“Ka An Je Nana Wam Mciem Iyolo?”
“Ka An Je Nana Wam Mciem Iyolo?”
“Shin ityav mbia mough a mo kpaa, me taver ishima her.” —PS. 27:3.
AVUR A A DONDO NE TESE ÉR KA NYI IA WASE SE VE SE TAVER ISHIMA?
Pasalmi 27:1
Pasalmi 27:4
Pasalmi 27:11
1. Ka mbampin mba han Pasalmi u sha 27 la una wase se u zuan a mbamlumun sha mini?
SHIN er mlu u tar ne a lu vihin gban a gba kera nahan kpa, er nan ve se lu hemban eren tom wase u pasen kwagh laa? Er ior kpishi ve lu ken ibanave tsung nahan kpa, hii nan ve ka i doo se u pasen kwagh a shighe wase man agee a ase? Se er nan ve se za hemen u taver ishima sha shighe u ior kpishi ve lu cian mlu u ken hemen nee? Pasalmi u sha 27, u Tor Davidi yange nger la una wase se u zuan a mbamlumun sha mbampin mban.
2. Mciem ka ma er a or nena, kpa ka vangertiôr u nyi se lu a mini?
2 Davidi hii Pasalmi ne sha mkaanem man, ér: “TER ka iwanger yam man myom wam kpaa, ka an je me cia? TER ka agee a uma wam, ka an je nana wam mciem iyolo?” (Ps. 27:1) Mciem ka ma na or iyolkpen je nan kera fatyô u eren kwagh môm ga. Kpa doo u mciem ma a gba or u nan cie Yehova iyol ga. (1 Pet. 3:14) Aluer Yehova ngu garutya wase yô, se “tema doo doo, ishima ia yôhôr [se, se] kera lu a mciem ma cian ican la ga.” (Anz. 1:33; 3:25) Er nan ve kwagh a lu nahana?
“TER KA IWANGER YAM MAN MYOM WAM KPAA”
3. Yehova ngu iwanger yase sha nyi gbenda, kpa ka nyi i gbe u se er keng-ne?
3 Kwagh u Bibilo i kaa ér “TER ka iwanger yam” la inja na yô ér Yehova tesen se mimi. (Ps. 27:1) Iwanger i kpôô kpôô ka i wase se u nenge a kwagh u nan se gbev, u a lu se sha hemen la, kpa ngi karen a kwaghbo la kera ga. Ka se se palegh kwaghbo la ye. Kape Yehova kpa a ka a pase se inja i akaa a a lu zan hemen ken tar ne la je la. Te se icin sha akaabo a shin tar ne. Shi a na i nger akaawan a dedoo ken Bibilo, a a wase se hanma shighe yô, kpa saa se dondo a ve se zua a iwasen ne ye. Aluer se dondo a yô, se er kwagh sha kwaghfan, a hemba mbaihyomov asev shin mbatesen asev cii.—Ps. 119:98, 99, 130.
4. (a) Davidi yange kaa vangertiôr ér: “TER ka . . . myom wam” sha ci u nyi? (b) Ka hanma shighe Yehova una va hemba lun myom wase ciilii?
4 Mkaanem ma Davidi nger ken Pasalmi u sha 27:1 la tese ér, a̱ shi nan kpa, yange umbur er Yehova vande yiman un ken ashighe a ken ijime yô. U tesen ikyav yô, Yehova yange yima un “sha ikyev i begha man sha ikyev i dwem.” Yehova shi wase un hemba Goliati ityav. Shighe kar yô, Tor Saulu nôngo ér una tume Davidi iwange acin ahar cii, kpa Yehova yima un. (1 Sam. 17:37, 49, 50; 18:11, 12; 19:10) Kape i lu ve, Davidi yange kaa vangertiôr ér: “TER ka . . . myom wam” la. Yehova shi una va hingir myom u ior nav, er lu myom u Davidi nahan. Una er kwagh ne nena? Una er kwagh ne sha u yiman ve sha shighe u “zegecan” la.—Mpa. 7:14; 2 Pet. 2:9.
UMBUR HANMA KWA U YEHOVA A WASE U CII
5, 6. (a) Ka sea umbur ikwa i Yehova yange vande wasen se la nahan, kwagh la a wase se u taver ishima nena? (b) Doo u se hen sha gbenda u Yehova yange wase ior nav la sha ci u nyi?
5 I pase se kwagh u injaa môm u se er ve se taver ishima la ken Pasalmi 27:2, 3. (Ôr.) Davidi yange umbur akaa a a tser un ve Yehova wase un la. (1 Sam. 17:34-37) Akaa a yange umbur ne wase un u lun a vangertiôr ér, atsan a hemban taver a angara je kpa, una fatyô u hemban a. Ú umbur ikwa i Yehova yange wase u ken ashighe a ken ijime la kpa? U tesen ikyav yô, i gbe nahan u tagher a zayol u vesen, nahan u er msen hen Yehova kpoghuloo wer a wase u, maa Yehova na u kwaghfan man tahav mbu nôngon a zayol la vee? Shin u fatyô u umbur er Yehova yange kar a akaa a wan we agbe ken tom u pasen kwagh la kera, shin u fatyô umbur aan a yange u zua a mi kpishi a eren ityom ken mcivir u Yehova la kpa? (1 Kor. 16:9) Ka wea umbur ashighe ne nahan, i lu u nena? Ka a taver we ishima ér Yehova una wase u u̱ wan ishima shin hemban mbamtaver mba vesen je kpaa ga he?—Rom. 5:3-5.
6 Aluer ma gomoti u lun a tahav soo u timin Mbashiada mba Yehova jimin cii kera di ye? Ior kpishi sha ayange ne nôngo ér vea tim ior mba Yehova, kpa ve kanshio. Aluer se umbur er Yehova yange wase ior nav sha ayange a karen la yô, kwagh ne una na se vangertiôr u tagher ishigh a kwagh u ken hemen.—Dan. 3:28.
MCIVIR U MIMI A DOO U ISHIMA
7, 8. (a) Pasalmi 27:4 tese ér Davidi yange sôn Yehova nyi? (b) Tempel u Yehova u ken jijingi la ka nyi, man mba civir un ker nena?
7 Mdoo u mcivir u mimi a doo se ishima la kpa ka a wase se u lun a ishimataver. (Ôr Pasalmi 27:4.) Sha shighe u Davidi la, “iyou i TER” lu tabernakel. Lu Davidi iyol na yange kohol ikyav mbi wan na Solomon va maa zege tempel a mi la ye. Anyom nga kar uderi imôngo yô, Yesu pase ér shighe ngu van u ior vea kera civir Aôndo ken tempel ga yô. (Yoh. 4:21-23) Apostoli Paulu yange tese ken Mbaheberu ityough 8-10 ér yange i ver tempel u ken jijingi u vesen, shighe u i er Yesu batisema ken inyom i 29, na iyol na sha u eren ishima i Yehova la. (Heb. 10:10) Ka se civir Aôndo ken tempel u ken jijingi la nena? Ka sha u eren msen hen Aôndo “a ishima i mimi, man a jighjigh u nan”; shi pasen ishimaverenkeghen yase ken igbar, a uwer u gban shio, man sha u wan mbananjighjigh a vese imôngo ikyo, shi taver ve asema shighe u se kombo imôngo ken tiônnongo man shighe u se lu eren mcivir u hen tsombor la. (Heb. 10:22-25) Aluer mcivir u mimi doo se ishima yô, se za hemen u eren akaa ne ken ayange a masejime a taver ne.
8 Mba ve civir Yehova sha jighjigh sha tar cii, mba hemban pasen kwagh a shighe ve cii, shi mba henen ijô igen, shi mba moughon yemen sha ajiir a kwagh a hembe gban sha mbapasenkwagh la. Ieren ve la tese ér mba sônon Yehova kwagh môm tseegh, er Davidi nahan. I̱ tese ér ve soo u nengen a aeren a Yehova a doon tsung la, shi civir un, a̱ lu nyi je ia er kpaa.—Ôr Pasalmi 27:6.
SUUR SHA IWASEN I AÔNDO A NE LA
9, 10. Inja i ibumun i Yehova a ne se ken Pasalmi 27:10 la ér nyi?
9 Davidi yange pase jighjigh u lu a mi ér Yehova una yima un la wang, ér: “Gadia terem man ngôm [vea] undum, kpa TER Una tôôm.” (Ps. 27:10) Akaa a i er ken 1 Samuel ityough 22 la wase se u fan ser mbamaren mba Davidi yange ve undu un ga. Nahan kpa, mbagenev nyian kpishi icombor ve ta ve kera. Kpa mbakpishiv mba i te ve kera la, ve zua a mkor man ikyo iwan ken tiônnongo u Kristu.
10 Er Yehova a kegh iyol u yiman mba ve civir un mbara shighe u mbagenev ve te ve kera yô, una kera sue ve ken nyityô ican i i tser ve cii gaa? U tesen ikyav yô, aluer ishima nyian se, se mba henen ape se zua a kwagh u koson tsombor wase nahan, se fatyô u lun a vangertiôr ser Yehova una wase se kpa? (Heb. 13:5, 6) A fa mbamlu man mbamgbe mba ior mba ve civir un sha jighjigh cii.
11. Aluer se suur sha Yehova yô, kwagh la una bende a mbagenev nena? Tese ikyav.
11 Hen ase kwagh u Victoria, kwase ugen u ken tar u Liberia, u lu henen Bibilo yô. Er zurum u a er un batisema la, or u ve tsaan imôngo la undu un a mbayev utar. Er kera lu a ya ga, shi lu a tom u eren ga nahan kpa, a za hemen u vesen ken jijingi. Mba eren Victioria batisema kera yô, wan na u lun anyom 13 za tôô anikpa ugen u lun a inyaregh ker poo. Er ve soo u palegh imeen i vihin inyaregh kira yô, ve ôr ki tsô kpaa ga. Fese je maa ve za ker orshoja u lu ikpa na la ve na un inyaregh nagh. Orshoja la kaa a ve ér, ior cii vea lu a mimi iyol er Mbashiada mba Yehova nahan yô, tar cii man u hembe doon, shi bem ma a hembe lun sha tar. Victoria tese orshoja la ityendezwa i Yehova a er i van a tar u he la ken Bibilo. Jighjigh u nan man ieren i mimi i Victoria tese la doo orshoja la kpen kpen, nahan a pande zege inyar ker a na un. Sha kpôô yô, jighjigh u Mbashiada mba Yehova ve ne taveraa ér Yehova una fatyô u kuren mbamgbe vev la na yô, i fa ve sha tar cii ér mba ior mba mimi.
12. Inyaregh ka kia saa se shin sea kera lu a tom ga je kpa sea za hemen u civir Yehova her yô, kwagh ne ngu a tese ér nyi? Tese ikyav.
12 Anmgbian ugen ken tar u Seirra Leone, u a lu orpasenkwagh u nan lu a er batisema ga yô, mba yer iti na ér Thomas. Yange hii u tesen tica ken kôleeji, kpa i kimbi un ga je nôngo u kuman inyom jimin. Nenge er yange a lu un ken ishima la sha wono! Yange gba u orhemen u makeranta la una tôv un sha akaa agen cii ve, a na un inyaregh nagh ye. Or ne gema lu orhemen adua, nahan a kaa a Thomas ér i soo ér a tese ior akaa a Mbashiada mba Yehova ve ne jighjigh a mi la hen makeranta la ga. A kaa ér aluer Thomas soo u tesen hen makeranta la her yô, saa una de kwaghaôndo u Mbashiada mba Yehova la. Thomas de tom la, shi inyaregh ki i lu un a injô je zulum sha inyom la kpa ki saa. A za ker tom ugen u sôron uredio man uhanseeti. Akav agen kpishi kpa tese ér, aluer se suur sha Yehova yô, mayange se lu a ishimanyian ser kwagh a ban se ga. Er Yehova a gbe akaa cii shi a kor ior nav hanma shighe yô, se fa ser una nenge sha a vese.
13. Tom u pasen kwagh u Tartor la ngu zan hemen ken ityar i ior kpishi ve lu ken ibanave la nena?
13 Ashighe kpishi tom u pasen kwagh ka u hemba zan ikyura ken ityar kpishi i ior ve lu a tom u eren ga la. Er nan ve kwagh a lu nahana? Afishi a branci agen nger ér: “Mbayaav kpishi mba ve lumun u henen Bibilo la mba a tom u eren ga, nahan ka ve lu a shighe kpishi u henen kwagh. Anmgbianev kpa hemba mban a shighe u pasen kwagh. Ior mba ve lu sha ajiir a uma a taver ne, nenge sha ashe ve er se lu ken ayange a masejime yô.” Ormishen ugen u a pase kwagh anyom 12 hen ijiir i mbapasenkwagh kpishi ve lu a ior mba henen Bibilo a ve i hembe utar nahan yô, nger ér: “Er mbapasenkwagh kpishi ve eren akaa ken uma ve akuma akuma, shi akaa a danen ve a lu kpishi ga yô, hemba mban a ian i pasen kwagh shi henen Bibilo a ior.”
14. Aôndo una kura zegeikpelaior la sha nyi igbenda?
14 Yehova tôndo zwa u wasen nongo na shi kuran u shi yiman u, sha iyol man ken jijingi kpaa. Shi se na jighjigh ser una er kwagh ne kpee. (Ps. 37:28; 91:1-3) Mba vea war “zegecan” la vea lu zegeikpelaior jim jim. (Mpa. 7:9, 14) Sha nahan yô, Yehova una kura zegeikpelaior la, ia war ayange a masejime a tar ne. Una na ve nyityôkwagh i ia wase ve u wan ishima a atsan, shi ia kura ikyar i ve ye vea na la cii. Shi sha iyange i Armagedon la kpa Yehova una kura ior nav.
“TERE, TESEM GBENDA WOU”
15, 16. Ka sea dondon kwaghwan u Aôndo yô, i wase se nena? Tese ikyav.
15 Aluer se soo ser se za hemen u taver ishima yô, saa se ungwan kwaghwan u Aôndo hanma shighe cii. Davidi yange zamber a Yehova ér: “TERE, tesem gbenda Wou, hemen mo sha gbenda u shambe shambe kpaa, sha ci u mbaihyomov av.” (Ps. 27:11) Inja i Yehova tesen se la yô, ka u se eren hanma kwagh u Bibilo i tese cii, shi dondon kwaghwan u nongo na u we se la. Ior kpishi mba ve kimbi anzô ve, shi ve tee akaa a kwagh a kera gbe ve sha mi ga la ve nenge er u dondo kwaghwan u i we se ér se eren akaa akuma akuma la a wase ve shighe u inyaregh ki ban kpishi ne yô. Hegen mba kera eren tom kpoghuloo sha u kimbin inyaregh sha akaa a kwagh a gbe ve a mi ga la ga. Nahan ve seer mban a shighe u eren tom u pasenkwagh. Doo u se cii se pine ayol a ase ser, ‘Ka mea ôr kwagh u i nger ken Bibilo shin ken ityakerada i wanakiriki u jighjigh man u fan kwagh nahan, a̱ taver mo u dondo kwagh shon je kpa, m dondo un ave ave je he?’—Mat. 24:45.
16 Aluer se de ser Yehova a wa se kwagh shi a hemen se sha gbenda u perapera yô, ma kwagh u tan se mciem iyol una lu ga. Zum u pania u keke ugen ken tar u Amerika wa apelekeshen ér i na un tom ugen hen ijiirtom na, u una eren ve tsombor na cii ua lu a shighe u eren tom pania yô, orvesen na kaa a na ér mayange una zua a iantom la ga, saa una lu a takerada u been yunivasiti. Luun er ka we imbakwagh ne yange i er u nahan, ma u vaa afanyô er yange u za yunivasiti ga, u lu eren pania yôô? Kasua mba kar uhar yô, i de orvesen na la tom, nahan orvesen u he u i va a na la pine anmgbian la mbaawashima nav. Fese je maa a pase orvesen ne ér un man kwase na mba Mbashiada mba Yehova mba ve pasen kwagh hanma shighe yô, shi sar ve u zan hemen a tom ne her. Cii man anmgbian ne a ôr kwagh ugen yô, orvesen u he ne kaa ér: “Yange m nenge a we tsô, kwagh wou lu kposo a mbagenev cii! Shighe u terem lu uange va zulum ken ku la, ior enev uhar vaan va ôron un Bibilo hanma iyange. Nahan m tôndo zwa mer aluer m va ngu sha ian i me wase mô ken Mbashiada mba Yehova yô, me er nahan kpee je.” Kpernan pepe yô, i na anmgbian la tom u orvesen na u hiihii yange venda u nan un la. Sha kpôô yô, ka sea vande keren Tartor u Aôndo yô, Yehova a kure ityendezwa na i a er ér una kure ugbayol asev mba hange hange la.—Mat. 6:33.
JIGHJIGH U NAN MAN ISHIMAVERENKEGHEN MBA HANGE HANGE
17. Ka nyi ia wase se ve se cia akaa a se va tagher a mi ken hemen la ga?
17 Davidi wase se u fan er i lu hange hange u lun a jighjigh u nan man ishimaverenkeghen yô, a kaa ér: “M na jighjigh mer me nenge mdoom ma TER ken tar u mbaumav.” (Ps. 27:13) Sha mimi yô, sea lu a ishimaverenkeghen ga, shi sea fe akaa a i nger ken Pasalmi u sha 27 la ga yô, uma wase ma a lu nena? Sha nahan yô, se za nen hemen u sônon Yehova vangertiôr ser a na se agee shi a̱ wase se se war Armagedon.—Ôr Pasalmi 27:14.
[Mbampin Mba Ngeren u Henen]
[Foto u sha peeji 23 la]
Davidi yange umbur er Yehova vande yiman un yô, nahan a zua a ishimataver
[Foto u sha peeji 25 la]
Se mba nengen m-ban u inyaregh ki ban hegen kpishi ne ser ka ian i injaa i se hemba pasen ior loho u dedoo kpa?
