Suur Sha Yehova, Aôndo U “Ashighe Man Aan”

“Ka Un A gem ashighe man aan ye; ka A dugh utor shi A ver utor.”—DAN. 2:21.

U NA MLUMUN WER NYI?

Igbetar man akaaôron a profeti a a kur sha mi la tese ér Yehova ka Orkuranshighe u Hemban nena?

Er se fe ser Yehova ka Aôndo u “ashighe man aan” yô, doo u se er nyi?

A lu nyi je uumace vea er kpa, Yehova una gema shighe u a ver sha u kuren awashima na la ga sha ci u nyi?

1, 2. Ka nyi i tese ér Yehova fa kwagh u shighe vindi vindii?

 YEHOVA AÔNDO yange vande gban akaa a nan iwanger sha u i faan shighe a mi, ica i gba cii ve mase gban or ye. Sha iyange i igbetar i sha unyiin la, Aôndo kaa ér: “Akaa a nan iwanger a̱ lu sha kwavaôndo Sha, sha er a̱ pav atetan a tugh yô; a̱ lu sha ci u akav man ashighe man ayange kua anyom.” (Gen. 1:14, 19, 26) Kwagh ne shi er nahan vough, sha awashima u Yehova la.

² Nahan kpa, zan zan nyian mbatôvonkwaghfan u sangen yeke mba a fa kwagh u a lu shighe jighilii ga. Takerada u tan iwanger sha atineakaa kposo kposo ugen kaa ér: “Shighe ka môm ken akaa a cimin uumace u kaven kpishi yô. Or u nana pase kwagh u a lu shighe jighilii yô, nan ngu ga.” Nahan kpa, Yehova yô, a fa kwagh u shighe vindi vindi. Kera kpa, ka un “A gbe Usha, . . . [shi] A maa tar man A er u kpaa” ye. Shi ka Yehova kpa a “pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la” ye. (Yes. 45:18; 46:10) De se time nen sha kwagh u igbetar kua akaaôron a profeti a a kur sha mi la tsô se fa er akaa ne a tese ér Yehova ka Orkuranshighe u Hemban yô. Aluer se er nahan yô, jighjigh u se ne Yehova man Bibilo la una seer taver.

IGBETAR WASE SE U SEER NAN OKURANSHIGHE U HEMBAN LA JIGHJIGH

3. Akaa a Aôndo a gbe a sha kwavaôndo la nga kor shighe vough vough nena?

³ Se fatyô u nengen a akaa a Aôndo a gbe a sha kwavaôndo la, er a kor shighe vough vough yô. U tesen ikyav yô, i ver asan man ityar i lun er tar wase ne nahan, i uma a lu ker ga yô, ngi ningir sha shighe vough vough, a anzughul shio. Ityar i lun er tar wase ne nahan man asan cii nga ningir sha ajiir a i ver a sha kwavaôndo la vough vough; man kwagh ne wase ior u fan ashighe shi fan ajiir  a vea kar, shighe u ve lu zan zende yô. Er Yehova a gbe akaa ne, shi a kuran shighe vough vough a anzughul shio yô, tese ér mimi je ‘tahav nav taver,’ shi a kuma u se wuese un kpaa.—Ôr Yesaia 40:26.

4. M-er u akaauma a eren akaa sha shighe vough vough la tese kwaghfan u Yehova a lu a mi la nena?

⁴ Akaauma a Aôndo a gbe a la kpa nga kor shighe. Akaamenden man ishôso kpishi ngi eren kwagh inja er ngi a agogo ken i nahan. Mfe u sha marami u a mgbeghan inyon kpishi u eren kwagh la ngu a wase i u fan shighe u ia mough zende yô. (Yer. 8:7) Uumace kpa mba a shighe ken iyol ve u a mgbegh ve yô. U tesen ikyav yô, iyol yase ka i ôr se shighe u sev mbu av man shighe u tugh mbu il yô. Ka sea nyôr igirgi i purugh sea yem ma tar ugen, u shighe u her a kaha kposo a u wase yô, ka i tôô ayange kpuaa cii ve i lian iyol yase a shighe u ken tar shon ye. Sha mimi je, akaa kpishi a Yehova a gbe la tese tahav man kwaghfan u Aôndo u “ashighe man aan” a lu a mi la. (Ôr Pasalmi 104:24.) Nahan er Yehova a lu a kwaghfan man tahav mbu hemban cii yô, se fatyô u nan jighjigh ser una kure mbaawashima nav kpee je.

AKAAÔRON A PROFETI A A KUR SHA SHIGHE VOUGH LA TAVER JIGHJIGH WASE

5. (a) Ka sha nyi gbenda tseegh se fatyô u fan kwagh u mlu u umace u ken hemene? (b) Yehova una fatyô u ôron se kwagh u ken hemen man shighe u kwagh shon una er la sha ci u nyi?

⁵ Akaa a Yehova a gbe a la tese se akaa kpishi sha kwagh u “mlu Na u i nengen a mi sha ashe ga la,” kpa a kera na mlumun sha mbampin mba vesen er, Mlu u uumace una va lu nan ken hemene? nahan ga. (Rom. 1:20) Cii man se̱ zua a mlumun sha mpin ne yô, saa se time sha kwagh u Aôndo a pase se ken Bibilo i i lu Mkaanem nam la. I ôr akaaôron a profeti ken Bibilo kpishi a a kur sha mi sha shighe vough yô. Yehova una fatyô u tsengan pasen kwagh u una va er yô, gadia una fatyô u tsengan nengen a kwagh ken hemen vighe vighe. Heela tseegh ga, kwagh u Ruamabera a tsengeôron yô, ngu a kure sha mi sha shighe vough, sha ci u Yehova Aôndo una fatyô u nan sha er akaa a er sha u kuren awashima na man sha shighe u a tsough la kpaa yô.

6. Ka nyi i tese ér Yehova soo ér se̱ fa inja i mkur u akaaôron a profeti a ken Bibilo laa?

⁶ Yehova soo ér mbacivir un ve kav akaaôron a profeti a i er ken Ruamabera la, sha er aa wase ve yô. Shin er gbenda u Aôndo a nengen shighe la u kaha a u wase nahan kpa, ka una ôr shighe u ma kwagh una va er jighilii yô, a ôr kwagh shon sha gbenda u se fatyô kaven yô. (Ôr Pasalmi 90:4.) U tesen ikyav yô, takerada u Mpase ôr kwagh ter “mbatyomov mba Shaav mba unyiin” mba “i ver ve a ver je sha ci u ihwa shon la man iyange la man uwer la man inyom la” yô. Uumace vea fatyô u fan kwagh a lu ihwa man iyange man uwer man inyom yô. (Mpa. 9:14, 15) Ka sea nenge er akaaôron a profeti a Aôndo yange kure sha mi sha shighe u Aôndo kaa la vough yô, jighjigh u se ne Aôndo u “ashighe man aan,” kua Mkaanem nam la ngu a seer taver. De se time ase nen sha akav kpuaa se nenge.

7. Mkur u kwaghôron u profeti u Yeremia yange ôr sha Yerusalem man Yuda la tese ér Yehova ka Orkuranshighe u Hemban nena?

⁷ Hiihii yô, se time nen sha kwagh u yange ér ken derianyom u sha utaankaruhar C.S.Y. (Cii man Shighe u Yesu) la. Kwaghôron u Orkuranshighe u Hemban la yange “va hen Yeremia sha kwagh u ior mba Yuda cii, ken inyom i sha unyiin i Yehoyakim wan u Yoshia, tor u Yuda” la. (Yer. 25:1) Yehova yange tsengaôron kwagh u mtim u Yerusalem man mkor u a kura Mbayuda mba ken tar u Yuda, a yem a ve ken Babilon la. Lu u vea za “lu sha ikyev i tor u Babilon anyom akunduatargber.” Ken inyom i 607 C.S.Y. la, akumautya a Mbababilon va hembe Yerusalem shi kura Mbayuda mba  ken tar u Yuda yem a ve ken Babilon. Kpa lu u nyi ia er ken mkur a anyom 70 laa? Yeremia tsengapasen ér: “TER ngu kaan nahan er: Saa anyom akunduatargber á iv sha ci u Babilon, man Me va sôr ne, Me kure kwaghôron Wam u dedoo a ven, Me hide a ven hen ijiir ne ye.” (Yer. 25:11, 12; 29:10) Kwaghôron u profeti ne yange kure sha shighe vough, ken inyom i 537 C.S.Y., shighe u Mbamedia man Mbapershia yange ve na Mbayuda ian i duen ken Babilon kera la.

8, 9. Akaaôron a profeti a Daniel yange ôr sha kwagh u mve u Mesiya man mver u a ver Tartor u sha la tese ér Yehova ka Aôndo u “ashighe man aan” nena?

⁸ Nenge ase kwaghôron u profeti ugen u Aôndo yange ôr sha kwagh u ior nav mba tsuaa mban yô. Shighe u mase shin er anyom ahar cii man Mbayuda vea undu Babilon la, Aôndo tsengaôron sha ikyev i profeti Daniel ér Mesiya una va, shighe u anyom a kar 483, hii sha mdugh u tindi sha u sôron man u maan Yerusalem la. Tor u Mbamedia man Mbapershia yange wa tindi la ken inyom i 455 C.S.Y. Anyom 483 la nga been, ken inyom i 29 la vough yô, i shighe Yesu u Nasareti mkurem sha icighan jijingi, shighe u i er un batisema la, hingir Mesiya. *—Neh. 2:1, 5-8; Dan. 9:24, 25; Luka 3:1, 2, 21, 22.

⁹ Hen ase sha kwagh u Ruamabera yange tsengaôron sha kwagh u Tartor u Aôndo la. Kwaghôron u profeti tese ér a ver Tartor u Mesiya la sha, ken inyom i 1914 la. Bibilo pase akaa a aa lu “ikyav” i mve u Yesu la, shi i̱ kaa ér zegecan una er sha tar hen shighe la, sha ci u a zenda satan sha a gbihi shin tar. (Mat. 24:3-14; Mpa. 12:9, 12) Heela tseegh ga, kwaghôron u profeti ugen wase se u fan inyom i “shighe u atôatyev” una kar kuman ve, Tartor u Mesiya ua hii u hemen sha la kpaa, ka inyom i 1914 je la. Shi kwagh ne va er ken inyom shon vough.—Luka 21:24; Dan. 4:10-17. *

10. Ka akaa a nyi i gbe u aa va er sha shighe vough, a bunde ga?

¹⁰ Ica ia kera gba ga tsô “zegecan” u Yesu yange tsengaôron kwagh na la una va. Zegecan la una karen yô, Hemen u Anyom Dubu la ua hii. Akpelan nga ga, akaa ne cii a er sha shighe vough. Shighe u Yesu lu shin tar la, Yehova vande veren “iyange man shighe” u akaa ne cii aa er yô.—Mat. 24:21, 36; Mpa. 20:6.

‘WAAN IAN YOU IKYO’

11. Er se fe ser se mba ken shighe u masetyô yô, ka nyi i doo u se ere?

¹¹ Er se fe ser Tartor u Mesiya hii u hemen sha hegen, shi se mba sha “shighe u mkur” yô, doo u kwagh ne una bende a vese nena? (Dan. 12:4) Ior kpishi fa er tar u lu vihin gban a gba kera yô, kpa ve kera kav er  kwagh ne a lu kuren kwaghôron profeti u Bibilo i er sha kwagh u ayange a masejime la ga. Mbagenev ken a ve ver ishma ér tar ne yange ua vihi a gande u sôron, mbagenev di na jighjigh ér uumace vea nôngo gbem tsô, vea kôrcio u van a “bem man mkpeyol” sha tar. (1 Tes. 5:3) Se se na jighjigh ser se zurum a mkur u tar u Satan ne kpa? Sea na jighjigh yô, se yar nen tom a shighe u a shi ne sha u eren Yehova tom shi wasen mbagenev ve va fa un. (2 Tim. 3:1) Gba u se tsua u eren kwagh a shighe wase sha inja.—Ôr Mbaefese 5:15-17.

12. Ka nyi se fatyô u henen ken kwagh u Yesu yange ôr sha kwagh u ayange a Noa laa?

¹² Er tar ne u mgbough a akaa a danen or ishima yô, ka ican kpishi u ‘wan ian yase ikyo.’ Yesu yange ta icin ér: “Er lu sha ayange a Noa nahan, kape mve u Wan u or kpaa una lu la.” Ayange a Noa la yange lu nena? Aôndo yange tsengaôron a Noa ér una tim tar u sha ayange a na la kera. Lu u a tim uumace mbaaferev sha mngerem ma deemee ma lu u ma a va yisa tar cii la. Noa lu or u “yôôn kwagh u perapera,” nahan a pase loho u Aôndo hen ior mba sha ayange na la cii. (Mat. 24:37; 2 Pet. 2:5) Kpa ve lu “yan akaa, man akaa, eren kasev, nan kasev ken unoo, . . . ve fa ga zan zan mngerem ma deemee va, va kuwa a ve cii.” Nahan Yesu ta mbadondon un icin ér: “Kohol nen iyol gadia ka hen shighe u ne ver ishima ga la je, Wan u or Una va ye.” (Mat. 24:38, 39, 44) Gba u se lu er ior mba sha ayange a Noa la nahan ga, kpa se lu er Noa nahan. Ka nyi ia wase se u kohol iyolo?

13, 14. Ka nyi se umbur sha kwagh u Yehova ve ia wase se u civir un sha mimi, er se lu keghen mve u Wan u or nee?

¹³ Shin er Wan u or a lu van hen shighe u se ver ishima ga la nahan kpa, doo u se umbur ser Yehova ka Orkuranshighe u Hemban. A̱ lu nyi je ia er ken tar shin uumace vea wa ishima u eren nyi je kpa, una bunde awashima u Yehova la ga. Una fatyô u veren shighe u a soo ér akaa a er, man kwagh u a soo ér a due ker la kpaa. (Ôr Daniel 2:21.) Anzaakaa 21:1 pase se wang je ér: “Ishima i tor ngi sha ikyev i TER er uikuwanmbamngerev nahan, ka A gema i henpe i sar Un cii.”

¹⁴ Yehova una fatyô u kôôm akaa sha er una kure awashima na sha shighe vough yô. Akaa a vesen a a lu eren sha tar la nga kuren akaaôron a profeti, hemban je yô a sha kwagh u loho u dedoo u Tartor u Aôndo u i lu pasen ú sha tar cii la. U tesen ikyav yô, hen ase sha kwagh u mgbe u gomoti u tar u Soviet Union man kwagh u yange due ker la. Ior kpishi yange vea hen ér kwagh a fatyô u kôron geman hen atô u ugomoti mban kpoo imba ne nahan ga. Nahan kpa, mbamgem mban na yô, hegen mba pasen loho u dedoo kpoghuloo ken ityar kpishi i yange i wa mbaatabam sha tom wase ker la. Nahan yô, se waan nen ian yase ikyo sha afatyô wase cii, sha er se civir Aôndo u “ashighe man aan” la sha mimi yô.

NA JIGHJIGH WER YEHOVA UNA KURE MBAAWASHIMA NAV SHA SHIGHE VOUGH

15. Se tese jighjigh u nan wase shighe u i ser akaa ken nongo u Yehova la nena?

¹⁵ Gba u se na jighjigh ser Yehova una kura awashima na sha shighe vough keng ve, se za hemen u pasen loho u dedoo ken ayange a masejime ne ye. Er akaa a lu geman ken tar ne yô, ashighe agen ka i gba u se gema gbenda u se pasen kwagh la. Alaghga ashighe agen nongo u Yehova ua sôr akaa sha gbenda u i pasen kwagh la, sha u wasen se u hemban fan u pasen loho u dedoo cii. Aluer se sue akaa a ka i sôr la shi se mba eren tom u pasen kwagh la sha mimi sha hemen u Wan na u a lu “ityough ki nongo Na” la yô, se lu tesen ser se na Aôndo u “ashighe man aan” la jighjigh.—Ef. 5:23.

16. Se fatyô u nan jighjigh ser Yehova una wase se sha shighe vough sha ci u nyi?

¹⁶ Yehova soo ér se eren msen hen a na  vangertiôr ser, una “wase se sha shighe vough.” (Heb. 4:16) Kwagh ne tese ér Yehova soo se asange asange ga he? (Mat. 6:8; 10:29-31) Se tese ser se na Yehova Aôndo jighjigh sha u eren msen hen a na hanma shighe ser a wase se, shi eren sha mbamsen asev shi dondon gbendatesen na kpaa. U seer yô, ka se umbur u eren msen sha ci u anmgbianev asev mba nomso man mba kasev.

17, 18. (a) Ka nyi ica a gba tsô Yehova una er a mbaihyomov nava? (b) Ka kwaghbo u nyi i doo u se palegha?

¹⁷ Hegen ka shighe u se ‘ta akperan sha jighjigh u nan ga’; kpa ka shighe u se taver sha jighjigh u nan yô. (Rom. 4:20) Mbaihyomov mba Aôndo, Satan kua mba a hemen ve la, mba nôngon ér vea bunde tom u Yesu yange wa se ér se er la. (Mat. 28:19, 20) Shin er Diabolo a lu tan num sha a vese kpoghuloo nahan kpa, se fa ser Yehova ka “Aôndo u uma u A lu Oryiman u ior cii la, jim yô, ka u mbananjighjigh.” Shi “mba ve civir Aôndo la [A] fa u yiman ve ken imeen.”—1 Tim. 4:10; 2 Pet. 2:9.

¹⁸ Ica a gba ga tsô Yehova una va a mtim sha botar ne. Shin er se fe shighe man gbenda u kwagh ne una er la vindi vindi ga nahan kpa, se fa ser Kristu una tim mbaihyomov mba Aôndo sha shighe vough. Hen shighe la, hanma or nana fa er Yehova a lu a ian i hemen sha won cii yô. Sha nahan yô, aluer se fa “ashighe man aan” a se lu ker hegen ne ga yô, a lu kwagh u vihin kpishi! Mayange se hen nen ser, “akaa cii nga her di er a lu sha mhii u igbetar la nahan” ga.—1 Tes. 5:1; 2 Pet. 3:3, 4.

‘LU A ISHIMA I KEGHEN KWAGH’

19, 20. Doo u se kegh Yehova sha ci u nyi?

¹⁹ Awashima u Yehova Aôndo lu a mi sha ci u uumace sha hiihii la wa u ve henen kwagh na man akaa a igbetar a doon ashe gbem sha won la ker. Orpasenkwagh 3:11 kaa ér: “A er hanma kwagh er a̱ doo ashe sha shighe na, man A shi A ver mtsôr ken asema a ve; nahan kpaa, or fatyô u timen fan tom u Aôndo A er sha hiihii je, zan zan mkur la kpaa ga.”

²⁰ Doo se kpishi er Yehova a gem awashima na sha ci u uumace ga nahan! (Mal. 3:16) Aôndo yô, “ma mgem ngu ken a Na ga, shin mure u mgem tsô kpaa ga.” (Yak. 1:17) Akaa a uumace ve fe shighe a mi la, er mningir u tar nahan, nga benden a awashima u Aôndo ga. Yehova ka “Tor u tsôron.” (1 Tim. 1:17) Sha nahan yô, se ‘kegh nen Aôndo u myom wase.’ ga. (Mika 7:7) Shi er Bibilo i kaa nahan, se ‘lu nen dông, asema a ase a̱ taver, se cii mba se veren ishima, se keghen TER yô.’—Ps. 31:24.

[Ngeren mba shin kpe]

[Mbampin Mba Ngeren u Henen]

[Foto u sha peeji 19]

Daniel yange na jighjigh a mkur u kwaghôron u profeti u Aôndo

[Foto u sha peeji 21]

U eren tom a shighe wou sha inja sha u eren ishima i Yehova kpa?