Kura Ieren I Dedoo I Tiônnongo Wou La
Kura Ieren I Dedoo I Tiônnongo Wou La
“Mlumun u sha mhôôn u Ter Yesu Kristu a̱ lu a ieren yen la.”—FIL. 4:23, NW.
SE NA IEREN I DEDOO IA LU KEN TIÔNNONGO . . .
shighe se kombo vea anmgbianev asev nena?
sha u pasen kwagh sha gbashima nena?
sha u pasen mbatamen isholibo i vesen nena?
1. Yange i wuese tiônnongo u ken Filipi man u ken Tiatire la sha ci u nyi?
MBAKRISTU mba ve lu ken Filipi sha derianyom u hiihii la yange ve lu a kwagh a ve ga. Nahan kpa, ve wa nagh shi mba civir Aôndo a ve imôngo doo ve ishima tsung. (Fil. 1:3-5, 9; 4:15, 16) Sha nahan yô, shighe u apostoli Paulu lu kuren washika u nger hen a ve la, a kaa ér: “Mlumun u sha mhôôn u Ter Yesu Kristu a̱ lu a ieren yen la.” (Fil. 4:23, NW) Er tiônnongo u ken Tiatire lu a imba ieren la yô, Yesu u i nder un shin ku la ôr kwagh na ér: “M fa aeren a ou man dooshima wou man jighjigh u nan wou man tom wou man ishima i taver you, man er aeren a ou a masetyô la hemba ngeen a a hiihii la.”—Mpa. 2:19.
2. Ka se wase tiônnongo wase á za hemen a ieren na i dedoo la nena?
2 Nyian kpa, hanma tiônnongo u Mbashiada mba Yehova yô ngu a ieren na. I hemba fan atôônanongo agen sha ieren i kundu kundu i sha dooshima. Atôônanongo agen di i fa a sha gbashima u a lu a mi sha tom u pasen kwagh kua tom pania la. Se asange asange ka sea lu a ieren i dedoo yô, se na mzough a lu ken tiônnongo shi tiônnongo a za hemen u lun a ieren na i dedoo la. (1 Kor. 1:10) Nahan kpa, aluer se mba a ieren i vough ga yô, se na ior a kera civir Aôndo sha gbashima ga shin vea gba mnyam ken jijingi, gayô se hingir u lumun a isholibo i vesen je kpaa. (1 Kor. 5:1; Mpa. 3:15, 16) Ka ieren i nyi nahan tiônnongo wou a lu a mini? Ka nyi u er ve u na tiônnongo wou una za hemen u lun a ieren i dedoo?
TAVER IOR ISHIMA VE LU A IEREN I DEDOO KEN TIONNONGO
3, 4. Se “sugh [Yehova] ken mkohol u tamen” nena?
3 Orpasalmi yange wa icam ér: “Me sugh U ken mkohol u tamen, me wuese We ken atô u ior kpishi.” (Ps. 35:18) Orpasalmi yange a wuese Aôndo shighe u una lu vea mba civir Aôndo mbagenev yô. Mbamkombo mba tiônnongo mba i eren hanma kasua la, kua mkombo u Iyoukura i Henen la, ka ve na se ian i injaa i tesen gbashima wase shighe u se lu wan zwa ken mbamkombo, sha u pasen jighjigh wase u nan la. Hanma wase nana fatyô u pinen iyol i nan ér: ‘M we zwa ken mbamkombo a ishima i môm kpa? M we iyol sha kwaghhenen tsembelee shi m ne mbamlumun mba maan mbagenev ken jijingi kpa? Mea lu orya yô, m tesen mbayev av u wan iyol tsuaa shi nan mbamlumun ken mkaanem vem kpa?’
4 Se fatyô u tesen sha gbenda u se we atsam ken mbamkombo la ser ishima taver se, inja na yô, se kange ishima ser se er kwagh u vough. Davidi kaa ér: “Ishima taver mo, Aôndo, ishima taver mo; me wa icam, een, me wa atsam a wuese.” (Ps. 57:7) Shighe u wan atsam ken mbamkombo asev la ka ian i injaa i se ‘wan atsam a wuese’ Yehova a ishima i taver. Aluer se fa atsam ne agen ga yô, er nan se karen iyol u wan a shighe u se nyer Mcivir u hen Tsombor aikighe la ga? Se kange nen ishima u ‘wan icam teren Aôndo wase er se lu her yô.’—Ps. 104:33.
5, 6. Se eren a mbagenev doo doo shi se naan ve kwagh wuee nena, man kwagh ne una wase ior u eren nyi ken tiônnongo?
5 Gbenda ugen u se wase ior vea lu a dooshima ken tiônnongo yô, ka u eren a anmgbianev asev doo doo. Paulu yange nger ken ityough ki masetyô ki takerada u Mbaheberu la ér: “Dooshima u anmgbianev ve doo ayol a ve la a̱ lu her. De hundu nen ishima u eren dedoo a mbavannya ga.” (Heb. 13:1, 2) Gbenda u injaa môm u se er a anmgbianev asev doo doo yô, ka u yôron mbatamen mba ningir sha kua kasev vev, shin mba ve eren tom u pania ken tiônnongo la. Ashighe agen se fatyô u lôhôn kasev mba côgholov man ormaren u nan lu yesen ônov tswen yô shin mbagenev ér ve va ya kwaghyan a vese imôngo shin ve va er mcivir u hen tsombor a vese.
6 Paulu yange kaa a Timoteu ér a wa mbagenev kwagh, “ve̱ eren akaa a dedoo ve̱ lu mbanyarev sha aeren a dedoo, ve̱ naan iyua, ve̱ panden kwagh ve̱ naan mbagenev kpaa, nahan man vea wa imagh ki dedoo sha ci ve ayol a ve ken hemen ye, sha u vea kôr ave sha uma u a lu uma jim la.” (1 Tim. 6:17-19) Paulu yange lu kaan a mba ve civir Aôndo a na imôngo mbara ér ve naan mbagenev kwagh wuee. Shighe u inyaregh ki ban je kpa, se fatyô u nan mbagenev kwagh wuee. Gbenda u injaa u eren kwagh ne yô, ka u wasen mba i gbe u a wase ve la, sha u tôôn ve sha kwaghhendan zan mkombo shin duen kwaghpasen. Anmgbianev mba i ne ve iwasen sha imba gbenda ne mbara di vea tese iwuese nena? Aluer ve nan mba ve tee ve la kwagh u ve fetyô la, sha er vea haa mkurem yô, vea taver ve ishima u lun a ieren i dedoo ken tiônnongo. Gbenda ugen u se tese anmgbianev asev ser ve doo se ishima shi ve gba se kwagh yô, ka u lun vea ve imôngo shighe gôgônan. Aluer se mba eren a “mbananjighjigh” mbagenev doo doo shi se kegh iyol u nan shighe wase kua akaa ase agen sha u wasen ve yô, vea seer doon se ishima, shi se wase mbagenev u lun a ieren i dedoo ken tiônnongo.—Gal. 6:10.
7. Aluer se mba pasen akaa a myer a mbagenev ga yô, kwagh la una kura ieren i dedoo i tiônnongo la nena?
7 U kôron ijende shi pasen akaa a myer a mbagenev ga la kpa ka a na dooshima a hemba taver hen atô u anmgbianev. (Ôr Anzaakaa 18:24.) Azende a mimi nga pasen mbagenev akaa a ve a myer ga. Anmgbianev asev ka vea pase se akaa a ve a sôngo sôngo shi vea na jighjigh ér se due a mi tembe ga yô, dooshima u a vande lun hen atô wase la a hemba taver cii. De se lu nen azende a pasen ior akaa a myer a mbagenev ga, nahan se na tiônnongo a lu er ka tsombor u lun a dooshima nahan.—Anz. 20:19.
PASEN KWAGH SHA GBASHIMA
8. Yesu yange wa Mbakristu mba ken Laodishia kwagh ér nyi, man lu sha ci u nyi?
8 Zum u Yesu lu tindin loho hen tiônnongo u Laodishia la, a kaa ér: “M fa aeren a ou, u ndôhôr ga, u tsee kpaa ga. Ma u ndôhôr, gayô, ma u tsee! Nahan yô, er u sagh a sagh yô, u tsee ga, u ndôhôr kpaa ga yô, Me haa u ken zwa Wam kera er ijer nahan.” (Mpa. 3:15, 16) Mbakristu mba ken Laodishia yange ve tsee ishima sha tom u pasen kwagh la ga. A shi nan kpa ieren ve la yange i na ve kera lu azende a dedoo ga. Sha nahan yô, Yesu wa ve kwagh ér: “Mba ve doom cii ka M tsaha ve shi M kôôm ve kpaa, nahan yô, ver ishima, gema ishima.”—Mpa. 3:19.
9. Ka sea pasen kwagh sha gbashima yô, kwagh la a bende a tiônnongo nena?
9 Aluer se soo ser tiônnongo a lu a ieren i dedoo yô, gba u se lu a gbashima sha tom u pasen kwagh la. I ver hanma tiônnongo sha er una ker mbaasemaamimi hen haregh u á lu her la, shi una wase ve u vesen ken jijingi yô. Sha nahan yô, doo u se er tom u geman ior hingir mbahenen la sha gbashima, er Yesu kpa er nahan. (Mat. 28:19, 20; Luka 4:43) Er se lu “mbashirentom a Aôndo imôngo” ne, aluer se mba tseen ishima sha tom u pasen kwagh la seer a seer yô, se hemba lun ken mzough cii. (1 Kor. 3:9) Ka sea nengen er mbagenev ve lu pasen ior akaa a ve ne jighjigh a mi la shi vea pasen er Yehova a doo ve ishima kua mcivir u mimi nahan, se hemba soon kwagh ve shi nan ve icivir kpaa. Shi ka sea pasen kwagh “sha ishima i môm” yô, se hemba lun ken mzough ken tiônnongo.—Ôr Sefania 3:9.
10. Ka sea nôngon ser se hemba fan tom u pasen kwagh la nahan, kwagh la a bende a tiônnongo nena?
10 Iniôngon i se nôngon ser se hemba fan tom wase u pasen kwagh la kpa ka i wase mbagenev kpishi je. Man er se lu tesen ser kwagh u ior mba se pasen ve kwagh la gba se ishima, shi se lu nôngon kpoghuloo ser ityesen yase i kôr ve ken ishima la, se hemba lun a gbashima sha tom u pasen kwagh la. (Mat. 9:36, 37) Aluer se mba pasen kwagh sha gbashima yô, mba se lun a ve imôngo la kpa vea pasen kwagh sha gbashima. Shighe u Yesu tindi mbahenen nav ér ve za pase kwagh la, a tindi ve môm môm ga, kpa a tindi ve uhar uhar. (Luka 10:1) Kwagh ne yange á tsaase ve shi a taver ve ishima tsô ga, kpa a na ve seer lun a gbashima sha tom u pasen kwagh la. Ka doon se u pasen kwagh vea mbapasenkwagh mba tseen asema kpa? Gbashima ve la ngu a taver se ishima shi a mgbegha se u pasen kwagh sha gbashima.—Rom. 1:12.
DE GBE AHON GA SHI DE YEREN ISHOLIBO I VESEN GA
11. Ka ieren i nyi Mbaiserael mbagen yange ve lu a mi sha shighe u Mose la, man ieren ve la na ve er nyi?
11 Yange Mbaiserael hingir ikyurior i lun sha tseeneke u i kuma iwer ateratar nahan tseegh, maa kwagh kera lu kuman ve ga, shi ve hii u gban ahon. Ieren ne na ve hingir u hemban Yehova ato kua mba Yange tindi ve la. (Eks. 16:1, 2) Lu Mbaiserael mba yange ve due ken Igipiti la kpuaa tseegh, Yehova lumun ér ve nyôr ken tar u ityendezwa la ye. Mose je kpa, i lumun un u nyôron ken tar la ga, sha ci u kwagh u a er shighe u Mbaiserael er kwagh sha mi ga la. (Dut. 32:48-52) Se er nan nyian ve se palegh ieren i bo?
12. Se er nan ve se palegh ieren i gban ahon laa?
12 Gba u se palegh ieren i gban ahon la sha ci u nyi? Iyol i hiden a mi ijime ia wase se u palegh ahon a gban. Kwagh ugen u shi una wase se yô, ka u wan ikyo sha mba se ker ijende a ve la. Aluer se tsua u eren iemberyolough i bo shi se mba vihin shighe vea ior mba se eren tom a ve shin se ze makeranta a ve, mba ve we ikyo sha atindi a wang a Yehova ga la ka karen ikyaa inya yô, se fatyô u gban ken kwaghbo. Aluer se mba zuan kwagh a ior mba gban ahon shi keren u lun sha tseeneke ve la kpishi ga yô, se lu eren kwagh sha kwaghfan.—Anz. 13:20.
13. Ieren i gban ahon la ia na se hingir u eren akaa agen a nyi, a vihin mlu wase vea Yehovaa?
13 Aluer mba ken tiônnongo mba gban ahon yô, vea va hingir u eren akaa agen a aa vihi mlu ve a Yehova yô. U tesen ikyav yô, ahon a gban aa fatyô u vihin bem man mzough u ma tiônnongo. Heela tseegh ga, aluer se zer vaan iyol sha kwagh u mba se civir Aôndo a ve imôngo la yô, alaghga kwagh ne una na ve ishimavihin tseegh ga, kpa una na se va hingir u eren asorabo a vesen, er u eren anger sha a ve shin vihin ve iti nahan. (Lev. 19:16; 1 Kor. 5:11) Mba gban ahon mba sha derianyom u hiihii la, yange ve “vendan mbautahav, ve lu tuhwan mba ve engem la.” (Yuda 8, 16) Mayange Aôndo lumun a ve lu gban ahon sha mba ve hemen ken tiônnongo la ga.
14, 15. (a) Aluer i de isholibo i vesen ngi zan hemen ken tiônnongo yô, ka nyi ia ere? (b) Aluer se fa ser ma or u ken tiônnongo nan er isholibo i vesen yô, doo u se er nyi?
14 Aluer ma or ken tiônnongo er isholibo ken myer, alaghga nan hunde msôrom shin nan nenge ufoto mba ijimbagh shin nan ngu eren idya, man se fa kwagh sha mi nahan se er nena? (Ef. 5:11, 12) Aluer or er isholibo i vesen se fa, kpa se ungwa ato yô, Yehova una kar a icighan jijingi na ken tiônnongo kera, shi tiônnongo la jimin cii una kera lu ken bem ga. (Gal. 5:19-23) Er yange gba u Mbakristu mba tsuaa mba ken Korinte vea dugh kwaghbo ken tiônnongo kera nahan, kape nyian kpa i gbe u se dugh hanma ieren i bo ken tiônnongo kera sha er se kura ieren i dedoo i tiônnongo shi se ver un tsembelee je la. Ka nyi u er ve u na bem a lu ken tiônnongoo?
15 Er se vande ôron nahan, ka hange hange u se palegh u pasen akaamyer agen a mbagenev ve er se la, hemban cii je yô, shighe u ve pase se mbamhen vev shin ve pase se er i lu ve ken ishima la. U pasen akaamyer a mbagenev la ka sha mi ga, shi ka kwagh u vihin ken ishima tsung. Nahan kpa, aluer or er isholibo i vesen yô, a gba u a pase mbatamen mba ken tiônnongo kwagh sha mi, sha ci u ka ve Ruamabera a kaa ér ka tom ve u nengen sha ambaakaa la ye. (Ôr Levitiku 5:1.) Sha nahan yô, zum u se fe ser ma anmgbian er isholibo i vesen yô, doo u se taver nan ishima ser nana za pase mbatamen sha er vea wase nan yô. (Yak. 5:13-15) Aluer shighe kar kpa nan za ga yô, doo u se za pase mbatamen kwagh sha mi.
16. Se kura tiônnongo sha u pasen mbatamen isholibo i or nan er se fe la nena?
16 Gba u mba ken tiônnongo vea nenge ér mba ken mkor, nahan doo u se kura tiônnongo sha u pasen mbatamen isholibo i vesen i or nan er yô. Aluer mbatamen wase orisholibo la nan kav er isholibo i nan i kehe kpishi, nahan nan lumun tsaha shi nan gema ishima yô, isholibo i nan la ia kera vihi ieren i dedoo i tiônnongo la ga. Kpa aluer or u nan er isholibo i vesen la nan venda u geman ishima shi nan venda u ngohol kwaghwan u mbatamen ve we nan sha dooshima la di ye? Mbatamen vea dugh nan ken tiônnongo sha. Nahan vea kar a kwagh u vihin ieren i dedoo i tiônnongo la kera. (Ôr 1 Mbakorinte 5:5.) Sha nahan yô, gba u hanmô wase nana pase mbatamen isholibo i vesen i nan fe kwagh sha mi yô, shi nana dondo gbendatesen ve kpaa. Ka nahan man se er kwagh u a hembe doon sha ci u anmgbianev asev, shi se kura ieren i dedoo i tiônnongo la kpaa ye.
TAVER MBAGENEV ISHIMA VE LU KEN “MZOUGH U KEN JIJINGI”
17, 18. Ka nyi ia wase se ve se lu ken “mzough u ken jijingi”?
17 Er mba dondon Yesu mba tsuaa mbara “kange asema sha ityesen i mbaapostoli” yô, ve na tiônnongo cii lu ken mzough. (Aer. 2:42) Kwaghwan u mbatamen wa mba dondon Yesu mban ken Ruamabera la yange gba ve kwagh kpen kpen. Er mbatamen mba sha ayange ne ve eren kwagh vea wanakiriki u jighjigh man u fan kwagh ken ijoughave yô, kwagh la ka a taver mba ken tiônnongo cii ishima shi a wase ve u lun ken mzough. (1 Kor. 1:10) Aluer se dondo kwaghwan u ken Bibilo u nongo u Yehova u ne se la shi se dondo gbendatesen u mbatamen yô, se lu tesen ser se mba ‘nôngon tsung u kuran mzough u ken jijingi sha mkange u bem.’—Ef. 4:3.
18 Sha nahan yô, de se nôngo nen sha afatyô wase cii, se kura nen ieren i dedoo i tiônnongo la. Aluer se er nahan yô, se lu a vangertiôr ser ‘mlumun u sha mhôôn u Ter Yesu Kristu una lu a ieren yase’ la.—Fil. 4:23, NW.
[Mbampin Mba Ngeren u Henen]
[Foto u sha peeji 19 la]
U ne wer ieren i dedoo i lu ken tiônnongo sha u wan iyol sha mbamlumun mba maan mbagenev ken jijingi kpa?
[Foto u sha peeji 20 la]
Na ieren i dedoo i lu ken tiônnongo sha u fan atsam ase tsembelee
