“Kura Nen Ayol a En sha Kwagh u Kwa u Mbafarishi”

Yesu yange ta mbahenen nav icin ér: “Kura nen ayol a en sha kwagh u kwa u Mbafarishi, ka imanger je la.” (Luka 12:1) Ivur Bibilo igen i̱ i̱ er kwagh u ityesen i Yesu ne yô, tese wang ér Yesu lu vendan “ityesen” i Mbafarishi la.—Mat. 16:12.

Ashighe agen Bibilo ka i ôr kwagh u “kwa” u̱ tilen sha ityough ki kwagh u bo. Ikyav tese wang ér atesen a Mbafarishi man aeren a ve la yange bende a ior mba ve tesen ve la sha gbenda u bo. Atesen a Mbafarishi la yange lu a bo sha ci u nyi?

1 Mbafarishi yange ve wa imanger shi ve nengen ér ve hemba gban kwagh, shi ve hemba ior mbagenev cii perapera.

Yesu yange ôr kwagh u imanger ve ne ken injakwagh na igen. A kaa ér: “Orfarishi la tile sha, gba eren msen sha ci na iyol na sha akaa ne nahan er: Aôndo, m sugh U sha ci u m lu er ior mbagenev nahan ga yô: anza er uityusenmbaiorov man mbalun a mimi ga man mbadyarev man orngoholkpandegh ne nahan kpaa. Lahadi môm ka m hôr kwaghyan kwa har; m ne môm-ken-upue sha akaa a m zough a mi cii. Kpa orngoholkpandegh la yô, tile ken ica je, lumun u kenden ashe sha tsô kpaa ga, kpa a ta uwegh sha vanger, a gba kaan er: Aôndo, zungwem mhôônom, mo, orsholibo ne!”—Luka 18:11-13.

Yesu wuese ieren i orngoholkpandegh u hiden a iyol ijime ne, kaa ér: “Me kaa ne, ka or ne a yem ken ya na a ishô ye, lu [Orfarishi] la ga, gadia anti or u nana kende iyol i nan sha yô, á hide a nan ijime; kpa u nana hide a iyol i nan ijime yô, á kende nan sha.” (Luka 18:14) Shin er i fa wuee er mbangoholkpandegh nyighen ior nahan kpa, Yesu ker u wasen mbangoholkpandegh mba ve keghen ato a na la. Se fa mbangoholkpandegh uhar mba yange ve hingir mbahenen mba Yesu yô, ka Mateu man Sakiu.

Aluer se hingir u henen ken ishima yase ser se hemba mbagenev sha ci u mfe wase u sha marami shin aan a se lu sha mi la, gayô sha ci u mbamyen mba mbagenev di ye? Aluer kwagh er nahan yô, doo u se dugh imba mhen la ken ishima yase kera fese je, gadia Ruamabera kaa ér: “Dooshima we ishima, lu sar sar, gbe iyuhwe ga; dooshima gengese iyol ga, moron iyol kpaa ga, we dang ga, keren kwagh na iyol na tsô ga, nyoon ishima ga, koson kwagh u bo ken ishima ga. Ka saan un iyol a ifer ga, kpa saan un iyol a kwagh u mimi.”—1 Kor. 13:4-6.

Doo u se lu a imba mhen u apostoli Paulu kpa lu a mi la. Yange kaan ér “Yesu va shin tar sha u yiman mbaasorabo” yô, shi a kaa ér: “Man ken ve yô, ka mo m hembe ye.”—1 Tim. 1:15.

Mbampin mba wasen se u henen sha kwagh:

M kav mer m ngu orsholibo, nahan saa sha mlumun u sha mhôôn u Yehova me zua a myom kpa? Shin m tôô mer, er m civir Yehova sha mimi anyom kpishi shin m lu a ityom ken nongo u Yehova shin m lu a mfe u marami tsema tsema yô, ka ityôkyaa i nengen mer m hemba mbageneve?

  2 Mbafarishi yange ve tesen aeren a ve a perapera la ken igbar sha u i̱ doo ior a ve yô. Aan a tagher tagher doo ve kua atiatom a icivirigh.

Kpa Yesu ta icin ér: “Aeren a ve cii yô, mba eren a sha u ior ve̱ nenge; gadia ka ve kor akpagher a gbangese, man ve eren umka mba uriga vev ve kehe. Ijiir i teman i injaa i ken uiniongo man mkônom ma injaam ma ken ushinagoge, man ishughun i sha ityembekasua man u ior ve yilan ve er, rabi kpaa, doo ve cii.” (Mat. 23:5-7) Kpa gbenda u Yesu henen kwagh la kaha kposo a ve. Shin er lu Wan u Aôndo u vough nahan kpa, a hide a iyol na ijime. Shighe u orgen yila un ér ortesen u “dedoo” yô, a kaa ér: “Er nan man u yerem wer Or u dedoo? Or u dedoo ngu ga, saa Aôndo tseegh.” (Mar. 10:18) Sha shighe ugen la Yesu ôô mbahenen nav angahar, nahan a ver mba dondon un ikyav i iyol i hiden a mi ijime.—Yoh. 13:1-15.

Gba u Mbakristu mba mimi vea eren akaa sha ci u mbananjighjigh mbagenev. (Gal. 5:13) Ka mba i sar ve u hingir mbakuran ken tiônnongo la je i hembe doon u vea er nahan ye. U̱ “keren u lun orkuran” la ka kwaghbo ga, kpa doo u se er nahan sha ci u sar se u wasen mbagenev. “Tom” ne ka ian i utaha shin i duen iti ga. Gba u mba ve lu mbakuran la vea “kehen ityough . . . ga,” er Yesu nahan.—1 Tim. 3:1, 6; Mat. 11:29.

Mbampin mba wasen se u henen sha kwagh:

M hembe eren a mba ve lu a aan a tom ken tiônnongo la dedoo, sha er alaghga vea va wasem u lun tagher tagher shin zuan a aan a tom seer yôô? M hembe veren ishima sha ityom i ken mcivir u Aôndo, i me eren ve ior a wuese mo laa? Shin ka m keren mer mbagenev ve nenge a moo?

  3 Atindi a Mbafarishi kua mbaadini vev mbara yange ve na yô, taver ior kpishi u kuran Tindi.

Tindi u Mose la yange tese Mbaiserael er vea civir Yehova yô. Kpa tindi la pase hanma kwagh dike dike ga. U tesen ikyav yô, Tindi la yange yange tom u eren sha Iyange i Memen, kpa gema pase kwagh u a lu tom shin a lu tom ga la vighe vighe ga. (Eks. 20:10) Nahan Mbafarishi seer atindi a ve kua mbamnenge vev man mbaadini vev sha u pasen kwagh u Tindi a kera pase vighe vighe ga la. Er Yesu kuran Tindi u Mose nahan kpa, atindi a Mbafarishi wa kpete kpete sha asema a ve la yô, kuran a ga. (Mat. 5:17, 18; 23:23) Yesu yange kav ityôkyaa i Aôndo na atindi la, nahan a fa er Aôndo soo ér i zungwen mhôônom yô. Mbahenen nav yange vea va un ahenge kpa, a vihi ishima a ve ga. U tesen ikyav yô, er Yesu wa mbaapostoli nav kwagh ér ve lu per, ve kuran hen tugh mbu i kôr un la nahan kpa, ve gba mnyam acin imôngo. Nahan kpa mhôônom kôr un a ve, a kaa ér: “Jijingi yô, lumun, kpa iyol yô, ngi a agee ga.”—Mar. 14:34-42.

Mbampin mba wasen se u henen sha kwagh:

M keren u wan atindi taveraa, nyôron ityough ga, shin geman mnenge wam hingir tindii? M hanger mer mbagenev ve er kwagh u a gande ve yôô?

Hen sha mkposo u lu hen atô u atesen a Yesu man a Mbafarishi la. U fa ma kwagh u ú er ve u hemban eren kwagh er Yesu nahan kpa? Wea fa yô, nôngo sha afatyô wou cii er nahan.

[Foto u sha peeji 28 la]

Mbafarishi yange ve kor akpagher a gbangese, ve wa avur a Ruamabera ker.—Mat. 23:2, 5.

[Ufoto mba sha peeji 29 la]

Mbatamen mba ken Kristu ka ior mba hiden a ayol a ve ijime, mba ve eren tom sha ci u mbagenev yô, mba er Mbafarishi mba wan imanger nahan ga

[Foto u sha peeji 30 la]

Ú eren kwagh a mbagenev kundu kundu er Yesu nahan shin u hanger wer mbagenev ve er kwagh u ganden ve tahav ken inyaa?