‘Icighan Jijingi Mgbegha Ve’

“Mayange ma kwaghôron u profeti due sha awashima u or ga, kpa Icighan Jijingi mgbegha ior man ve ôr kwagh u Aôndo ye.”—2 PET. 1:21.

ATÔAKAA A HENEN SHA MI

Aôndo yange er tom a icighan jijingi sha u pasen mbangeren Bibilo kwagh u vea nger la nena?

Ka atôakyaa a nyi a ne ve se ne jighjigh ser Bibilo due hen Aôndo?

Ka nyi u fatyô u eren hanma iyange sha u tesen wer u ngu a iwuese sha Bibilo?

1. Er nan i gbe u se lu a Mkaanem ma Aôndo?

 KA AN nan gbe se? Er nan ve se lu uma sha tara? Mlu wase u ken hemen una va lu nena? Er nan ve tar u vihi nahana? Ka nyi ka i er se zum u se kpe kera laa? Sar ior kpishi sha tar u zuan a mbamlumun sha mbampin mban. Luun er se mba a Mkaanem ma Aôndo ga yô, ma se fetyô u zuan a mbamlumun sha mbampin mban ga. Luun er ka Icighan Ruamabera ga yô, ma se hemban henen kwagh sha akaa a a eren se ken uma la tseegh. Man aluer ka u saa kwagh a er se ve se hen kwagh sha mi yô, mayange ma se nengen “atindi a TER” er orpasalmi nahan ga.—Ôr Pasalmi 19:7.

2. Ka nyi ia wase se se za hemen u lun a iwuese sha Bibilo i i lu iyua i injaa i Aôndo a ne se laa?

² Kpa kwagh er vihi yô, mimi u ken Bibilo la kera doo mbagenev ishima er yange doo ve hiihii la ga. (Nenge Mpase 2:4.) Mba kera eren kwagh u una na a saan Yehova iyol ga. (Yes. 30:21) Doo u imba kwagh ne ia er se ga. Gba u se nôngo kpoghuloo se za hemen u lun a iwuese sha Bibilo man atesen a i. Bibilo ka iyua i injaa i Orgban wase u lun a dooshima la a ne se yô. (Yak. 1:17) Ka nyi ia wase se u seer lun a iwuese sha “mkaanem ma Aôndo”? Kwagh u vesen yô, ka u henen sha gbenda u Aôndo yange mgbegha mbangeren Bibilo ve, ve nger Ruamabera la. Kwagh ne wa u hiden gbidyen kwar sha akav kpishi a a tese ér jijingi u Aôndo yange mgbegha ior ve ve nger Bibilo la kpaa. Aluer se er nahan yô, kwagh ne una na se seer lun a isharen i ôron Mkaanem ma Aôndo ayange ayange, shi dondo kwaghwan u ma kpaa.—Heb. 4:12.

“ICIGHAN JIJINGI MGBEGHA IOR” NENA?

3. ‘Icighan Jijingi yange mgbegha’ uprofeti kua mbangeren Bibilo nena?

³ Ior mba kuman er 40 nahan yange ve nger Bibilo, ken iaven i hemban anyom 1,610, hii ken inyom i 1513 C.S.Y.  (Cii man Shighe u Yesu) la zan zan kighir inyom i 98 S.Y. (Shighe u Yesu) la. Mbagenev mba “Icighan Jijingi mgbegha” ve la lu uprofeti. (Ôr 2 Peteru 1:20, 21.) Inja i ishember i ken zwa Grika i í gem ér “mgbegha” la ér, “u tôôn kwagh yemen a mi sha ajiir kposo kposo,” shi “a fatyô u ôron kwagh u i̱ sha igbenda kposo kposo, ér: u daan or, shi u or den ér i tuur nan i yem a nan mape.” * I ter ishember ne ken Aerenakaa 27:15 sha u pasen kwagh u tso u ahumbe yange daase a mi shin mgbegha un yem a mi ijiir igen yô. Lu “Icighan Jijingi mgbegha” uprofeti man mbangeren Bibilo ye, sha ci u Aôndo yange lamen a ve shi mgbeghan ve shi kôôm ve sha tahav mbu tomov nav. Sha ityôkyaa ne yô, yange ve nger lu mbamhen vev ga, kpa lu mbamhen mba Aôndo. Ashighe agen jijingi u Aôndo yange a mgbegha uprofeti kua mbangeren Bibilo mban ve tsengaôron kwagh shin ve nger kwagh, kpa ve fa inja i kwagh shon ga. (Dan. 12:8, 9) Sha kpôô yô, “icighanruamabera cii ka Aôndo A ne i nger ye,” nahan ngi a mbamhen mba uumace ker ga.—2 Tim. 3:16.

4-6. Ka sha nyi igbenda nahan Yehova yange pase mbangeren Bibilo mkaanem ma vea ngere? Tese ikyav.

⁴ Nahan kpa, Aôndo yange pase mbangeren Bibilo kwagh u ve nger la sha ikyev i icighan jijingi na nena? Yange ôr ve asember a vea nger la keve keve shin yange ôr ve jindikwagh, ve gema ve nger ken mkaanem veme? Nenge ase gbenda u orkpenga nana fatyô u ngeren or washika yô. Ka a gba hange hange u a nger asember agen keng yô, nan nger washika la iyol i nan, shin nan ôr akawe u nan kwagh u nana nger la vough. Akawe la ka nan nger washika la, kpa orkpenga nan gema a nger sigeneca u nan shin washika shon. Ashighe agen yô, ka nan ôr akawe u nan akaa a vesen a nan soo u ngeren ken washika la tseegh, akawe la a za mase ngeren washika la ken mkaanem ma nan. Maa orkpenga la nan ôr washika la, nan sôr akaa ker nan hide a na akawe la ér a hide a nger. Ka a̱ ngeren washika la a been yô, orkpenga la a wa uwegh shimi, nahan or u i ne nan washika la cii nan fa ér ka orkpenga la a nger ye.

⁵ Kape Bibilo kpa i nger avegher a i̱ agen sha “ihôwe u Aôndo” je la. (Eks. 31:18) Yehova kpa ashighe agen yange a yila asember a a lu hange hange la jighilii i nger inya. U tesen ikyav yô, i nger ken Ekesodu 34:27 ér: ‘TER shi kaa a Mose er: Nger akaaôron ne; gadia ka sha akaaôron ne M ya ikyur a we kua Iserael kpaa ye.’ (Eks. 34:27) Shi Yeremia kpa Yehova yange kaa a na ér: ‘Nger akaaôron a M er a we cii ken takerada.’—Yer. 30:2.

⁶ Nahan kpa, ashighe kpishi Aôndo yange ôron mbangeren Bibilo mkaanem ma vea nger ga, kpa yange a wa mbamhen nav ken asema a ve sha ivande, nahan ve mase ngeren mbamhen mbara ken mkaanem vem.  Takerada u Orpasenkwagh 12:10 kaa ér: “Orpasenkwagh ker er una zua a akaaôron a dedoo, man kwagh u i nger jighilii yô, ka akaaôron a mimi je la.” Luka u lu orngeren Ivangeli la di yange “time sha akaa la cii doo doo, hii sha mhii u a zan zan, je yô, [a] nenge doo u [una] nger . . . a sha inja sha inja sha adondo adondo.” (Luka 1:3) Jijingi u Aôndo yange lumun ér myen u uumace la a gema loho na ga.

7. Mne u Aôndo yange na uumace tom u ngeren Bibilo la tese kwaghfan na nena?

⁷ Mne u Yehova yange na uumace tom u ngeren Bibilo la tese kwaghfan na u hemban la. Asember ka a wase se u fan kwagh u i lu ôron yô, shi ka a bende a ishima yase kpaa. Luun er Yehova yange na mbatyomov tom u ngeren Bibilo la nahan, ma ve fatyô u pasen mlu u orumace, er mciem man ijungwen man iyolkpen nahan je he? Er Aôndo yange de ér uumace mba ve yen ne ve tsua asember a vea pase mbamhen mba icighan jijingi yange wa ken a ve la ayol a ve yô, Mkaanem ma Aôndo ka ma kôr se ken ishima kpishi je.

ATÔAKYAA A A NE VE SE NE JIGHJIGH SER BIBILO DUE HEN AÔNDO YÔ

8. Se fatyô u kaan ser Bibilo hemba ityakerada i kwaghaôndo igen cii sha ci u nyi?

⁸ Akaa nga kpishi a a tese ér Bibilo ka Mkaanem ma Aôndo a ne i nger yô. Bibilo wase se u fan kwagh u Aôndo, nahan i hemba hanma takerada ugen u i nger sha kwagh u kwaghaôndo cii. U tesen ikyav yô, ityakerada i kwaghaôndo u Mbahindu pase kwagh u uiniongo vev mba kwaghaôndo man kwaghfan ve man ukwaghhir vev kua atindi a ve a sha kwagh u aeren a dedoo. Ityakerada i kwaghaôndo u Mbabuda di ôr kwagh u atindi a i gbe u nomso man kasev mba eren tom ken iyagh ki kwaghaôndo la vea kuran yô. Ityakerada ne shi pase akaa a Mbabuda ve ne jighjigh a mi yô, kua atesen a ve. Buddha iyol na yange senge ér un ngu aôndo ga, shi yange ôr kwagh u Aôndo kpuaa tseegh. Ityakerada i kwaghaôndo u Confucius gema ôr kwagh u akaa a yange er yô, man atindi a sha kwagh u aeren a dedoo man ahir a eren kua atsam. Takerada u kwaghaôndo u Mbamusulumi di tese ér Aôndo ngu môm tseegh, a fa akaa a ken hemen cii, shi nga eren sha iniezwa na kpaa. Nahan kpa, u pase iti i Aôndo i Yehova, i i nger ken Bibilo ajiir udubu imôngo la ga.

9, 10. Se fatyô u henen nyi sha kwagh u Aôndo ken Bibilo?

⁹ Ityakerada i kwaghaôndo kpishi ôr kwagh u Aôndo cuku tseegh. Kpa Bibilo wase se u fan Yehova Aôndo kua ityom na. I̱ wase se u nengen a aeren a na kpishi. Bibilo pase se ér Aôndo ka u hembanagee cii, shi ngu a kwaghfan shi ka Aôndo u mimi, shi se doo un ishima kpaa. (Ôr Yohane 3:16; 1 Yohane 4:19.) Heela tseegh ga, Bibilo pase se ér: “Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una lumun nan.” (Aer. 10:34, 35) Msamber u i samber a Bibilo wuee la tese ér mimi je Aôndo ka u sangen a sange ga. Mba timen sha kwagh u ijô kposo kposo kaa ér mba lamen ijô i kuman er 6,700 nahan sha tar nyian. Ior mba hemban iyenge sha tar mba lamen ijô i kuman er 100 nahan ken ijô ne. I gema Bibilo jimin cii shin avegher a i̱ ken  ijô kposo kposo hemba 2,400. Nahan Bibilo jimin cii shin vegher u i nôngo u lun ken zwa u hanma or sha tar.

¹⁰ Yesu kaa ér: “Terem ngu eren tom her, Mo kpaa M ngu eren tom.” (Yoh. 5:17) Yehova ka Aôndo, “hii sha uicôronmbaashighev je zan zan gbem sha won.” Nahan hen ase sha akaa a Aôndo a er la cii! (Ps. 90:2) Ka Bibilo tseegh i pase se akaa a Aôndo yange er man a a lu eren hegen shi una va er ken hemen la kpaa ye. Ruamabera shi tese se kwagh u a doon un man u a doon un ga la, shi a pase se kwagh u se er ve se kporom ikyua a na la kpaa. (Yak. 4:8) Mayange se de ser mbamgbe asev shin akaa a nyian se ishima a yange se u kporom hen Aôndo ga.

11. Ka kwaghfan u injaa u nyi a lu ken Bibilo?

¹¹ Kwaghfan u injaa u a lu ken Bibilo la kpa tese ér Bibilo ka takerada u Aôndo a ne i nger yô. Apostoli Paulu yange nger wener: “Ka an nan fe mhen u Ter je u nana tese Un kwagha?” (1 Kor. 2:16) Ivur la har sha mpin u profeti Yesaia yange pine ior mba sha ayange a na la, ér: “Ka an nan lu wa Jijingi u TER kwagh, shi nan lu orwasen Un henen kwagh, nan tesen Unu?” (Yes. 40:13) Mlumun sha mpin la yô, or môm nan ngu ga, sha ci u or môm fa kwagh kuma sha Yehova ga. Kape i lu ve ka sea dondo kwaghwan u Ruamabera sha kwagh u ivese man iemberyolough man azende a ase man tom u eren kpoghuloo man ieren i mimi man u yesen ônov kua aeren a dedoo ve i kpe se iyol je la. Bibilo ngi a kwaghwan u bo ga. Kpa uumace yô, mba a kwaghfan kuma u wan or kwagh u wasen nan hanma shighe ga. (Yer. 10:23) Hanma shighe yô, ka ve shi sôron shi geman a kwaghwan ve, zum u ve nenge ér ngu a mshi yô. Bibilo kaa ér: ‘mbamhen mba iorov mba er humbe nahan.’—Ps. 94:11.

12. Ior nôngo ér vea tim Bibilo kera nena?

¹² Yiase kpa na se ityôkyaa i nan jighjigh ser ka Aôndo u mimi la a ne i nger Bibilo ye. Ngise la, ior kpishi nôngo ér vea tim loho u Aôndo. Ken inyom i 168 C.S.Y. la, tor u Shiria u i yilan un ér Antiochus IV la, na zwa ér i ker ityakerada i ken Ruamabera u Atindigh la cii i̱ nande i. Ken inyom i 303 la, Tor u tartor u Roma, u i yilan un ér Diocletian la, yange wa tindi ér i hembe ajiir a Mbakristu kohol ker la cii shi i nande Uruamabera vev kpaa. Nahan i za hemen u hemben Mbakristu ajiir shi nanden Uruamabera vev kuma anyom pue. Derianyom u sha 11 la been yô, upoopu nôngo ér vea yange mfe u Bibilo u samber, nahan ve hendan a ior mba ve soo u geman Ruamabera ken ijô i ior kpishi lamen la. Shin er Satan kua mbatomov nav nôngo kwagh kpoghuloo nahan kpa, Bibilo war zan zan ar nyian. Yehova lumun ér or môm nana tim iyua i a ne uumace la ga.

ATÔAKYAA A A NE VE IOR KPISHI VE NE JIGHJIGH LA

13. Ka atôakyaa a nyi a tese ér ka Aôndo a ne i nger Bibilo?

¹³ Atôakyaa agen kpa nga a a tese ér ka Aôndo a ne i nger Bibilo yô. Bibilo hide nyiman iyol i i̱ ga, i̱ gba zwa môm vea sainsi, shi akaaôron a profeti a ken Bibilo nga kuren sha mi vough, shi mba yange ve nger Bibilo la ôr kwagh sha mimi. Heela tseegh ga, shi Bibilo ngi a tahav mbu geman uuma mba iorov, shi akaa a i̱ er sha kwagh u yiase la ka a mimi shi nga vough kpaa, shi i̱ na mbamlumun sha mbampin mba ve lu sha ikyumhiange i hiihii la. Nenge ase kwagh u a wese mbagenev u fan ér ka Aôndo a ne i nger Bibilo yô.

14-16. (a) Lu nyi i wase orgen ken Kwaghaôndo u Mbamusulumi man wankwase ugen ken Kwaghaôndo u Mbahindu kua kwase ugen u huna ér Aôndo ngu ga yô, ve na jighjigh ér ka Aôndo a ne i nger Bibilo? (b) Ka atôakyaa a tesen ér ka Aôndo a ne i nger Bibilo a nyi, u soo wer u za pase ioro?

¹⁴ Yange i mar orgen ken tar u Mbamusulumi hemba ingyegh ker yô, shi i yese un ken Kwaghaôndo u Mbamusulumi, mba yer iti na ér Anwar. * Shighe u za lu ken tar ugen ken  Imbusutarimese i tar u Amerika yô, Mbashiada mba Yehova za un inya. Anwar kaa ér: “Hen shighe la m lu a mnenge u kpeegh sha kwagh u ukwaghaôndo mba Mbakristu sha ci u akaa a vihin tsung a yange ve er la. Er m lu or u soon u fan akaa yô, m lumun mer ve va hen Bibilo a mo.” Ica gba ga tsô, Anwar hide yem ken tar na, nahan kera zuan a Mbashiada mba Yehova ga. Anyom nga kar yô, a mough a yem ken Yuropa, za hide hii Bibilo na i henen, nahan a kure ikyaa ér: “Mkur u akaaôron a profeti a ken Bibilo la, man mnyiman u Icighan Ruamabera i nyiman iyol i i̱ ga la, kua mdoo u ior mba Yehova ve doo ayol a ve la yange wasem u fan mer Bibilo ka Mkaanem ma Aôndo.” Yange i er Anwar batisema ken inyom i 1998.

¹⁵ I mar wankwase ugen u lun anyom puetaratar ken Kwaghaôndo u Mbahindu, mba yer un ér Asha. A kaa wener: “Yange m eren msen shighe u m lu ken tempel tseegh, shin shighe u m tagher a akaa a zan mo iyol tseegh, kpa yange kwagh a zam iyol ga yô, mayange m umbur kwagh u Aôndo ga.” Shi a kaa ér: “Nahan kpa, hii shighe u Mbashiada mba Yehova va kema uwegh sha hunda wam la je, uma wam jimin cii kôr gema.” Shighe kar yô, Asha hingir u fan Aôndo shi yan ikyar a na kpaa. Lu nyi i na ve Asha na jighjigh ér ka Aôndo a ne i nger Bibilo? A kaa ér: “Hanma mpin u yange m pine cii, Bibilo nam mlumun sha mi. I̱ wasem u nan jighjigh a u zan ken tempel za guren ma eev inya shio.”

¹⁶ Yange i yese kwase ugen u i yer un ér Paula yô, ken adua u fada, kpa va hingir gumkwase yô, hii u hunan ér Aôndo ngu ga. Maa kwagh va er. A kaa ér: “Yange m za nenge a ijende yam igen i se kera nenge ga iwer ngee yô. Lu hen shighe u agumaior kpishi umen ityough shi maan mcimbim ma bom kpoghuloo la. Kpa yange gema uma na, hondo ityough tsembelee, shi lu sar sar kpaa. Nahan m pine un mer, ‘Ka nyi i ne ve u hingir sha ashe tsembelee nahana, man ka han u yem u za lu?’ A kaa ér un ngu henen Bibilo vea Mbashiada mba Yehova, je shi pasem kwagh kpaa.” Paula nengen er Bibilo i gem ijende na yô, kwagh ne mgbegha un u henen Bibilo, shi lumun ér ka Aôndo a ne i nger i ye.

“MKAANEM OU KA IMENGER I ANGAHAR A AM”

17. Aluer u ngu ôron Mkaanem ma Aôndo hanma iyange shi gbidyen kwar sha mi yô, a wase u nena?

¹⁷ Bibilo ka iyua i doon tsung i Yehova a ne sha icighan jijingi na yô. I̱ doo u u̱ ôron i ayange ayange, nahan ia seer doon we ishima kua Un u a ne i nger i la kpaa. (Ps. 1:1, 2) Hanma shighe u ú lu ôron i̱ cii, vande hiin sha msen, sôn jijingi u Aôndo sha er una wase u u̱ kaven i yô. (Luka 11:13) Bibilo ngi a mbamhen mba Aôndo, nahan shighe u ú gbidye kwar sha kwagh u ú lu henen yô, u lu a mhen u Aôndo.

18. U soo wer u za hemen u henen Bibilo sha ci u nyi?

¹⁸ Er u lu zuan a mfe sha kwagh u mimi seer la, eren sha akaa a u lu henen la. (Ôr Pasalmi 119:105.) Bibilo i ôron ngi er u nengen ken ijingi nahan. Sha nahan yô, aluer u nenge wer doo u ú sôr akaa ken uma wou yô, er nahan. (Yak. 1:23-25) Er tom a Mkaanem ma Aôndo er ka sanker nahan, sha u kuran atesen a u ne jighjigh a mi la man sha u dughun atesen a aiegh ken asema a mbaasemaamimi kera. (Ef. 6:17) Er u lu eren nahan la, wuese Aôndo er “Icighan Jijingi mgbegha” nomso man uprofeti ve nger Bibilo yô.

[Ngeren mba shin kpe]

[Mbampin Mba Ngeren u Henen]

[Mkaanem ma sha peeji 29 la]

Ôron Bibilo ayange ayange, nahan Aôndo u a ne i nger i̱ la una seer doon we ishima

[Foto u sha peeji 26 la]

Or ka nana zua a washika yô, nan nenge ér ka or u nan nger sigeneca shimi la nan nger un ye