Za Hemen U Pasen Kwagh Torough Torough
Za Hemen U Pasen Kwagh Torough Torough
“Yôô kwaghôron Na, yôôn torough torough je.”—2 TIM. 4:2, NW.
Ú FATYÔ U PASEN KPA?
Er nan ve Mbakristu mba sha derianyom u hiihii la yange ve pasen kwagh torough torougho?
Se er nan ve se za hemen u pasen kwagh torough torougho?
Er nan ve i hembe lun torough torough u pasen loho u dedoo la hegen ciilii?
1, 2. Ka mbampin mba sha kwagh u ‘pasen kwagh torough torough’ mba nyi, se lu timen sha mi?
IOR mba ve eren tom u waren uma ka ve er kwagh torough torough. U tesen ikyav yô, shighe u ya a gbe usu yô, mba ve ve u va wasen usu u pirin la ka ve er kwagh torough torough, sha ci u ve fa ér alaghga or a va hia ker.
2 Er se lu Mbashiada mba Yehova yô, se soo u wasen ior sha u ve war yô. Sha nahan yô, se mba nengen tom u pasen loho u dedoo u Tartor la beelee ga. Kpa u ngu wer se mba gbe eren u gyaver gyaver, a u henen sha u shio ga. Nahan shighe u Paulu kaa ér: “Yôô kwaghôron Na, yôôn torough torough je” la, yange ver ishigh ér nyi? (2 Tim. 4:2, NW) Se pase kwagh torough torough nena? Man er nan ve i hingir torough torough u se er tom nee?
ER NAN VE I GBE U A ER TOM WASE U PASEN KWAGH LA TOROUGH TOROUGHO?
3. Aluer ior lumun loho u dedoo shin ve venda u yô, ka nyi ia er ve?
3 Aluer u hen er tom wase u pasen kwagh la ua fatyô u yiman uuma mba iorov yô, alaghga u nenge er i hingir torough torough u pasen ior loho u dedoo yô. (Rom. 10:13, 14) Mkaanem ma Aôndo kaa ér: “Zum u Me kaa a iferor Mer: Ú kpe keng; aluer nana gema nana undu isholibo i nan, man nana er kwagh u sha tindi man u a lu vough yô, . . . nana lu uma kpee je, nana kpe ga. Ma isholibo i môm i nan er kpaa, á kera umbur nan i ga.” (Esek. 33:14-16) Bibilo kaa a mba ve pasen loho u dedoo la ér: “Ú yima iyol you kua shi mba ve lu ungwan we la kpaa.”—1 Tim. 4:16; Esek. 3:17-21.
4. Mvende u vendan mimi yange na hingir u a pase kwagh torough torough sha derianyom u hiihii la sha ci u nyi?
4 De se ôr ivur i ngeren ne a har sha mi la, kua avur a a dondo her la tsô se kav er i hii ve Paulu wa Timoteu kwagh ér a pase kwagh torough torough yô. Ijiir ne kaa ér: “Yôô kwaghôron Na [yôôn torough torough je, NW], a lu sha ian i doon, shin a lu sha ian i doon ga kpaa, kôôm, yangen, waan kwagh, sha ishima i wan tsung man sha ityesen kpaa. Gadia shighe ngu van u ior vea kera fatyô u veren ato sha ityesen i dedoo ga, vea kohol mbatesen kpishi sha asaren a ve ayol a ve sha ci u ato vande ngiligh ve yô. Vea tôô ato a ve sha kwagh u mimi la kera vea gema vea ver sha ukwaghhir.” (2 Tim. 4:2-4) Yesu yange vande kaan ér ior mba vendan mimi vea due. (Mat. 13:24, 25, 38) Er shighe ne lu zurum yô, yange hingir torough torough u Timoteu una “yôô kwaghôron” ne ken tiônnongo je kpaa, sha er atesen a aiegh aa tsume a Mbakristu ga yô. Gadia uuma vev lu sha zongo. Nyian di ye?
5, 6. Ka atesen a nyi a samber wuee, a alaghga se tagher a mi ken kwaghpasene?
5 Mvende u vendan mimi samber nyian wuee. (2 Tes. 2:3, 8) Ka ityesen i nyi i ngiligh ior ato nyiana? Sha ajiir kpishi, mba tesen ior ityesen i akaa cii gba duen abu tsô la sha gbashima, vough er ka i pase kwaghaôndo nahan. Shin er i lu kwaghfan u sangen yeke i pasen ityesen i akaa cii gba duen abu tsô la a mi nahan kpa, ka inja er ityesen ne hingir mcivir u mba ve nyiman ér Aôndo ngu ga la nahan. Ityesen ne ka i gema gbenda u ior ve nengen Aôndo kua mbagenev la. Ityesen igen i í samber wuee yô ér, kwagh gba Aôndo sha kwagh wase ga, nahan ityôkyaa ngi i kwagh a gba se a na ga. Er nan ve atesen ne a doo ior umilion imôngo ishima je, a ne ve gbe mnyam ken jijingi nahana? Atesen ne cii nga kaan ér, ‘U fatyô u eren kwagh u ú soo cii sha ci u or kpa nana pine u kwagh ga.’ Ka loho u ior ve soo u ungwan shi ve ne jighjigh a mi je ne.—Ôr Pasalmi 10:4.
6 Atesen agen kpa nga a ior ve ne jighjigh a mi yô. Ior mbagenev mba ve ze adua her je kpa, ka ve soo ér mbatesen vev ve kaa a ve ér, ‘Wea er nyi je kpa, ú doo Aôndo ishima her.’ Upristi kua upastô kpishi ka ve ngiligh mbagenev atô sha u kaan a ve ér, mbaadua mba eren man uiniongo man ieev mbi ve a iveren i Aôndo. Mba zan adua mban kav er mlu ve la a vihi kpishi nahan ga. (Ps. 115:4-8) Nahan kpa, aluer se nder ve ken jijingi shi se wase ve ve fa loho u Bibilo u mimi la yô, vea zua a averen a Tartor u Aôndo ua va a mi la.
INJA I U PASEN KWAGH TOROUGH TOROUGH LA ÉR NYI?
7. Se tese ser se mba eren kwagh torough torough nena?
7 Ka i gba u ortwer u paven ior nana ver ishima sha tom u nan zulee, sha ci u nana wa ikyo ga yô, uuma mba iorov vea va saa. Se fatyô u tesen ser se mba eren kwagh torough torough sha u veren ishima sha tom wase u pasen kwagh la. Se fatyô u eren kwagh ne sha u henen sha mbampin man abaver kua akaa agen a adooga aa doo ior mba se pasen ve kwagh la yô. Shi aluer se mba eren kwagh torough torough yô, kwagh ne una mgbegha se u keren ian sha er se za pase ior kwagh shighe u vea hemba keghen ato a vese yô.—Rom. 1:15, 16; 1 Tim. 4:16.
8. U eren kwagh torough torough la wa nyi man nyi kere?
8 Gbenda ugen u se fatyô u eren kwagh torough torough yô, ka u vanden eren akaa a a hembe lun a inja la. (Ôr Genese 19:15.) U tesen ikyav yô, tôô ase wer doo u iyol ga, nahan ortwer za karen we akaa yô, a yila u ken afishi na, a pase u zayol wou la sha mimi, a kaa a we ér: “Nenge, gba u u er kwagh sha angev ou mbun fefa. U ngu a uwer môm tseegh u eren kwagh ne.” U nure gaegh u due ken afishi a ortwer la kera er or u pirin usu nana er shighe u ya a gbe usu nahan ga. Kpa alaghga u kegh ato u ungwa kwagh ortwer a kaa u la, nahan u yem ken ya wou u za hen sha kwagh u a hembe doon u ú er yô.
9. Se fatyô u kaan ser Paulu yange pasen kwagh torough torough shighe u lu ken Efese la nena?
9 Aluer se time sha mkaanem ma Paulu ôr a mbatamen mba ken Efese sha kwagh u loho u dedoo u yange pase ken veghertar u Ashia la yô, se fa er yange pasen kwagh torough torough yô. (Ôr Aerenakaa 20:18-21.) Ikyav tese ér, iyange i hii nyôron la je, lu zan sha uya uya za pasen ior loho u dedoo. Heela tseegh ga, “hanma iyange lu ôron kwagh ken makeranta u Tiranu,” zan zan kuma anyom ahar je. (Aer. 19:1, 8-10) Sha kpôô yô, gbenda u Paulu pase kwagh ken Efese la, tese wang ér yange eren kwagh torough torough. Kwaghwan u a kaa ér se ‘yôô loho u dedoo tôrough torough’ la tese ér tom u pasen kwagh la yuhwa gande u se er ga. Kpa gba u tom ne ua lu kwagh u hiihii ken uma wase.
10. Doo u se wuese er Mbakristu yange ve pase kwagh torough torough, anyom 100 ken ijime la sha ci u nyi?
10 Cii man inyom i 1914 yô, annongo u Mbahenen Bibilo hii u pasen loho u dedoo. Ikyav ve la pase se kwagh u a lu u eren kwagh torough torough yô. Shin er iyenge ve lu udubu kpuaa tseegh nahan kpa, ve kav er gba u vea er kwagh torough torough hen shighe ve la yô, nahan ve hii u pasen loho u dedoo sha ishimatseen. Yange ve gber ilyoho i ve pasen la ken upipambaabaver uderi uderi, shi ve tese tser u lun a ufoto mba tenger shi duen a ikyenge, u i yilan ér “Photo-Drama of Creation” la. Kwagh ne na yô, ve pase ior umiliôn imôngo loho u dedoo. Yange vea lu a ishima i eren kwagh torough torough ga nahan, ka se ume ma se ongo loho u dedoo nyiana?—Ôr Pasalmi 119:60.
WA IKYO SHA ER U DE U PASEN KWAGH TOROUGH TOROUGH GA YÔ
11. Lu nyi i na mbagenev va de u pasen kwagh torough torougho?
11 Akaa a danen or aa fatyô u yangen nan u nengen er tom u pasen kwagh la u lu hange hange yô. Tar u Satan ne ka u dan se ér se de u civir Yehova, se hemba haren ishima sha u zendan akaa a a hange se la, kua akaa agen a a lu hange hange ga la. (1 Pet. 5:8; 1 Yoh. 2:15-17) Mbagenev mba kwagh u mcivir u Yehova yange hemba gban ve ishima yô, va de u pasen kwagh torough torough. U tesen ikyav yô, Orkristu ugen sha derianyom u hiihii, u i yilan un ér Dema yô, yange ‘eren tom imôngo’ vea Paulu. Kpa Dema va de akaa a taregh dan un. Er yange ma za hemen u haren ishima sha u taver anmgbianev nav asem ken ican la yô, a gema a undu Paulu.—File. 23, 24; 2 Tim. 4:10.
12. Ka ian i nyi se lu a mi hegene, man ka aan a nyi se va lu a mi gbem sha wono?
12 Saa se kighir isharen yase i keren mkpeyol ken tar ne la ve, se za hemen u pasen kwagh torough torough ye. Gba u se nôngo kwagh sha er se “kôr ave sha uma u a lu uma jim la” yô. (1 Tim. 6:18, 19) Akperan nga ga, we kpa u na jighjigh wer shighe u se lu uma gbem sha won ken Tartor u Aôndo la, se zua a aan a eren akaa a doon se kpishi, je ka u henen a hen ga. Kpa ka hen shighe wase ne tseegh se lu a ian i wasen mbagenev sha u ve war Armagedon ye.
13. Er se hingir Mbakristu hegen yô, se za hemen u eren kwagh torough torough nena?
13 Er ior kpishi ken tar ne ve lu yaven ken jijingi yô, ka nyi ia wase se ve se de u pasen kwagh torough torough ga? Doo u se umbur er se kpa yange se lu yaven ken ime yô. Kpa er Paulu kaa nahan, i nder se, shi Kristu ta iwanger sha a vese bong. Hegen se mba a ian i icivirigh i mondon iwanger la. (Ôr Mbaefese 5:14.) Paulu teren kwagh ne yô, maa a nger ér: ‘Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen ikyo, gadia ayange ne ka a bo je.’ (Ef. 5:15, 16) Er se lu ken botar ne yô, se ‘wa nen ian yase ikyo’ sha er se eren akaa a aa wase se u lun per ken jijingi yô.
SE MBA UMA SHA SHIGHE U DOON KPISHI
14-16. Ka nyi i ne ve i hembe lun torough torough u se pase kwagh hegen ciilii?
14 Hanma shighe cii ka i gba u se er tom wase u pasen kwagh la torough torough, kpa hemba kan torough torough u se er u hegen cii. Hii ken inyom i 1914 la je, akaa a Bibilo i pase ér aa lu ikyav i mkurtar la nga eren nahan vough. (Mat. 24:3-51) Akaa ne nga hemban anger uumace jimin cii hegen. Shin er ityar i ageegh i zough zwa nyian ér ia lu ken bem nahan kpa, ityar ne ngi a ubom mba bov kuma 2,000, mba a fatyô keren ve za gban hanma ijiir sha tar cii yô. Mbahemenev ka ve shi yôôn ér ubom mbagenev ndiir shin ve saa kuaa. Mbatswamev mba a ubom mban mbagenevee? Mbagenev ka ve kaa ér mbatswamev vea fatyô u tan ityav sha uumace, timin ve a ican iyol shio. Kpa ka ityav tseegh mbi ne uuma mba iorov ve lu sha zongo ga.
15 Makeranta u vesen ugen, u í yer ér The Lancet and University College London la yange u due a ibaver ken inyom i 2009 ér: “Mtsee u tar u lu tseen ganden ikyaa inya shi u lu ndôhôr ganden ikyaa inya la ka zayol u hemban cii, u nan uumace angev sha tar ken derianyom u sha 21 ne.” Makeranta ne shi kaa ér: “Ken anyom a a lu van ken hemen la, mtsee man mndôhôr u karen ikyaa inya ne una na ior kpishi sha tar iangev, shi una gbihi ior ubiliôn imôngo ken kwaghbo.” Kwagh ne una na yô, ajiir kpishi sha tar aa vihi sha ci u utyeku mba saren avenge man icegh man mngerem ma kuan akaa man iangev man ujeverahumbe kua ityav mbi nôngon kpelan akaa a injaa a shin inya. Sha mimi yô, aahe man ityav mbi anger uumace.
16 Adooga ior mbagenev vea hen ér ka er ityar i lun a ubom mba bov vea va nôngo ityav a mi la ve, kwaghôron u profeti u Yesu ôr sha kwagh u ayange a masejime la una kure ye. Nahan kpa, ior kpishi kav inja i kwagh u Yesu kaa ér una lu ikyav i mkur la jighilii ga. Se nenge a ikyav la hegen anyom ngee, nahan kwagh la tese ér Yesu hii u hemen sha shi mkur u botar ne mgbôghom. (Mat. 24:3) I gbe je kpa, se mba a nenge ikyav la i kure sha igbenda kposo kposo imba ne nahan ga. Ka shighe u i gbe u ior vea nder ken mnyam ma ken jijingi je ne. Tom wase u pasen kwagh la ua wase ve u nderen.
17, 18. (a) Ayange a masejime ne nga benden a vese nena? (b) Ka nyi ia fatyô u mgbeghan ior u geman mnenge ve sha kwagh u loho u dedoo u se pasen laa?
17 Se mase shin a shighe kpuaa tseegh u tesen ser Yehova doo se ishima, shi kuren tom u pasen kwagh u a ne se u eren ken ayange a masejime ne. Kwagh u Paulu yange ôr a Mbakristu mba ken gar u Roma la hemba ngun se a inja nyian cii. Yange kaa ér: “Ne fa shighe ne gadia ka ihyongo i ma ne nder ken mnya je ne, gadia hegen myom hemba mgbôghom a vese a shighe u se na jighjigh hiihii la.”—Rom. 13:11.
18 Akaa a yange i tsengaôron ér aa er ken ayange a masejime la aa fatyô u wasen ior u fan er i gbe u vea ya ikyar a Aôndo yô. Mbagenev ka vea hen er ugomoti mba uumace ve kanshio u yangen mtaver u inyar man ityav mbi sha ubom mba bov kua afer a eren man mvihi u i lu vihin tar la yô, kwagh ne a na ve hingir u fan er orumace nan yen u wasen iyol i nan yô. Mbagenev di yô, ka ve hingir u fan er i gbe u vea ya ikyar a Aôndo shighe u kwaghvihin a er ma or hen tsombor ve yô; er angev mbu vesen shin ku u or u doon ve ishima shin ivaa i paven nahan. Ka sea pasen kwagh yô, se na ayol a ase u wasen ambaaior ne.
ISHIMA I EREN KWAGH TOROUGH TOROUGH MGBEGH SE
19, 20. Ishima i eren kwagh torough torough la i mgbegha Mbakristu kpishi u geman uuma vev nena?
19 Ishima i eren kwagh torough torough la mgbegha Mbakristu kpishi u seer pasen kwagh. U tesen ikyav yô, gumor ugen ken tar u Ecuador vea kwase na yange mba ongo akaaôron a i na sha mkohol u iyange i môm u i er ken inyom i 2006, u lu a itinekwagh ér “Ver Ishe You Jighilii” la yô, ve tsua u eren akaa ken uma ve akuma akuma. Yange ve nger akaa a kwagh a gbe ve a mi ga la shin inya, shi ken atô u iwer itiar, ve due hen zege ya u ve lu her la ve za nyôr haya hen ya u kiriki, shi ve tee akaa agen ve kimbi anzô ve cii. Ica i gba ga tsô ve tôô ishuen pania shi ve ungwa kwaghwan u ortamen u sôron atôônanongo wa ve ér ve za wase ma tiônnongo u kwagh a hembe gban sha mbapasenkwagh her la.
20 Anmgbian ugen ken tar u Amerika nger ér: “Shighe u mo vea kwase wam se za mkohol u ningir u i er ken inyom i 2006 la nahan, i er se batisema kuma anyom 30. Mba been mkohol, se mba ngur nahan mato hiden ken ya yô, se lu lamen sha kwagh u se er ve se dondo kwaghwan u i wa se sha mkohol ér se eren akaa ken uma wase akuma akuma la. (Mat. 6:19-22) Yange se lu a uyaav utar shi se lu a inya man umato mba taver ishe man tso-injin kua iyou i lun a akaver, i ka i zer sha mato i yem zende a mi kpaa la. Er lu se inja er se vihi shighe wase man agee a ase gbilin sha u zendan akaa a iyolough yô, se tsua ser se gema eren tom u pasen kwagh hanma shighe la. Nahan ken inyom i 2008 la, se kohol wan wase u kwase ken tom u pania u keke la. Saan se iyol kpishi er se lu hemban eren tom a anmgbianev asev kôôsôô nahan. Kwagh ne wase se u za eren tom hen ape kwagh a hembe gban sha mbapasenkwagh yô. Shi er se lu hemban eren Yehova tom yô, se hemba mban a na kôôsôô. Shi doo se kpishi u nengen er ka i saan ior iyol kpishi zum u ve ongo mimi u ken Mkaanem ma Aôndo la shi ve kav un nahan.”
21. Ka mfe u nyi ka a mgbegha se u pasen kwagh torough torougho?
21 Se fa ser ica a gba ga tsô Aôndo una va a “iyange i ijirigh man mtim u mba ve vende Aôndo la” sha botar ne. (2 Pet. 3:7) Mfe u se fe Mkaanem ma Aôndo la ngu a mgbegha se u yôôn mve u zegecan man tar u he u ua dondo la sha gbashima. Se za hemen u lun a ishima i eren kwagh torough torough la sha er se wase ior ve lu a ishimaverenkeghen i mimi yô. Aluer se mba eren tom u pasen kwagh, u i gbe u a er u torough torough ne er se fetyô la cii yô, se lu tesen ser Aôndo doo se ishima kua mba wan ndor a vese.
[Mbampin Mba Ngeren u Henen]
