Ne Icombor I Mbakristu, “Kohol Nen Iyol”
Ne Icombor I Mbakristu, “Kohol Nen Iyol”
“Kohol nen iyol . . . ; gadia ka hen shighe u ne ver ishima ga la, man Wan u or Una va ye.”—LUKA 12:40.
1, 2. Er nan ve i gbe u se dondo kwaghwan u Yesu u a kaa ér “kohol nen iyol” laa?
“ZUM u Wan u or Una va sha iengem Na,” una pav [“ior] kposo” la, kwagh wou man u tsombor wou una lu nena? (Mat. 25:31, 32) Er kwagh ne una er hen shighe u se ver ishima ga la yô, ka a inja kpishi u se wa ikyo sha kwaghwan u Yesu u a kaa ér “kohol nen iyol” la!—Luka 12:40.
2 Ngeren u karen la pase er hanma or hen tsombor nana wase tsombor jimin cii u lun per ken jijingi, sha u eren tom u nan sha gbashima yô. De se time nen sha igbenda igen i se fatyô u wasen tsombor wase u taver ken jijingi yô.
Ishe You I Lu “Dedoo”
3, 4. (a) Gba u icombor i Mbakristu ia kuran sha ci u nyi? (b) Inja i u veren ishe yase lun “dedoo” la ér nyi?
3 Saa icombor ia ver ishima sha er kwagh môm una dan i sha mcivir u mimi ga ve, ia fatyô u wan iyol keghen mve u Kristu ye. Gba u vea kuran sha er kwagh a dan ve ga yô. Er uyôughyôughmbaakaav mba keren ve hingir kwaghhônon hen icombor kpishi yô, nenge ase kwagh u Yesu yange ôr sha kwagh u ishe yase lun “dedoo” la. (Ôr Mateu 6:22, 23.) Di er imenger ka i ta iwanger sha gbenda wase, se zende a u gban shio nahan, kwagh u se kenger sha ‘ashe a asema a ase’ a sha injakwagh la, una fatyô u seer se mkav, nahan wasen se u eren kwagh palegh gbev mbu nôngon.—Ef. 1:18.
4 Cii ve ishe i kpôô kpôô ia nenge kera wang yô, saa ia er tom tsembelee shi ia hôn sha kwagh u i lu kenger la jighilii. Ashe a ishima kpa kape kwagh u a a lu je la. Inja i ishe yase i sha injakwagh la lun dedoo yô, ka u veren ishima sha awashima môm. Ishima nyian se sha kwagh u ugbayol mba tsombor wase ka karen ikyaa inya ga, shi se mba haren uma wase cii sha akaa a yolough ga, kpa ka se ver ishe yase sha akaa a ken jijingi jighilii. (Mat. 6:33) Kwagh ne tese ér akaa a hange hange a se lu a mi la aa kuma se, nahan se mba hembe veren ishima sha mcivir u Aôndo ken uma wase.—Heb. 13:5.
5. Gumkwase ugen yange tese ér “ishe” na hôn sha u civir Aôndo nena?
5 Aluer i tese mbayev u veren ishe ve dedoo yô, kwagh u dedoo una due ker kpen kpen! Nenge ase kwagh u gumkwase ugen ken tar u Etiopia. Yange fa takerada kpishi, je yô, shighe u lu been kôleeji la, i na un iwasen i zan makeranta u vesen gbilin. Kpa er ishe na hôn sha u civir Yehova yô, a venda iwasen la. Shighe kar kpuaa yô, shi i na un tom u a kimbin un inyaregh ki kuman er ₦625,800 nahan sha uwer yô. Aluer u tôô inyaregh kin u kar sha kwagh u ior kpishi ve ngohol ken tar la yô, ka zege-inyar u numben a mi ga. Kpa ishe i wankwase la hôn sha tom u pania. Yange za pine mbamaren nav cii ve venda tom la ga. Mbamaren nav yange mba va fe kwagh u er ne yô, lu ve ken ishima nena? Yange saan ve iyol kpishi, ve wuese un, shi ve pase un er kwagh u a er a la a doo ve yô!
6, 7. Ka kwaghbo u nyi i gbe u se ‘ver ishima’ sha er una tser se ga?
6 Mkaanem ma Yesu ma i nger ken Mateu 6:22, 23 la ma a icintan ker sha kwagh u hua u eren. Bibilo ôr kwagh u ‘ishe i dedoo’ man ‘ishe i ifer.’ Ishember i ken zwa Grika i í gem ér ‘ifer’ la shi ia fatyô u lun “mtôm” shin “hua.” (Mat. 6:23) Yehova nengen mtôm man hua nena? Bibilo kaa ér: “Kpa idya man hanma inja i hôngorough kua hua u eren [shin “mtôm,” NW] yô, u teren tsô kpaa, de teren her a ven ga.”—Ef. 5:3.
7 Er alaghga a lu se zange u nengen ser mbagenev wa hua nahan kpa, se ayol a ase di yô, ka i gema i taver se u nengen a ieren la ken a vese. Sha nahan yô, doo u se er kwagh sha kwaghfan, se dondon kwaghwan u Yesu ne, ér: “Ver nen ishima, kura nen ayol a en sha hanma hua” u eren cii. (Luka 12:15) U se̱ er kwagh ne yô, a gba u se tôv ayol a ase se fa akaa a se ver asema ase sha mi la. Doo u icombor i Mbakristu ia hen sha kwagh u shighe man inyaregh ki i vihin sha iemberyolough man ahumbe a man kua u yamen ikyav la dedoo.
8. Shighe u se lu yamen kwagh yô, gba u se ‘ver ishima’ nena?
8 U yamen kwagh hemba di u henen tsô wer u ngu a inyaregh kuma u yamen ma kwagh shin u ngu a mi kuma ga la. Tôô shighe hen sha akaa a a dondo ne kpaa: ‘Me zua a shighe u eren tom a kwagh u m lu yamen ne shi veren ishima sha mi je kpa? A tôôm shighe nena ve me fa u eren tom a mi tsembelee? Ne agumaior, de ne nen hanma kwagh u tar u yôôn sha u ior ve yam la jighjigh ga, sha er ne va yem zendan akondo a taver ishe shin akaa agen a i yôôn la gbilin gbilin ga yô. Kôr nen iyol tsaha. Shi hen nen er ne yam ma kwagh ve, una bende a mkegh u tsombor wen u lu keghen mve u Wan u or la yô. Na nen ityendezwa i Yehova a er ér: “Mayange Me undu u ga, Me kende u kpaa ga” la jighjigh.—Heb. 13:5.
Ker u Eren Akaa a ken Jijingi
9. Aluer icombor ngi keren u eren akaa a ken jijingi yô, á wase i nena?
9 Kwagh ugen u mba hen tsombor vea er ve jighjigh u nan ve una hemba taver shi vea wase tsombor cii ua lu kundu kundu yô, ka u tsuan akaa a ken jijingi a vea er yô, shi keren u eren a kpaa. Kwagh la una wase icombor u fan aluer mba zan hemen ken mcivir u Yehova yô, shi vea kar vea fa akaa a a hembe lun a inja la.—Ôr Mbafilipi 1:10.
10, 11. Kanyi akaa tsombor wou u tsough u erene, man kanyi akaa ne we ishima u va tsuan ken hemene?
10 U tsuan akaa a kiriki a hanma or hen tsombor nana fatyô u eren la je kpa, una va a mbamtsera kpishi je. U tesen ikyav yô, vea fatyô u tsuan ér vea timen sha ivur Ruamabera ayange ayange. Mkaanem ma mba hen tsombor ve lu ôron shighe u timen sha ivur Ruamabera la, ma a wase orya la u kaven mdoo u Yehova a doo ve ishima la kua er ve fe mimi i kom ve la kpaa. Tsombor ka ua tsua u ôron Bibilo imôngo hanma shighe yô, kwagh la a wase mbayev u seer fan takerada u ôron shi ve kav Bibilo kpa ve seer. (Ps. 1:1, 2) Shi doo u se tsua ser se ker igbenda i se seer fan msen u eren ga he? U umen avegher a ityamegh ki jijingi seer la kpa, ka kwagh u injaa ugen u se fatyô u tsuan ser se er yô. (Gal. 5:22, 23) Man hide sha kwagh u keren gbenda u zungwen a ior mba se zuan a ve ken kwaghpasen wase la di ye? Aluer tsombor cii ngu nôngon u eren kwagh ne imôngo yô, a wase mbayev vea hen u zungwen mhôônom, shi a hemba lun ve ican ga u lun a isharen i lun upania mba keke shin mbamishen.
11 Er nan u tsough akaa a we man tsombor wou ne fatyô u eren la ga? Tsombor wou ua fatyô u tsuan ér ua seer shighe u ú pasen kwagh la je he? Ne fatyô u keren gbenda sha er ne bee a ishimanyian sha kwagh u pasen kwagh sha telefon shin sha godobi shin hen ijiir i í eren kpenga her kpa? Man u yemen hen ape kwagh a hembe gban sha mbapasenkwagh mba Tartor la di ye? Ma or hen tsombor nana fatyô u henen zwa ugen sha er nana pase mba ve dugh ken tar ugen la kwagh je he?
12. Kanyi mba ve lu ityough hen tsombor vea er sha u wasen tsombor ve u vesen ken jijingii?
12 Er u lu ityough ki tsombor wou yô, ter igbenda i u nenge wer tsombor wou ua seer vesen ken jijingi yô. Maa tsua akaa a ne er ve aa wase ne u seer vesen ken jijingi la. Akaa a tsombor wou cii u tsough u eren la, i̱ lu akaa a hanma or nana fatyô u eren er tahav mbu nan mbu kom man er mbamlu mba nan ve lu la. (Anz. 13:12) Akperan nga ga, ka i tôô shighe ve i er kwagh u injaa ye. Nahan pande nen shighe u ne nengen televishen la, gema na nen sha u eren akaa a ken jijingi. (Ef. 5:15, 16) Nôngo tsung er u er kwagh u ú tsough sha ci u tsombor wou la. (Gal. 6:9) Tsombor u ú keren akaa a ken jijingi yô, ua na “ior cii vea nenge a mzehemen” u ú.—1 Tim. 4:15.
Za Nen Hemen u Eren Mcivir u hen Tsombor Aikighe
13. Ka mgem u nyi yange i due a mi sha gbenda u eren mbamkombo mba tiônnongo ken hanma kasua la, man ka mbampin mba nyi i doo u se time sha mini?
13 Kwagh u injaa u una wase icombor u ‘kohol iyol’ sha mve u Wan u or yô, ka mgem u yange i gema gbenda u eren mbamkombo, hii ken uwer u Janawari 1, 2009 la. Hegen kera gba u se kohol imôngo sha iyange igen kposo sha u eren mkombo u yange i yilan ér Takerada u Henen ken Tiônnongo la ga. I magh mkombo ne hegen vea Makeranta u Henen Tom u Hemen u Aôndo man Mkombo u Henen Tomshiren la. Yange se gema kwagh ne nahan sha er icombor i Mbakristu ia zua a ian i wan mlu ve u ken jijingi inyatine, sha u veren iyange i môm ken kasua, eren mcivir u hen tsombor aikighe yô. Er yange se gema kwagh ne, shighe a we karen hegen ne, se fatyô u pinen ayol a ase ser: ‘M ngu eren Mcivir u hen Tsombor u aikighe la shin m ngu henen kwagh sha tseeneke wam a shighe ne kpa? M ngu eren kwagh sha u kuren awashima u mgem la kpa?’
14. (a) Ityôkyaa i vesen i môm i zan hemen u eren Mcivir u hen Tsombor aikighe shin henen kwagh sha tseeneke yô kanyi? (b) Er nan ve u veren ma aikighe sha u henen kwagh la i lu kwagh u hange hangee?
14 Ityôkyaa i vesen i eren Mcivir u hen Tsombor aikighe shin henen kwagh sha tseeneke yô, ka u wasen se u seer kporom hen Aôndo. (Yak. 4:8) Ka sea tôôn shighe sea henen Bibilo hanma shighe shi sea seer fan Orgban se yô, ikyaryan yase vea na i seer doon. Aluer se mba kporom ikyua a Yehova seer a seer yô, se hemba zuan a ityôkyaa i soon un ‘sha ishima yase cii, man sha uma wase cii, man sha mfe wase cii kua sha agee ase cii.’ (Mar. 12:30) Sha mimi yô, doo se u ungwan imo i Aôndo shi lun mba kaven un kpaa. (Ef. 5:1) Sha nahan yô, u eren Mcivir u hen Tsombor aikighe hanma shighe la, ka kwagh u hange hange u una wase hanma or hen tsombor u ‘kohol iyol’ ken jijingi, er se lu keghen “zegecan” i í tsengeôron kwagh u i̱ la yô. (Mat. 24:21) Ka kwagh u hange hange u i gbe u se er ve se war yô.
15. Mcivir u hen Tsombor u aikighe la una wase mba hen tsombor sha gbenda u ve nengen ayol a ve la nena?
15 Ityôkyaa igen kpa ngi, i í ver Mcivir u hen Tsombor yô, ka u wasen mba hen tsombor u kporom ikyua a ayol a ve. Aluer hanma kasua yô, tsombor ngu vihin shighe imôngo sha u lamen sha akaa a ken jijingi yô, kwagh la una wase mba hen tsombor kpishi sha gbenda u ve nengen ayol a ve la. Nom man kwase ka vea henen kwagh imôngo ken Bibilo, vea zuan a iember yô, mlu ve a hemba lun kangenaa. (Ôr Orpasenkwagh 4:12.) Mbamaren man mbayev mba ve eren mcivir imôngo yô, vea hemba lun imôngo ken dooshima, u a lu “kwagh u maghen mlu u vough” la.—Kol 3:14.
16. Pase er anmgbianev mba kasev utar ve lu zuan a iwasen sha u veren shighe aikighe, henen Bibilo yô.
16 Nenge ase er anmgbianev mba kasev utar mba ken tiônnongo yange ve zua a iwasen sha kwagh u veren aikighe môm sha ci u henen Bibilo yô. Shin er kasev mba côgholov mba kaven ishigh mban lu anmgbianev mba sha ngô shin sha ter ga nahan kpa, ve lu hen gar môm shi ve lu azende a dedoo anyom imôngo. Er sar ve u hemban lun imôngo shi sar ve er mlu-imôngo ve la a̱ lu ve a iwasen ken jijingi, i̱ de lu di u keren msaanyol tseegh ga yô, ve ver shighe u zuan imôngo henen Bibilo aikighe. Ve hii u henen Bibilo a takerada u “Bearing Thorough Witness” About God’s Kingdom la. Môm ken a ve kaa ér: “Kwaghhenen wase ka a maa se iyol je, nahan ka se shi her i hemba ihwa i môm. Ka se nôngo u nengen a kwagh u anmgbianev asev mba sha derianyom u hiihii yange ve lu ker la ken ishima, nahan se lam sha kwagh u se kpa se lu ken imba mlu la ve se er yô. Maa se nôngo u eren kwagh u se hen ken kwaghhenen wase la shighe u se dugh kwaghpasen yô. Kwagh ne na yô, tom wase u pasen kwagh shi geman ior hingir mbahenen la maa se iyol hemba ave a tse.” Dugh u maan ve ken jijingi la sha yô, kwaghhenen la wase azende a atar ne hemba ngan ikyua a ayol a a. Ve kaa ér: “Ian i henen kwagh aikighe ne gba se kwagh kpen kpen.”
17. Kanyi akaa aa na Mcivir u hen Tsombor u aikighe la una za a doo?
17 We di ye? U ngu zuan a iwasen ken shighe u ú ver aikighe sha u eren mcivir u hen tsombor shi henen kwagh sha tseeneke wou la nena? Aluer ne mba eren kwagh ne tsere tse tsere yô, kwaghhenen la una lu a iwasen er se ver ishima la ga. Hanma or hen tsombor nana kegh iyol u henen kwagh hen shighe u i ver la. I̱ de den ér akaa a kiriki a va tagher kwaghhenen u aikighe la ga. Heela tseegh ga, kwagh u i tsough u henen la, i̱ lu kwagh u una wase mba hen tsombor wou ken uma ve u ayange ayange yô. U er nan ve kwaghhenen la una maa hanma or iyoloo? Ker igbenda i tesen kwagh i injaa, shi eren nen kwagh hen kwaghhenen la sha icivir man ken bem kpaa.—Yak. 3:18. *
“Lun Nen Per” shi “Kohol Nen Iyol”
18, 19. Gba u mfe u ú fe wer mve u Wan u or mgbôghom la una wase u kua tsombor wou nena?
18 Mvihi u tar ne u lu vihin seer a seer ken ayange a ase ne, ka ikyav i tesen wang ér tar u bo u Satan ne nyôr ken ayange a u a masetyô, hii ken inyom i 1914 la je. Armagedon kera shi ica ga. Shi côhiin tsô shighe a kuma u Wan u or una va a mtim u Yehova sha mbavendan Aôndo. (Ps. 37:10; Anz. 2:21, 22) Er u fe kwagh ne nahan yô, doo u una wase u kua tsombor wou ga he?
19 U ngu dondon kwaghwan u Yesu sha u veren ishe you lun “dedoo” kpa? Er ior i tar ne i lu zendan inyaregh man gwa man tahav nahan kpa, tsombor wou ngu zendan akaa a ken jijingi kpa? Mserakaa u eren Mcivir u hen Tsombor aikighe shin henen kwagh sha tseeneke la ngu wasen we kpa? U ngu zuan a mtsera u i we ishima ér u zua a mi la kpa? Er i pase ken ngeren u karen la nahan, u ngu eren tom wou u nom shin kwase shin wan, nahan wasen tsombor jimin cii u ‘lun per’ kpa? (1 Tes. 5:6) Aluer ka nahan yô, ne ‘kohol iyol’ sha ci u mve u Wan u or.
[Ngeren u shin kpe]
^ Wea soo u fan kwagh u á hen kua gbenda u a er Mcivir u hen Tsombor u aikighe la ve una wase tsombor shi una maa hanma or iyol yô, ôr Iyoukura i Oktoba 15, 2009, peeji 29-31.
Ú Hen Nyi?
• Pase er icombor i Mbakristu ia ‘kohol iyol’ sha u . . .
lun a ishe i “dedoo” yô.
tsuan akaa a ken jijingi a vea er la shi vea eren a yô.
zan hemen u eren Mcivir u hen Tsombor u aikighe la yô.
[Mbampin mba ngeren u henen]
[Foto u sha peeji 13]
Ishe i “dedoo” ia mgbegha se u vendan akaa a taregh a danen or la