De Yehova A Hemen We A Za A We Ken Mlu U Ken Uikyangen Ga La
De Yehova A Hemen We A Za A We Ken Mlu U Ken Uikyangen Ga La
“Kenger sha tindi u vough u a pasen se a toho la.”—YAK. 1:25.
Ú FATYÔ U PASEN KPA?
Ka hanma tindi a pasen se a toho, man ka unô ve zough a mtsera ken tindi shono?
Se er nyi ve se lu ken uikyangen ga?
Mba ve ze hemen u ungwan imo i Yehova la, vea va kera lu ken uikyangen ga nena?
1, 2. (a) Mlu u tar ne ngu nena, man ka sha ci u nyi? (b) Ka mlu u nyi a lu keghen ior mba Yehova?
SE MBA ken shighe u ior ve hembe wan hua kua ipila, shi mvende u vendan atindi a seer ngeen yô. (2 Tim. 3:1-5) Kwagh ne na yô, ugomoti ka ve seer wan atindi shi ve seer tsaase udasenda vev, shi ve wa mbaanar mba wasen ve u fan akaa a ior ve eren la. Ken ityar igen yô, ior ka ve nôngo ér vea lu ken mkor, nahan ve wa akaa a iferor nana va hen ya ve ve, aa er imo yô, kua uishindan mba taver man akaa a kasen sha igyar, a or a bende ker ve aa dura nan yô. Ior kpishi ka ve venda u duen ken won tugh shi ve yange mbayev vev u za numben ken won shighe u or nan lu her ga yô, a̱ lu tugh shin atetan kpaa. Sha mimi yô, mkor kera ngu ga, man ashe ver ikyôr sha inja i guda a lu ga.
2 Satan yange kaa ken Sule u Eden ér saa or a lu sha tseeneke u nan, nana lu sha ikyev i Yehova ga ve, nana lu ken uikyangen ga ye. Ungwa imba icôr aie la sha wono! Er ior ve lu hemban eren kwagh sha asema a ve la, kape uumace ve lu yan ican seer a seer je la. Se mba se civir Yehova kpa, mlu u vihin ne bende a vese. Nahan kpa, se mba a ishimaverenkeghen ser uumace vea va osough sha ikyev i isholibo kera, vea gema a lu ken “mlu u engem u lun a ikyangenev ga u ônov mba Aôndo la.” (Rom. 8:21) Man Yehova hii u wan ior nav ago iyol sha er vea va lu ken mlu u doon ne yô. Sha nyi gbenda?
3. Yehova na Mbakristu tindi u nyi, man ka mbampin mba nyi se lu timen sha mini?
3 Yehova na se kwagh u una wa se ago iyol u va lun ken mlu u ken uikyangen ga la yô, Yakobu yila kwagh ne ér “tindi u vough u a pasen se a toho la.” (Ôr Yakobu 1:25.) Ka a ter ishember i “tindi” la yô, ior ve hen kwagh u wan tswer, mba henen kwagh u nan a na or ian i eren kwagh ga. Nahan “tindi u vough u a pasen se a toho la” ka nyi? Man tindi la pasen se toho nena?
TINDI U A PASEN SE A TOHO LA
4. “Tindi u vough u a pasen se a toho la” ka nyi, man ka unô ve zough a mtsera ken tindi ne?
4 “Tindi u vough u a pasen se a toho la” ka Tindi u Mose ga, sha ci u Tindi u Mose la yange pon a pon isholibo i or, shi va kure sha Kristu. (Mat. 5:17; Gal. 3:19) Nahan yô, ka tindi u han Yakobu yange lu ôron kwagh naa? Yange lu ôron kwagh u “tindi u Kristu,” shi i yila tindi ne kpaa ér “tindi u jighjigh u nan” kua ‘tindi u pasen ior tuhwan.’ (Gal. 6:2; Rom. 3:27; Yak. 2:12) Sha nahan yô, “tindi u vough” la wa hanma kwagh u Yehova a soo ér se er cii ker. Mbakristu mba i shigh ve mkurem kua mba ve lu “iyôngo igen” la cii zua a mtsera ken tindi ne.—Yoh. 10:16.
5. Tindi u a pasen se a toho la yuhwa ga sha ci u nyi?
5 “Tindi u vough” ne ngu er atindi a ken ityar kpishi nahan ga, a wa kpelegh kpelegh ga, shi a yuhwa ga, kpa ngu a atindiakaa ker, a a taver u kaven shin dondon ga yô. (1 Yoh. 5:3) Yesu kaa ér: “Igbur Yam leghem man ikyav Yav kpaa peese.” (Mat. 11:29, 30) Heela tseegh ga, “tindi u vough” ne ngu a utswer shin mbamtsaha wue wue ga, kpa ka u sha dooshima, shi i nger un ken asema a ior, ka sha ikpande i awen ga.—Ôr Mbaheberu 8:6, 10.
ER “TINDI U VOUGH” LA A PASEN SE A TOHO LA
6, 7. Ka nyi se fatyô u ôron sha kwagh u Atindi a Yehova, man tindi u a pasen se a toho la wasen se u eren nyi?
6 Atindi a Yehova a we uumace la nga sha ci u mkpeyol ve. U tesen ikyav yô, hen ase sha kwagh u atindi a igbetar a Yehova a we sha kwagh u mningir u tar la. Ior mba a vaa iyol sha kwagh u atindi ne ga. Kpa a gba ve kwagh, shi ve fa je ér atindi a igbetar ne nga sha ci u mkpeyol ve. Kape “tindi u vough” u Kristu u a pasen se kwagh u atindi a Yehova a we sha kwagh u mcivir man aeren a dedoo la kpa a lu sha ci u iwasen yase je la.
7 Tindi u a pasen se a toho la kor se, shi ne se ian i kuren asaren a ase a vough la sha gbenda u vihin se iyol shin nzughul a ian i mbagenev ve lu a mi i eren kwagh u ve soo la ga. Nahan kwagh u una wase se ve se lu ken uikyangen ga, se eren kwagh u se soo yô, ka u lun a asaren a a zough sha atindi a Yehova man aeren a na yô. Inja na yô, gba u se hen u soon kwagh u Yehova a soo la, shi kôron kwagh u Yehova a ker un ihyom la ihyom, man ka kwagh u tindi u a pasen se a toho la a wasen se u eren je la.—Amo. 5:15.
8, 9. Mba ve var a tindi u a pasen se a toho la yô, ka ve zua a mbamtsera mba nyi? Tese ikyav.
8 Ka se nôngo ser se hemba asaren a bo ken mlu wase u yinan ne. Nahan cii kpa, er se var a tindi u a pasen se a toho la yô, se mba zuan a mtsera u tindi ne hegen je. U tesen ikyav yô: Orgen u taav u man ya tor ker a na yô, va hii Bibilo i henen, iti na ér Jay. Fe ér kwagh u un lu eren la doo Yehova ga yô, gba u una er kwagh sha mi. Una tsua u wan iyol na sha ikyev i asaren a na a iyolough la shin a lu sha ikyev i Yehova? Yange er kwagh sha kwaghfan, a tsua u civir Yehova, shin er taver un u den taav u man nahan kpaa. Yange de taav nahan lun un nena? A kaa ér: “Yange doom kpishi, lum er i shirim ikyav mbi yuhwan nahan.”
9 Kwagh ne wase Jay u fan ér, ian i ior i tar ne i̱ lu a mi i eren kwagh sha asema a ve, nahan “veren ishima sha akaa a iyolough” la ngi ne ve msaanyol ga, kpa ngi gem ngi ker ve ikpan. Nahan kpa, atindi a Yehova, a a wasen se u ‘veren ishima sha akaa a ken jijingi’ la ka a pase se a tuhwa, shi a na se “uma man bem.” (Rom. 8:5, 6) Ka han Jay yange zua a tahav ve de ieren i bo i man taav laa? Yange lu sha tahav nav ga, kpa lu sha tahav mbu Aôndo. A kaa ér: “Yange m timen ken Bibilo hanma shighe cii, shi m sônon Aôndo mer a nam icighan jijingi na, shi m lumun iwasen i anmgbianev mba ken tiônnongo naan mo sha dooshima la.” Aluer se cii se mba eren akaa ne yô, aa wase se u duen ken uikyangen kera. De se nenge nen er akaa ne aa wase se yô.
KENGER KEN MKAANEM MA AÔNDO
10. Inja i u “kenger” sha tindi u Aôndo la ér nyi?
10 I ôr ken Takerada u Yakobu 1:25 ér: ‘Or u nan kenger sha tindi u vough u a pasen se a toho la shi nan veren ishima yô, á saan nan iyol ken aeren a nan cii.’ Ishember i ken zwa Grika i í gem ér “kenger” la inja i i̱ yô, “ka u ngurum sha er u nenge kwagh vighe vighe yô,” man or a gba teman a tema tsô maa nana er kwagh ne ga. Nahan aluer se soo ser tindi u a pasen se a toho la a kura asema a ase man mbamhen asev yô, a gba u se henen Bibilo kpoghuloo, shi se eren msen shi se gbidyen kwar sha kwagh u se hen la.—1 Tim. 4:15.
11, 12. (a) Yesu yange tese wang ér gba u a hingir ieren yase u eren kwagh sha mimi nena? (b) Ka kwaghbo u nyi i gbe u se palegh keng, hemban cii je yô agumaior?
11 Shi gba u se “veren ishima” shin se za hemen u eren kwagh u Mkaanem ma Aôndo ma kaa la, nahan a hingir ieren yase u eren kwagh sha mimi. Yesu kpa yange ôr imba kwagh la a mbagenev mba ve na un jighjigh la, a kaa ér: ‘Aluer nea lu ken kwaghôron Wam zan zan yô, ne mba mbahenen Av mimi je; man né fa mimi, mimi kpaa una pase ne una tuhwa.’ (Yoh. 8:31, 32) Takerada u pasen asemberakaa ugen kaa ér: Inja i ishember i “fa” la kpaa ér u lun a iwuese sha “kwagh u or nan ‘fe’ yô, sha ci u kwagh la ngu nan a inja.” Sha nahan yô, ka a hingir ieren yase u eren kwagh sha mimi yô, í tese ér se fa mimi vindi vindi. Se er nahan yô, se fatyô u kaan ser “kwaghôron u Aôndo” ngu “eren tom” ken a vese, ngu kôôm mlu wase sha er se hemban eren kwagh er Ter wase u sha la yô.—1 Tes. 2:13.
12 Pine iyol you wer, ‘mimi je, m fa mimii? Ka ieren yam u eren kwagh sha mimi kpa? Shin mlu u tar u nengen ér ka u ken uikyangen ga la ngu saren mo?’ Anmgbian u kwase ugen u mbamaren nav yese un ken mimi yô, kaa ér: “Ka a tese u mimi iyev je yô, u henen kwagh u Yehova hanma shighe cii. Kpa mo yô, m fa Yehova tsembelee ga cii. Mayange m hen u kôron kwagh u a soo ga la ihyom ga. M na jighjigh ma shighe môm mer, akaa a m eren la nga benden a na kpaa ga. Shi m hen u zan hen a na ken msen shighe u kwagh a tserem la ga. Yange m suur sha mkav wam, man m fa lu ibumekwagh m lu eren ye, sha ci u m fa kwagh môm ga.” Kwagh er doo yô, shighe kar yô, anmgbian u kwase ne kav er mhen na la lu shami ga yô, nahan a gema inja kpishi je. Je yô, shi hii u eren tom u pania u keke kpaa.
ICIGHAN JIJINGI UNA FATYÔ U WASEN SE U DUEN KEN UIKYANGEN KERA
13. Icighan jijingi wasen se u duen ken uikyangen kera nena?
13 I nger ken 2 Mbakorinte 3:17 ér: “Hen ape Jijingi u Ter A lu yô, ikyangenev mbi her ga.” Icighan jijingi wasen se u duen ken uikyangen kera nena? Ka a wase se u lun a aeren a aa na se lu ken uikyangen ga yô; aeren shon yô, ka “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” (Gal. 5:22, 23) Aluer ior mba a aeren ne ga, man hemban je yô, aluer mba a dooshima ga yô, mayange vea fatyô u duen ken uikyangen sha ga. Kwagh u a lu zan hemen ken tar nyian la tese kwagh ne wang. Apostoli Paulu yange teren ityamegh ki jijingi kin been yô, a nger ér: “Anzaakaa ne yô, tindi yange a ga.” Lu nyi lu ôrono? Ma tindi ngu u yangen ityamegh ki jijingi ga. Ma tindi ngu u yangen se u lun a aeren ne ga. (Gal. 5:18) Ityôkyaa ngi i tindi una yange aeren ne ga, gadia Yehova soo ér se lu a aeren a Kristu gbem sha won, a ikighir shio.
14. Jijingi u taregh ka a kôr mba a hemen ve la ikpan nena?
14 Ior mba jijingi u taregh a hemen ve yô, ka ve hen ér ve mba ken uikyangen ga, sha ci u mba eren sha asaren a ve a iyolough la. (Ôr 2 Peteru 2:18, 19.) Kpa ve fa er ve lu ikpan ga. Saa gomoti ka a wa atindi kpete kpete ve, ior mban ve kighir asaren a ve a bo kua aeren a ve a bo la ye. Paulu yange kaa ér: “I ver tindi ka sha ci u or u nan lu u perapera la ga, kpa ka sha ci u mbavendanatindi kua mbahembanato.” (1 Tim. 1:9, 10) Shi mba ikpan i isholibo, mba eren sha ‘mbamhange mba ken iyol,’ man iyol ngi er tor u vihin tu nahan. (Ef. 2:1-3) Ambaaior ne nga er ishondo i ka a ver iyough shin gbande ve i va u ndiar la nahan. Isharen ve la ka i tuur ve ken ityô, ve va hingir u kpen shin iyough shon.—Yak. 1:14, 15.
SE MBA KEN UIKYANGEN KEN TIÔNNONGO U KRISTU GA
15, 16. Ka mbamtsera mba nyi se zough a mi hii shighe u se hii u kohol a tiônnongo imôngo la je, man ka mlu ken uikyangen ga u nyi se lu kere?
15 Shighe u ú hii u kohol a anmgbianev mba ken tiônnongo imôngo la, lu ma mzough u taregh u nyôr ga. Kpa u va ken tiônnongo sha ci u Yehova urugh we. (Yoh. 6:44) Ka nyi yange i na ve Yehova urugh we? Yange nenge u lu orperapera shi u lu or u cian Aôndo yumu? Alaghga u kaa wer “ei!” Tsô lu nyi Yehova nenge a mi ken a wee? Yange nenge u kegh iyol i ungwan tindi na u a pasen ior a toho la, u lu a ishima i dondon gbendatesen na. U ve ken tiônnongo yô, Yehova tese u Mkaanem nam. A pase u a tuhwa sha ikyev i mciem ma kwagh u mbaimev man atesen a aiegh a kwaghaôndo, a tese u u̱ eren kwagh er Kristu nahan. (Ôr Mbaefese 4:22-24.) Kwagh ne na yô, we kpa u ngu môm ken ior mba ve lu ken uikyangen ga kuaa la.—Yak. 2:12.
16 Hen ase sha kwagh ne: Ka wea lu vea ior mba Yehova a doo ve ishima a ishima ve cii nahan ka cier we iyoloo? Ka u yengen keen man keen fele felee? Ka wea lamen a anmgbianev ken Iyou i Tartor nahan, ka i za u iyol er or a va ii u kwagh nahanaa? Mayange ga! Ka u lu gbar gbar, ishima i za u iyol ga. Ú lu vea ior mbagenev ken tar nahan, a lu u nahan kpa? Taver tsô! Shi mlu u ken uikyangen ga u ú lu ker vea ior mba Aôndo ne ka di mafo u mlu u ken uikyangen ga u a lu keghen se ken hemen la tsô.
“MLU U ENGEM U LUN A IKYANGENEV GA U ÔNOV MBA AÔNDO LA”
17. Myom u uumace gba zua vea “mpase u á va pase ônov mba Aôndo” la nena?
17 Shighe u Paulu lu ôron kwagh u mlu u ken uikyangen ga u a lu keghen ior mba Aôndo shin tar la, a nger ér: “Gadia akaa a i gbe a sha won cii nga veren ashe keghen mpase u á va pase ônov mba Aôndo ken igbar la tsung je.” Maa shi a kaa ér: “Gadia akaa a i gbe a la kpaa á va pase a sha ikyev i mlu u hôôn la á tuhwa, á za a mi ken mlu u engem u lun a ikyangenev ga u ônov mba Aôndo la.” (Rom. 8:19-21) “Akaa a i gbe a sha won cii” la ka uumace mba ve lu a ishimaverenkeghen i lun uma gbem sha won shin tar la, ka mba vea va zua a mtsera sha “mpase u á va pase” ônov mba Aôndo, mba i tsegh ve sha jijingi la je la. Mpase ne una hii shighe u a nder “ônov” mban vea za lu sha vea Kristu, vea er tom a na imôngo sha u timin mbaaferev, kpa vea gema a war “zegeikpelaior” vea nyôr a i ken tar u he la.—Mpa. 7:9, 14.
18. Uumace vea seer lun ken uikyangen ga nena, man ken masejime yô, ka mlu u ken uikyangen ga u nyi se va lu kere?
18 Uumace mba a va war ve la vea due ken uikyangen kera vindi vindi, Satan man azôv a na vea kera lu ga. (Mpa. 20:1-3) Nenge er a pever uumace iyol sha wono! Hii hen shighe la je, mba 144,000 mba vea lu upristi shi vea tema tor vea Kristu imôngo la vea er tom a nagh ku ipaan ku Yesu kura sha u wasen uumace zan zan vea kar aren sha mlu u vough u Adam yange ta kera la. (Mpa. 5:9, 10) Uumace mba a kar ve kpa vea tile sha mimi la, vea ar sha mlu u vough, u Yehova yange wa ishima ér ve lu ker la, ka “mlu u engem u lun a ikyangenev ga u ônov mba Aôndo” je la. Nenge imba kwagh u doon ne sha wono! A kera gba u se nôngon a nôngo ser se er kwagh u vough sha ishigh ki Aôndo ga, gadia mlu wase jimin cii una lu vough, á gema un una zua sha ibeen i Aôndo.
19. Aluer se soo u lun ken “mlu u engem u lun a ikyangenev ga u ônov mba Aôndo la” yô, ka nyi i gbe u se za hemen u eren nyiana?
19 “Mlu u engem u lun a ikyangenev ga u ônov mba Aôndo la” sar u kpa? Aluer a sar u yô, de “tindi u vough u a pasen se a toho” la a za hemen u kuran ishima you. Sha nahan yô, henen Ruamabera sha gbashima. Eren kwagh sha mimi hanma shighe cii. Sôn Aôndo a na u icighan jijingi. Zaan mbamkombo mba tiônnongo shi yaan kwaghyan u ken jijingi u Yehova a ne se la. Mayange de lumun wer Satan a tsugh u er yange tsugh Ifa, hen ér atindi a Aôndo taver yum la ga. Satan wa atseregh kpishi, kpa er ngeren u dondon ne a tese nahan, “Satan a̱ de ye mtsera sha a vese ga,” gadia “se kera lan ayom a na ga.”—2 Kor. 2:11.
[Mbampin Mba Ngeren u Henen]
[Ufoto mba sha peeji 9 la]
Mlu u tar u nengen ér ka u ken uikyangen ga la ngu saren mo?
[Ufoto mba sha peeji 9 la]
Ka ieren yam u eren kwagh sha mimi kpa?
