“Orkuran u Dedoo man Ijende i Doon Ishima”

JOHN (JACK) BARR, u lu môm ken Mbahemenev mba Shin Tine mba Mbashiada mba Yehova la, yange kure tom na shin tar ne sha iyange i Sati pepe, Disemba 4, 2010; lu anyom 97. I ôr kwagh na ér lu “orkuran u dedoo man ijende i doon ishima.”

Yange i mar Anmgbian Barr ken gar u Aberdeen, ken tar u Scotland, mbamaren nav mar ônov utar, un lu wan ve u masetyô. Ter na man ngô na cii lu mba i tsegha ve sha jijingi, u yemen sha yô. Ashighe kpishi Anmgbian Barr yange a ôr kwagh u mlu na hen tsombor na shighe u lu wanye la sagher sagher, lu a iwuese kpishi sha ikyav i injaa i mbamaren nav mba doon un ishima ver un la.

Anmgbian Barr va hiin u wan ikyondo yô, í taver un tsung u lamen a ior mba á vande fan ve ga yô. Kpa, yange nôngo kpoghuloo sha er una hemba zayol la yô, nahan sha iyange i Lahadi ugen atetan, ken inyom i 1927, shighe u lu anyom 14 la, a kaa a ter na ér un soo u dondon un za pasen kwagh sha uya uya. Lu mhii u mcivir u yange civir Yehova anyom kpishi la je la. Hii sha iyange la zan zan ku na, Anmgbian Barr lu orpasen loho u dedoo u tseen ishima.

Shighe u anmgbian Barr lu gumor la, aikyôr ugen u vihin tsung, war wuan ngô na u doon un ishima la. Kwagh ne na yô, Anmgbian Barr,hen sha kwagh u awashima u uma, nahan ken inyom i 1929 la, a tsegha iyol na sha ci u Yehova, ian i hiihii ngi gbe je maa, a tese ikyav i iyoltseghan la ken inyom i 1934. Ken inyom i 1939 la, a hingir u za eren tom shin Betel u ken London, ken tar Ingila. Lu mhii u tom na u pasen kwagh hanma shighe, u a er anyom 71 je la.

Sha iyange i Oktoba 29, 1960 la, Anmgbian Barr vôso Mildred Willet, kwase u tseen ishima, u vande eren tom pania man tom mishen ica i gba yô, á yila ivese na ne ér “ikyaryan i injaa tsung.” Yange i fa Anmgbian Barr vea kwase na ér mba ior mba veren ikyav i dedoo shi soon ayol a ve tsung, shi ve lu nahan zan zan Mildred kar kuren tom na shin tar ne ken uwer u Oktoba, 2004. Hanma iyange cii yô, Anmgbian Barr vea kwase na yange ve ôr ivur i Ruamabera imôngo.

Mba yange ve fa un yô, iti na i Jack la ia umbur ve kwagh u or u yange a wa ior kwagh u una wase ve yô, shi hanma shighe yô, a wa or kwagh kundu kundu, zôhôn a zôhô ga, shi kwaghwan na á har sha Ruamabera. Lu or u eren tom taveraa shi lu orkuran u wan mbagenev ikyo man u lun a dooshima shi lu ijende i mimi kpaa. Mkaanem nam ken mbamkombo man akaaôron a na kua mbamsen nav yange ve tese mdoo u mimi doo un ishima tsung la, kua mlu na u lu vea Yehova kôôsôô la kpaa.

Shin er i vihi se er Anmgbian Barr a kera lu a vese shin tar ne ga nahan kpa, se ember a na imôngo sha mngohol u a ngohol iyua i uma u kpen ga la, ka ian i icivirigh i yange ver ashe a mi shi ashighe kpishi a ôr kwagh a mi kpaa yô. Lu kwagh u hemba gban un kwagh je la.—1 Kor. 15:53, 54. *

[Ngeren u shin kpe]