Kpoghor Ior Ve “Nder Ken Mnya”
Kpoghor Ior Ve “Nder Ken Mnya”
“Ne fa shighe ne gadia ka ihyongo i ma ne nder ken mnya je ne, gadia hegen myom hemba mgbôghom a vese a shighe u se na jighjigh hiihii la.”—ROM. 13:11.
Ú FATYÔ U PASEN KPA?
Er nan ve i lu hange hange u Mbakristu vea lu per ken jijingi?
Gba u mbapasenkwagh mba ve lu per mbara vea lu tsevaa shi vea veren ishima shighe u ve dugh kwaghpasen la sha ci u nyi?
Aluer se mba lamen a ior kundu kundu shi eren a ve doo doo shighe u se dugh kwaghpasen yô, a wase se nena?
1, 2. Ka sha nyi gbenda nahan i gbe u ior vea nder ken mnya?
HANMA inyom yô, ior ka ve kpe udubu udubu sha ci u ve meer mnyam shin ve yav zum u ve lu nahan mato sha gbenda yô. Ka i de mbagen tom sha ci u ve nder tsuaa ve yar tom ga, shin ve yav sha tom. Kpa kwaghbo u mnyam ma ken jijingi ma ve a mi la hemba vihin cii. Ka nahan ve Bibilo i kaa ér: “Or u nan lu per . . . yô, i saan nan iyol” ye.—Mpa. 16:14-16.
2 Er iyange i vesen i Yehova i mgbôghom ne, uumace kpishi gba mnyam ken jijingi. Mbahemenev mba Mbakristu Mbaaiev mbagenev je kpa kaa ér ior mba ken ukwaghaôndo vev mba yaven. Ka nyi i lu mnyam ma ken jijingi? Er nan ve i lu hange hange u Mbakristu vea lu pere? Se er nan ve se kpoghor ior vea nderee?
KA NYI I LU MNYAM MA KEN JIJINGI?
3. Or ka nan yav ken jijingi nena?
3 Ior mba ve yav yô, mba kera eren kwagh ga. Nahan kpa, mba ve yaven ken jijingi yô, alaghga vea lu a akaa a eren kpishi, kpa a lu akaa a ken jijingi ga. Adooga vea uve ityough u keren akaa a kuren mbamgbe vev mba ayange ayange, gayô vea lu keren mkpeyol shin itizan shin inyaregh. Akaa ne cii aa na yô, vea kera wa ikyo sha mgbe ve u ken jijingi la kpishi ga. Nahan kpa, mba ve lu per ken jijingi yô, ve fa er se lu “ken ayange a masejime” yô, nahan mba eren ishima i Aôndo sha afatyô ve cii.—2 Pet. 3:3, 4; Luka 21:34-36.
4. Inja i kwaghwan u a kaa ér: “Se kera hungur nen mnyam er mbagenev nahan ga” la ér nyi?
4 Ôr 1 Mbatesalonika 5:4-8. Heen ne, apostoli Paulu wa Mbakristu kwagh ér ve de ‘kera hungur mnyam er mbagenev nahan ga.’ Yange ôr nahan ver ishigh ér nyi? Gbenda môm u se fatyô u ‘hungur mnyam’ yô, ka u vendan u dondon atindi a Yehova a we sha kwagh u aeren a wang la. Shi gbenda ugen u se fatyô u ‘hungur mnyam’ yô, ka u tesen ser, er shighe a zurum u Yehova una tim mbaaferev nahan kpa, kwagh gba se sha mi ga. Gba u se ver ishima sha er ambaaior a vendan Aôndo la a na se hingir u lun a mbamhen vev man aeren a ve ga yô.
5. Ka mbamhen mba kpeegh mba nyi mba ve yaven ken jijingi ve lu a mini?
5 Mbagen ka ve hen ér Aôndo je kpa ngu u una va ôr ve ijir sha aeren a ve ga. (Ps. 53:1) Mbagen nenge ér kwagh gba Aôndo sha kwagh u se uumace ga, nahan ityôkyaa ngi i vea soo kwagh na ga. Mbagenev yô, ve nenge ér aluer mba zan adua yô, kwagh la una na vea ya ikyar a Aôndo. Ambaaior ne cii nga yaven ken jijingi, nahan a gba u aa nder. Se wase ve nena?
GBA U SE AYOL A ASE KPA SE LU PER
6. Gba u Mbakristu vea nôngo tsung sha u vea lu per sha ci u nyi?
6 Saa se ayol a ase kpa se lu per ve se fatyô u nderen mba ve yaven la ye. Kpa se lu per nena? Mkaanem ma Aôndo kaa ér mba ve yaven ken jijingi yô, mba eren “aeren a imegh.” Aeren shon yô, ka iniongo i msôr man msôrom ma hunden man idya man ijimba i eren, kua iyuhwe i eren. (Ôr Mbaromanu 13:11-14.) Taver kpishi u palegh aeren ne. Ka hange hange u se lu per. Gba u ordelaba u nan lu nahan mato nana fa ér aluer nan yav yô, nana fatyô u zuan a ku. Gba u Mbakristu vea fa er mnyam ma ken jijingi ma lu kwaghbo yô.
7. Aluer se mba a mnenge u kpeegh sha kwagh u ior mba hen haregh wase la yô, ka nyi ia ere?
7 U tesen ikyav yô, alaghga Orkristu nana tôô ér ior mba hen haregh u nan pasen kwagh her la cii venda mimi gbindigh gbindigh. (Anz. 6:10, 11) Alaghga nana hen ér ‘Aluer or môm kpa kegh iyol i ungwan loho u dedoo ga yô, ityôkyaa i me nôngo mer me wase ior yô, ngi hana?’ Sha kpôô yô, alaghga mbagenev vea lu yaven ken jijingi hegen, kpa mlu ve shin ieren ve ia fatyô u va geman. Mbagenev ka ve nder ken jijingi, nahan ve ngohol loho shon. Aluer se ayol a ase se mba per, se mba keren igbenda i he i pasen loho u Tartor ne sha gbeda u ua kôr ior ken ishima yô, se kôrcio u wasen ve. Gbenda môm u se fatyô u lun per yô, ka u umbur ayol a ase er i hii ve tom wase ne u lu hange hange yô.
KA NYI I NE VE TOM WASE U PASEN KWAGH LA U LU HANGE HANGE?
8. Tom wase u pasen kwagh la ngu hange hange sha ci u nyi?
8 Doo u se umbur ser, ior vea venda loho u se pasen ve la je kpa, tom wase ne ngu ne Yehova icivir shi ngu wasen u kuren awashima na. Ica ia gba ga tsô, a tsaha mba ve venda loho u dedoo la. Ka gbenda u ior ve er kwagh sha loho u se lu pasen ve la, a ôr ve ijir ye. (2 Tes. 1:8, 9) Heela tseegh ga, aluer Orkristu hen ér, er i lu u “mbaperapera kua mba ve lu perapera ga vea [va] nder shin ku” yô, ka hange hange u pasen kwagh kpoghuloo ga yô, nan tsume kpishi. (Aer. 24:15) Mkaanem ma Aôndo wase se u kaven ér mba i er ve ijir ér mba “ivo” la vea “yem ken mtsaha u tsôron.” Tom wase u pasen kwagh ne ngu tesen mhôônom ma Aôndo, shi ngu bughun gbenda u ior vea gema asema vea zua a “uma u tsôron” yô. (Mat. 25:32, 41, 46; Rom. 10:13-15) Aluer se pase kwagh ga yô, a er nan ve ior vea zua a ian i ungwan loho u ua na ve uma laa?
9. Ka wea pasen loho u dedoo yô, i wase u kua mbagenev nena?
9 Shi tom u pasen loho u dedoo la ngu wasen se. (Ôr 1 Timoteu 4:16) Ka wea lamen a ior sha kwagh u Yehova man kwagh u Tartor na yô, jighjigh u nan wou a seer taver shi Aôndo a seer doon we ishima kpaa. Kwagh ne wasen we u lun a aeren a Orkristu ga he? Ka wea tese wer Aôndo doo u ishima sha u pasen ior kwagh na nahan, i saan we iyol gaa? Ior kpishi mba ve zough a ian i tesen mbagenev mimi yô, nenge er jijingi u Aôndo wase ior mba shon u geman uuma vev yô, nahan ve zua a iember kpishi.
VER ISHIMA ZUM U Ú LU PASEN KWAGH YÔ
10, 11. (a) Yesu man Paulu yange ve ver ishima sha u fan mbamgbe mba iorov nena? (b) Tese er se veren ishima sha u fan mbamgbe mba iorov ve, se seer fan u pasen kwagh yô.
10 Igbenda ngi kpishi i se na ve or a soo u ungwan loho u dedoo yô. Nahan gba u Mbakristu vea luun tsevaa shi vea veren ishima u fan mbamgbe mba iorov, shighe u ve lu pasen kwagh yô. Yesu ver se ikyav sha gbaa ne. Er Yesu lu or u vough yô, a kav mbamhen mba bov mba Mbafarishi lu a mi la, man mgemshima u kwase u eren asorabo ugen, kua ieren i nan kwagh i kwasecôghol ugen lu a mi la. (Luka 7:37-50; 21:1-4) Yesu waan ikyo sha mgbe u ken jijingi u hanma or cii. Nahan kpa, saa or u civir Aôndo nana lu vough ve, nana kôrcio u kaven ishima i or ga. Apostoli Paulu yange tese ikyav i kwagh ne. Yange geman gbenda u pasen kwagh la, sha er una pase kwagh a kôr ior mba sha ajiir wue wue man mba lun a aeren kposo kposo ken ishima yô.—Aer. 17:22, 23, 34; 1 Kor. 9:19-23.
11 Aluer se mba nôngon ser se lu tsevaa shi se veren ishima u fan mbamgbe mba iorov, er Yesu man Paulu nahan yô, se fatyô u kaven gbenda u ú hembe doon u se pase ior kwagh ve vea soo u ungwan loho wase yô. U tesen ikyav yô, wea za u pasen or kwagh yô, ver ishima sha er u fa akaa a a tese adini u nan shin akaa a a gbe nan ishima, shin mlu u tsombor u nan yô. U fatyô u veren ishima kaven kwagh u nan lu eren zan a mi a ve la, shi wuese kwagh shon shighe u ú hii iliam a nan yô.
12. Shighe u se lu pasen kwagh yô, doo u se wa ikyo sha iliam yase nena?
12 Or u nan lu tsevaa yô, ka nan palegh akaa a danen ior. Shighe u se dugh kwaghpasen yô, iliam yase vea or u se lu pasen kwagh imôngo la ia fatyô u maan se ken jijingi. Kpa doo u se umbur ser, awashima wase u duen kwaghpasen yô, ka sha u pasen mbagenev kwagh. (Orpa. 3:1, 7) Nahan gba u se wa ikyo sha er iliam i se lu lamen shighe u se mough hen hunda ugen se lu yemen hen ugen la ia yange se tom ga yô. Gbenda u dedoo u se ver ishima sha tom u se lu eren la yô, ka u lamen sha akaa a se soo ser se za ôr mba ve tese ér ve soo u ungwan loho wase la. Shin er hanseeti una fatyô u wasen se ken kwaghpasen nahan kpa, doo u se ver ishima sha er se de iliam a orya se yem u lamen a or sha hanseeti ga yô.
TESE WER KWAGH U IOR GBA U ISHIMA
13, 14. (a) Se er nan ve se fa kwagh u a gbe ior ishima? (b) Ka nyi ia na ve ior vea lu a isharen sha kwagh u Aôndo?
13 Mbapasenkwagh mba ve lu per shi ve lu tsevaa yô, ka ve wa ikyo sha kwagh u ior mba ve zough a ve la. Ka mbampin mba nyi u pine or hen haregh wou sha er nana pase u ishima i nana? Ishima za nan iyol sha mngee u ukwaghaôndo ve lu ngeen la, shin tswam u hen haregh u nan shin igbekera i gomotii? U fatyô wasen nan u henen kwagh u Aôndo sha u pasen nan gbenda u kpilighyol u i gbe akaa a uma la man er kwaghwan u Bibilo a lu a iwasen la kpa? Msen ka a nôngo u doon hanma injaor cii ishima, kua mba ve nyiman ér Aôndo ngu ga la je kpaa. Ka i taver ior kpishi u fan, aluer or ngu u nan ongo msen yô. Mbagenev vea soo u zuan a mbamlumun sha mbampin mban, ér: Aôndo ongo mbamsen ciili? Aluer ka mbamsen cii a ongo ga yô, ka nyi se er ve una ungwan se?
14 Aluer se ver ishima sha gbenda u mbapasenkwagh mba fan ityesen ve lamen a ior la yô, se kpa se hingir u fan u lamen a ior tsema tsema. Nenge er ka ve palegh u sendegh ior mbampin shi ve palegh u pinen ve akaa a ve a myer yô. Shi nenge er ikyenge ve man mlu u ishigh vev ngu a tese ér mba nôngon ér vea kav mnenge u mbayaav yô.—Anz. 15:13.
EREN A IOR DEDOO SHI NDEREN VE SHA KWAGHFAN
15. Er nan ve i doo u se eren a ior dedoo shighe u se lu pasen ve kwagha?
15 Ka wea yav mem mem nahan u soo wer or a nder u wee? Ka a nder mbagenev gaegh nahan i doo ve ga. Ka ve hemba soon ér i nder ve kure kure. Kape u nderen ior ken mnyam ma ken jijingi kpa i lu je la. U tesen ikyav yô, aluer u za hen ya u or man nan vihi ishima a we nahan, hemba doon u ú er nyi? Tese wer u kav er i lu nan ken ishima yô, nahan sugh nan er nan pase u ishima i nan wang yô, maa kar her sha. (Anz. 15:1; 17:14; 2 Tim. 2:24) Alaghga ieren you la ia mgbegha imba or la u keghen ato, kwagen u Mbashiada mba Yehova ve ze u pasen nan kwagh yô.
16, 17. Se er kwagh sha kwaghfan shighe u se lu pasen kwagh nena?
16 Ashighe agen yô, aluer or kaa a we ér nan soo u ungwan ga je kpa, u fatyô u zan hemen a iliam la. Alaghga orgen nana kaa ér, “Ei, mo m ngu a kwaghaôndo wam,” shin “Mo m soo u ungwan ga,” sha ci u nan hen ér ka gbenda u hemban taver ga u nana dan kwaghôron wou je la. Nahan kpa, aluer u tese nan erdoo shi u er kwagh sha kwaghfan yô, alaghga u fatyô pinen orya la mpin u vough u una wase nan, nana soo u ungwan loho wase yô.—Ôr Mbakolose 4:6.
17 Ashighe agen yô, aluer se zua a ior mba ve lu a ian cuku kpaa ga yô, hemba doon u nengen a mlu ve la, nahan yemen kera. Kpa ashighe agen di yô, alaghga u nenge wer hemba doon u ú ôr kwagh tiônôô u una wase ve yô. Anmgbianev mbagenev ka ve bugh Bibilo ve ôr ivur i ia kôr orya sha mtema yô, shi ve pine nan mpin, maa ve yem. Mba eren kwagh ne cii ka kom miniti môm ga. Er ka ve lam a mbayaav tiônôô yô, ashighe agen ka i doo orya kpishi nan nenge ér nana fatyô u zuan a ian i henen Bibilo. Er nan u kar eren nahan shighe u i gbe i doo ga?
18. Ka nyi se fatyô u eren sha er se hemba fan u pasen kwagh shighe u ian i dughu?
18 Aluer se wa iyol ser shighe u ian i dugh cii se pase kwagh yô, se fatyô u wasen ior mba se zough a ve ayange ayange la u soon loho wase. Anmgbianev kpishi ka ve wa ityakerada ken ikpa i ikyondo i ve hoo la shin ikpa i kôron hen uwe. Shi alaghga vea lu a ma ivur Bibilo ken ishima, i ian a due ve vea lam a ior sha mi yô. U fatyô u lamen a ortamen u nengen sha tomshiren shin upania mba ken tiônnongo wou, sha er vea wase u ú fa u eren kwagh ne yô.
KPOGHOR MBA HEN TSOMBOR WOU KURE KURE
19. Er nan i doo u se de u nôngon ser se wase mba hen tsombor wase ga?
19 Se cii ka i sar se u wasen mba hen tsombor wase sha u ve ngohol loho u dedoo. (Yos. 2:13; Aer. 10:24, 48; 16:31, 32) Aluer se nôngo ser se pase ve kwagh kpa ve venda yô, alaghga iyol ia kpe se u shi lamen a ve kwagen. Adooga se hen ser kwagh u se er ve vea gema inja je kpa ngu ga. Nahan kpa, alaghga akaa agen aa va er, a aa na anmgbianev ou vea gema mnenge ve yô. Shin adooga u seer fan u pasen ior mimi, nahan kwaghôron wou una hemba kôron ve ken ishima hen shighe la.
20. Er nan ve i doo u se er kwagh sha kwaghfan shighe u se lu lamen a mba hen tsombor wasa?
20 Doo u kwagh a gba se sha mhen u mba hen tsombor wase. (Rom. 2:4) Doo u se lamen a ve kundu kundu er se lamen a ior shighe u se dugh kwaghpasen la ga he? Lamen a ve kundu kundu man sha icivir kpaa. De zeren pasen ve kwagh kpii ga, kpa aeren a ou a tese er mimi a wese u kpishi yô. (Ef. 4:23, 24) Tese ve wang er Yehova a “tese u kwagh u una lu u a inja,” nahan uma wou a hembe doon yô. (Yes. 48:17) Anmgbianev ou ve nenge a aeren a Orkristu ken a we, nahan ve dondon ikyav you la.
21, 22. Ôr kwagh u a tese ér doo u se gba uwer u pasen anmgbianev asev mimi ga yô.
21 Semberee ne, anmgbian u kwase ugen nger ér: “M ngu a anmgbianev 13, man hanma shighe yô ka m nôngo mer me pase ve kwagh sha aeren am kua iliam yam cii. Inyom i môm kpa m gbe inya u ngeren ve cii washika ga. Nahan kpa, ken anyom 30 a karen ne cii, ka mo tswen m lu Kwaseshiada hen tsombor wam ye.”
22 Anmgbian u kwase la za hemen kaa ér: “Iyange igen m tôô telefon m yila anmgbian wam u kwase ugen u a lu ica yô. A kaa a mo ér un kaa a orhemen côôci na ér a hen Bibilo a na, kpa a lumun ga. M kaan a na mer a doom kpishi u henen Bibilo a na yô, a kaa ér: ‘Ka shami, kpa fa wer: Mayange me hingir Kwaseshiada u Yehova ga.’ Er m tindi un takerada u Bibilo Tese Ér Nyi Jimi? la, shi m yilan un faa faa nahan kpa, lu a bugh takerada la ga. Ken masejime yô, m kaa a na mer a tôô takerada na a bugh, nahan a bugh se ôr avur a ruamabera agen a i nger ker la shi se lam sha mi sha telefon kuma miniti 15. M yer un acin agen kpuaa shi se mba lamen yô, a soo ér se lamen i hemban miniti 15. Tsô a gema yilan mo ér se hen Bibilo. Ashighe agen yange m lu a nder ga tsô a yilam, ashighe agen je yô, a yilam kwa har ken iyange i môm. Ka ker ken inyom igen yô, i er un batisema, ka hurugh inyom igen yô, a hii u eren tom u pania.”
23. Er nan ve i doo u se gba uwer u nderen ior mba ve lu mnyam ken jijingi ga?
23 Ka i gba u se za hemen u nôngon kwagh shi se fa ityesen ve se fatyô u kpoghor mba ve lu mnya ken jijingi la ye. Ior kpishi mba ngohol loho u dedoo ne her. Aluer i tôô iyenge i ior mba i eren ve batisema ken inyom la i kar kwar sha hanma uwer yô, ka i er ior batisema je i hemba iorov 20,000, ve hingir Mbashiada mba Yehova. Nahan yô, se umbur nen kwaghwan u Paulu yange wa anmgbian Arekipu, u lu Orkristu sha derianyom u hiihii la, ér: “Ver ishima sha tom u u ngohol hen Ter la sha u eren u sha mi vough.” (Kol. 4:17) Ngeren u a dondo ne una wase se cii se fa kwagh u a lu u pasen kwagh torough torough la.
[Mbampin Mba Ngeren u Henen]
[Ngeren u kiriki u a lu sha peeji 13 la]
KWAGH U SE ER VE SE LU PER YÔ
▪ Za hemen u eren ishima i Aôndo
▪ Palegh aeren a imegh
▪ Fa kwaghbo u mnyam ma ken jijingi ma ve a mi la
▪ Lu a mnenge u vough sha kwagh u ior mba hen haregh wou la
▪ Kar pasen ior kwagh sha igbenda igen kpaa
▪ Umbur wer tom wou u pasen kwagh la ngu hange hange
