Ngeren u Pasen Kwagh u Uma u Or

Icighantom u Se Eren Yehova La Wase Se Se Hen Ityesen i Injaa

Kwaghôron u Olivier Randriamora

“U lun ken ican kpaa m fa, u ngeen a kwagh wuee kpaa m fa. Hanma gbenda cii man ken hanma kwagh cii kpaa, i nyôr a mo ker, m fa ci ca cii, u yan kwagh kuman mo man shi u lun ijen kpaa . . . M ngu a agee a eren akaa cii je ken Un u A taver mo ne.”—Fil. 4:12, 13.

MKAANEM ma apostoli Paulu man ma taver mo vea kwase wam, Oly, ishima hanma shighe. Se hen kwagh u vesen ken tom u se lu eren Yehova ken tar u Madagascar ne. Kwagh shon yô, ka u suur sha Na ken hanma mlu cii.

Shighe u Mbashiada mba Yehova hii u henen Bibilo vea ngô u Oly, ken inyom i 1982 la, mo vea Oly se lu sôôr ayol a ase. Nahan mo kpa m lumun mer i̱ hen Bibilo a mo, shighe kar yô, Oly kpa kohol mo ken kwaghhenen ne. Yange se vôso ayol a ase ken inyom i 1983, i er se batisema ken inyom i 1985, fese je maa se tôô ishuen pania. Ka ker ken inyom i 1986 yô, se hingir upania mba keke.

Ka ker ken uwer u Setemba inyom i 1987 yô, se hii u eren tom u ikpur pania. Ijiir i i hii tindin se her yô, lu angeri ugen ken imbusutarimese i ityôtar i tar u Madagascar; tiônnongo lu hen ijiir ne ga. Tar ne ngu a ikweior ker wue wue, i lun a aeren man mbaadini vev kposo kposo. Akuraior a vesen 18 nga ken tar u Madagascar, man uipaven mba kiriki kpishi. Zwa u vesen u i lamen ken tar ne yô, ka zwa Malagasy, kpa mba lamen zwa ne sha ajiir agen kposo kposo. Nahan se hii u henen zwa u ior mba hen geri u se lu eren tom u pasen kwagh her la lamen la. Kwagh ne na yô, kera taver ior mba hen geri la u ngohol loho wase ga.

Sha hiihii la, yange m na kwaghôron u ken igbar hanma iyange i Lahadi, mea been yô, Oly a kure ave. Lu se tseegh se nyôron mkombo ye. Shi yange se eren Makeranta u Henen Tom u Hemen u Aôndo, nahan Oly una eren asaimenti yô, a lamen er ngu lamen a orya nahan. Shighe u Ortamen u sôron atôônanongo sôr se ve, kaa ér se fatyô u sôron gbenda u se eren mbamkombo la, yange doo se kpen kpen!

Ka hanma uwer yange se zuan a inyaregh ki i naan se sha uwer la ga, sha ci u uwashika yange ve vaan hanma shighe ga. Sha nahan yô, se hen u lun ken ican. Sha shighe ugen la, se lu a injar mato i zan mkohol u ningir, u i er hen ijiir i í gba ica je kuma ukilomita 130 la ga. Se umbur kwaghwan u dedoo u anmgbian ugen yange wa se ne. Yange kaa ér: “Pase nen Yehova mbamzeyol enev. Kera kpa ka tom na ne lu eren ye.” Nahan se er msen shi se tsua u zan mkohol la angahar. Kpa cii man se mough zende ne yô, anmgbian ugen va sôr se, shi na se inyaregh je kuma ki se kimbi injar mato i zan mkohol la.

TOM U SÔRON ATÔÔNANONGO

Yange i nam tom u sôron atôônanongo ken uwer u Febewari 1991. Hen shighe la, annongo wase vese kuma mbapasenkwagh iorov 9, iorov 3 ken a ve er  batisema shi se nyôron mkombo iorov 50. Mba tsaase se kera cii yô, se gba zenden sôron atôônanongo a hen ningir ugen ken gartamen, u i yer ér Antananarivo la. Ken inyom i 1993 la, i hide i na se tom u sôron atôônanongo la hen ningir ugen vegher u sha ityoughkitaregh ki tar u Madagascar la. Uma yange hemba taver hen ijiir la a ken geri.

Yange a gba u se za sôr atôônanongo shin iniongo i lun ica yô, se zende angahar, ashighe agen se zende i kuma ukilomita 145. Se unde sha iwo i lun a akô a wan ime kpishi. Kwagh ne na yô, se luun a ikyav kpishi ga. Nahan kpa, yange a gba u mbatamen mba sôron atôônanongo vea na kwaghôron shi vea tese senema, er ashighe agen yange i er nahan yô, i gba u se tôô ikyav mbi yuhwan kpishi. Oly yange a tôô mashin u nengen senema a mi, mo di m tôô batere u matoo.

Ashighe kpishi yange se zende i kuma ukilomita 40 ken iyange, sha er se za hen tiônnongo ugen yô. Se unden shi se hungwan sha iwo shi se peren uifi shi se hungwan shin angbiôr je kpaa. Ashighe agen yô, se tsa hen kpegbenda, kpa ashighe kpishi se nôngo sha er se zua a ya se tsa her yô. Ashighe agen yange se kaa a ior mba se vande fan ve ga kuaa ser ve na se ijiir i tsan. Sea zuan a ijiir i tsan yô, maa se hii u yôron iwer. Oly yange a ngohol ityegh ki jiir kwagh a mi, a za shin uwagh a za kese mngerem. Mo di m za sôn ijembe m hira aren ikyon i keer usu. Yange i tôô se shighe kpishi u eren akaa ne cii. Ashighe agen se yam ikyegh, nahan i gba u se sôngo i̱ se bur shi se ôô vough vough.

Sea yaan kwagh kera cii yô, se kese mngerem ma ôôn iyol. Ashighe agen yange se tsa shin kicin. Ura yange ua nôôn, man a lu iyou i ura u nee ker yô, i gba u se lian ken kpekpe sha er ura ua nôô se ga yô.

Hanma shighe yô yange se ker u pasen ior mba se tse hen ya ve la kwagh. Yange sea za nyôr ape se lu zan yô, anmgbianev asev ve ngohol se doo doo, nahan kwagh ne a doo se tsung. Er yange vea nenge a vese i doo ve kpishi yô, se kera umbur atsan a se ye sha gbenda la ga.

Yange sea tsa hen ya u ma anmgbian yô, i doo se kpishi u wasen nan u eren ityom i hen ya. Kwagh ne a gema a na yô, tsombor u nan u zua a ian i duen kwaghpasen. Yange se ver ishima ser anmgbianev ve̱ naan se kwaghyan u hemban cii, shin kwaghyan u vea kanshio u yamen la ga.

TOM U SÔRON INIONGO I LUN ICA

Yange i doo se u sôron iniongo i lun ica la kpishi. Anmgbianev yange ve ngohol se doo doo, shi ve lu a akaa kpishi a i gba u se nenge sha mi yô. Shighe u ‘memen kpeghee’ tsô kpa se luun a mi ga. (Mar. 6:31) Hen ijiir igen la, anmgbian ugen vea kwase na yange ve lôhô ior mba ve henen Bibilo a ve cica cii, iorov 40, hen ya ve, sha er se wase ve u henen kwagh a ve yô. Kwase wam kohol kwase u anmgbian ne, ve hen Bibilo a iorov er 20 nahan, mo vea anmgbian la di se hen kwagh a iorov 20 mbagenev mbara. Yange a henen kwagh a or a been a bee nahan, orgen nan kar. Shighe kar yô, se tôndo kwaghhenen la, se er mbamkombo mba tiônnongo cii ve se hide shi se za hemen a kwaghhenen shon ye. Yange se pase kwagh zan zan ahwa anigheni aikighe nahan ve, se va mase memen ye!

Kwagen la se sôr annongo ugen, nahan se cii se mough u yemen hen angar ugen, er ahwa anigheni  pepe nahan. Se cii se hua akondo a tse. Se mba zenden angahar zan zan yô, se za mase nyôron ape se lu zan la atetan. Se hua akondo a tsembelee maa se hii u pasen kwagh sha uya uya ave ave je. Uyaav mbara lu kpuaa, kpa mbapasenkwagh gema lu kpishi. Nahan se pase kwagh hen haregh la se bee ken atô u uminiti mba kuman er 30 nahan tseegh. Maa se gba yemen hen angar ugen. Se mba been heela yô, maa shi se ver ishigh hiden ken ya. Sha hiihii la, imba kwaghpasen ne nôngo u kpen mo iyol. Gadia se vihi shighe kua agee a ase kpishi kpa se gema se pase kwagh sha uya uya kuma er ihwa i môm nahan tseegh. Nahan kpa, anmgbianev mban toghor iyol sha kwagh ne ga. Ve lu a gbashima her.

Annongo u mbapasenkwagh ugen yange lu sha ityough ki uwoogh. Tsombo ugen u ú lu Mbashiada yô lu her, ve tsaan ken iyou i môm. Ve er anyou ugen kpuaa nahan, ve nyôron mbamkombo ker. Ica i gbe ga yô, anmgbian u se tsa hen ya na la gba yilan anmgbianev mbagenev sha ikyenge ikyenge ér: “Anmgbianev!” Orgen lumun sha ityough ki uwoogh ér “Oo!” Anmgbian u se tsa hen na la shi yila kaa ér, “Anmgbian u sôron atôônanongo va nyôr ve!” Nahan ve kaa ér: “Ka sha mi?” Anmgbianev mbara za hemen u samber a loho la zan zan u ar a mba ve lu ica kpishi mbara kpaa. Ica i gbe ga yô, ior hii u kohol imôngo. Er mkombo hii la, ior lu hen mkombo la hemba 100.

MBAMTAVER MBA KEN ZENDE

Ken inyom i 1996 la, i hide i na se tom u sôron atôônanongo hen haregh u lu ikyua ikyua a gar u Antananarivo yô. Heen ne shi se tagher a uzayol mbagenev kposo. Kwaghhendan faan zan sha ajiir a gban ica a gar la ga. Iyange igen yô, se lu wan iyol i za sôron annongo ugen hen geri u Beankàna (Basakey), u gba ica a gar u Antananarivo kuma er ukilomita 240 nahan la. Se nenge a pikôôpu igen i i lu yemen vegher la yô. Se mba er ishe vea deraba se mba been yô, se nyôr pikôôpu shon. Pasenja mbagenev vande lun shimi je kuma er 30 nahan, mbagen yav sha ijime na, mbagen di zer a zer shin ityô na.

Ica i gbe ga yô, mato ne vihi, er ashighe kpishi yange i lu nahan, maa se hungwa se gba yemen angahar. Se mba zenden ahwa imôngo yô, gongulo ugen gba va karen. Gongulo ne iv a ior kua ikyav shimi poo, kpa deraba la tile tôô se, shin ér ian lu i se tema inya ga nahan kpaa. Se mba va nyer hen ifi ugen yô, í lu sôron a sôr tsar u peren ifi shon la. Kwa ne kpa, se hungwa se gba yemen angahar, zan zan se kar nyôron hen angar ugen, ape ikpur pania mbagenev lu yô. Shin er se vande wan ago iyol u sôron ve ga nahan kpa, se tôô shighe la se kohol ve se gba pasen kwagh imôngo, keghen shighe u a sôr tsar a bee, shi mato ugen una va la.

 Se tsa her kuma kasua môm cii ve, mato mase van ye, maa se za hemen a zende wase. Gbenda la lu agber agber. Ashighe kpishi yange i gba u se hungwa se tuur mato shin mngerem ma gban anu anu, ashighe agen se gba je kpaa. Ka kom sha use yô, se za nyôr hen ya ugen, maa se hungwa her. Se undu gbenda u vesen, se tôô gbenda toho se gba yemen angahar, karen shin ijande, hungwan shin angbiôr iwenge iwenge.

Lu hiin yase u zan hen ijiir la je la, nahan se pase mba kahan ijande kwagh, shi se pine ve gbenda u zan hen uya mba Mbashiada mba hen ijiir la. Se mba va fe er mbatomov mbara lu anmgbianev asev mba ken jijingi yô, doo se kpishi!

SE TAVER MBAGEN ASEMA U EREN TOM U PASEN KWAGH HANMA SHIGHE LA

Ken anyom a karen ne, se taver mbagen asema ser ve er tom u pasen kwagh hanma shighe la, man kwagh u dedoo u a dugh ker la na se msaanyol kpishi. Zum u se za sôr tiônnongo ugen u lu a upania mba keke utaankarunyiin yô, se wa ve kwagh ser hanmô ve nana taver orpasenkwagh môm ishima, nana hingir pania. Iwer ataratar ngi kar, se mba hidi se mba za sôron tiônnongo la yô, iyenge i upania mba keke yem nyôr iorov 22. Anmgbianev mba kasev uhar mba ve lu upania yô, taver uter vev mba ve lu mbatamen yô asema ve hingir upania mba keke. Mbatamen mban shi taver ortamen ugen ishima, un kpa hingir pania. Shighe kar yô, ortamen ne va hingir ikpur pania. Ken masejime yô, un vea kwase na ve hingir u zenden sôron atôônanongo. Mbatamen mbauhar mbara di ye? Môm ken a ve hingir ortamen u sôron atôônanongo, ugen la di na iyol na sha u wasen tom u maan Ayou a Tartor.

Hanma iyange ka se sugh Yehova sha ci u iwasen i a ne se la, gadia se kav ser sha tahav asev tseegh yô, se kôrcio u eren kwagh môm ga. Shin er ashighe agen ka i tume se iyol shi se gba angev nahan kpa, ka sea hide sea hen sha atam a dedoo a tom wase u um la yô, i saan se iyol kpishi. Yehova ka a na tom u se eren un la u za ikyura. Saan se iyol er se kpa se lu a ci ken tom shon, se lu eren tom u ikpur pania hegen nahan. Sha kpôô yô, se hen u suur sha Yehova, un “u a taver” se la.

[Mkaanem ma sha peeji 6 la]

Se hen u suur sha Yehova

[Foto u tesen ijiir/Ufoto mba sha peeji 4 la]

Tar u Madagascar, u mbagenev ve yer ér Big Red Island la, ka icile i sha unyiin i hemban kehen sha tar cii. Inya i hen icile ne ngi nyian, shi inyam man imendenegh kpishi i i lu hen icile ne ngi hen ajiir agen ga

[Foto u sha peeji 5 la]

Yange se tagher a mbamtaver kpishi ken zende wase

[Ufoto mba sha peeji 5 la]

Yange i doo se u henen Bibilo a ior kpishi