‘Wan Wa Ishima U Pasen Ior Kwagh U Ter Na’
‘Wan Wa Ishima U Pasen Ior Kwagh U Ter Na’
“Ma or fa Ter kpaa ga, saa Wan, man shi hanmô u Wan A we ishima u pasen nan yô.”—LUKA 10:22.
Ú NA MLUMUN WER NYI?
Er nan ve lu Yesu tseegh kuma u pasen ior kwagh u Ter naa?
Yesu yange pase mbagenev kwagh u Ter na nena?
Ka sha igbenda i nyi nahan se fatyô u dondon ikyav i Yesu i pasen ior kwagh u Ter laa?
1, 2. Ka hanma mpin a taver ior kpishi, man ka sha ci u nyi?
‘KA AN nan lu Aôndo?’ Mpin ne taver ior kpishi. U tesen ikyav yô, ior kpishi mba ve senge ér ve mba Mbakristu yô, na jighjigh ér Aôndo ngu iorov utar ken môm. Ve kpishi ve lumun ér ityesen ne taver u kaven. Fada ugen, u a ngeren ityakerada kpaa yô, kaa ér: “Ityesen ne aver mhen u orumace yem zende zende. Ka kwagh u orumace nana kôrcio u fan ga yô.” Mbagenev di gema na jighjigh ér akaa cii gba duen abu tsô, nahan Aôndo ngu ga. Ka ve kaa ér akaa a kpilighyol a i gbe a se nengen a mi ne cii yange va abu. Nahan kpa, or u yange due a ityesen i akaa cii gba duen abu tsô, i yilan un ér Charles Darwin la nyiman ér Aôndo ngu ga ze, kpa a kaa ér: “M nenge mer, sha ikyaa ne yô, hemba doon u me kaa mer kwagh ne gande mfe u orumace yem zende zende.”
2 Ior kpishi mba ve ne Aôndo jighjigh kua mba ve ne un jighjigh ga kpaa, mba pin mbampin sha kwagh u Aôndo. Kpa, ka vea zuan a mbamlumun mba kuman ve ga yô, ve yina ishima ve de u pinen ér vea fa kwagh u Aôndo. Sha kpôô yô, Satan “pir [mbananjighjighga] ashe a asema.” (2 Kor. 4:4) Nahan kera taver se er i hii ve ior kpishi ve fe mimi sha kwagh u Ter u a gbe sha man tar la ga, ve lu ken mlan nahan ga.—Yes. 45:18.
3. (a) Ka an nan pase se kwagh u Tere? (b) Ka mbampin mba nyi se lu timen sha mini?
3 Nahan kpa, ka hange hange u ior vea fa mimi sha kwagh u Aôndo. Sha ci u nyi? Sha ci u ka mba ve “yer sha iti i Ter” la tseegh vea war ye. (Rom. 10:13) Cii man se yila sha iti i Aôndo yô, saa se fa or u i yer nan sha iti ne la. Yesu Kristu yange pase mbahenen nav kwagh u hange hange ne. A pase ve kwagh u Ter na. (Ôr Luka 10:22.) Er nan ve Yesu pase ior kwagh u Ter sha gbenda u orgen môm nan fatyô ga? Yesu er kwagh ne nena? Se kpa se fatyô u pasen mbagenev kwagh u Ter, er Yesu nahan nena? De se time nen sha mbampin mban.
KA YESU TSWEN A KOM U PASEN IOR KWAGH U TER YE
4, 5. Er nan ve lu Yesu tseegh kuma u pasen ior kwagh u Ter naa?
4 Ka Yesu tseegh yange kuma u pasen ior kwagh u Ter na ye. Sha ci u nyi? Sha ci u cii man i gba akaa a uma agen cii yô, Yesu lu or u ken jijingi, lu sha vea Ter na. Yange lu “Wan u môm môm u Aôndo.” (Yoh. 1:14; 3:18) Ka Yesu tswen yange lu vea Ter na cii man i gba akaa agen ye, nahan a hen kwagh u Ter na man aeren a na. A̱ shi nan kpa, Yesu yange lamen vea Ter na hanma shighe, nahan ve soo ayol a ve tsung, ken anyom a a gande u ôron, a ve lu imôngo la. (Yoh. 5:20; 14:31) Nenge imba er wan yange una fa kwagh u Ter na la sha wono!—Ôr Mbakolose 1:15-17.
5 Ter yange tsua Wan na lu orshua na, ka “Imo i Aôndo” je la. (Mpa. 19:13) Kwagh ne na yô, lu Yesu tseegh kuma u pasen ior kwagh u Ter na ye. Yohane, u lu môm ken mba ve nger ityakerada i Ivangeli la, ôr kwagh u Yesu, u lu “Imo” la vough nahan ér, a lu “sha ikyum i Ter.” (Yoh. 1:1, 18) Alaghga shighe u Yohane ôr kwagh ne la, lu henen sha kwagh u i eren sha ayange a na, shighe u a yaan kwaghyan la. Yange orvannya nan tema nan zua ishigh vea orgen ikyua ikyua. Er ve lu ikyua yô, yange ve fatyô u lamen a ayol a ve. Nahan er Wan kpa, lu “sha ikyum i Ter” yô, yange lamen iliam i sôngo sôngo vea Ter na.
6, 7. Mlu u kangenaa u lu hen atô u Ter man Wan la yange lu taver seer a seer nena?
6 Mlu u kangenaa u Ter man Wan la lu taver seer a seer. “Hanma iyange [Wan a] lu saan saan gbem.” (Ôr Anzaakaa 8:22, 23, 30, 31.) Sha nahan yô, se fatyô u kuren ikyaa ser, mlu ve u kangenaa la seer taver shighe u ve lu eren tom imôngo la, kua shighe u Wan hen u eren kwagh er Ter na la kpaa. Shighe u Yehova gba mbatyomov kua uumace la kpa, Wan nenge gbenda u Yehova eren kwagh a hanmô ve la, nahan a seer fan aeren a Aôndo.
7 Shighe u Satan va hendan kwagh a Yehova ér a kuma u hemen sha won cii ga la kpa, Yesu zua ian i nengen er Yehova una tese dooshima man kwaghfan man tahav, shi una ôr ijir sha mimi shighe u tagher a mlu u taver la. Lu u kwagh ne una wa Yesu agoyol u va nôngon a mbamlu mba taver mba una va tagher a mi, shighe u lu pasen kwagh shin tar la je ka u henen a hen ga.—Yoh. 5:19.
8. Ityakerada i Ivangeli ngi wasen se u fan kwagh u aeren a Ter tsembelee nena?
8 Er Yesu lu a Ter na kôôsôô yô, yange fatyô u pasen ior kwagh u Yehova vighe vighe sha gbenda u ma orgen môm nan fatyô u eren nahan ga yô. Gbenda u hemban doon u se fa kwagh u Ter yô, ka u henen kwagh u Wan na u môm môm la tesen shi eren la. U tesen ikyav yô, aluer se kaa ser se fa inja i ishember i “dooshima” la vindi vindi sha u nengen er i pase i̱ ken ma dikishenali la tseegh yô, a taver se kpishi. Nahan kpa, aluer se hen sha akaa a i nger ken ityakerada i Ivangeli sha kwagh u tom u pasen kwagh u Yesu er, kua gbenda u yange waan mbagenev ikyo la yô, se hemba kaven inja i mkaanem ma ma kaa ér “Aôndo ka dooshima” la. (1 Yoh. 4:8, 16) Kape aeren a Aôndo agen a Yesu pase mbahenen nav shighe u lu shin tar la kpa, se hemba fan inja i a je la.
ER YESU A PASE TER NA LA
9. (a) Ka sha igbenda i vesen ihiar i nyi Yesu yange pase ior kwagh u Ter naa? (b) Ôr kwagh u a tese ér Yesu yange pase ior kwagh u Ter na sha ityesen na yô.
9 Yesu yange pase mbahenen nav kua mba vea va dondon un ken hemen la kwagh u Ter na nena? Yange er kwagh ne sha igbenda i vesen ihiar, lu sha atesen a na man sha ieren na. De se hii timen sha atesen a Yesu. Kwagh u Yesu tesen mbahenen nav la tese ér yange fa mbamhen mba Ter na dedoo, kua igbenda na shi fa ishima na kpaa. U tesen ikyav yô, Yesu yange tôô Ter na kar sha or u lun a iyôngo, u lun a dooshima, u nan yem u keren iyôngo i nan i môm i̱ i̱ saa yô. Yesu kaa ér nana zua a iyôngo i i tsum la yô, “m-ember u nana ember sha i la, una hemba u sha i akunduanyiingber kar itiankarinyiin i i tsum ga la.” (Mat. 18:12-14) Inja i injakwagh ne ér nyi? Yesu pase ér “Kape i lu ishima i Ter wen u A lu Sha la, u mbakiriki mban, mô ve nana̱ saa ga la.” (Mat. 18:12-14) Injakwagh ne pase se nyi sha kwagh u Yehova? Aluer ashighe agen ka i lu u inja er u gba kwagh ga, shi i ta u kera yô, umbur wer kwagh wou gba Teru u sha la ishima shi a wa u ikyo kpaa. Nengen we ér ú ngu môm ken “mbakiriki mban.”
10. Yesu yange pase ior kwagh u Ter na sha ieren na nena?
10 Gbenda u sha uhar u Yesu pase mbahenen nav kwagh u Ter na yô, lu sha ieren na. Sha nahan yô, shighe u apostoli Filibu kaa a Yesu ér: “Tese se Ter” la, Yesu kaa a na vough nahan ér: “U nan nenge a Mo yô, nan nenge a Ter je ve.” (Yoh. 14:8, 9) Nenge ase akav agen, a a tese ér Yesu yange tese aeren a Ter na sha ieren na yô. Shighe u orimande ugen zamber a Yesu ér a wanger un imande yô, Yesu bende or u “lu a imande iyol yoholoo” la uwegh iyol, kaa a na ér: “M lumun, i̱ wanger we!” A̱ shi nan kpa shighe u Yesu bee or ne imande la, a kav er lu sha tahav mbu Yehova Yesu er kwagh ne yô. (Luka 5:12, 13) Shighe u Lasaru kpe la kpa, mbahenen mba Yesu yange vea nenge a mhôônom ma Aôndo, zum u “sôô [Yesu] ken ishima, ishima ta Un kwe” shi a “vaa” la. Shin er Yesu fa er un lu nderen Lasaru nahan kpa, ku ne nyoon un er u nyoon tsombor u Lasaru kua ahuraior a na la nahan. (Yoh. 11:32-35, 40-43) Akperan nga ga, we kpa u ngu a ajiir ken Bibilo a doon we tsung, a a er kwagh u Yesu, a wasen we u nengen er Ter a zungu mhôônom yô.
11. (a) Yesu pase se nyi sha kwagh u Ter na zum u a wanger tempel laa? (b) Er nan ve m-wanger u Yesu wanger tempel la a lu kwagh u surun se ishima?
11 Nahan kpa, u hen nyi sha mwanger u Yesu yange wanger tempel laa? Hen ase sha kwagh u yange za hemen ne: Yesu tume akpa sha ikyar, zenda mba ve lu teen ibua man iyôngo ken tempel la kera. A haa inyaregh ki mbamusaninyaregh kira inya, shi a mgbegha utebul vev kera. (Yoh. 2:13-17) Kwagh u Yesu er sha utaha ne wase mbahenen u umbur kwaghôron u profeti u Tor Davidi u a kaa ér: “Ishima i veren sha iyou You la wuam” la. (Ps. 69:9) Kwagh u Yesu er sha ishimataver la tese ér yange deen ér i̱ nzughul a mcivir u mimi ga. U nenge a or u Aôndo a lu la ken kwagh u Yesu er ne kpa? Kwagh ne umbur se ér tahav mbu Aôndo a lu a mi u karen a iferkwagh sha tar kera la mbu a ikighir shio, shi a tese ér sar un tsung u karen a iferkwagh kera kpaa. Er Yesu venda iferkwagh shia shia yô, kwagh ne tese se er i lu Yehova ken ishima sha kwagh u ifer i i ngee shin tar nyian yum ne yô. Er se fe ser Yehova soo iferkwagh ga, shi una va kar a i kera yô, kwagh ne ngu a sur se ishima shighe u i nzughul a vese yô.
12, 13. Gbenda u Yesu eren kwagh a mbahenen nav la tese u nyi sha kwagh u Yehova?
12 De se time nen sha ikyav igen kpaa, ka gbenda u Yesu eren kwagh a mbahenen nav je la. Yange ve zer gban anyiman ayol a ve sha kwagh u or u nan hembe hen atô ve la. (Mar. 9:33-35; 10:43; Luka 9:46) Mlu u Yesu lu vea Ter na gbem la na yô, a fa er Yehova a soo aeren a sha ihyagh angara nahan ga yô. (2 Sam. 22:28; Ps. 138:6) Heela tseegh ga, Yesu vande nengen a ieren i tan ihyagh la ken Satan. Satan yange hemba soon itizan man u lun sha ian i vesen. Nahan shighe u Yesu nenge a ieren ne ken mbahenen mba tese ve la, ishima yange ia vihi un kpen kpen. Man lu mba tsua ve ér ve lu mbaapostoli ne je ve lu a ieren ne ye! Ve tese ieren ne zan zan iyange i Yesu mase lun shin tar la. (Luka 22:24-27) Nahan kpa, Yesu za hemen u kôôm ve sha ishima i legh legh, mayange yina ishima ér vea tsa a hen u dondon ikyav na i hiden a iyol ijime la ga ze.—Fil. 2:5-8.
13 U fatyô u fan or u Aôndo a lu la sha gbenda u Yesu yange kôôm ieren i kpeegh i mbahenen nav sha ishimawan la kpa? Akaa a Yesu yange ôron shi eren la wase u u̱ nengen er Ter a we ishima a ior nav, shin er ka ve nôngo gbev kwa imôngo nahan la kpa? Er se fe aeren a Aôndo ne nahan yô, doo u kwagh ne una mgbegha se u geman ishima shighe u se tsum la ga he?
YESU PASE IOR KWAGH U TER NA A MKIGHIR SHIO
14. Yesu yange tese ér un ngu pasen ior kwagh u Ter na a ishima na nena?
14 Mbahementar mba vihin tu kpishi ka ve soo u tesen mba ve hemen ve mbara kwagh u i gbe u ma ve fe la ga. Kpa Yesu yô, yange pasen ior akaa a yange fa sha kwagh u Ter na la a mkighir shio, a yer ve kwagh môm môm sha kwagh u Ter na ga. (Ôr Mateu 11:27.) Heela tseegh ga, Yesu yange na mbahenen nav “mkav sha u [ve̱] fa Un u A lu u mimi la,” ka Yehova Aôndo je la. (1 Yoh. 5:20) Inja i kwagh ne ér nyi? Inja na yô, Yesu yange bugh mbahenen nav asema sha u ve kav akaa a a lu tesen ve sha kwagh u Ter na la. Yange yer ior kwagh u Ter na sha u tesen ve atesen a taver u kaven, er ityesen i Aôndo Utar ken Môm la nahan ga.
15. Yesu yange pase mbahenen nav akaa agen sha kwagh u Ter na ga sha ci u nyi?
15 Yesu yange pase mbahenen nav hanma kwagh u fa sha kwagh u Ter na ciili? Ei, yange pase ve hanma kwagh ga. Man er kwagh ne lu sha kwaghfan je. (Ôr Yohane 16:12.) Yange pase ve hanma kwagh ga sha ci u nyi? Sha ci u lu u mbahenen nav vea ‘kôrcio’ u fan a hen shighe la ga. Nahan kpa, er Yesu kaa nahan, lu u icighan jijingi u a lu “Orsurunshima” la una va yô, una pase ve akaa kpishi, shi una hemen ve una za a ve ‘ken mimi cii.’ (Yoh. 16:7, 13) Vough er mbamaren ka ve palegh u pasen mbayev vev akaa agen ér ve̱ vese ve̱ kuma u kaven a cii man vea pase ve nahan, kape Yesu kpa yange kegh ér mbahenen nav ve via ken jijingi i kuma u vea kav akaa agen sha kwagh u Ter na cii ve, una pase ve a je la. Yesu yange umbur er mbahenen nav ve yen yô.
DONDO YESU SHA U WASEN MBAGENEV U FAN YEHOVA
16, 17. Ka nyi i ne ve se kom u pasen mbagenev kwagh u Aôndo?
16 Ka wea fa or tsembelee shi wea fa aeren a dedoo a nan nahan, i sar u u pasen mbagenev kwagh u nan ga he? Yesu yange ôron ior kwagh u Ter na shighe u lu shin tar la. (Yoh. 17:25, 26) Se kpa se fatyô u dondon ikyav na la sha u pasen mbagenev kwagh u Yehova.
17 Er se vande henen nahan, Yesu yange fa kwagh u Ter na hemba hanma orgen cii. Nahan kpa, yange pasen mbagenev akaa agen a a fa sha kwagh u Ter na la a mkighir shio, je yô, a na mbahenen nav mhen u kaven aeren a Aôndo agen a zan shimi kpaa. Yesu wase se u fa kwagh u Yehova sha gbenda u ior kpishi nyian ve fe ga yô. Doo se kpishi er Yesu a pase se kwagh u Ter na sha atesen man aeren a na nahan! Ka se kwagh u civirigh kpishi er se fe Ter yô. (Yer. 9:24; 1 Kor. 1:31) Er se nenge tsung ser se kporom ikyua a Yehova yô, un kpa a kporom ikyua a vese. (Yak. 4:8) Sha nahan yô, se kuma u pasen mbagenev kwagh u Aôndo. Kpa se er kwagh ne nena?
18, 19. Ka sha igbenda i nyi se pase ior kwagh u Tere? Ta iwanger.
18 Gba u se dondo ikyav i Yesu la sha u pasen mbagenev kwagh u Aôndo sha kwaghôron man aeren a ase. Umbur wer ior kpishi mba se pasen ve kwagh la fa kwagh u Aôndo ga. Alaghga atesen a aiegh aa na vea lu a mnenge u kpeegh sha kwagh u Aôndo. Se fatyô u pasen ve iti i Aôndo man awashima na sha ci u uumace kua aeren a na a i pase ken Bibilo la. Shi se fatyô u lamen a Mbashiada mbagenev sha avur a Bibilo agen a a er kwagh u aeren a Aôndo sha gbenda u se lu a vande fan ga yô. Kwagh ne una wase ve kpishi.
19 Se pase ior kwagh u Ter sha aeren a ase er Yesu nahan nena? Zum u ieren yase i tese ior dooshima u Kristu yô, ve kpa a sar ve u yan ikyar a Yesu kua Ter na. (Ef. 5:1, 2) Apostoli Paulu yange taver se ishima ér se ‘lu mbakaven un er un kpa, un kaven Kristu nahan.’ (1 Kor. 11:1) Doo se kpishi er se lu a ian i se wase ior sha aeren a ase, vea fa Yehova nahan! Yô, se cii se dondo nen ikyav i Yesu la, se pase nen ior kwagh u Ter.
[Mbampin Mba Ngeren u Henen]
