Ú Umbur Kpa?

Ú ôr Iyoukura mba i sember duen a mi la vighe vighe kpa? Yô, nenge ase wea fatyô u nan mlumun sha mbampin mban yô:

• Er Aôndo kaa a Mbalevi ér “M ngu kwar wou” yô, lu kaan ér nyi?

Yange i kar kwar u tar u ityendezwa la i na ikwe i Mbaiserael cii, kpa Mbalevi yô, lu Yehova lu “kwar” ve ye. (Num. 18:20) Lu u vea zua a dyako ken tar ve ga, kpa ve gema ve zua a iantom i injaa. Nahan cii kpa, Yehova nengen sha ugbayol vev mba hange hange mbara. Nyian ne, mba ve lu a ian i icivirigh i eren tom sha ci u mzehemen u Tartor la, vea fatyô u lun a vangertiôr ér Yehova una nengen sha mbamgbe vev mba hange hange mbara.—9/15, peeji 7-8, 13.

• Ka nyi ia wase Orkristu u fan ér ma iemberyolough ngi a iwasen shin ngi a mi ga?

Wea soo u fan, aluer ma iemberyolough ia wase u shi ia doo Aôndo ishima yô, doo u ú pine wer: Ka nyi i lu ken iemberyolough laa? Ka hanma shighe nahan me er iemberyolough laa? ka unô me eren iemberyolough la vea ve?—10/15, peeji 9-12.

• Kwagh u i nger ken Anzaakaa 7:6-23 la una wase se se palegh u nengen ufoto mba ijimbaa nena?

Avur a Bibilo la ôr kwagh u wanyekwaor ugen u lu karen gbenda hen ijiir igen i yange i fa ér idyakwase ngu her yô. Nahan idyakwase la mee un er kwagh u yange ma er ga yô. Nyian ne, doo u se palegh ajiir a sha Intanet a a lu a ufoto mba jimbagh la, shi gba hange hange u se er msen hen Yehova cii ve alaghga se va za hingir u nengen ufoto mba jimbagh sha Intanet ye.—11/15, peeji 9-10.