Mbampin Mba Mbaôron Takerada Ne Ve Pin La

Ieren i Orkristu nengen ufoto mba ijimbagh la ia fatyô u vihin je, a hingir u a dugh nan ken tiônnongo u Kristu keraa?

▪ Een, ia vihi je a fatyô u dughun nan kera. Ka nahan ve i gbe hange hange u se nôngo kwagh kpoghuloo se nyagh hanma foto u ijimbagh cii ye. Kwagh ne kua ufoto mba ijimbagh mba ve lu ken ityakerada man ken umagazin man ken ufiim man uvidio, man mba sha Intanet la kpaa.

Ufoto mba ijimbagh mba hanma ijiir sha tar cii. Ior mba nengen ufoto mba ijimbagh seer iyenge sha ci u Intanet na yô, kera ka ican u nengen ve ga. Agumaior man mbaganden mbagenev ve tagher a ufoto mba ijimbagh aburabur sha Intanet. Mbagenev yô, ka ve za sha ajiir a i tesen ufoto mba ijimbagh sha Intanet la a ishima ve. Ve zua a ian gbanger gbanger i nengen ve sha ci u mba hen uyaav vev shin mba sha afishi a ve, ape or a fatyô u nengen a ve ga yô. Gba u Orkristu nana nenge kwagh ne beelee ga sha ci u nyi?

Se zua a ityôkyaa i vesen ken icin i Yesu yange ta la. A kaa ér: “Hanma or u nana kenger kwase sha u nana tôm un yô, nan er idya a na ken ishima je ve.” (Mat. 5:28) Ka mimi, myav u nom man kwase yaven ayol a ve la ka kwaghbo ga, shi ka kwagh u nan ve msaanyol kpaa. (Anz. 5:15-19; 1 Kor. 7:2-5) Nahan kpa, ufoto mba ijimbagh yô, ka ve gema ve tese ieren i vihin tsung sha kwagh u yaven a or la, shi ve na or nan hingir u lun a mbamhen mba kpeegh mba Yesu yange ta se icin sha mi la. Nahan aluer or nan ngu ôron akaa a i nger sha kwagh u ufoto mba ijimbagh la shin nan ngu nengen ve yô, ka tindi u Aôndo a we la jim je  nan lu peren ye. Tindi la kaa ér: “Nahan yô, wua nen alegh a en a shin tar la kera, ka idya man hôngor man ityoronshima man isharen i bo man hua u eren, ka akombo a civir je la.”—Kol. 3:5.

Kpa aluer Orkristu nan nenge ufoto mba ijimbagh icin i môm shin acin ahar di ye? Nana lu nyôron ken kwaghbo u vihin tsung er orpasalmi Asav nahan. Yange kaa ér: “Kpa mo yô, shi kpuaa tsô angahar a am ma a kera lu ga, shi kpuaa tsô angahar a am ma a dolough kera.” Aluer Orkristu nan ngu nengen ufoto mba kasev shin nomso ve lu idyelegh ker, shin nomsoor vea kwase ve lu eren idya yô, nana kera lu a imoshima i wang ga shi nana kera lu ken bem vea Aôndo kpaa ga. A lu nan vough er Asav nahan; un yange kaa ér: “Ka m shi yan ican didi, kua mtsaha kpaa hanma sev.”—Ps. 73:2, 14.

Gba u Orkristu u nan lu nengen ufoto mba ijimbagh la nana fa er ufoto mban ve lu vihin ikyar i nan ye vea Yehova la, shi i gbe u nana ker iwasen kpaa yô. Nana fatyô u zuan a iwasen hen mbatamen mba ken tiônnongo. Bibilo kaa ér: “Aluer a kohol or a ma gbev mbu nôngon ave yô, ne mba ne lu ken jijingi yô, kôôm nen imbaor la sha ishima i legh legh; kpa nenge sha iyol you.” (Gal. 6:1) Ortamen môm shi mbatamen uhar vea fatyô u nan nan iwasen i i gbe u a na nan la, shi vea er ‘mbamsen mba sha jighjigh u nan mba vea yima oruange la, nahan á de nan isholibo i nan’ yô. (Yak. 5:13-15) Mba ve ker iwasen sha u vea wanger hôngor u ufoto mba ijimbagh kera la, ve kav ér doo ve u kporom ikyua a Aôndo, er Asav nahan yô.—Ps. 73:28.

Nahan kpa, apostoli Paulu yange kaa ér mbagenev mba ve er isholibo la ve gema ishima ‘sha hôngor ve man sha idya i eren man sha ijimba ve’ la ga. * (2 Kor. 12:21) Profesôr Marvin R. Vincent nger kwagh pase inja i ishember i ken zwa Grika i i gem ér “hôngor” la ér, “ka ieren i wang ga, i i ndôhôrishima” yô. Ufoto mba ijimbagh mbagenev kpishi hemba vihin a mba ka ve tese kasev shin nomso ve lu idyelegh shin or nan eren idya vea kwase la. Ufoto mba ijimbagh mba ndôhôrishima wa mba nomso ka ve yaven a ayol a ve shin kasev ve yaven a ayol a ve, gayô mba nomso man kasev ka ve lu hen ijiir i môm kpishi ve yaven a ayol a ve la, shin mba ka ve tese or nan yaven a zendenya shin ior kpishi ve yaven a or sha igyosough, shin i yaven a kasev sha ipila shin i kange or, i yaven a nan gayô i yaven a or sha gbenda u a nyoon nan tsung la cii ker. Mbagenev sha ayange a Paulu, mba ‘mfe ve wa ime’ la, yange ‘asema a ve wa akpema, ve na ayol a ve sha ijimba i eren sha u keren hanma kwagh u hôngorough sha hua.’—Ef. 4:18, 19.

Shi Paulu ter ishember i “hôngor” la ken Mbagalatia 5:19. Or u timen ken Bibilo ugen, ken tar u Ingila, kaa ér ishember la “alaghga ngi hemban ôron kwagh u aeren a a lu sha gbaaôndo ga la cii.” Hanma Orkristu cii yô, nana lumun ér amba a ufoto mba ijimbagh mba se time sha mi heen la cii, a ndôhôr ishima kpishi shi nga a na or nan lu a asaren a sha gbaaôndo ga. Nahan Paulu kaa ken Galatia 5:21 ér mba ve eren ambaakaa la cii “vea ya dyako u tartor u Aôndo ga.” Aluer hingir ikye i or u nengen ufoto mba ijimbagh, mba ve ndôhôr ishima shi ve vihi tsung, mba alaghga je yô, nan nenge ve ica i gbe la di ye? Aluer nan gema ishima, nan de ieren la ga yô, a dugh nan kera, sha er a kura tiônnongo shi a ver un wang kpaa yô.—1 Kor. 5:5, 11.

Doo u se fa ser mbagenev yange ve gba ken to u nengen ufoto mba ijimbagh, mba ndôhôr ishima mbara, kpa ve za pase iyol ve hen mbatamen, nahan ve zua a iwasen, ve de ieren ne. Yesu yange wa Mbakristu mba tsuaa, mba ken tiônnongo u Sardisu la kwagh ér: “Taver akaa a a shi her a a sôôn u kpen la. . . . umbur akaa a u ngohol shi u ongo a la, kusu a, gema ishima. Aluer u lu per ga yô, . . . ú fa shighe u Me va hen a we ga.” (Mpa. 3:2, 3) Shi u fatyô u geman ishima, nahan palegh kwaghbo u a lu ken ufoto mba ijimbagh la.—Yuda 22, 23.

Nahan kpa, hemba doon u hanmô wase nana kange ishima ér nana za ikyua a ufoto mba ijimbagh cuku tsô kpaa ga. Sha kpôô yô, gba u se cii se kange ishima u palegh nyityô foto u ijimbagh cii!

[Ngeren u shin kpe]

[Mkaanem ma sha peeji 30 la]

Gba u Orkristu u nan lu nengen ufoto mba ijimbagh la nana fa er ufoto mban ve lu vihin ikyar i nan ye vea Yehova la, shi i gbe u nana ker iwasen kpaa yô