Er Se Za Hemen a Ieren i Mimi ken Tar u I Eren Kwagh sha Anyighe Ne Yô

ANYIGHE ngu hanma ijiir sha won cii, er ahumbe a se ôôn a mi ne kpa a lu hanma ijiir nahan. Ior ka ve er aie, ve tee kwagh ishe i kar ikyaa inya, shi ve ii; mba kimbin anzô kpaa ga, shi ka ve kaa ihyagh sha liba i ve zough a mi sha ayom la. Er se kange ishima ser se eren kwagh sha mimi nahan kpa, mlu wase ken tar u ior ve eren akaa ne la na yô, ashighe kpishi ka se tagher a mbamlu mba karen mtil sha mimi wase la. Se er nan ve se za hemen u hendan a isharen i ka i mgbegha or u eren kwagh sha anyighe laa? De se nenge sha atôakaa atar, a aa wase se u eren nahan yô. Akaa shon yô, ka mcie u cian Yehova man imoshima i wang man shi u kwagh a kuman se.

Mcie u Cian Yehova sha Gbenda u Vough La

Profeti Yesaia nger ér: “TER ka Orjir wase, TER ka Orwan se atindi, TER ka Tor wase.” (Yes. 33:22) Aluer se fa ser Yehova ka Tor wase yô, se lu mba cian Aôndo, shi ka kwagh u una na se kange ishima u hendan a imeen i eren kwagh sha anyighe je la. Anzaakaa 16:6 kaa ér: “Ka sha mcie u cian TER kpaa, ior ve undun kwaghbo ye.” Mciem man ka ma cian Aôndo gighir gighir inja er a vihi tu ga, kpa ka u veren ishima zulee ser se eren ishima i Ter wase u sha, u a we ikyo sha kwagh u mkpeyol wase tsung la.—1 Pet. 3:12.

Kwagh ugen yange er u tesen er mcie u cian Aôndo sha gbenda u vough la a lu a inja yô. Orgen u i yer un ér Ricardo vea kwase na, Fernanda, yange ve za dugh inyaregh vev ken banke ki kuman udola deri utaankaruhar (sha inyaregh ki Amerika). * Fernanda gema ijuku inyar la wa ken ikpa na, a u ôron ki shio. Ve pande inyaregh kira ve kimbi sha akaa agen, mba hidi mba za nyer hen ya yô, kpiligh ve iyol sha ci u ve nenge inyaregh shi ken ikpa i Fernanda je nôngo u kuman sha iyenge inyar i ve za dugh ken banke la. Tsô ve kure ikyaa ér: “A shi nan kpa kashia u banke la na se inyaregh hemba kwagh u se pin la.” Sha hiihii la, lu ve er ve koso inyaregh kira nahan, sha ci u akaa shi ve her kpishi, a ve lu a kimbi inyaregh sha mi ga yô. Ricardo pase ér: “Yange se er msen hen Yehova ser a taver se ishima u hiden a inyaregh kira. Isharen i se lu a mi i eren kwagh u doon un, er i nger ken Anzaakaa 27:11 nahan la mgbegha se u hiden a inyaregh kira.”

Imoshima i Bibilo i Tsaase i La

Se fatyô u tsaase imoshima yase sha u henen Bibilo shi nôngon kpoghuloo eren sha kwagh u se lu henen la. Sha nahan yô, ‘mkaanem ma Aôndo ma ma lu uma, ma tem gbilin ga’ la ma a gema mbamhen asev tseegh ga, ma a gema mbaawashima asev kpaa. Kwagh ne una mgbegha se “u zenden tsembelee sha akaa cii.”—Heb. 4:12; 13:18.

Nenge ase kwagh u João kpaa. Yange nyôr ken injô i vesen, i kuman er udola dubu utaan nahan (sha inyaregh ki Amerika). Maa mough yem hen geri ugen, a u kimbin injô la shio. Anyom anigheni nga kar yô, João fa mimi, nahan imoshima na i Bibilo tsaase i la mgbegha un hide za kimbi kômpeni u yange gba u injô la inyaregh kira! Er João lu a kwase man mbayev unyiin mba una nenge sha a ve, man lu a tom u van un a inyaregh kpishi ga yô, kômpeni la lumun u nan un injô la ér a kimbin i̱ cuku cuku sha mbee u hanma uwer.

Kwagh a Kuman We

Apostoli Paulu nger ér: “U civir Aôndo man kwagh a kuman we yô, mtsera ngu sha mi vese. . . . Aluer sea lu a kwaghyan man akondo yô, i̱ kuma se.” (1 Tim. 6:6-8) Aluer se kusu kwaghwan  u injaa ne yô, una wase se u palegh imeen i zuan a mtsera sha kwagh sha ayom shin sha anyighe la, shin se palegh u keren inyaregh sha igbenda i se nôngo se hingir mbanyarev a iyol i nyoon shio la. (Anz. 28:20) Kwaghwan u Paulu la shi una wase se u hemban veren ishima sha Tartor u Aôndo, lun a vangertiôr ser akaa a kwagh a gbe se a mi ayange ayange la cii a na se a.—Mat. 6:25-34.

Nahan kpa, sha ci u “icugh i inyar” yô, gba u mayange je se nenge ser se fatyô u gban ken hua u eren man mtôm ga ze. (Mat. 13:22) Umbur kwagh u Akan la. Yange nenge sha ashe a na er Mbaiserael per Ifi u Yordan sha ivande yô. Nahan cii kpa, er hua ya tor ken a na yô, a hendan a isharen i iin la ga, nahan a za ii azurfa man zenaria kua ikyondo i cirin, i taver ishe, ken akaa a i ta icin ér or a de ye ishar sha mi ga la. Kwagh ne va un a ku. (Yos. 7:1, 20-26) Kape i lu ve anyom nga karen uderi imôngo yô, Yesu ta icin sha kwagh ne je la, a kaa ér: “Ver nen ishima, kura nen ayol a en sha hanma hua.”—Luka 12:15.

Eren Kwagh sha Mimi hen Ijiirtom

De se time nen ase hegen sha mbamlu mba vea fatyô u meen se ér se gbihi ishima i se kange ser se eren akaa cii sha mimi la. U eren kwagh sha mimi hen ijiirtom yase la wa u “iin ga” kpa ker, shin aluer mbagenev hen ijiirtom yase mba iin je kpaa. (Titu 2:9, 10) Orgen yaren tom hen ijiir i gomoti igen, iti na ér Jurandir, yange una za zende yô, a hide a va ôr inyaregh ki un vihi sha zende la cii sha mimi. Nahan kpa, mba eren tom ijiir i môm a ve la yange vea za zende yô, ve hide ve va ôr inyaregh ki ve vihi sha zende la i hemba kwagh u ve vihi jighilii la. Yange ve er nahan sha ci u orvesen u hen afishi a ve la na ve ian i eren anyighe. Orvesen la iyol na yange zôhô a Jurandir sha ci u ngu jighilii yum, shi de u tindin un ijende i sha kwagh u tom ve la. Nahan kpa, shighe va kom yô, i va gba ceke i inyaregh ki afishi la vihi yô, nahan i wuese Jurandir sha ieren na i mimi la, shi i ver un sha iantom i i hembe i yange vande lun sha mi la kpaa.

Orgen u a teen kwagh ken shôôpu yô, iti na ér André, un kpa orvesen na u yange tôô un tom yô kaa a na ér a seer hanma kwagh ishe i kuma ishe i i teen un la kwa har, a teen mbakasuav. Anmgbian wase ne er msen hen Yehova sha u a̱ taver un ishima una kura atindi a Bibilo. (Ps. 145:18-20) Shi yange nôngo sha u orvesen na a fa er i hii ve i lu u una fatyô u dondon kwaghwan na la ga yô, kpa gba her ga. André maa de tom u i kimbin un inyaregh sha mi tsembelee ne. Nahan kpa, shighe kar ka kom er inyom i môm nahan yô, or la yila un ér a hide a va er tom la, pase un wanger wanger er i de u wan mbakasuav ishe i akaa karen ikyaa inya yô. André hingir orvesen u nengen sha kpenga la.

Kimbin Injô

Apostoli Paulu wa Mbakristu kwagh ér: “De luun ma or a ma injô ga.” (Rom. 13:8) Alaghga se lu nôngon u kaan ser sea kimbi injô igen ga kpa a  lu kwagh ga, sha ci u se nenge ser or u se gbe injô hen nan la nan ngu a kwagh ave, nahan kwagh gba nan sha inyaregh kira ga. Nahan kpa, Bibilo kaa ér: “Iferor ka nan ya injô, nan kimbi ga.”—Ps. 37:21.

Nahan kpa, aluer ma “aikyôr” yange se u kimbin kwagh u se lu or a mi la di ye? (Orpa. 9:11) Orgen u i yer un ér Francisco yô, yange ngohol inyaregh ki kuman udola dubu utaankaruhar (sha inyaregh ki Amerika) hen orgen, iti na ér Alfredo, sha u una kimbi injô i yange gba ken banke yô. Kpa er Francisco tagher a mbamzeyol mbagenev ken kpenga na yô, a fatyô u hiden Alfredo a inyaregh nagh sha iyange i tôndo zwa u hiden un a ki la ga. Maa a mough a za kohol Alfredo ve lam sha kwagh shon, nahan Alfredo lumun ér a kimbin un inyaregh ki shon cuku cuku sha mbee u hanma uwer.

De Ne Wer Kwagh Wou a Shi Ior Ga

Umbur ikyav i bo i Anania kua kwase na Safira, mba ve lu ken tiônnongo u Kristu u sha derianyom u hiihii la yange ve ver la. Yange ve tee sule ve pande a pande inyaregh kira ve va na sha ikyev i mbaapostoli, ve kaa ér ka kwagh u ve tee sule cii je la. Ve soo ér mbagenev ve nenge i doo ve, er ve ne kwagh mgbeghaa yô. Nahan kpa, icighan jijingi u Aôndo mgbegha apostoli Peteru pon aie ve la, nahan Yehova tsaha ve sha ku.—Aer. 5:1-11.

Mbangeren Bibilo yange ve lu ior mba ve ôron kwagh shi eren kwagh sha mimi yô, ve lu er Anania man Safira, mba ve wa aie la nahan ga. Mose yange pase sha mimi, er lu ishimavihin na na ve i yange un u nyôron ken Tar u Ityendezwa la yô. (Num. 20:7-13) Kape Yona kpa, yange yer mbamyen mba a tese cii ve mase za pasen Mbanineve kwagh la, kua mba tese zum u za pase kwagh bee kera la ga je la. Kpa a gema a nger akaa la shin takerada.—Yona 1:1-3; 4:1-3.

Sha kpôô yô, saa u taver ishima ve u ôr kwagh u mimi ye, aluer ka u kwagh la una va u a ma mzeyol je kpa u wa ikyo ga, er kwagh u yange er Nathalia, wanyekwase ugen u lun anyom 14 ken makeranta la a tese nahan. Er lu hiden nengen shin ikyaren na i yange tica na make va na un la yô, a za nenge a mlumun ugen u yange na sha mi ga, kpa tica na gema na un ingyegh her yô. Nathalia yange fa dedoo je ér, aluer un za ôr tica na kwagh sha mi yô, una kera pase ikyaren la tsembelee ga, nahan kpa a timbir u za ôron tica na ga. A kaa ér: “Mbamaren av mba tesen mo hanma shighe ér saa me eren kwagh sha mimi ve a doo Yehova a mo ye. Yange mea za er tica wam kwagh la ga yô, ishima ma zer nan mo ibo gbem.” Tica la wuese ieren i mimi i Nathalia la.

Ieren i Mimi i Ve Yehova a Icivir

Wankwase ugen u lun anyom 17, iti na ér Giselle, yange za asegh sha anikpa u wan inyaregh, u ikyatakerada i pasen kwagh na kpa lu ker kua inyaregh ki kuman er udola 35 (sha inyaregh ki Amerika) nahan yô. Nahan a ker gbenda sha ikyev i mbahemenev mba hen makeranta na ér or u i lu ikpa i nan la nana zua a mi. Uwer môm ngu kar yô, or u cirin ken buter-makeranta na la ôr washika ugen kelase na cii ungwa, lu wuese Giselle sha ieren na i mimi la shi wuese tsombor na kpaa er ve ne un ityesen i dedoo shi ve yese un ken kwaghaôndo tsembelee yô. ‘Aeren a na a dedoo’ la yange va Yehova a icivir.—Mat. 5:14-16.

Er se lu hen atô u ‘mbawan ayol a ve ikyo tseegh man mba inyaregh ki doo ve ishima man mbahagher sha akaa man mbagengese iyol man mba lun wang ga’ yô, ka i gba u se nôngo kwagh kpoghuloo ve se eren kwagh sha mimi ye. (2 Tim. 3:2) Nahan kpa, aluer se mba cian Yehova sha gbenda u vough yô, imoshima yase i Bibilo i tsaase i la man mkom u kwagh a kuman se la una wase se u zan hemen u eren kwagh sha mimi ken tar u i eren kwagh sha anyighe ne. Shi se hemba lun vea Yehova, u a lu ‘orperapera shi perapera a doo Un ishima’ la kôôsôô cii.—Ps. 11:7.

[Ngeren u shin kpe]

[Ufoto u sha peeji 7]

Mcie u cian Aôndo sha gbenda u vough la ngu a na se hemba kangen ishima ser se eren kwagh sha mimi cii

[Foto u sha peeji 8]

Ieren yase i mimi la i ve Yehova a icivir