Tese Mbagenev U Eren Ityom I Ken Tiônnongo
Tese Mbagenev U Eren Ityom I Ken Tiônnongo
“Hanma or u i tese nan nan kom vough yô, nana hingir er ortesen u nan nahan.”—LUKA 6:40.
1. Shighe u Yesu lu pasen kwagh shin tar la, yange wa imaagh ki tiônnongo u vesen nena?
APOSTOLI YOHANE yange nger takerada na u Ivangeli la za kure ér: “Akaa agen nga kpishi a Yesu er yô; aluer a nger a cii ser ser yô, beem er ityakerada i ma i nger yô, ma i nenger tar ne je.” (Yoh. 21:25) Akaa agen a Yesu er hen shighe u kpuaa, u a er tom na u pasen kwagh kpoghuloo la yô, lu u tsuan nomsombaiorov, tesen ve shi kohol ve sha u ve va hemen zum u una kure tom na shin tar ne yô. Zum u Yesu hide yem sha ken inyom i 33 la, a wa imaagh ki tiônnongo u vesen, u yange lu u ica a gba ga tsô ua lu a ior ker udubu udubu yô.—Aer. 2:41, 42; 4:4; 6:7.
2, 3. (a) Er nan ve i gbe torough torough u nomso mba ve er batisema vea ker ityom ken tionnongoo? (b) Ka nyi se time sha mi ken ngeren nee?
2 Er nyian mbapasenkwagh u Tartor mba hemban miliôn utaankaruhar ve lu ken atôônanongo a hemban 100,000 sha tar cii ne, kwagh ngu gban sha nomso mba vea hemen sha u eren ityom ken tiônnongo yô. U tesen ikyav yô, kwagh gba sha mbatamen mba ken Kristu kpishi je. Mba ve keren ityom ken tiônnongo la ve kuma u se wuese ve, sha ci u “ka tom u dedoo u sar [ve] ye.”—1 Tim. 3:1.
3 Nahan kpa, or a lu nomsoor tsô maa nana kuma u eren tom ken tiônnongo ga. Mfetakerada shin kwaghfan u or nan zough a mi ken uma u nan la, una fatyô u wan nan ago iyol u eren imba tom ne ga. Cii ve or a kuma u eren tom ken tiônnongo yô, saa nana via ken jijingi. A gba u nana lu di a mfe sha akaa kposo kposo tsô ga, kpa nana lu a aeren a ken jijingi. A wase nomso mba ken tiônnongo nena ve vea kuma u eren ityom kere? Yesu yange kaa ér: “Hanma or u i tese nan nan kom vough yô, nana hingir er ortesen u nan nahan.” (Luka 6:40) Ken ngeren ne, se time sha igbenda i Yesu Kristu, Ortesen u Vesen la, yange wase mbahenen nav sha u ve kuma u eren ityom i vesen yô, shi se nenge kwagh u se hen sha kwagh u yange er la yô.
“M Yila Ne Mer, Akar”
4. Yesu yange tese ér un ngu ikyar u mbahenen nav u mimi nena?
4 Yesu yange eren kwagh a mbahenen nav er ka akar a na nahan, lu er ka mba shiren un nahan ga. Yange vihin shighe a ve, pasen ve akaamyer shi ‘akaa a a ungwa hen Ter na cii, a ôr ve.’ (Ôr Yohane 15:15.) Hen ase er yange a saan ve iyol shighe u Yesu na mlumun sha mpin u ve pine ér: “Ka nyi ia lu ikyav i sha mve Wou la man i mkurtara?” la yô. (Mat. 24:3, 4) Shi yange pasen mba dondon un mbamnenge nav man er ishima luun un ker la. U tesen ikyav yô, hen tugh mbu kpernan i nenge un mker la, a kua a Peteru man Yakobu man Yohane a za a ve ken sule u Gesemane, ape a za er msen tsung sha ci u ishima i i lu zan un iyol la. Alaghga mbaapostoli mba utar mban yange vea ungwa msen u Yesu lu eren la ga, kpa a shi nan kpa, yange vea kav er shighe la lu shighe u beelee ga yô. (Mar. 14:33-38) Shi hen er mgem u i gema iyol i Yesu sha uwo la, yange una bende a mbaapostoli mba utar mban yô. (Mar. 9:2-8; 2 Pet. 1:16-18) Ikyar i Yesu ya a mbahenen nav kôôsôô la lu ikile, i yange i va wase ve u eren ityom i vesen yô.
5. Ka sha igbenda igen i nyi nahan, mbatamen vea fatyô u nan ayol a ve u eren tom sha ci u mbageneve?
5 Mbatamen mba ken Kristu kpa mba ye ikyar a mbagenev nyian shi mba wasen ve, er Yesu nahan. Ka ve ya ikyar a mba nan jighjigh a ve imôngo kôôsôô, sha u tesen ér kwagh ve gba ve ishima. Er mbatamen ve pasen ior akaa agenegh ga nahan kpa, gema ka ior mba lun kusususu ga. Mbatamen na anmgbianev vev jighjigh shi mba pasen ve akaa a mimi a ken Ruamabera a ve hen la. Mayange mbatamen mba nengen ma diakon u ve lu tamen a nan ér nan yina sha a ve ga. Kpa ka ve nenge nan ér nan ngu or u vian ken jijingi, u nana fatyô u va hingir ortamen, u nan lu eren tom u injaa sha ci u tiônnongo yô.
“M Ver Ne Ikyav”
6, 7. Pase ikyav i Yesu ver mbahenen nav la, man er kwagh la wase ve la kpaa.
6 Shin er akaa a ken jijingi doo mbahenen mba Yesu ishima nahan kpa, ashighe agen gbenda u yange i yese ve la man aeren ve a ityôô yange a bende a mhen ve. (Mat. 19:9, 10; Luka 9:46-48; Yoh. 4:27) Nahan kpa, Yesu ta ve mciem iyol shin wa ve kwagh ngeekeke ga. Yesu yuhwa ve ikyav sha u wan ve ityom i ganden tahav vev ken inya, shin kaan a ve ér ve er ma kwagh, un geman eren ugen ga. Kpa tesen ve sha u veren ve ikyav.—Ôr Yohane 13:15.
7 Ka ikyav i nyi Yesu yange ver mbahenen nava? (1 Pet. 2:21) Yange eren akaa ken uma na akuma akuma sha er una zua a ian i eren tom sha ci u mbagenev yô. (Luka 9:58) Yesu kaan ihyagh ga shi atesen na cii har sha Ruamabera. (Yoh. 5:19; 17:14, 17) Yange eren a ior dedoo shi lumun ér mbagenev ve va ikyua a na. Lu dooshima mgbeghan un ve eren hanma kwagh u eren la ye. (Mat. 19:13-15; Yoh. 15:12) Ikyav i Yesu la yange i wase mbaapostoli nav kpishi je. U tesen ikyav yô, shighe u Yakobu tagher a ku la, a cia sulua ga, kpa a civir Aôndo sha mimi zan zan i kar wuan un. (Aer. 12:1, 2) Yohane yange dondo ikyav i Yesu hemba anyom 60.—Mpa. 1:1, 2, 9.
8. Ka ikyav i nyi mbatamen ve ver sha ci u nomso mba ve lu agumaior la man mbageneve?
8 Mbatamen mba ve tangen iyol ga, ve hidi a ayol a ve ijime shi ve eren kwagh a mbagenev sha dooshima la, mba veren ikyav i dedoo i ia wase nomso mba ve lu agumaior yô. (1 Pet. 5:2, 3) Heela tseegh ga, mbatamen mba ve ver ikyav i dedoo sha kwagh u jighjigh u nan man ityesen man uma ve u Orkristu la, fa ér mbagenev vea fatyô u kaven jighjigh ve u nan la, nahan kwagh ne ne ve mkom.—Heb. 13:7.
‘Yesu Wa Ve Kwagh, Maa A Tindi Ve’
9. Er nan ve se fe ser Yesu yange tese mbahenen nav u eren tom u ivangeli?
9 Yesu yange pase kwagh sha gbashima, ka kom er anyom ahar nahan yô, a gbanger a tom na u pasen kwagh la sha u tindin mbaapostoli 12 ér ve za pase kwagh. Kpa hiihii yô, a wa ve kwagh. (Mat. 10:5-14) Shighe u Yesu soo u nan ikpelaior udubu imôngo kwaghyan sha ivande la, a pase mbahenen nav er soo ér ve kohol ior shi ve kar ve kwaghyan la. (Luka 9:12-17) Kwagh ne tese wang ér Yesu tesen mbahenen nav sha u pasen ve akaa a vea eren la wang. Shighe kar yô, gbenda u a tese mbaapostoli la, kua tahav mbu icighan jijingi mbu mbu sen sha a ve la, wase ve u eren tom u vesen u pasen kwagh, u ve hii u eren ken inyom i 33 la.
10, 11. Ka sha nyi igbenda nahan a fatyô u tesen mba hev zan zan vea kar viana?
10 Nyian ne, ka se hii u tesen nomsoor shighe u se lu henen Bibilo a nan la. Alaghga a gba u se tese nan u ôron takerada tsembelee. Ka se za hemen u wasen nan er se lu henen Bibilo a nan la. Ka nana hiin u zan mbamkombo mba Mbakristu hanma shighe yô, nan seer zuan a ityesen i ken jijingi shighe u nan hii u nan akaaôron ken Makeranta u Henen Tom u Hemen u Aôndo, shi nan hingir orpasenkwagh u i lu a er nan batisema ga la. Nana eren batisema yô, ityesen i nan la ia kua akaa er u wasen tom u nengen sha Iyou i Tartor . Shighe a karen yô, a fatyô u wasen anmgbian u fan kwagh u i gbe u nana er ve nana kuma u lun diakon yô.
11 Shighe u ortamen nan lu nan ma anmgbian u nan er batisema tom yô, ka i saan nan iyol u pasen anmgbian la gbenda u nongo u Yehova u tese ér i er tom shon la, shi nan wa nan kwagh u una wase nan u eren u la kpaa. Anmgbian u i lu tesen nan yô, gba u nana fa kwagh u i ver ishima er nana er la. Ka nana nôngon a nôngo a kwagh u i kaa a nan er nana er la kpa, ortamen u lun a dooshima nan kur ikyaa fese ér nan kuma ga ze. Kpa ka nan tese nan akaa a i gbe u nana hemba veren ishima sha mi la, shi nan kimbir pasen nan awashima u tom u i ne nan la, kua gbenda u nana er u la kpaa. Mbatamen ka vea nôngo a nomso man vea tsera sha tom u i ne ve la shi vea zua a iember i or ka nana eren mbagenev tom ve nan zua a mi la nahan i saan ve iyol.—Aer. 20:35.
“Or U Nan Ver Ato sha Kwaghwan yô, Nan Fa Kwagh”
12. Lu nyi i na ve kwaghwan u Yesu lu a iwasen yumu?
12 Yesu yange tese mbahenen nav sha u wan ve kwagh u a zough sha mbamgbe vev yô. U tesen ikyav yô, a yange Yakobu man Yohane shighe u ve soo ér vea kaa usu u sen sha aôndo, u va hia Mbasamaria mbagenev mba ve lu a ngohol un ga la. (Luka 9:52-55) Shighe u ngô u Yakobu man Yohane va pine Yesu sha ci u ônov nav ér Yesu a na ve aan a injaa ken Tartor na la, Yesu ôr kwagh a anmgbianev mban jighilii, a kaa ér: “U teman a Mo ken uwegh Agh ku yanegh man ku imesegh yô, ka kwagh Wam er Me na kera ga, kpa ka sha ci u mba Terem A ser ijiir la sha ci ve yô.” (Mat. 20:20-23) Hanma shighe cii, Yesu wa ve kwagh wang, shi kwaghwan na lu ve a iwasen shi har sha atindiakaa a Aôndo. Shi a tese mbahenen nav u gbidyen kwar sha atindiakaa shon kpaa. (Mat. 17:24-27) Yesu shi yange fa mbamyen mba mba dondon un, nahan keren ér ve er akaa a u tsumen shio ga. Lu dooshima mgbeghan un ve waan ve kwagh ye.
13, 14. (a) Ka an i gbe u a wa nan kwagha? (b) Tese ikyav sha akaa a ortamen nana fatyô u wan or u nan lu vesen ken jijingi ga la kwagh sha mi yô.
13 Hanma or u nan lu keren tom ken tiônnongo u Kristu cii, a gba u a waan nan kwagh ashighe ashighe. Anzaakaa 12:15 kaa ér: “Or u nan ver ato sha kwaghwan yô, nan fa kwagh.” Anmgbian ugen kaa ér: “Kwagh u yange hemba taver mo u nôngon a mi yô, lu mbamyen av. Kpa kwaghwan u ortamen ugen wasem u lun a mnenge u vough sha mlu wam.”
14 Mbatamen ka vea nenge ér ma ieren i kpeegh ngi yangen nomsoor u vesen ken jijingi yô, ve ker gbenda u kôôm imbaor la sha ishima i legh legh. (Gal. 6:1) Ashighe agen yô, ka i gba u a wa or kwagh sha ci u inja i nan. U tesen ikyav yô, aluer ma anmgbian nan ngu eren tom tangen iyol yô, alaghga mbatamen vea nenge ér doo u vea pase nan er Yesu lu or u pasen kwagh u Tartor sha gbashima, u na mbahenen nav tom u geman ior hingir mbahenen yô. (Mat. 28:19, 20; Luka 8:1) Aluer anmgbian u nomso ngu hagher sha akaa yô, ortamen nana fatyô u tesen nan er Yesu yange wase mbahenen nav u nengen a kwaghbo u a lu ken ieren i keren u lun tagher tagher la yô. (Luka 22:24-27) Man aluer ka taver ma anmgbian u nomso u den mbagenev kwaghbo di ye? Injakwagh i kpan u yange venda u den or injô i cuku, man i vande den un injô i vesen la, ia lu a iwasen kpishi. (Mat. 18:21-35) Shighe u i gbe u a na kwaghwan yô, doo u mbatamen ve wa a wa ahô sha kwagh ne ga.—Ôr Anzaakaa 27:9.
“Kar Iyol You”
15. Tsombor u nomsoor ua wase nan u eren tom sha ci u mbagenev nena?
15 Mbatamen mba hemen sha u tesen anmgbianev u eren ityom ken tiônnongo, kpa mbagenev kpa vea fatyô u suen iniôngon ve la. U tesen ikyav yô, tsombor u or ua fatyô u wasen nan u keren ityom i eren ken tiônnongo, shi gba u ua er nahan kpaa. Aluer nan vande ngun ortamen kera yô, iwasen i kwase u nan man ônov mba nan vea na nan a iyoltangen shio la, ia wase nan kpen kpen. Mkegh u ve kegh iyol u den ér nana undun ve ashighe agen sha u nengen sha akaa a tiônnongo la, ka kwagh u hange hange u una wase nan u eren tom u nan doo doo yô. Ieren ve i tangen iyol ga la, i ve nan a iember shi mbagenev kpa wuese i kpishi je.—Anz. 15:20; 31:10, 23.
16. (a) Ka an i lu tom u nan u keren u eren tom sha ci u mbageneve? (b) Nomsoor nana ker u eren tom ken tiônnongo sha ci u mbagenev nena?
16 Shin er i lu u mbagenev vea wase nomsoor la nahan kpa, ka or la iyol i nan i lu tom u nan u keren u eren tom sha ci u mbagenev ye. (Ôr Mbagalatia 6:5.) U ngu wer saa anmgbian nana lu ortamen shin diakon ve nana wase mbagenev vea pasen kwagh kpoghuloo ga. Nahan kpa, u keren u eren ityom ken tiônnongo la, inja na yô, ka u or keren ér nana lu a anza a Ruamabera a tese ér mbatamen man udiakon ve lu a mi la. (1 Tim. 3:1-13; Titu 1:5-9; 1 Pet. 5:1-3) Nahan aluer sar nomsoor u lun diakon shin ortamen man mba a na nan tom ne ga yô, nana ver ishima sha akaa a nana er ve nana seer vesen ken jijingi la. Or a er kwagh ne sha u ôron Bibilo hanma shighe, shi henen kwagh sha tseeneke u nan dông, shi gbidyen kwar, shi eren msen taveraa shi eren tom u pasen kwagh kpoghuloo. Nana er nahan yô, nana fatyô u dondon kwaghwan u Paulu wa Timoteu ne, ér: “Kar iyol you sha u ú taver sha u civir Aôndo yô.”—1 Tim. 4:7.
17, 18. Shigh u Orkristu u nan er batisema nan nenge ér nan yina sha tom, shin nan ngu a isharen i eren tom ga yô, ka nyi nana fatyô u erene?
17 Kpa aluer nomsoor nan ngu keren u eren tom sha ci u mbagenev ga, sha ci u ishimanyian shin nan ngu nengen ér nan yina sha tom shon di ye? A doo u nana hen sha kwagh u Yehova Aôndo man Yesu Kristu ve lu eren sha ci wase la. Sha kpôô yô, Yehova “tee se ayange ayange.” (Ps. 68:19) Sha nahan yô, Yehova una fatyô u wasen anmgbian u nomso u eren tom sha ci u mbagenev ken tiônnongo. Shi a doo u anmgbian u nan lu diakon shin ortamen ga yô, nana umbur ér kwagh gba sha nomso mba vian ken jijingi hange hange, mba vea er ityom ken nongo u Aôndo yô. Anmgbian nana gbidyen kwar sha atôakaa ne yô, ishima ia mgbegha nan u nôngon kwagh sha er nana hemba mbamhen mba kpeegh yô. Nana sôn icighan jijingi ken msen, nana umbur er bem man iyolkôrontsaha ve lu avegher a ityamegh ki jijingi, a i gbe u or a lu a mi ve nana kera nenge ér nan yina sha tom la ga yô. (Luka 11:13; Gal. 5:22, 23) Shi or a fatyô u lun a vangertiôr ér Yehova veren mba ve keren ityom i eren ken tiônnongo a awashima u dedoo la doo doo.
18 Alaghga tsô ka m-ban u isharen a lu yangen ma or u nan er batisema u keren tom ken tiônnongo ye shinii? Ka nyi ia wase or u nan lu a isharen ga la u eren tomo? Apostoli Paulu nger ér: “Ka Aôndo je A lu eren tom ken a ven ye, sha u kwagh u a doo Un la a̱ sar ne, shi ne̱ eren sha mi kpaa.” (Fil. 2:13) Ka Aôndo a ne isharen i eren tom ken or ye, shi jijingi u Yehova una fatyô u taver or sha u nana er Aôndo tom yô. (Fil. 4:13) Heela tseegh ga, Orkristu nana fatyô u eren msen ér Aôndo a wase nan u eren kwagh u vough.—Ps. 25:4, 5.
19. Mver u i ver “mbakuranilev utaankaruhar man mbatarev ken ior anigheni” la na se ibumun i nyi?
19 Yehova veren iniôngon i mbatamen ka ve nôngon ér vea tese mbagenev la doo doo. Shi mba ka ve ngohol ityesen shi ve ker u eren ityom ken tiônnongo la kpa ka ve zua a iveren na. Ruamabera bum a vese ér Aôndo una ver “mbakuranilev utaankaruhar man mbatarev ken ior anigheni,” hen atô u ior nav, ka ingyegh ki nomso mba vian ken jijingi je la, vea lu mbahemen ken nongo u Yehova. (Mika 5:5) Nyian ne, anmgbianev mba hiden a ayol a ve ijime, mba ve lu a isharen i eren tom sha ci u mbagenev la mba kpishi, mba i lu tesen ve u nengen sha ityom i ken tiônnongo yô. Kwagh ne va Yehova a iwuese shi va se a averen kpishi!
Ú Na Mlumun Wer Nyi?
• Yesu yange wase mbahenen nav sha u ve kuma u eren ityom i vesen nena?
• Mbatamen vea dondo ikyav i Yesu la er ve lu tesen nomso mba ken tiônnongo ér ve lu mbahemen la nena?
• Tsombor u or ua er nyi sha u wasen nan u keren tom u eren ken tiônnongo?
• Ka nyi nomsoor nana er sha u keren ityom i eren ken tiônnongo?
[Mbampin mba ngeren u henen]
[Ufoto mba sha peeji 31 la]
Ka ityesen i nyi u fatyô u nan or u ú henen Bibilo a nan, u nan soo u vesen ken jijingii?
[Foto u sha peeji 32 la]
Nomso vea tese ér ve mba keren u eren ityom ken tiônnongo nena?
