“Ú Za Ikyura” Nena?
“Ú Za Ikyura” Nena?
ISHEMBER i “mzeikyura” la ka ishember i i doo ior kpishi yô! Ior mbagenev za ikyura ken kpenga u eren, nahan ve hingir u lun a inyaregh kpishi shi duen ati. Mbagenev di yô, tôm mzeikyura je, kpa ve tsa ve za ikyura ga.
Ashighe kpishi yô, ka kwagh u ú hembe nan ishima u eren ken uma wou la ngu a na ú za ikyura ye. Akaa agen ahar a mzeikyura a har sha mi yô, ka gbenda u u eren kwagh a shighe wou kua agee a ou la, man kwagh u ú kar a ishima ú er shin ú er ga la.
Mbakristu kpishi nenge ér ka vea pasen kwagh kpoghuloo yô, ve zua a msaanyol u vesen. Tom u pania wase agumaior man mbaganden mba ve eren u sha gbashima la u zan ikyura. Nahan kpa, alaghga mbagenev vea nenge ér tom u pasen kwagh la war ngun ve ican, nahan ishima ia hemba lun ve sha akaa a ve aa tom ne. Kwagh ne una fatyô u eren sha ci u nyi? Kanyi ú er ve u hunde ishima a kwagh u a lu u injaa jim jim la ga? Man u er nena ve ‘ú za ikyura sha igbenda youwe’?—Yos. 1:8, NW.
Ityom Igen man Akaa a Ka U Eren Shighe u Ú Memen La
Gba u agumaior a ken Kristu aa za hemen u lun a mnenge u vough sha kwagh u civir Aôndo u mimi man akaa agen a ve eren la. Mba ve eren nahan la mba zan sha gbenda u vea za ikyura ken uma ve yô, shi ve kuma iwuese kpishi je.
Nahan kpa, agumaior a ken Kristu agen hingir u tumen ityough ken ityom igen kua akaa a ka ve eren shighe u ve memen la. U eren ambaakaa la nahan ka kwaghbo keng ga. Nahan kpa, doo u agumaior a ken Kristu aa pine ayol a ve ér: ‘Akaa ne nga tôôn mo shighe ka kom nena? Man ka ambaaior a nyi nahan m eren akaa ne a ve imôngoo? Ka anza a nyi nahan ior mba m eren akaa ne a ve imôngo la ve lu a mini? Shi kanyi akaa ne aa na me hingir u veren ishima sha mi ken uma wama?’ Alaghga u kav er or a fatyô u nyôron iyol ken ambaakaa la cor-cor je nana kera lu a shighe kua agee a nana za hemen u civir Aôndo ga yô. Nahan u mase nengen er i hii ve i lu a inja u ú tsua akaa a hange hange ken uma wou yô.—Ef. 5:15-17.
Nenge ase kwagh u orgen u yer iti na ér Wiktor la. * A kaa ér: “Shighe u m lu anyom 12 la, m nyôr nongo a mba gbidyen bol u sha ave u i yer ér volleyball la. Shighe kar yô, m ya uiyua kpishi. M lu sha ian i me za iti ken iniumbe ne kpishi yô.” Shighe karen yô, ishima gba zan Wiktor iyol sha kwagh u gbenda u iniumbe i yange eren la bende a mlu na u ken jijingi la. Iyange igen, ngur nôngon ér una ôr Bibilo yô, mnyam kar un. Shi a umbur er yange un zuan a iember ken tom u pasen kwagh la cuku tseegh yô. A kaa ér: “Iniumbe la yange beem agee iyol cica, shi ica i gba ga tsô m kav er i̱ lu yangen mo u eren akaa a ken jijingi sha gbashima yô. Yange m fa er m kera lu civir Aôndo sha afatyô wam cii ga yô.”
Makeranta U Seer Henen
Gba u Orkristu nana kura tindi u Ruamabera sha u nengen sha tsombor u nan, man kwagh la wa u nengen sha ugbayol mba tsombor la ker. (1 Tim. 5:8) Nahan kpa, mimi je, saa or nana zua a digirii ken yunivasiti shin imakeranta i vesen igen ve nana er kwagh ne yee?
Doo u se time sha gbenda u makeranta u vesen u se za la ua bende a mcivir u se civir Yehova la. De se tese ikyav i kwagh ne sha orgen u Ruamabera a er kwagh na yô.
Baruki lu akawe u profeti Yeremia. Sha shighe ugen la, Baruki kera ver ishima sha ityom i yange eren ken mcivir u Yehova la ga, kwagh hingir u hangen un. Yehova gema fa kwagh ne, nahan a ta un icin sha ikyev i Yeremia ér: “U ngu keren akaa a vesen sha ci wou iyol youwe? De kera keren a ga.”—Yer. 45:5.
Lu “akaa a vesen” a nyi Baruki lu kerene? A shi nan kpa yange soo u keren ér iti na i za gwa hen ityô i Mbayuda. Gayô, alaghga akaa a vesen shon lu uyôughyôughmbaakaav. A lu nyi kpa, yange kera ver ishima sha akaa a a hemba lun a inja la ga, akaa a yange lu wasen un u lun ikyua a Yehova la. (Fil. 1:10) Nahan kpa, ikyav tese ér Baruki ungwa icin i Yehova ta un sha ikyev i Yeremia la, nahan a war mtim u Yerusalem la.—Yer. 43:6.
Se fatyô u henen nyi ken kwagh ne? Kwaghwan u i wa Baruki la tese ér yange kwagh za iyol. A lu keren akaa a vesen sha ci na iyol na. Aluer u ngu a ma kwagh u koson iyol you a mi kpa, saa u za vihi shighe kua inyaregh man agee a ou sha u seer henen makeranta wer u lu a icivir shin u lu kwagh u mbamaren ou shin anmgbianev ou mbagenev ve soo ér we u lu yôô?
Nenge a ase kwagh u Grzegorz, orgen u dughun igbenda i kômputa una eren tom la. Er mba ve eren tom ijiir i môm a na zer tuur un ken ityô ér a za seer henen tom la yô, a za hingir u wan ityough ken kwaghhenen la. Ica i gbe ga yô, kera lu a shighe u eren akaa a ken jijingi ga. A kaa ér: “Ma shighe môm kpa m lu zuan a mmem ken uma wam ga. Imoshima yam lu memen mo ga sha ci u m lu fantyô u eren akaa a ken jijingi a yange m tsua u eren ken uma wam la ga.”
U Wan Ityough ken Tom
Mkaanem ma Aôndo wa Mbakristu kwagh ér ve lu mbashirentom sha gbashima shi mba i tee a tôô ve tom shin ve lu mbavesen hen tom kpa ve eren kwagh sha inja. Apostoli Paulu nger ér: “Hanma kwagh u ne eren cii yô, eren nen un, i̱ lu sha ishima i môm er ka sha ci u Ter nahan, i̱ de kera lu sha ci u ior ga.” (Kol. 3:22, 23) Er i lu a inja u eren tom sha gbashima nahan kpa, kwagh ugen ngu u a hembe ngula yô, ka u yan ikyar a Orgban se la kôôsôô je la. (Orpa. 12:13) Aluer Orkristu hingir u wan ityough ken tom u nan yô, nana ngôôr tôôn ishima sha akaa a ken jijingi a nan tsough u eren la kera ga.
Tom u eren tumen ityough la ua na Orkristu nana kera za hemen u eren akaa a ken jijingi sha inja vough vough shi wasen tsombor u nan ga. Tor Solomon yange kaa ér “ave ahar a a iv a ican” la ka “u zendan ahumbe ityô” tsô. Aluer Orkristu wa ityough ken tom u nan yô, iyol a nyoon nan tsusee gbem. Imba or la ia fatyô u hingir kpan u tom zan zan je yô, nana kera va lu a agee iyol ga shin tom la ua ngôôr guren nan ga. Aluer nan va hingir nahan yô, shi nana fatyô u ‘ember shi a doo nan iyol ken tom u nan ye ican sha mi la cii’ je he? (Orpa. 3:12, 13; 4:6) U hemban cii yô, shi nana shi a tahav iyol kua gbashima a kuma u eren ityom i nan i hen tsombor kua ityom i ken jijingi je he?
Orgen ngu sha ityoughkitaregh ki veghertar u Yuropa, mba yer iti na er Janusz; yange hingir u tumen ityough ken tom sule na u a eren sha tôndo la. A kaa ér: “Ior mba ken tar yange ve soo kwagh wam kpishi sha ci u yange m fa igbenda i nôngo a mbamzeyol kpishi shi hanma tom u yange a nam yô, m er m bee. Kpa m gema m gba ijime sha akaa a ken jijingi, shi m de u pasen kwagh kpaa. Ica i gbe ga yô, m de u zan mbamkombo. M hingir u moron iyol je huren kwaghwan u mbatamen kera shi m undu tiônnongo kpaa.”
U Fatyô u Zan Ikyura ken Uma Wou
Se time sha akaa atar, a Orkristu nana wa ityough ker ve mlu u nan u ken jijingi una vihi yô. U nyôr iyol ken mô ken akaa nee? Aluer ka nahan yô, mbampin mba ve dondo shin heen ne kua avur a ken Ruamabera man mbamlumun mba i ne sha mi la vea wase u u̱ fan, aluer mimi je u ngu zan sha gbenda u zuan a mzeikyura yô.
Ityom igen man akaa a ka u eren shighe u ú memen la: U wa ityough ken ambaakaa la nena? Akaa ne nga yan we shighe u ú ne sha u eren akaa a ken jijingi laa? Ka hembe doon we u lun vea mba u eren akaa ne a ve imôngo la a u lun vea mbananjighjigh a we imôngoo? Aluer ka nahan yô, er nan u dondo ikyav i Tor Davidi, u yange zamber a Aôndo ér: “Tesem gbenda u me za yô” la ga?—Ps. 143:8.
Ortamen u zenden sha ugen yange wase Wiktor, u se vande teren kwagh na la. Ortamen la kaa a na ér: “Ka u ôr kwagh u bol u ú gbidyen la sagher sagher je.” Wiktor kaa ér: “Kwagh la yange tenger a mo. M kav er yange m wa ityough ken iniumbe la kaa ikyaa inya yô. Ica kera gba ga je maa m due nongo a mba gbidyen bol la, m undu azende a am a ken tar la, m va kôr azende ken tiônnongo.” Nyian ne, Wiktor ngu civir Yehova sha gbashima ken tiônnongo na. A wa kwagh ér: “Pine azende a ou shin mbamaren ou gayô mbatamen mba ken tiônnongo wou ve pase u aluer ve nenge ér akaa agen a u eren la nga wasen we u seer kporom ikyua a Yehova shin nga paven we a pav a na yô.”
Er nan u pase mbatamen mba ken tiônnongo wou wer sar u u̱ seer eren ityom ken mcivir u Aôndo ga? U fatyô u wasen mbabeenyol mba i gbe u a wasen ve shin a luun a ve imôngo la, er u wasen ve ityom igen hen ya shin za yamen ve akaa ken kasua nahan je he? Wea lu wanye shin organden kpa, u fatyô u nyôron iyol ken tom u pania, nahan pasen mbagenev ityôkyaa i iember you.
Makeranta u seer henen: Yesu yange ta icin sha kwagh u ‘or keren icivir i nan’ la. (Yoh. 7:18) Wea tsua u henen makeranta za kighir han han kpa, u ‘kar u fa akaa a a hembe lun a inja’ la je he?—Fil. 1:9, 10.
Grzegorz, or u dughun igbenda i kômputa una eren tom la yange de akaa agen ken uma na. A kaa ér: “Yange m ngohol kwaghwan u mbatamen a ishima yam i môm, nahan m gema eren akaa ken uma wam akuma akuma. M kav er ityôkyaa lu i me za hen makeranta me seer ga yô. Kwagh la yange ma na ma m kera lu a shighe kua agee a civir Yehova ga.” Grzegorz yange hemba nan iyol na sha u eren ityom i ken tiônnongo. Shighe kar yô, a za bee Makeranta u Tsaase Mbashiren Tom, u i gem yilan hegen ér Makeranta u Henen Bibilo Ú sha ci u Anmgbianev mba Nomso Mba Lun Kwav la. Sha kpôô yô, yange ‘wa ian na ikyo’ sha u seer zuan a ityesen i Aôndo.—Ef. 5:16.
Tom: U wa ityough ken tom wou je u goom mcivir u Yehova anbyôr udamaa? U tee shighe naleghaa u lamen a tsombor wou je he? Shi akaaôron a ou a nan ken mbamkombo mba tiônnongo nga doon seer a seer kpa? Hide sha kwagh u lamen a mbagenev sha gbenda u maan ve a maa la di ye? “Cia Aôndo, waan atindi Na ikyo,” nahan Yehova a̱ na u iveren mgbeghaa shi i̱ ‘kpe uma wou iyol ken tom wou u sha ican la.’—Orpa. 2:24; 12:13.
Janusz, u se vande teren kwagh na la yange za ikyura ken tom sule na la kpishi ga; gema gba bo ken tom la. Kera lun a kobo ga yô, a cin a hide hen Yehova a anzô iyol poo. Janusz sôr akaa a na ver sha inja vough shi hegen ngu eren tom u pania shi ngu ortamen ken tiônnongo kpaa. A kaa ér: “Ka mea lu a akaa a hange hange tseegh kpa i kumam, shi mea eren ityom i ken jijingi a agee am yô, m zua a mmem ken ishima, ishima i kera nyian mo sha ma kwagh ga.”—Fil. 4:6, 7.
Tôô shighe hen sha mbaawashima ou man akaa a a hembe gban we kwagh la sha mimi. U civir Yehova la ka gbenda u zuan a mzeikyura u been mayange ga. Mcivir u Yehova a lu tamenkwagh ken uma wou.
Alaghga a gba u ú nyôôso akaa agen ken uma wou, je u de u eren akaa a a lu a hange hange ga la kuaa sha er u kar er “ishima i Aôndo i lu yô man kwagh u a doo man a kom u lumun un man shi a lu vough la kpaa yô.” (Rom. 12:2) Kpa u fatyô u ‘zan ikyura’ sha u civir un a ishima i môm.
[Ngeren u shin kpe]
^ Í gema ati agen.
[Ngeren u kiriki/Foto u sha peeji 31]
Ú Er Nan Ve U Za Ikyura?
Er akaa a aa fatyô u yan we shighe a lu kpishi yô, kanyi i gbe u ú er ve u hunde ishima a kwagh u a lu u injaa jim jim la ga? Tôô shighe time sha mbaawashima ou man akaa a a hembe gban we kwagh la sha u gbidyen kwar sha mbampin mban:
ITYOM IGEN MAN AKAA A KA U EREN SHIGHE U Ú MEMEN LA
▪ Ka anza a nyi nahan ior mba u eren akaa ne a ve imôngo la ve lu a mini?
▪ Akaa ne nga tôôn we shighe ka kom nena?
▪ U va hingir u veren ishima sha akaa ne tseegh ken uma wouwee?
▪ Akaa ne nga yan we shighe u ú ne sha u eren akaa a ken jijingi laa?
▪ Ka ambaaior a nyi nahan u eren akaa la a ve imôngoo?
▪ Ka hembe doon we u lun vea mba u eren akaa ne a ve imôngo la a u lun vea mbananjighjigh a we imôngoo?
MAKERANTA U SEER HENEN
▪ Aluer u ngu a ma kwagh u koson iyol you a mi kpa, saa u za vihi shighe kua inyaregh man agee a ou sha u seer henen makerantaa?
▪ Mimi je, saa u zua a digirii ken yunivasiti shin makeranta u vesen ugen ve u nenge sha iyol you yee?
▪ Kwagh la una bende a mkombo wou u zan nena?
▪ U ‘kar u fa akaa a a hembe lun a inja’ la je he?
▪ U nenge wer gba u ú seer lun a vangertiôr ken tahav mbu Yehova a lu a mi u koson we laa?
TOM
▪ U zough a ian ken tom wou sha er u ‘ember shi a doo u iyol ken tom wou u u ye ican sha mi la cii’ je he?
▪ U ngu a tahav iyol kua gbashima her kuma u eren ityom you i hen tsombor shi eren ityom i ken jijingi je he?
▪ U tee shighe naleghaa u lamen a tsombor wou je he?
▪ U wa ityough ken tom wou je u goom mcivir u Yehova anbyôr udamaa?
▪ Akaaôron a ou a nan ken mbamkombo mba tiônnongo nga doon seer a seer kpa?
[Foto u sha peeji 30]
Yehova yange ta Baruki icin sha mker u lu keren akaa a vesen sha ci na iyol na la