Ka u Wa Or Kwagh Nena?

I lu nahan i kaa ér we u wa or kwagh vee? Ikyav i tesen yô, i lu nahan i pine u amba a mbampin ne vee? Mbampin er: ‘Ka nyi i doo u me ere? M za mkombo nee? M er tom nee? M sôôr kwase ne m vôsôô? M lumun ornee?’

Alaghga or a pine u ér we u wase nan u tsuan kwagh u nana er, u una fatyô u benden a mlu u nan vea azende a nan shin mba hen tsombor u nan, gayô Yehova je kpaa yô. Kwagh u u wa nan la una har sha nyi? Ka u wa or kwagh nena? Aluer kwagh u u lu wan or kwagh sha mi la ka kwagh u kiriki shin ka kwagh u vesen kpa, Anzaakaa 15:28 kaa ér: “Ishima i orperapera ka i henen imokwagh i ia ôr yô.” Nenge ase er atindiakaa ataan a ken Bibilo, aa dondo ne aa wase u u wan or kwagh yô.

1 Fa Kwagh u A Lu Zayol la Tsembelee.

‘Or u nan kaa imo je er nan lu a ungwa ga yô, á hingir lanegh ku nan man kwagh u kunya kpaa.’ —ANZ. 18:13.

Aluer se soo u wan or kwagh tsembelee yô, gba u se kav mnenge u nan kua mlu u nan. U tesen ikyav yô: Aluer or kaa a we ér u tese nan gbenda u zan hen ya wou nahan, gba u u hii fan ve u na nan iwasena? U gba tesen nan gbenda tsô, a u we hiin pinen fan ape nan lu la shio? U er nahan mayange ga! Kape aluer u soo u wan or kwagh u injaa kpa, a gba u u vande kaven mnenge u nan kua mlu u nan kpaa je la. Akaa agen nga a u kav sha mlu u nan tsembelee ga, aa alaghga aa bende a gbenda u u wa na kwagh la yôô? Aluer se kav mlu u or tsembelee ga yô, alaghga se wa nan kwagh u una tsume a tsume a nan yô.—Luka 6:39.

Pine Fa Nana Vande Tôvon sha Kwagh Shon Yô. Shi alaghga a doo u u pine or u nan lu keren kwaghwan hen a we la mbampin er mba ve dondo heen ne nahan, wer: “Ka atindiakaa a ken Bibilo a nyi u hen wer aa wase u u tsuan kwagh u u ere?” “Ka nyi i doo shin i vihi sha kwagh u u tsough u eren laa?” “U vande tôvon sha kwagh shon nena?” “Ka iwasen i nyi mbatamen mba ken tiônnongo shin mbamaren ou shin or u nan henen Bibilo a we la nan vande nan we?”

Mbamlumun mba or la nana na sha mbampin mbara vea wase se u fan kwagh u nan vande eren sha kwagh la yô, shi mbagenev vea vande wan nan kwagh kpa se fa. Shi alaghga se fa aluer or la nan soo di tsô ér se ôr nan kwagh u nan soo u ungwan yô.—2 Tim. 4:3.

  2 Palegh u Ôron Kwagh Gaegh.

‘Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron.’—YAK. 1:19.

Alaghga se hen ser aluer se kaa imo fese yô, a wase or u nan lu keren kwaghwan la. Kpa ka hanma shighe i doo u u kaa imo fese ga, hemban je yô, aluer se tôv sha kwagh u or la nan pin se la tsembelee ga yô. Anzaakaa 29:20 kaa ér: “U nenge or u ôron kwagh gaegh kpa? Yô, guda ibumeor a nan.”

Nenge wer kwaghwan wou la zua sha kwaghfan u a lu ken Mkaanem ma Aôndo la. Pine iyol you wer, “Kwaghwan wam la har sha mhen man ‘jijingi u tareghaa?’” (1 Kor. 2:12, 13) Umbur wer awashima u dedoo u ú lu a mi ve u lu wan or kwagh la tseegh kuma ga. Shighe u Yesu kaa ér gba kpee u una ya ican shi una kpe la, apostoli Peteru wa un kwagh, kaa ér: “Aôndo A̱ bunde kwagh la, Tere, a̱ de tseren We ga.” Ka nyi se fatyô u henen sha gbenda u Peteru yange kaa imo laa? Aluer se wa ikyo ga yô, alaghga kwaghwan wase la una har sha “akaa a a lu a Aôndo ga, saa a ior tsô” la. (Mat. 16:21-23) Nenge imba er i doo u se hen sha kwagh cii man se ôr la sha wono! Mhen wase yina sha kwaghfan u Aôndo ica je.—Yobu 38:1-4; Anz. 11:2.

3 Dondo Mkaanem ma Aôndo a Iyol i Hiden Ijime.

‘M gbe eren ma kwagh sha tahav Av iyol Yam ga, kpa M er akaa er Ter A tesem yô.’—YOH. 8:28.

Doo u u kaa wer, “Mea lu we yô, Ma m er nahan shin nahanaa”? Aluer mlumun sha mpin u i pine u la taver ga je kpa, a doo u u hen kwagh sha ikyav i Yesu a ver i hiden a iyol ijime shi eren kwagh akuma akuma la. Yesu yange hemba lun a mfe man kwaghfan a hanma orumace ugen cii, nahan kpa a kaa ér: “M gba ôron kwagh sha tahav Av ga; kpa ka Ter . . . A nem tindi sha kwagh u Me kaa man shi Me ôr kpaa ye.” (Yoh. 12:49, 50) Yesu yange tesen ior shi waan ve kwagh u lu sha ishima i Ter na la hanma shighe cii.

U tesen ikyav yô, i ôr ken Luka 22:49 ér mbahenen mba Yesu yange ve pine un sha u vea fa aluer gba u vea nôngo ityav shighe u i lu nôngon ér a kôr un la yô. Orhenen ugen la yange tsua sanker je kpaa. Kwagh u i nger ken Mateu 26:52-54 la kpa tese ér hen shighe ne je kpa, Yesu tôô shighe u wasen orhenen ne ér a kav ishima i Yehova. Er Yesu kav atindiakaa a a lu ken Genese 9:6 man akaaôron a profeti a i nger ken Pasalmi 22 man Yesaia 53 la yô, a kôrcio u wan ve kwagh sha inja, u yange war uuma vev shi lu sha ishima i Yehova kpaa yô.

  4 Nenge ken Ityakerada Yase.

‘Yô, ka an nan lu wanakiriki u jighjigh man u fan kwagh u ter u nan una wa nan ya sha ikyev sha u nana naan ve kwaghyan sha ashighe ashighe?’—MAT. 24:45.

Yesu ver nongo u wanakiriki u jighjigh la sha u u̱ naan se kwaghyan u ken jijingi. Ka a gba u u wa or kwagh sha akaa a a lu hange hange nahan, ka u vande timen ken ityakerada i pasen Bibilo la tsembelee kpa?

Se fatyô u zuan a akaawan kpishi ken takerada u i yer ér Watch Tower Publications Index la, kua tser u Watchtower Library * la kpaa. Aluer se ker kwaghwan ken ityakerada ne ga yô, se tsume. I tese akaa sha atineakaa kposo kposo udubu imôngo, aa wase or u nan lu keren kwaghwan la yô. U fa u wasen mbagenev u tôvon sha atindiakaa a ken Bibilo shi gbidyen kwar sha Mkaanem ma Aôndo je he? Er kwagh u i nger sha u tesen or gbenda, u a ter ajiir kposo kposo a u kar ve u za ape u soo la ngu a wase or nahan, kape ityakerada ne kpa ia fatyô u wasen or u tsuan akaa a a wase nan u zuan a uma u tsôron u nan ver ishima u zuan a mi la je la.

Mbatamen kpishi tsaase mbapasenkwagh ve fa u eren tom a takerada u Index man tser u Watchtower Library la. Sha nahan yô, mbatamen mban ka ve wase anmgbianev vev mba nomso man mba kasev u timen ken Ruamabera. Kwagh ne ka a wase mbapasenkwagh u sôron mbamzeyol vev tseegh ga, kpa shi ngu a wase ve ve hen u tôvon sha kwagh shi suur sha ityakerada i Yehova a ne se la kpaa. Sha nahan yô, ka ve “er tom sha mkav u ken ishima, [i] hoghor ve u paven kwagh u dedoo a kwagh u bo.”—Heb. 5:14.

5 Palegh u Tsuan Akaa sha Ci u Mbagenev.

‘Hanma or nana va tôô ikyav mbi nan iyol i nan je.’—GAL. 6:5.

Gba u hanma or nana tsua kwaghwan u nana dondo la iyol i nan. Yehova na hanmô wase ian i tsuan u dondon atindiakaa a na shin dondon ga. (Dut. 30:19, 20) Akaa agen ka a na i gba u se yar tom a atindiakaa a ken Bibilo kpishi, kpa ken masejime yô, ka or u nan keren kwaghwan la i gbe u nana tsua kwagh u nana er ye. Anyom a or u nan lu keren kwaghwan la gayô mlu u nan, una na yô, a gba u shi alaghga se pine ayol a ase ser, ‘Jighilii yô, ka mo i gbe u me wa or ne kwagh yee?’ Akaa agen yô, a hemba doon u u kaa a or u nan keren kwaghwan la wer nana za pine mbatamen mba ken tiônnongo, shin aluer ka wanye u cuku yô, nana za pine mbamaren mba nan.

[Ngeren u shin kpe]

[Ngeren u kiriki/​Foto u sha peeji 8]

U Tôvon sha Kwagh u A Time sha Mi ken Mcivir u hen Tsombor Yô

U fatyô u tôvon sha ma mpin u or nan sember pinen we yô, sha er a time sha mi ken mcivir hen tsombor u yô. Ka akaawan a ken Bibilo man ngeren mba nyi vea wase u u nan mlumun sha mpin u or shon nan pine u laa? Ikyav i tesen yô, anmgbian u nomso shin u kwase ugen pine u mpin sha kwagh u sôôr or a awashima u vôson nan la. Aluer u ngu tôvon sha mpin ne ken Index shin Watchtower Library yô, vande nengen itinekwagh i i time sha kwagh ne jighilii la. U tesen ikyav yô, aluer ka Index u lu timen ker yô, u fatyô u nengen ishember i “Dating” (Ishiôr) shin “Marriage” (Ivaa) la. U been yô, nenge ngeren mba kiriki mba ve lu hen atineakaa ne la, sha er u zua a ngeren mba ve zough sha mlu u or la yô. U nguren nengen mtom ma vesen yô, ver ishima fa aluer atineakaa agen nga ape i nger her ér “See Also” la kpaa yô. Atineakaa ne aa fatyô u tesen we ngeren mbagenev mba ve hembe pasen kwagh u u lu tôvon la jighilii yô.

[Ngeren u kiriki u a lu sha peeji 9 la]

Er Yehova a ne se akaa a injaa kpishi sha ikyev i nongo na yô, ka se zua a kwaghwan u hemban doon cii shi se kpa se fatyô u wan mbagenev kwagh. Orpasenkwagh 12:11 kaa ér: “Asemberakaa a mbafankwagh nga er utakera yô; man er ukusa mba i mande i taver yô, kape akaaôron a i kohol a imôngo a lu la, ka hen orkuran môm a dugh ye.” Er “utakera” shin mbaagya ka ve wase u kôôm ibua nahan, kape kwaghwan u injaa man u sha dooshima kpa ngu a kôôm mbaasemaamimi, a za a ve sha gbenda vough je la. “Ukusa mba i mande [sha kwagh] i taver” yô, kwagh la tenger ga. Kape u wan or kwagh u una lu nan a inja la kpa mbamtsera mba tsôron ve lu ker je la. Ka i doo mbafankwagh tsung u ‘kohol akaaôron imôngo’ aa tese kwaghfan u Yehova, u a lu “orkuran môm” la.

Shighe u u we or kwagh yô, er kwagh vough er Orkuran iyôngo nahan. Hanma shighe u se fatyô u wan mbagenev kwagh cii, ka kwagh u civirigh u se keghen ato a ve shi wan ve kwagh u una lu ve a iwasen yô! Aluer kwaghwan wase har sha atindiakaa a ken Bibilo yô, kwaghwan shon una doo shi una fatyô u lun or u nan ongo un la a iwasen gbem sha won kpaa.