Mkombo U A Hungur a Mi Ga Yô

STEPHEN LETT u a lu môm ken Mbahemenev mba Shin Tine mba Mbashiada mba Yehova la, yange ôr mkaanem ma ma lu shin heen ne sha u kenden isharen i ikpelaior i i za mkombo u sha inyom la sha. A kaa ér, “Shighe u mkombo ne una kure yô, ne fatyô u kaan ner, ‘mimi je, mkombo u sha inyom ne ka u hange hange u a hungur a mi ga yô!’” Ikpelaior la yange i za mkombo u sha inyom u sha kwa 126, u Watch Tower Bible and Tract Society of Pennsylvania, u i zua un hen Iyou i Mkohol i Mbashiada mba Yehova, hen gar u Jersey City, ken kpentar u New Jersey, ken tar u Amerika, sha iyange i Oktoba 2, 2010 la. Ka akaa a sagher iyol a nyi nahan yange i ôr hen mkombo nee?

Kwaghôron u hiihii u Anmgbian Lett na la, yange pase kwagh u sagher iyol sha kwagh u ikyekye i uitya, i i ôr kwagh u i ken takerada u Bibilo u Esekiel la. Zegeikyekye u engem ne tile sha ityough ki nongo u Aôndo, u Yehova a hemen hanma vegher u u la. Anmgbian Lett yange kaa ér vegher u nongo ne u sha, u i lu mbatyomov la, ngu yemen leva leva sha mbamhen mba Yehova a duen a mi fele fele la. Vegher u nongo ne u shin tar la kpa kape a lu yemen leva leva je la. Anmgbian Lett pase akaa a sagher iyol kpishi a a er ken nongo u Aôndo u shin tar ne ken anyom a a sember karen ne yô.

Ikyav i tesen yô, mba tôôn ubranci mbagenev maghen sha mbagen, nahan kwagh ne una na mba yange ve vanden eren tom shin Betel ken ityar ne la kpishi ian i hemban veren ishima sha tom u pasen kwagh. Anmgbian Lett yange taver mba ve lu ungwan la cii ishima ér ve eren msen ér Mbahemenev mba Shin Tine, mba ve til sha ityough ki nongo u wanakiriki la, ve de ze hemen u lun jighjigh tseegh ga, kpa shi ve za hemen u lun mba fan kwagh kpaa.—Mat. 24:45-47.

Ibaver i Nan Ishimataver man Akaatôvon a Sagher Iyol

Anmgbian ugen u i yer un ér Tab Honsberger, u a lu môm ken Kômatii u Nengen sha Branci u ken tar u Haiti la, yange na ibaver i kôron ken ishima sha kwagh u yange er shighe u tar tenger sha iyange i Janawari 12, 2010 la. Mbagenev kaa ér tar-tenger ne yange u wua ior kuma 300,000. A kaa ér mbahemen mbaadua za hemen u pasen ior ér Aôndo yange tsaha mba tar-tenger wua ve la sha ci u ve lu mbananjighjighga, kpa a gema a kura mba dedoo. Nahan cii kpa, mbaaferev udubu imôngo war shighe u tar-tenger la hembe purusu u ve lu ker la. Sha nahan yô, mbaasemaamimi kpishi mba ken tar u Haiti, mba zuan a ishimasurun sha u henen fan mimi, er i hii ve ashighe a ase ne a vihi kpishi yô. Anmgbian Honsberger yange ôr mkaanem ma anmgbian ugen ken tar u Haiti, u aahe la wua kwase na yô, ôr yô, ér: “Zan zan hegen kpa, m ngu a de u vaan ga. M fa shighe u me de u zungwen ga, kpa ka i saan mo iyol er m lu nengen a dooshima u nongo u Yehova yô. M ngu a ishimaverenkeghen, shi m kange ishima mer me wase mbagenev kpa ve lu a ishimaverenkeghen la.”

 Anmgbian Mark Sanderson, u hegen a lu môm ken tsombor u Betel u ken Brooklyn la, yange na ibaver i ken tar u Philippines. Er vande lun môm ken Kômatii u Nengen sha Branci u ken tar la yô, doo un u ôron kwagh u mseer u mbapasenkwagh u Tartor ve seer ken tar la ciligh ciligh kwa 32 la, kua er mba i henen Bibilo a ve la ve hembe iyenge i mbapasenkwagh i yem ica la kpaa. A ôr kwagh u anmgbian ugen u i yer iti na ér Miguel, u yange i wua wan u wan na yô. Miguel yange nôngo kpoghuloo i ôr or u wua wan u wan na la ijir shi i wuhe un. Shighe kar, Miguel ngur pasen kwagh hen purusu u i wuhe or la ker la yô, a zua a na. Shin er cier un iyol nahan kpa, a lam a na kundu kundu. Shighe kar yô, a hen kwagh a or la, or la kpa lumun ityesen la tsembelee shi Yehova hingir u doon un ishima. A er batisema hegen. Miguel ngu ijende na i ishima ishima shi ngu nôngon kpoghuloo ér anmgbian na u he ne a due purusu tsuaa. *

Iaven la been yô, anmgbian Mark Noumair u a lu ortesen hen Gbaatom u Nengen sha Imakeranta i Hemen u Aôndo la, gba a mi tôvon ior sha u ve ôr yiase ve yô. A tôv iorov utar vea kasev vev, ve yô, lu Alex vea kwase na Sarah Reinmueller, man David vea kwase na Krista Schafer, kua Robert vea kwase na Ketra Ciranko. Alex Reinmueller, u a wasen Kômatii u Gberen Ityakerada la, pase er yange un gema mimi hingir kwagh na zum u un lu anyom 15, un lu eren pania ken tar u Kanada shi un hemban duen kwaghpasen tswen yô. Yange mba pin anmgbian Reinmueller or u inja i nan i hembe benden a na shin Betel yô, a ter iorov utar mba civir Aôndo sha mimi, shi a pase er hanma ve wase un u vesen ken jijingi yô. Kwase na Sarah di pase kwagh u ikyaryan na vea anmgbian u kwase ugen u yange wa ishima anyom imôngo ken upurusu mba ken tar u China sha ci u jighjigh u nan na yô. Sarah kaa ér un hen u suur sha Yehova ken msen.

Anmgbian David Schafer, u a wasen Kômatii u Tesen la kpa wuese ngô na sha jighjigh na u lu a mi dông la, shi a pase kwagh u anmgbianev mba sôngon ikyon, mba ve wase un u eren ishuen pania shighe u un lu iyev la. Kwase na Krista di ôr kwagh u doon un tsung er mba ve tse shin Betel anyom imôngo, mba ve tese “jighjigh sha ankwagh u kiriki,” er Yesu kaa nahan la, ve ver un ikyav i dedoo yô.—Luka 16:10.

Anmgbian Robert Ciranko, u a wasen Kômatii u Nengen sha Kwaghngeren la, yange umbur kwagh u mbamaren nav mba vesen, mba ve mough ken tar u Hungary ve yem shir ken tar ugen shi ve lu Mbakristu mba i shigh ve mkurem la. Shighe u lu wanye la, yange una za ma mkohol u vesen mba i er ken kwavanyom u sha 1950 la yô, i doo un kpishi shi a nenge er nongo u Yehova kehe hemba tiônnongo na yô. Kwase na Ketra di, pase er yange un hen kwagh u mtil sha mimi shighe u un lu eren pania hen tiônnongo ugen u mbavendan mimi kua mbamzeyol mbagenev lu her kpishi yô. Yange taver  ishima, nahan shighe kar yô, i na un tom u ikpur pania hen tiônnongo ugen u mzough u lu her la bende a na kpishi yô.

Ka been yô, Manfred Tonak di na ibaver i ken tar u Etiopia. Etiopia ka tar u nyian a mi ga, shi ngu a mba pasen loho u dedoo hegen hemba 9,000. Mbapasenkwagh mban kpishi mba ken gartamen u tar la, u i yer ér Addis Ababa la, shin mba ikyua a gar shon. Sha nahan yô, kwagh gba sha mbapasenkwagh sha ajiir a a lu ica a gartamen la kpishi. Yange i lôhô Mbashiada mba ve lu marnya u tar u Etiopia, mba ve lu ken ityar igen la ér ve za pase kwagh sha ajiir a caa agen ken tar la, sha er a kure mgbe ne yô. Mbapasenkwagh kpishi za, za taver Mbashiada mba hen ityônya mbara asema, shi ve zua a mba keghen ato a ve kpaa.

Kwaghôron u vesen hen mkombo ne lu kwaghôron u tan agbaa u sha kwagh u Mbashiada mba Yehova mba ken tar u Russia kua ajir a ôron a ve. Anmgbian Aulis Bergdahl, u a lu môm ken Kômatii u Nengen sha Branci u ken tar u Russia la yange ôr yiase i mtev u sha ican u Mbashiada mba ken Russia, hemban je yô, mba hen gar u Moscow la. Anmgbian Philip Brumley, u a eren tom vea Gbaatom u Atindigh u hen branci u ken tar u Amerika la, ôr akaa a sagher iyol a a er ken iwer i i sember karen, shighe u atejir u Yuropa u á ne or ian i eren kwagh sha ishima i nan, i yer un ér European Court of Human Rights la ungwa akaa ataankaranyiin a i wa Mbashiada iyol la yô. Atejir la gba zwa môm ér mimi cuku ngu ken akaa ataankaranyiin a i wa Mbashiada iyol la ga, man ken ajir agen je yô, atejir ne nôngo pase kembe kembe er hii ve akaa a mbaihyomov lu nyiman la lu sha mi ga yô. Shin er se lu keghen ser se nenge kwagh u una due ken ijir i i kur la nahan kpa, Anmgbian Brumley ôr kwagh u nan ishimaverenkeghen ér gbenda u i kur ijir ne la, ua fatyô u benden a ajir a i lu ôron ken ityar igen la kpaa.

Mba ne ibaver i sagher iyol ne mba been yô, Anmgbian Lett yôô ér atejir u Yuropa u á ne or ian i eren kwagh sha ishima i nan, i yer un ér European Court of Human Rights la yange nenge ér doo una tôv sha zayol u tar u France u lu a mi vea Mbashiada mba Yehova sha kwagh u kpandegh ku tan, ica i gbe hegen la. Atejir u i ne un icivir ne lumun u tôvon sha akaa kpuaa ken mbamzeyol mba i va a mi hen a na la. Atejir la hila ungwa ajir 39 a Mbashiada mba Yehova, shi a na ve ishô sha ajir 37. Anmgbian Lett taver ior mba Aôndo cii ishima ér ve eren msen hen Yehova Aôndo sha ikyaa i i lu zan hemen ne.

Anmgbian Richard Morlan, u a tesen ken Makeranta u Mbatamen Mba ken Tiônnongo la, yange na ibaver i masetyô. Yange ôr kwagh u makeranta la sagher sagher shi pase er mbatamen mba ve ze u la kpa ve lu a iwuese yô.

Akaaôron Agen a Mbahemenev mba Shin Tine Na Yô

Anmgbian Guy Pierce, u a lu môm ken Mbahemenev mba Shin Tine la, yange na kwaghôron  u kôron ken ishima, u har sha ivur i sha inyom i 2011, i i kar ér ‘Suur sha Iti i Yehova’ la. (Sef. 3:12) A pase ér shin er shighe ne a lu u saan iyol sha ci u ior mba Yehova sha igbenda kposo kposo nahan cii kpa, shi ka shighe u i gbe u se eren kwagh uwer uwer ga yô. Er iyange i vesen i Yehova i mgbôghom nahan kpa, ior za hemen u suur sha kwaghaôndo u aiegh, man mbamzough mba mbapatii man uyôughyôughmbaakaav man iemberyolough i wasen or u hungur a mbamzeyol la, kua ambaakaa la nahan. Aluer se soo u zuan a ijiir i yeren yô, gba u se yilan sha iti i Yehova, man kwagh ne wa u fan iti la shi nan i icivir kpishi shi suur sha Or u iti shon i lu i na la, shi soon un a ishima yase cii la kpa ker.

Ka been yô, Anmgbian David Splane, u a lu môm ken Mbahemenev mba Shin Tine la, na kwaghôron yughur yughur, u kôron ken ishima, u lu a itinekwagh ér, “U Nyôr ken Mmem u Aôndo Vee?” yô. A pase ér mmem u Aôndo la ka u den a de tom ga, sha ci u Yehova man Wan na mba “eren tom her” ken iyange i mmem i sha injakwagh ne la cii, sha er awashima u Aôndo a lu a mi sha akaa a i gbe a sha tar la una kure sha mi vough yô. (Yoh. 5:17) Nahan se er nan ve se nyôr ken mmem u Aôndo laa? Ka sha u palegh isholibo kua ieren i tesen ser se hemba perapera la tseegh se nyôr ken mmem u Aôndo ga. Gba u se na jighjigh shi se lu a awashima u Aôndo la ken ishima yase, nahan se suen un er se fetyô la. Ashighe agen yô, alaghga a taver se kpishi u eren kwagh ne, kpa a gba u se lumun kwaghwan shi se dondo gbenda u nongo u Yehova u tese la. Anmgbian Splane taver mbaungwan mbara asema ér ve er hanma kwagh u ve fetyô cii sha er vea nyôr ken mmem u Aôndo la yô.

Anmgbian Anthony Morris, u a lu môm ken Mbahemenev mba Shin Tine la, yange na kwaghôron u masetyô, u lu a itinekwagh ér “Ka Nyi Jim Se Lu Keghene?” la. Anmgbian Morris yange ôr kwagh yughur yughur shi lam kundu kundu sha inja i ter a wan, nahan umbur mbaungwan akaaôron a profeti a a lu a kure ga la, ka akaa a mbananjighjigh cii ve lu keghen a ishima ve i môm je la. Akaa shon wa myee u a va yôô “Bem, man mkpeyol” shi a tim kwaghaôndo u aiegh la kpa ker. (1 Tes. 5:2, 3; Mpa. 17:15-17) Anmgbian Morris ta icin ér zum or nan nenge akaa a kpilighyol ken abaver yô, nana de kaan ér, “A shi nan kpa ka Armagedon je ne” ga, sha ci u akaa a nan nenge sha abaver la nga kuren akaaôron a profeti ne ga. A kaa a mbaungwan ér ve lu a ieren i wan ishima, keghen kwagh saan saan, er Mika 7:7 a tese nahan. Heela tseegh ga, a taver hanma or cii ishima ér nana kporom ikyua a Mbahemenev mba Shin Tine, er ushoja ka ve lu shighe u ityav mbi tsee kpishi la nahan. A kaa ér, “Asema a en a̱ taver, ne cii mba ne veren ishima, ne keghen TER yô.”—Ps. 31:24.

Mkombo la yange kure sha akaayôôn a sagher iyol, a a hungur a mi ga yô. Anmgbian Geoffrey Jackson, u a lu môm ken Mbahemenev mba Shin Tine la yôô ér i wa ishima u duen a mgber u Iyoukura i ken zwa Buter ú taver ga, sha ci u mba ve fe zwa Buter i yen ve la, sha u karen nengen. Been yô, Stephen Lett yôô ér Mbahemenev mba Shin Tine vea lu sôron akaa veren sha er a za mbatamen mba nengen sha haregh, mba ken tar u Amerika, vea kasev vev inya yô. Shi a yôô ér a gema yilan Makeranta u Tsaase Mbashiren Tom la ér Makeranta u Henen Bibilo Ú Anmgbianev mba Nomso mba Lun Kwav. Ica ia kera gba je maa a ver makeranta u he ugen u i yer ér Makeranta u Henen Bibilo Ú Mbakristu Mba Ve Vese Ayol a Ve Yô la. Makeranta ne ua seer tsaase mba ve vese ayol a ve la sha er vea hemba lun nongo u Yehova a iwasen yô. Anmgbian Lett shi yôô ér a zaan Makeranta u Mbakuran Mba Ningir Sha kua Kasev Vev man Makeranta u Anmgbianev Mba ken Kômatii u Nengen sha Branci kua Kasev Vev la kwa har ken inyom hen gar u Patterson, sha er mba ve ze u kwa u hiihii la kpa shi ian ia lu i vea fatyô u hiden zan sha kwa har yô.

Anmgbian John E. Barr, u lu anyom 97, shi lu môm ken Mbahemenev mba Shin Tine ica i gba la, kure mkombo ne sha gbenda u kôron ken ishima, sha msen u a er a iyol i hiden a mi ijime man a ishima i môm la. * Mba hemben yô, hanma or nenge ér sha kpôô yô, mkombo la lu u a hungur a mi ga.

[Ngeren mba shin kpe]

[Mkaanem ma sha peeji 19]

Mba yange ve lu hen mkombo ne cii doo ve u ungwan yiase i mba i tôv ve mbara ôr la

[Mkaanem ma sha peeji 20]

Yehova ver tom u pasen kwagh ken tar u Etiopia doo doo