Ve Pase Mkaanem ma Aôndo sha Ishimataver!

Shighe u ka a tôvon Mbakristu mba mimi a ican je kpa, ve taver ishima. Ka se er msen hen Yehova ser a na se jijingi na shi a wase se se pase mkaanem nam sha ishimataver, er Mbakristu mba sha derianyom u hiihii la kpa yange ve er nahan.—Aer. 4:23-31.

Anmgbian ugen nger kwagh sha kwagh u tom u pasen kwagh u yange i er sha shighe u ityav mbi tar cii mbi hiihii la, ér: “Mba civir Aôndo yange ve lu samber a tihi u sha utaankaruhar u takerada u Studies in the Scriptures la sha gbashima, i yilan tihi ne ér The Finished Mystery. Í lu samber a takerada ne hemban hanma takerada ugen cii. Yange i due a Abaver a Tartor Namba 1 ken inyom i 1918 la. Maa i due a Abaver a Tartor Namba 2, i pase ityôkyaa i i na ve mbautahav lu yangen msamber u takerada u The Finished Mystery la yô. Shi i due a Abaver a Tartor Namba 3. Nongo u wanakiriki u jighjigh man u fan kwagh la samber a ityakerada ne wuee. Yange i gba u or a taver ishima ve nana na ior Abaver a Tartor ye.”

Nyian ne, ka i tese mbapasenkwagh mba hev er vea pasen kwagh yô, kpa sha ayange la i eren nahan hanma shighe ga. Anmgbian ugen u a lu marnya u tar u Poland, kpa a gem a lu ken tar u Amerika yô, nger kwagh u yange er un shighe u hii duen kwaghpasen ken inyom i 1922 la, ér: “Yange m tile sha hunda u afishi a ortwer ugen tswen, m mande uwegh, kpa m fa gbenda u nan ior ityakerada ken won ga, shi m fa u lamen zwa Buter sha inja ga. Kwase-nôôsu ugen va bugh hunda. Mayange kwagh ne una hungur mo ga, sha ci u yange cier mo iyol shi girim mo iyol kpaa. M ngur bughun ikpa yam yô, ityakerada i ker cii osough haa inya hen angahar a nôôsu la. M fa kwagh u yange m ôr a na ga, kpa yange m na un takerada môm ngohol. M karen her sha yô, ishima taver mo, shi m tôô mer Yehova verem doo doo. Yange m na ityakerada ken won sha iyange la kpishi sha godobi u i eren kpenga sha mi la.”

Anmgbian u kwase ugen kaa ér: “Ken inyom i 1933 la nahan, anmgbianev kpishi lu pasen kwagh a umato mba yôôn angwe u Tartor.” Sha shighe ugen la, un man orgen vea kwase na, ve lu pasen kwagh ken kpentar u California, ken tar u Amerika, ape iwo lu kpishi yô. A kaa ér: “Anmgbian ne yange naha mato u yôôn angwe u Tartor ne unde a mi sha uwo, se se gema se lu shin inya. Hiin u kuhwan icer i yange i kura ilyoho ker la yô, lu inja er ikyenge shon ngi duen sha abeen nahan. Ior mba ken geri la nôngo er ma nyi, ér vea nenge a anmgbian la kpa ve fatyô ga. Anmgbian ne koho tser la been yô, se hii u za pasen ior kwagh sha uya vev. Yange m er tom a umato mba yôôn angwe u Tartor mbagenev uhar, nahan me fatyô u kaan mer ior kpishi soon u ungwan loho u se pasen la ga. Kpa ve lu a kwagh u eren ga, sha ci u ilyoho i umato mba yôôn angwe u Tartor pasen la duen ken uyaav vev gbungur gbungur. Kwagh ne wase se u nengen er Yehova yange wasen se hanma shighe, u fan gbenda u hemban doon u pasen kwagh yô. Yange i gba u se kange ishima gbang ve se pase kwagh sha  imba gbenda ne ye, kpa kwagh ne yange a wase, shi a na iti i Yehova icivir kpaa.”

Ken kwavanyom u 1930 man u 1940 la, se pasen kwagh a mbaanar mba kuhwan tser kua akaaôron a yange i kura ken tser yô. Kwasekristu ugen kaa ér: “Gumkwase ugen ken Kristu yange lu pasen kwagh sha uya uya a anar u kuhwan tser. Nahan koho tser u i kura la hen hunda môm yô, ishima vihi orya la ker je a gbidye nguhar sha anar u kuhwan tser la osough sha varenda gba shin inya. Kpa tser môm tsô kpa kar kwe ga. Iorov mbagen utar mba ve lu yan kwaghyan atetan shin mato u i ver ikyua her yô, nenge kwagh ne, nahan ve yila anmgbian u kwase ne ér a va wa ve tser la vea ungwa, shi ve ngohol ityakerada hen a na kpaa. Kwagh ne na yô, ishima pever un, gadia orya ugen la vande eren a na caveraa.” Yange i gba u anmgbianev vea taver ishima ve vea wa ishima a atsan amba la nahan ye.

Anmgbian u kwase ne shi kaa ér: “M umbur er yange se hii u nan magazin sha godobi ken inyom i 1940 la. Kpa cii man shighe la yô, i duen wuaji sha godobi a akaa a ngeren man akav. Anmgbianev yange ve wa sha nongo suuluu sha akpe a godobi, ape mbaangahar karen la, ve kôr akav, i nger sha mi ér: ‘Religion Is a Snare and a Racket’ (‘Kwaghaôndo ka kwar man kwaghhônon’) kua ‘Serve God and Christ the King’ (‘Civir Aôndo man Kristu u a lu Tor’) la. Er ve lu yemen sha nongo la, ve naan ior trak gbilin. Yange i gba u or a taver ishima ve nana er tom ne sha igbenda i ngin nahan ye, kpa igbenda ne yange i wase u kuran iti i Yehova kua ior nav sha ashe a ikpelaior.”

Anmgbian u kwase ugen kaa ér: “Yange lu ican kpishi u nan ior ityakerada sha godobi sha ugeri mba kiriki. Shighe ne i lu tôvon Mbashiada a ican kpoghuloo. . . . Nahan i gba u or a taver ishima tsung ve nana tile sha kpe-gbenda a magazin ken uwe, nana lu ôron mkaanem ma yange i wa se kwagh ér se ôron la ye. Nahan cii kpa, yange i kar a kar ve se due kwaghpasen sha iyange i Sati ga ye. Ashighe agen ior yange ve lu a vese bem bem. Ashighe agen di yô, ior mba vihin asema ker ve va kase se, nahan ihyongo igen i gba u se ta ibalegh sha er a nzughul a vese ga yô.”

Shin er i lu tôvon Mbashiada mba Yehova a ican kpishi shighe u Ityav mbi Tar cii Mbi sha II la nahan kpa, ve lu eren tom ve u pasen kwagh la sha ishimataver. Hii ken uwer u Disemba 1, 1940 zan zan Janawari 12, 1941, mbapasenkwagh mba kuman er 50,000 nahan ken tar u Amerika yôô angwe ken ayange 43, ve na ior antyakeradav nôngo u kuman miliôn anigheni. Ve yila shighe ne ér “Courage” Testimony Period (“Shighe u Eren Shiada sha Ishimataver.”)

Mbapasenkwagh kpishi ken nongo u Aôndo mba ve lu sha shighe la ka ve umbur mbamtaver mba yange ve tagher a mi, mba gba u vea taver ishima ve vea hemba ve yô. Mbagenev ka ve umbur kwagh u yange ve ôron hanma shighe ér, Se pase nen kwagh zan zan mkur!, sha u tesen ishimataver i ve lu a mi anyom imôngo la. Se fa gbenda ugen u se va pase loho u Aôndo a ne se ne cii ve mkur u botar una mase van ga. Kpa sha iwasen i Aôndo yô, se za hemen u pasen mkaanem ma Yehova sha jighjigh u nan man sha ishimataver.

[Mkaanem ma sha peeji 9 la]

Hanma shighe yô, ka i gba u or a taver ishima ve nana er tom u pasen kwagh u Tartor la ye