yô. Tsô, iyange igen, se mba ngur ôron kwagh u Isaka man Rebeka ken Takerada Wam ú Akaaôron a Bibilo yô, m gese uwegh m tôô akaa a numben a mi ahar, m gba eren inumbe a mi, tesen kwagh u adooga yange ve ôr la. Kwa ne yô, a kegh ato zulee, a ungwa hanma ishember cii! Iwer i i dondo la cii, se gema yaren tom a akaa a numben a mi a ahar la sha u eren inumbe sha kwagh u ior kpishi mba i er kwagh ve kposo kposo ken Bibilo la. Sea ôron ma ngeren sea been yô, wan wase u kwase a gba keren akaa a numben a mi shin akaa agen ken iyou sha u una er inumbe sha kwagh u a hen la yô. Lu inja er i yer ma kwagh u injaa, un di ngu keren kwagh shon nahan! Akwati u wan akôv shimi man tsar-ikyondo u nyian hingir un ya u Rahabi, u yange i ta tsar-ikyondo u nyian dindee sha mi la. Iyô i iniumbe i lihen kuman angahar ataan, i í kamber sha kon u canca yô, hingir un iyô i togula i í er kwagh u i ken Numeri 21:4-9 la. Se kohol ikyav mbi iniumbev mbin cii se wa ken zege-ikpa i í er sha ikyondo i civir yô. Yange sea nenge wan wase u kwase la una za tema ken iyou yase i memen, una gba keren ikyav mbi iniumbev ken ‘ikpa [na] i akaaôron a Bibilo’ la nahan, i doo se kpishi. Yange i saan se iyol kpishi shighe u sea nenge una eren inumbe sha akaaôron a ken Bibilo sha an-mfe na la nahan!”

U yesen mbayev ka kwagh u kiriki ga, shi cii man i wase ve u lun a isharen i civir Yehova yô, gba u a er kwagh a hemba di kwaghhenen u ken hanma kasua la. Kpa Bibilo i henen hen tsombor ia fatyô u lun gbenda u vesen u tesen mbayev akaa a ken jijingi agen kpaa. Sha kpôô yô, Bibilo i henen hen tsombor ia na iniôngon yase ia due gbilin ga!