U Ngu Mondon Iengem I Yehova Kpa?

“Se mba mondon iengem i Ter er ka ijingi nahan”—2 KOR. 3:18, NW.

U NA MLUMUN WER NYI?

Shin er se yen nahan kpa, se fatyô u nan Yehova icivir nena?

Mbamsen asev man mbamkombo mba zan mba wasen se u mondon iengem i Aôndo nena?

Ka nyi ia wase se ve se za hemen u nan Yehova iciviri?

1, 2. Uumace vea fatyô u kaven Yehova sha ci u nyi?

 SE CII se bee mbamaren asev sha igbenda kposo kposo. Alaghga se ungwa orgen nana kaa a wanyenomso ér, ‘U sua a sua teru!’ Shin or a kaa a wanyekwase ér, ‘Ka mea nenge a we nahan i lum er ka ngôu m nenge a na nahan.’ Shi mbayev ka ve nôngo u eren kwagh u ve nenge mbamaren vev ve eren la. Se di ye? Se fatyô u kaven Yehova, Ter wase u sha la je he? Shin er se nengen a na ga nahan kpa, se fatyô u nengen a aeren a na a doon tsung la sha u timen ken Mkaanem nam man sha akaa a a gbe la. Shi se fatyô u henen kwagh na sha u gbidyen kwar sha kwagh u se er ken Ruamabera la, hemban cii je yô sha akaaôron man aeren a Yesu Kristu, Wan u Aondo la. (Yoh. 1:18; Rom. 1:20) Se fatyô u kaven aeren a Yehova nahan mondon iwanger na.

² Cii man Aôndo gba adam man ifa yô, a lu a vangertiôr ér uumace vea kôrcio u eren kwagh u a zough sha awashima na, shi kaven un shi eren kwagh u van un a icivir kpaa. (Ôr Genese 1:26, 27.) Er se lu Mbakristu yô, se soo u lun a aeren a Aôndo wase kpa a lu a mi la. Se er nahan yô, se lu a ian i icivirigh i mondon iengem i Aôndo; sea due ken nyityô ikyurior, shi sea fa takerada shin sea fa ga kpaa. Sha ci u nyi? Sha ci u “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan.”—Aer. 10:34, 35.

3. Ka i lu se ken ishima nena, er se civir Yehova ne?

³ Mbakristu mba i shigh ve mkurem la mba mondon iengem i Yehova. Sha nahan yô, apostoli Paulu u i shighe un mkurem sha jijingi la nger ér: “Se cii se kera mba a ikyondo i yisan sha ishi ga se mba mondon iengem i Ter er ka ijingi nahan. Mba geman se hingir er ibeen shon la nahan, hii ken iengem za a  za hemen ken iengem.” (2 Kor. 3:18, NW) Shighe u profeti Mose hungwa sha Uwo u Senai a ikpande i awen, i í nger Atindi a Pue la, kwav u ishigh nagh engem, sha ci u Yehova za lam a na sha uwo la. (Eks. 34:29, 30) Shin er Yehova a lamen a Mbakristu ishigh a ishigh ga, shi kwav u ishigh vev u engem ga nahan kpa, ka ve mgbough a iember shighe u ve lu pasen mbagenev kwagh u Yehova man aeren a na kua awashima na u vesen u a lu a mi sha ci u uumace la. Nahan sea lu Mbakristu mba i shigh ve mkurem la shin sea lu iyôngo igen kpa, se mba er “ijingi” nahan, sha ci u se mba mondon iengem i Yehova ken uma wase man tom wase u pasen kwagh la. (2 Kor. 4:1) U ngu mondon iengem i Yehova sha ieren you i dedoo man sha u duen kwaghpasen hanma shighe kpa?

SAR SE U MONDON IENGEM I YEHOVA

4, 5. (a) Ka nyi se nôngon a mi, er Paulu nahana? (b) Isholibo bende a vese nena?

⁴ Er se lu mbacivir Yehova yô, se soo u nan Orgban wase icivir ken hanma kwagh u se eren cii. Nahan kpa, ashighe kpishi, ka se fatyô u eren sha isharen yase ne ga. Paulu kpa yange tagher a zayol ne. (Ôr Mbaromanu 7:21-25.) Paulu pase ityôkyaa i í ne ve ka i taver se u eren kwagh u nan Yehova icivir hanma shighe la, ér: “Ior ca ca ve er isholibo nahan kera mba a iengem i Aôndo ga.” (Rom. 3:23) Er Adam yange er isholibo yô, i mar uumace cii mba ikpan i isholibo, i̱ i̱ lu er ka tor u vihin tu nahan la.—Rom. 5:12; 6:12.

⁵ Ka nyi i lu isholibo? Isholibo ka hanma kwagh u a kaha a mlu u Yehova man igbenda na man atindi a na kua awashima na cii. Isholibo ka i vihi ikyar i or ye vea Aôndo la. Ka i yange se u mondon iengem i Aôndo, vough er kwagh ka a yange or u keren ivaan tan kwagh u nan soo u tan la nahan. Se fatyô u eren isholibo sha apera shin abu kpaa. (Num. 15:27-31) Isholibo ya tor ken uumace shi i yisa ve u zan hen Orgban ve. (Ps. 51:5; Yes. 59:2; Kol. 1:21) Sha nahan yô, uumace jimin cii mba paleghaa a Yehova shi ian i mondon iengem i Aôndo la kar ve. Isholibo ka ihyogholough ki hemban vihin ki uumace ve lu a mi yô.

6. Er se yen nahan kpa, se fatyô u nan Aôndo icivir nena?

⁶ Er se lu mbaasorabo nahan kpa, Yehova ngu se “Aôndo u ishimaverenkeghen.” (Rom. 15:13) A na nagh ku ipaan sha Yesu Kristu sha er una kar a isholibo kera yô. Aluer se na nagh kura jighjigh yô, se kera lu “ikpan sha ikyev i isholibo” ga, kpa se lu a ian i mondon iengem i Yehova. (Rom. 5:19; 6:6; Yoh. 3:16) Aluer se za hemen u lun ken mlu u dedoo ne vea Aôndo yô, Yehova una ver se doo doo hegen, shi ken hemen yô, se va zua a uma u tsôron ken mlu u vough. Er se lu uumace mba yinan nahan kpa, se mba a ian i icivirigh kpishi, sha ci u Aôndo nenge ér se kuma u mondon iengem na!

KWAGH U A WASEN SE U MONDON IENGEM I AÔNDO LA

7. Ka nyi i gbe u se fa sha ayol a ase ve, se mondo iengem i Aôndo?

⁷ Saa se fa mbamyen asev ve, se fatyô u mondon iengem i Aôndo ye. (2 Kron. 6:36) Gba u se fa asaren a ase a bo la, shi se nôngo sha afatyô wase se kighir a, sha er se ar sha ian i nan Aôndo icivir sha mimi yô. U tesen ikyav yô, aluer se nyôr iyol ken ieren i hôngorough i nengen ufoto mba ijimbagh yô, saa se lumun ser gba u a na se iwasen i ken jijingi, shi se ker gbenda u zuan a iwasen shon kpaa. (Yak. 5:14, 15) Aluer se soo u nan Aôndo icivir sha mimi yô, ka kwagh u i doo u se hii eren je ne. Er se civir Yehova yô, gba u hanma shighe yô, se tôvon ayol a ase sha er se fa, sea lu kuran atindi a perapera a Yehova la yô. (Anz.  28:18; 1 Kor. 10:12) Asaren a ase a bo aa lu nyi je kpa, gba kpee u se za hemen u nôngon ser se kighir a sha er se mondo iengem i Aôndo yô.

8. Er se lu vough ga nahan kpa, doo u se er nyi?

⁸ Ka Yesu tseegh yange lu orumace u mondo iengem i Aôndo a mshi shio zan zan kar kpen ye. Se mba vough er Yesu nahan ga. Nahan kpa, se fatyô u nôngon ser se dondo ikyav na la, shi doo u se er nahan kpaa. (1 Pet. 2:21) Ka sea nôngon ser se na Yehova icivir yô, ngu a nenge iniôngon yase la shi a ver i doo doo kpaa.

9. Bibilo wasen se u mondon iengem i Aôndo nena?

⁹ Mkaanem ma Aôndo ma i nger la ma a fatyô u wasen se sha iniôngon yase la, aluer se mba ôron ma shi gbidyen kwar sha kwagh u se er la yô. (Ps. 1:1-3) Aluer se mba ôron Ruamabera ayange ayange yô, se fa kwagh u se er ve se hemba civir Yehova vough yô. (Ôr Yakobu 1:22-25.) Kwagh u se henen ken Bibilo la taver jighjigh wase u nan, shi taver isharen i se lu a mi ser se palegh asorabo a vesen, nahan se na i doo Yehova a vese la.—Ps. 119:11, 47, 48.

10. Msen una wase se se hemba civir Yehova nena?

¹⁰ Shi gba u se ‘taver ishima sha msen u eren’ ve se mondo iengem i Aôndo ye. (Rom. 12:12) Doo u se sôn Yehova ser a wase se u civir un sha gbenda u una lumun se yô. Sha nahan yô, se fatyô u sônon un ser a na se icighan jijingi na shi a seer se jighjigh u nan shi a na se tahav mbu hendan a imeen shi a na se mfe u “pasen kwaghôron u mimi la jighilii.” (2 Tim. 2:15; Mat. 6:13; Luka 11:13; 17:5) Er wanye ka nan suur sha ter u nan nahan, se kpa doo u se suur sha Yehova, Ter wase u sha la. Aluer se sôn un ser a wase se se hemba civir un yô, se fatyô u lun vangertiôr ser una wase se. Doo u mayange se nenge ser se mba zan a za un iyol ga! Kpa se wuese un ken msen, se sugh un, shi se sôn un ser a tese se kwagh u se er yô, hemban cii je yô, shighe u se nyer ken mlu u taver yô. Shi se sôn un ser a wase se se civir un sha gbenda u se va a icivir sha icighanti na yô.—Ps. 86:12; Yak. 1:5-7.

11. Mbamkombo mba tiônnongo mba wasen se u mondon iengem i Aôndo nena?

¹¹ Aôndo gema iyôngo na i i gbe un kwagh kpishi la wa sha ikyev i “wanakiriki u jighjigh man u fan kwagh.” (Mat. 24:45-47; Ps. 100:3) Wanakiriki ne soo u wasen se cii ér se mondon iengem i Yehova. Gbenda môm u a eren kwagh ne yô, ka sha mbamkombo asev. Mbamkombo mban ka ve wase se u nyôôso uuma asev kua aeren ase a Mbakristu la, er tela ka nan sôr akondo nan kor, sha er aa hemba doon ashe nahan. (Heb. 10:24, 25) Sha nahan yô, se vaan nen mbamkombo mban sha shighe, sha ci u aluer hingir ikye yase u van sha shighe ga yô, akaa a ken jijingi agen a ma a wase se la aa kar se.

SE KAV NEN AÔNDO

12. Se kav Aôndo nena?

¹² Saa se ‘lu mbakaven Aôndo’ ve se mondo iengem na ye. (Ef. 5:1) Gbenda môm u se kav Yehova yô, ka u lun a mnenge na sha akaa. Aluer se mba nôngon ser se er kwagh gbenda ugen kposo yô, se lu van Aôndo a ilyahan shi van a kwaghbo sha ayol a ase kpaa. Er tar u se lu ker ne u lu sha ikyev i Satan Diabolo yô, gba u se nôngo kpoghuloo se kôr kwagh u a vihi Yehova ishima la ihyom, kpa kwagh u a doo un ishima la, se kpa una doo se ishima tsung. (Ps. 97:10; 1 Yoh. 5:19) Gba u se na jighjigh a ishima i môm ser, gbenda u ú hembe doon u civir Aôndo yô, ka u eren akaa cii sha ci u icivir na.—Ôr 1 Mbakorinte 10:31.

13. Gba u se kôr kwaghbo ihyom sha ci u nyi, man doo u kwagh ne una mgbegha se u eren nyi?

¹³ Yehova kôr isholibo ihyom, nahan se  kpa gba u se kôr i ihyom. Sha mimi yô, gba u se gba ica a kwaghbo er se fetyô la cii, se kera tôô ser se za ikyua a kwaghbo kôôsôô kpa kwagh a er se ga ze. U tesen ikyav yô, a gba u se kura ayol a ase sha er se hingir u vendan mimi ga yô, gadia isholibo ne ia na se kera kuma u nan Aôndo icivir ga. (Dut. 13:6-9) Nahan yô, mayange kwagh a de zough se a mba vendan mimi, shin ma or u nan senge ér nan ngu anmgbian, kpa nan lahan Aôndo la ga. Aluer nan ngu or u hen tsombor wase je kpa, kwagh a de zough se a nan ga. (1 Kor. 5:11) Ka a inja u keren ser se nyiman kwagh a mba vendan mimi shin mba ve puun nongo u Yehova la ga. Jighilii yô, aluer se mba ôron mkaanem vem ma i nger shin takerada shin sha Intanet yô, a lu shami ga, shi kwagh ne una vihi mlu wase u ken jijingi la kpaa.—Ôr Yesaia 5:20; Mateu 7:6.

14. Shighe u se lu nôngon ser se mondo iengem i Aôndo yô, ka ieren i nyi i doo u se lu a mi tseer tseere, man ka sha ci u nyi?

¹⁴ Gbenda u vesen u se fatyô u kaven Ter wase u sha la yô, ka u tesen mbagenev dooshima. Doo u se eren kwagh sha dooshima er un nahan. (1 Yoh. 4:16-19) Sha kpôô yô, dooshima u se lu a mi hen atô wase la, ka ikyav i tesen ér se mba mbahenen mba Yesu shi se mbacivir Yehova. (Yoh. 13:34, 35) Shin er alaghga ashighe agen myen wase la una wa se agbe nahan kpa, gba u se ver un ken kpe, sha er se eren kwagh sha dooshima hanma shighe yô. Aluer se mba a dooshima man aeren a dedoo agen yô, aa yange se u eren akaabo.—2 Pet. 1:5-7.

15. Aluer mbagenev doo se ishima yô, se eren kwagh a ve nena?

¹⁵ Dooshima ka a na se soo u eren akaa a doon a mbagenev. (Rom. 13:8-10) U tesen ikyav yô, aluer or u se vese la nan doo se ishima yô, se na gambe wase u ivaagh una lu a acôghor ga. Aluer mbatamen doo se ishima shi se mba a icivir sha tom u ve eren la yô, kwagh la una wase se u ungwan imo ve shi hiden a ayol a ase ijime hen a ve. Mbayev mba mbamaren vev ve doo ve ishima yô, ka ve ungwa ve shi ve na ve icivir; mba lamen sha a ve geseghee ga. Aluer mbagenev doo se ishima yô, se kera nengen ve ér ve gba kwagh ga ze, shi se lamen a ve dang kpaa ga. (Yak. 3:9) Shi mbatamen kpa, aluer iyôngo i Aôndo doo ve ishima yô, vea eren a i kundu kundu.—Aer. 20:28, 29.

16. Dooshima una wase se ken tom wase u pasen kwagh la nena?

¹⁶ Shi gba u se tese ieren i dooshima ne ken tom wase u pasen kwagh la. Er Yehova a doo se ishima yô, se de ser mvende u mbagenev ve vendan u keghen ato a loho wase la a yange se u pasen ior kwagh ga. Kpa se za hemen u pasen loho u dedoo. Dooshima una mgbegha se u wan iyol tsembelee shi pasen kwagh sha gbenda u a kôr ior ken ishima yô. Aluer Yehova doo se ishima kua mba wan ndor a vese yô, se pasen kwagh ser gba u se pase keng yum ga. Se gema se nenge u ser ka ian i icivirigh shi se eren u saan saan.—Mat. 10:7.

ZA HEMEN U NAN YEHOVA ICIVIR

17. Er se fe ser isholibo yangen se u mondon iengem i Aôndo yô, doo u se er nyi?

¹⁷ Ior kpishi ken tar fa er isholibo i vihi tsung ga, kpa se yô, se fa. Sha nahan yô, se fa er i gbe u se kighir isharen i i lu ken a vese, i eren isholibo la yô. Er se fe ser se mba mbaasorabo yô, kwagh ne ngu a wase se u tsaase imo yase i ken ishima, sha er ia mgbegha se u eren kwagh sha inja, zum u isholibo i hii u jilen ken asema a ase yô. (Rom. 7:22, 23) Er se yen nahan kpa, Aôndo una fatyô u nan se agee a eren kwagh u vough ken hanma mlu cii.—2 Kor. 12:10.

18, 19. (a) Ka nyi ia wase se ve se nôngo a ujijingi mba aferev se hemba ve? (b) Gba u se kange ishima ser se er nyi?

 ¹⁸ Aluer se soo u nan Yehova icivir yô, saa se nôngo ityav a ujijingi mba aferev. Satan ngu nôngon sha afatyô na cii ér una ngohol icivir i í lu Yehova tswen a kom u a na un la. Shi Satan za hemen u nôngon ér una vihi mlu wase vea Yehova kpaa. Ka nahan ve se man ior umiliôn mbagenev mba ve yen la, nomso man kasev man mbayev cii, ka sea za hemen u civir Yehova sha mimi ve, Satan a gba bo ye. Sha nahan yô, de se za nen hemen u wuese Yehova, er akaauma a sha la nahan, ser: “We, Ter Aôndo wase, U kuma u ngohol iengem man icivir man agee gadia U gba akaa cii man ka sha ishima You kpaa a lu, shi i gbe a kpaa ye.”—Mpa. 4:11.

¹⁹ Yô, de se kange nen ishima ser, a lu nyi je ia er kpa, se za hemen u nan Yehova icivir. Saan Yehova iyol er ior kpishi ve lu nôngon sha afatyô ve cii ér vea kav un shi vea mondo iengem na nahan. (Anz. 27:11) Se wuese nen Yehova er Davidi nahan. Yange wa icam wuese Aôndo kaa ér: “Tere, Aôndo wam, me wuese We a ishima yam cii; man shi me civir iti You gbem kpaa.” (Ps. 86:12) Girim se iyol u nyôron ken iyange i se mondo iengem i Aôndo a mshi shio, shi se wuese un gbem sha won la! Ishimaveren i uumace mba ungwan imo na ne ia kure sha mi hen shighe la. U ngu mondon iengem i Yehova Aôndo hegen, shi u ngu veren ishima u va mondon i gbem sha won kpa?

[Mbampin Mba Ngeren u Henen]

[Ufoto mba sha peeji 27 la]

U ngu mondon iengem i Yehova sha igbenda ne kpa?