Er Tom a Intanet sha Kwaghfan

INTANET ka a wase se se nôngo u fan hanma kwagh, sha hanma ijiir man sha hanma shighe cii. Nahan kera kpiligh se iyol er hanma ijiir cii ior ve eren tom a mi sha u samber a ilyoho nahan ga.

Tahav mbu se lu a mi mbu lamen a mbagenev la ka iyua i kpiligh iyol i Orgban se a ne se yô. Iyua ne ka i wase se u pasen mbagenev mbamhen asev shi ôron ve ilyoho. Yehova yange lu or u hiihii u lamen a tsombor u uumace. Yange pase ve kwagh u vea er ve uma ve una lu a inja la wang. (Gen. 1:28-30) Kpa, se fatyô u eren kwagh a iyua ne sha gbenda u vough ga kpaa? Lu kwagh u er sha mhii u uumace je la. Satan yange ôr Ifa kwagh u mimi ga. Ifa na kwagh u i ôr un la jighjigh je shi ôr Adam. Adam er kwagh u mimi ga u i kaa ér a er ne, nahan kwagh u er la va uumace a ican.—Gen. 3:1-6; Rom. 5:12.

Intanet una fatyô u wasen se u zuan loho u injaa shi una fatyô u wasen se u eren akaa fele kpaa. Nahan kpa, shi una fatyô u tesen se akaa a mimi ga kpaa, shi una fatyô u yan se shighe u ma se er akaa agen a mi la, shi una na a lu se ican ga u kenger akaa a ijimbagh. De se time se fa er se er tom a Intanet sha kwaghfan yô.

Kwagh u I Kaa la Ka Mimi Shin Ka Mimi Ga?

De henen wer hanma kwagh u sha Intanet cii ka u dedoo ga. Shighe u se lu keren akaa sha Intanet yô, se fatyô u zuan a ilyoho i hemban doon cii, shi se fatyô u zuan a ilyoho i hemban vihin kpaa. Doo u se lu tsev tsev, se pav ilyoho i dedoo a i bo la.

Ken inyom i 1993 la, magazin u ior kpishi ve er yô, due a foto u aniwaav uhar mba ve tema hen kômputa yô. Aniwa u môm pase ugen la ér: “Sha Intanet yô, or môm kpa nan fe ér u ngu aniwa ga.” Tsuaa tsuaa la je tsô, Satan yer ken iyô, hii “iliam” a Ifa, a kaa a na ér una fatyô u lun er Aôndo nahan. Nyian ne, or u nan eren akaa sha Intanet cii nana fatyô u sengen ér nan ngu a mfe kpishi shi nan fa u eren ma kwagh tsembelee. Shi ior mba ne ati a ve kpôô kpôô keng ga. Hanma or nana fatyô u ngeren mnenge u nan sha mi shin tindin a loho gayô foto shin duen a mhen u nan soo cii.

De gbe nan kwagh u ú nenge a mi sha Intanet cii jighjigh ave ave je ga. Hii pinen wer: (1) Ka an nan gber kwagh nee? Or shon ka or u se fatyô u nan nan jighjigh  yôô? (2) I gber loho la sha ci u nyi? Kanyi i ne ve or shon nan nger loho shono? Orngeren la ka or u ikyoogh shin nan ngu samber di a samber a mbamnenge mba nan tsô? (3) Or shon nan zua a kwagh u nan nger la hana? Nan pase ape nan zough a kwagh u nan nger la sha er mbagenev vea za ker her kpa? (4) Kwagh u nan nger la zua sha kwagh u hegen kpa? Sha derianyom u hiihii la, apostoli Paulu wa Timoteu kwagh u nyian kpa a lu se a inja kpishi yô. Paulu nger ér: “We, Timoteu, kuran kwagh u i we u sha ikyev la. Palegh ayôôso a dang a gbilinigh la man anyimanakaa a i eren aie sha mi er ka kwaghfan la.”—1 Tim. 6:20.

Intanet Ye Shighe Shin Wasen u Eren Kwagh Kôvora?

Aluer se er tom a Intanet sha kwaghfan yô, una fatyô u panden shighe man agee man inyaregh ki ma se vihi u eren kwagh shon la. Se tema hen ya kpa se yam kwagh a ngôôr se ga. Una fatyô u wasen se u fan ishe kwagh i í hembe gban ijime yô. Ior ka ve tema hen ya, ve kimbi inyaregh sha akaa shi ve tindi mbagenev a inyaregh shi ve er akaa a sha inyar agen sha Intanet, a u zan ken banke shio. Intanet una fatyô u wasen se u wan ago a zan zende fele shi yamen tikeeti kpaa. Shi ka a wase u keren unamba mba telefon mba iorov man mbaadereshi vev kua ajiir a ve kpaa. Afishi a branci a Mbashiada mba Yehova kpishi sha tar nga eren tom a Intanet shi nga zough a iwasen sha mi kpaa.

Kpa kwaghbo ngu ker. U tesen ikyav yô, gba u se hen sha kwagh u shighe u ka se vihi sha Intanet la. Mbagenev ka ve vihi shighe i kar ikyar inyar sha u eren anumbe shin yamen akaa shin lamen shin tindin a ilyoho shin keren akaa gayô gban ningir sha ajiir kposo kposo tsô. Nahan ashighe agen ka ve hungur tsombor ve man azende a ve kua tiônnongo kpaa. Intanet ka a ya ve ishima. U tesen ikyav yô, kwaghtôvon ugen u yange i due a mi ken inyom i 2010 yô, tese ér Intanet ya agumaior ishima ken tar u Korea hemba iorov 18 ken atô u iorov 100. Mba tôvon sha akaa mbagen ken tar u Jamani kaa ér, “iyenge i kasev mba ve lu gban ijir ér Intanet ngu yan noov vev ishima la ngi seer a seer.” Kwase ugen vaa iyol ér, mhar u nom na a har sha Intanet la vihi nom na kpishi je, nahan ivaa ve saa ishe.

Orgen yange nger afishi a branci a Mbashiada mba Yehova agen washika kaa ér un ngu or u Intanet a ngohol un awambe yô. Ayange agen or ne a shi sha Intanet i kuma ahwa pue. A kaa ér, “kwagh ne yange hii di beelee nahan.” Ica i gbe ga yô, a hii u bunden mbamkombo shi de u eren msen kpaa. Yange una za mkombo kpa, a vande wan iyol sha mi ga, a henen sha kwagh u shighe u shi una “hide a za nyôr sha Intanet la” ken ishima. Shighe kar yô, a kav er un lu a zayol u vesen yô, nahan a gema inja. Mayange se vihin nen shighe sha Intanet je u una va ya se ishima ga.

 Kanyi Ka U Kenger sha Intanet?

Bibilo kaa ken 1 Mbatesalonika 5:21, 22 ér: “Karen nen akaa cii, kôr nen u dedoo la gbang je. Nyagh nen hanma inja i kwaghbo cii.” Zum u se kenger ma kwagh sha Intanet yô, doo u se umbur mnenge u Yehova sha kwagh shon. Kwagh u se kenger la a lu u wang, man u a doo sha ci u Mbakristu yô. Ieren i nengen ufoto mba ijimbagh sha Intanet la samber wuee hegen. Aluer se wa ikyo ga yô, kwagh la una nyôr a vese ken zayol fele.

De se hen nen sha mpin ne, sha u wasen se u fan kwagh u i doo u se kenger man u se kenger ga yô, mpin shon yô, ér, ‘Kwagh u m kenger sha Intanet la ka kwagh u kwase wam shin orya wam shin mbamaren av shin anmgbianev av mba ken Kristu vea va nyôr ve me kar a mi sha fele yôô?’ Aluer ka nahan yô, guda se eren akaa sha Intanet shighe u mbagenev ve lu a vese la tseegh. Intanet gema gbenda u ior ve lamen shi ve yamen akaa la vindi vindi. Shi a tese ior gbenda u he u eren idya ken asema a ve kpaa.—Mat. 5:27, 28.

Ka Loho u Nyi i Doo u Se Tindi Mbagenev a Mi?

Ka sea eren akaa sha Intanet yô, ashighe kpishi se tindi ior a ilyoho. Doo u se nenge ser kwagh u se nger shin se tee hen ma ijiir sha Intanet se tindi mbagenev a mi la ka u mimi, shi ka u ijimbagh ga, shi ka kwagh u se lu a ian i tindin a mi yô. * Doo u se hen sha kwagh ne: Loho u se tindi la ua wase mbagenevee? Er nan ve se soo u ôron mbagenev loho nee? Ka di sha u i doo ve tsôô?

Aluer se mba tindin ilyoho sha Intanet sha inja yô, ia lu se a iwasen kpen kpen. Kpa shi se fatyô u pasen mbagenev akaa kpishi a ma se pase ga yô, ken ilyoho ne. Se mba tindin ior a ilyoho kpishi, je yan ve shighe karen ikyaa inyaa? Doo u se hen sha ityôkyaa i í ne ve se lu tindin a loho sha Intanet la cii ve se mase kighir ijiir i tindin a mi la ga he? Ngise la ior ngeren icombor ve man azende a ve washika sha u pasen ve kwagh u a lu zan hemen ken uuma vev yô. Doo u a lu kwagh u ilyoho i se tindin sha Intanet la ia hemban pasen je la. Inja na nan man se tindi ior a kwagh u se fatyô u fan ser ka u mimi shin ka u mimi ga ze?

Nahan doo u ú er nyi sha kwagh u Intanet? Doo u ú er tom a mi ga kuaa shinii? Mbagenev yô, alaghga a gba u vea er nahan. Or u Intanet yange ya un ishima, u se vande teren kwagh na la, kpa lu kwagh u er je la. Aluer u ngu eren tom a “m-er u sha inja” shi u de wer a̱ “kumban we” yô, Intanet una lu u a iwasen kpishi je.—Anz. 2:10, 11.

[Ngeren u shin kpe]

[Foto u sha peeji 4]

U er nan ve u fa aluer ilyoho i u zough a mi sha Intanet la ka i mimi?

[Foto u sha peeji 5]

Kanyi i doo u ú hen sha mi cii ve u mase kighir ijiir i tindin a loho sha Intanet laa?