‘Sur Mba Ve Zungu Cii Asema’

“TER shighem mkurem; . . . A verem er . . . mba ve zungu cii, M̱ sur ve asema.”—YES. 61:1, 2.

1. Yesu yange er nyi sha ci u mba zungwene, man lu sha ci u nyi?

 YESU KRISTU yange kaa ér: “Kwaghyan Wam yô, ka u Me er ishima i u A tindim la, Me kure tom Na vough kpaa.” (Yoh. 4:34) Shighe u Yesu lu eren tom u Aôndo na un la, a tese aeren a Ter na a doon tsung la. Môm ken aeren ne yô, ka dooshima u vesen u Yehova lu a mi sha ior la. (1 Yoh. 4:7-10) Apostoli Paulu ter gbenda môm u Aôndo a tesen se dooshima na la, zum u a ôr kwagh u Yehova ér “ka Aôndo u A lu a ishimasurun cii” la. (2 Kor. 1:3) Yesu yange tese imba dooshima ne, shighe u er kwagh u i nger ken kwaghôron u profeti u Yesaia la. (Ôr Yesaia 61:1, 2.) Yesu yange ôr kwaghôron u profeti la ken Shinagoge u ken Nasareti, gema kaa ér kwagh la kure sha a na. (Luka 4:16-21) Shighe u Yesu lu pasen kwagh la cii, lu surun mba ve zungwen la asema, taver ve ishima shi nan ve bem u ken ishima.

2, 3. Er nan ve i gbe u mba dondon Kristu vea kav un sha u surun mbagenev asema?

² Gba u mba dondon Yesu cii, vea kav un  sha u surun mba ve zungu la asema. (1 Kor. 11:1) Paulu kaa ér: “Nahan yô, taver nen ayol a en asema, wasen nen ayol a en.” (1 Tes. 5:11) Hemba gban u se surun mbagenev asema hegen cii, sha ci u uumace cii mba ken “ashighe a ican.” (2 Tim. 3:1) Mbaasemaamimi kpishi sha tar cii mba hemban tagher a ior mba mkaanem vem man aeren a ve a ne ior ishimavihin man ijungwen yô.

³ Er Bibilo tsengaôron nahan, ken ayange a masejime a tar u bo ne, ior kpishi ka “mbawan ayol a ve iko tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve ikyo ga man mbamoron ayol a ve man mba iember i iyolough i hembe doon ve a Aôndo la.” Aeren a dang ne nga ngeen seer a seer hegen, gadia ‘udangmbaiorov man mbatsughunior mba yemen hemen hemen, mba hemban vihin a vihi kwagh cii.’—2 Tim. 3:2-4, 13.

4. Mlu u tar ne ngu nena sha shighe wase nee?

⁴ Kwagh ne a de kpiligh se iyol ga, sha ci u Mkaanem ma Aôndo pase se wang ér “tar cii ngu sha ikyev i Orbo.” (1 Yoh. 5:19) “Tar cii” la wa iniongo i patii man i kwaghaôndo man mbakpengav kua mbaabaver cii ker. Sha kpôô yô, i yila Satan Diabolo ér “tor u tar ne” man “aôndo u tar u ainge ne” nahan ka sha inja je. (Yoh. 14:30; 2 Kor. 4:4) Tar cii ngu vihin seer a seer sha ci u ishima vihi Satan hegen tsung, gadia a fa er shighe u Yehova una tim un kera a kera la vese ga yô. (Mpa. 12:12) Er se fe ser ian i Aôndo a ne Satan la ngi sôôn been, shi á kure ikyaa i Satan yange due a mi sha kwagh u or u nan kom u hemen sha won cii la kpaa yô, kwagh la ka msurshima hen a vese kpen kpen!—Gen., ityou 3; Yobu ityou 2.

Mba Pasen Loho u Dedoo sha Tar Cii

5. Kwaghôron u profeti u i er sha kwagh u tom u kwaghpasen la ngu kuren sha mi ken ayange a masejime ne nena?

⁵ Kwagh u Yesu yange tsengaôron la ngu kuren sha mi ken ashighe a ican a uumace ve nyer ker ne. A kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mat. 24:14) Mba eren tom u pasen kwagh u Tartor u Aôndo ne hemban ave a tse. Nyian ne, Mbashiada mba Yehova mba hemban iyenge er 7,500,000 nahan, ken atôônanongo a hemban 107,000 sha tar cii, mba pasen kwagh u Tartor u Aôndo, er Yesu kpa Tartor ne lu itinekwagh ken kwaghpasen na nahan. (Mat. 4:17) Tom wase u pasen kwagh, u se eren nyian ne ngu surun mba ve zungu la asema. Ken anyom ahar a karen ne tseegh, i er iorov  mba kuman 570,601 batisema, ve hingir Mbashiada mba Yehova!

6. U kaa wer nyi sha kwagh u mvese u tom wase u pasen kwagh laa?

⁶ Aluer se nenge er Mbashiada mba Yehova ve lu geman ityakerada i pasen Bibilo ken ijô i hemban 500 shi samber a mi nahan yô, se hemba kaven er i lu eren tom u pasen kwagh ne sha gbenda u vesen yô. I gbe je kpa mba a vande eren kwagh nahan ga! Mlu u Mbashiada mba Yehova, man tom u ve lu eren, kua mvese u ve lu vesen la kpilighyol kpen kpen. Imba kwagh ne ia fatyô u eren ken tar u u lu sha ikyev i Satan ne mayange ga, saa sha iwasen i icighan jijingi u Aôndo u ageegh la. Er i lu pasen loho u dedoo ne sha tar cii yô, mba nan jighjigh a vese imôngo kua mba zungwen mba ve lu ngohol loho u Tartor ne cii yô, mba zuan a msurshima u ken Ruamabera la.

Er Se Sur Mba Civir Aôndo a Vese Imôngo Ishima La

7. (a) Se fatyô u veren ishima ser Yehova a kar a hanma mlu u a ne se ican hegen ne kera ga sha ci u nyi? (b) Er nan se fe ser se fatyô u wan ishima a mtev u sha ican man atsana?

⁷ Er se lu ken tar u u iv a ifer man ican i yan yô, ka keng se tagher a mbamlu mba vea va se a ican yô. Se fatyô u veren ishima ser Aôndo a kar a hanma kwagh u a ne se ijungwen shin ishimavihin kera ga, zan zan una kar timin tar ne. Nahan kpa, er se lu tagher a mtev u sha ican u yange i tsengaôron ne, mba karen mtil sha mimi wase hen Yehova, sha ci u se ta ikyaa a mtemtor na yum. (2 Tim. 3:12) Kpa, sha iwasen i Ter wase u sha la kua msurshima na yô, se fatyô u lun er Mbakristu mba ken Tesalonika mba i shighe ve mkurem, mba ve wa ishima a mtev u sha ican kua atsan sha jighjigh u nan la nahan.—Ôr 2 Mbatesalonika 1:3-5.

8. Ruamabera tese ér Yehova surun mba civir un ishima nena?

⁸ Yehova ne mba civir un msurshima u kwagh a gbe ve a mi la je ka u henen a hen ga. U tesen ikyav yô, shighe u Torkwase u wan ifer, Yesebel, lu keren profeti Eliya aa ku la, mciem gba profeti ne iyol, nahan a gba yevese un, je yô a kaa ér un soo u kpen kera. Nahan kpa, Yehova zôhô a Eliya ga, gema sur un ishima shi taver un ishima u zan hemen a tom na u profeti la. (1 Utor 19:1-21) Shi kwagh u er Mbakristu mba sha derianyom u hiihii la kpa wase se u nengen er Yehova a surun ior nav ishima yô. U tesen ikyav yô, Bibilo kaa ér “bem gba sha nongo u Kristu u u lu ken Yudia cii, man Galilia kua Samaria kpaa; er i lu maan ve a maa” yô. Shi er “ve lu zenden ken mciem ma Ter man ken msurshima u Icighan Jijingi yô, ve seer a seer ngeen.” (Aer. 9:31) Se mba a iwuese kpishi ér se kpa se zough a “msurshima u Icighan Jijingi yô.”

9. Aluer se mba henen kwagh u Yesu yô, se zua a msurshima sha ci u nyi?

⁹ Er se Mbakristu se hen kwagh u Yesu Kristu shi se lu dondon un ijime yô, se mba a msurshima. Yesu kaa ér: “Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikyev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikyav Yav kpaa peese.” (Mat. 11:28-30) Aluer se mba henen kwagh u gbenda u kundu kundu u Yesu eren kwagh a ior la, shi se mba dondon ikyav na la tseegh kpa, kwagh ne una sur se ishima kpishi.

10, 11. Ka unô ken tiônnongo vea fatyô u surun mbagenev asema?

¹⁰ Shi Mbakristu mbagenev kpa vea fatyô u surun se ishima. U tesen ikyav yô, nenge ase er mbatamen mba ken tiônnongo ka ve sur mba ve lu ken ican la asema yô. Apostoli Yakobu yange nger ér: “Orgen ken a ven nan ngu [uange ken jijingii]? Nana̱ yila mbatamen mba nongo u Kristu, ve̱ er msen sha ci u nan.” Ka nyi ia due kere? “Msen u sha jighjigh u nan la una yima oruange la man Ter Una mough a nan sha. Aluer nan er isholibo je kpaa, á de nan.” (Yak. 5:14, 15) Mbagenev ken tiônnongo kpa vea fatyô u surun nan ishima.

 ¹¹ Ka i hemba lun kasev zange u lamen a kasev mbagenev sha akaa a a ze ve iyol kposo kposo la. Kasev mba ganden mba ve hembe lun a mfe ken uma a agumaukase la vea hemba fan u wan ve kwagh. Alaghga akaa a agumaukase a lu tagher a mi hegen la, kasev mba ganden mba ken Kristu mban vande tagher a mi ken uma ve. Mlu ve u ukase la kua mhôônom vem ma zungwen ma a wase kasev mba kiriki mban kpen kpen. (Ôr Titu 2:3-5.) Nahan kpa, mbatamen man mbagenev kpa gba u vea ‘taver mba ve yen ishima la asema.’ (1 Tes. 5:14, 15) Shi doo u se umbur ser Aôndo “surun se asema sha atsan a ase cii, sha er se kpaa sé fatyô u surun mba ve lu ken hanma ican la ishima” yô.—2 Kor. 1:4.

12. Er nan ve i lu hange hange u se zaan mbamkombo mba tiônnongo?

¹² Gbenda u injaa u se fatyô u zuan a msurshima yô, ka u zan mbamkombo mba Mbakristu, ape i lamen sha akaa a ken Bibilo a taver se ishima la. Bibilo kaa ér Yuda man Shila yange “ve nyôôso anmgbianev asema sha akaaôron kpishi, shi ve taver ve asema kpaa.” (Aer. 15:32) Ka se lam a mbagenev ken tiônnongo sha u taver ve ishima, shighe u i lu a hii mkombo ga la, kua shighe u i dugh mkombo kpaa. Nahan aluer se mba yan ican a ma mzeyol yô, se lu paleghaa a mbagenev ga, sha ci u u̱ eren nahan la una wase se ga. (Anz. 18:1) Se gema se dondo kwaghwan u jijingi mgbegha apostoli Paulu nger ne, ér: “Sé wa nen ayol a ase ikyo, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô.”—Heb. 10:24, 25.

Zua a Msurshima ken Mkaanem ma Aôndo

13, 14. Pase er Ruamabera una fatyô u surun se ishima yô.

¹³ Sea lu Mbakristu mba i er se batisema shin sea hii a hii u henen kwagh u Aôndo man mbaawashima nav kpa, se fatyô u zuan a msurshima kpishi ken mkaanem ma Aôndo ma i nger la. Paulu nger ér: “Gadia akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la.” (Rom. 15:4) Icighan Ruamabera una fatyô u surun se ishima shi nan sha u ‘se̱ kuma, se̱ lu a agoyol sha ci u hanma tom u dedoo.’ (2 Tim. 3:16, 17) Aluer se fa mimi sha kwagh u mbaawashima mba Aôndo shi se mba a ishimaverenkeghen i mimi sha kwagh u mlu u ken hemen yô, se zua a msurshima u vesen. Sha nahan yô, de se ôron nen Mkaanem ma Aôndo kpoghuloo kua ityakerada i pasen Bibilo, i ia sur se asema shi ia wase se sha igbenda kpishi la.

¹⁴ Yesu ver se ikyav i dedoo i wan mbagenev kwagh shi surun ve ishima ken Ruamabera. U  tesen ikyav yô, shighe u i nder un shin ku, lu anden hen ior la, a ande hen mbahenen nav mbagenev uhar, a ‘pase ve icighanruamabera.’ Er lu lamen a ve la, a ôr ve kwagh kôr ve ken ishima tsung. (Luka 24:32) Apostoli Paulu kpa yange dondo ikyav i doon tsung i Yesu ver la, nahan ‘ôron kwagh a ior sha akaa a ken Ruamabera.’ Ior mba ken Berea mba lu lamen a ve la “lumun kwaghôron la sha gbashima shi ve lu timen ken icighanruamabera ayange ayange.” (Aer. 17:2, 10, 11) Nenge i doo u se ôron Bibilo ayange ayange, se zuan a mtsera ken i̱ kua ken ityakerada yase i Mbakristu, i i gber sha u nan se msurshima man ishimaverenkeghen ken ashighe a ican ne sha wono!

Igbenda Igen i Surun Mbagenev Ishima

15, 16. Ka akaa agen a nyi se fatyô u eren sha u wasen shi surun anmgbianev asev mba ken Kristu asema?

¹⁵ Se fatyô u wasen Mbakristu mbagenev sha igbenda i injaa kpishi, nahan surun ve ishima. U tesen ikyav yô, se fatyô u zan ken kasua sha ityough ki anmgbianev asev mba been iyol shin mba ve lu uange la, za yamen ve akaa a ve soo la. Se fatyô u wasen mbagenev sha u eren ve ityom i hen ya, nahan tesen ser kwagh ve gba se ishima. (Fil. 2:4) Se fatyô u wuese mba civir Aôndo a vese imôngo sha aeren a dedoo a ve lu a mi, er dooshima man ishimataver man jighjigh u nan shin mhen u ka ve due a mi sha u sôron ma zayol la nahan.

¹⁶ Se fatyô u zan mbabeenyol inya, za surun ve ishima sha u keghen ato a ve zulee, shighe u ve lu pasen se uvande-eren vev kua averen a Yehova a ne ve ken tom na yô. Kwagh ne una taver se ishima kpen kpen! Se fatyô u ôron Bibilo shin ityakerada i pasen Bibilo vea mba se ze ve inya la. Alaghga se tsua u timen ken ma ngeren u ken Iyoukura, u i gbe u a hen ken tiônnongo yô, shin takerada u i lu henen ken mkombo u Bibilo i Henen ken Tiônnongo ken kasua la yô. Gayô, se fatyô u kohol ve nengen ma tser u DVD, u ú lu a itinekwagh i í har sha Ruamabera yô. Maa alaghga shi se ôr ve ma vande-eren u taver ve ishima, u i nger ken ityakerada yase yô.

17, 18. Er se lu mba civir Aôndo sha mimi yô, se fatyô u lun a vangertiôr ser una sue se shi una sur se asema sha ci u nyi?

¹⁷ Aluer se nenge ser gba u a sur ma or u civir Yehova a vese imôngo ishima yô, se fatyô u umbur nan ken mbamsen asev. (Rom. 15:30; Kol. 4:12) Er se lu nôngon a mbamzeyol mba uma shi nôngon kpoghuloo ser se sur mbagenev ishima la, se kpa se lu a vangertiôr er Orpasalmi nahan, yange wa icam ér: “Haa akaa a zan we iyol cii sha TER, tsô Una taver we; Una lumun er i̱ tenger a mbaperapera mayange ga.” (Ps. 55:22) Aluer se mba civir Yehova sha mimi yô, una suen se hanma shighe shi una surun se ishima.

¹⁸ Aôndo yange kaa a mba civir un mba tsuaa mbara ér: “Ka Mo, M surun ne ishima ye!” (Yes. 51:12) Se kpa Yehova una sur se ishima, shi una ver ieren yase i dedoo man mkaanem asem ma surun mba ve zungu mbara asema la doo doo. Ishimaverenkeghen yase ia lu i yemen sha shin lun uma shin tar kpa, hanma wase nana fatyô u zuan a msurshima ken mkaanem ma Paulu yange kaa a Mbakristu mba ve kpa i shighe ve mkurem la, ér: “Ter wase Yesu Kristu iyol Na man Ter wase Aôndo u se doo Un ishima man A ne se msurshima u tsôron man shi ishimaverenkeghen i dedoo sha mlumun u sha mhôôn la, A̱ sur ne asema, A̱ taver a sha hanma tom u dedoo kua kwaghôron u dedoo kpaa.”—2 Tes. 2:16, 17.

Baver We Kpa?

• Tom wase u surun mba ve lu zungwen mbara asema la samber hegen kighir nena?

• Ka akaa agen a nyi se er sha u surun mbagenev ishima?

• Ka ikyav i ken Ruamabera i han i tese ér Yehova surun ior nav asema?

[Mbampin mba ngeren u henen]

[Foto u sha peeji 28 la]

Ú surun mba ve zungu la asema sha gbashima kpa?

[Foto u sha peeji 30 la]

Mbayev man mbaganden cii vea fatyô u taver mbagenev ishima