Tile Dông Shi Palegh Uhôn Mba Satan!
Tile Dông Shi Palegh Uhôn Mba Satan!
‘Tile dông hendan a ayom a diabolo.’ —EF. 6:11.
Ú NA MLUMUN WER NYI?
Or u civir Yehova nana er nan ve nana gba ken hôn u uyôughyôughmbaakaav ga?
Ka nyi ia wase Orkristu u nan vese kwase shin nom ve nana gba shin ihyungwa i idya i eren ga?
Aluer se palegh uyôughyôughmbaakaav man idya i eren yô, a lu se a iwasen sha ci u nyi?
1, 2. (a) Er nan ve mhôônom ma ker Satan a Mbakristu mba i shigh ve mkurem man mba ve lu “iyôngo igen” la ga? (b) Ka uhôn mba Satan mba nyi se lu timen sha mi ken ngeren nee?
MHÔÔNOM ma ker Satan Diabolo a uumace ga, hemban cii je yô, mba ve civir Yehova la. Jighilii yô, Satan ngu nôngon ityav a asande a mba i shigh ve mkuren la. (Mpa. 12:17) Mbakristu mba jighjigh mbara mba hemen ken tom u pasen kwagh u Tartor ne, shi ve pase ior ér ka Satan a lu tor u tar ne ye. Shi mba ve lu “iyôngo igen,” ve suen Mbakristu mba i shigh ve mkurem mbara ken tom ve, shi ve lu a ishimaverenkeghen i va zuan a uma u tsôron la kpa Diabolo kôr ve ihyom. (Yoh. 10:16) Ishima vihi Satan ker kpishi sha ci u kera ngu a ian i lun uma gbem sha won ga. Sea lu a ishimaverenkeghen i yemen sha shin i lun uma shin tar kpa, Satan ka orihyom wase. Awashima na ka u bulan se.
2 Satan eren tom a uhôn kpishi sha er una kure awashima na la yô. Er a ‘pir mbananjighjighga ashe a asema’ yô, mba lumun loho u dedoo ga, nahan vea fatyô u palegh uhôn mbara ga. Nahan cii kpa, Diabolo ka a kôr mba ve lumun loho u Tartor la je kpaa. (2 Kor. 4:3, 4) Ngeren u karen la tese se er se palegh uhôn mba Satan yô, uhôn mba shon yô ka (1) kwaghôron u gaegh man (2) mciem man mkighir u mbakov kua (3) ishima i nan or ibo karen ikyaa inya. De ase se time sha kwagh u se er ve se tile dông se palegh uhôn mba Satan mbagenev uhar yô, ka uyôughyôughmbaakaav man idya i eren je la.
UYÔUGHYÔUGHMBAAKAAV KA HÔN U IMBISHI
3, 4. Ishimanyian i sha akaa a tar ne ka i na or nan hingir u keren uyôughyôughmbaakaav nena?
3 Yesu yange ôr kwagh u ivor i i hee ken usaa la ken injakwagh na igen. Yange kaa ér alaghga or nana ungwa loho ne, ‘kpa anzughul a tar ne a nyian ishima man icugh i inyar vea va imbishi kwaghôron la, una kera ume atam ga.’ (Mat. 13:22) Uyôughyôughmbaakaav ka hôn ugen u orihyom wase Satan a tsughun se a mi yô.
4 Akaa nga ahar a ka a kohol cii a imbishi kwaghôron la yô. Kwagh u hiihii yô, ka ‘anzughul a tar ne a nyian ishima’ la. Akaa ngee a nan se ishimanyian ken “ashighe a ican” ne kpishi. (2 Tim. 3:1) Alaghga a taver we u yamen akaa a kwagh a gbe u a mi la, sha ci u kwagh taver ishe hegen kpishi gayô sha ci u ú ngu a tom u eren ga. Adooga ishima ia nyian we sha kwagh u ken hemen, nahan u pine wer, ‘Me lu a inyaregh ki kuren mbamgbe av shighe u me kera fatyô u eren tom ga la kpa?’ Er ishima i nyian mbagenev sha akaa ne yô, ve hingir u keren inyaregh kpishi, sha ci u ve hen ér inyaregh kia na ve mkor.
5. ‘Inyaregh’ kia fatyô u tsughun se nena?
5 Kwagh u sha uhar yô ka ‘icugh i inyar.’ Zum u icugh i inyar man anzughul a tar ne a nyian ishima la a te sha or yô, ka a imbishi kwaghôron la. Bibilo kaa ér ‘inyaregh ki kor or sha kwagh u vihin.’ (Orpa. 7:12) Nahan kpa, ieren i zendan inyaregh la tese kwaghfan ga. Ior kpishi nenge ér, ka vea nôngon ér vea lu mbanyarev yô, hôn u uyôughyôughmbaakaav la a hemban imbishi ve cii. Mbagenev je yô hingir ikpan i akaa a ve lu a mi la.—Mat. 6:24.
6, 7. (a) Uyôughyôughmbaakaav vea fatyô u lun kwaghbo hen ijiir i or eren tom her la nena? (b) Shighe u i kaa a Orkristu ér nana er tom tugh coroaa yô, doo u nana pine iyol i nan mbampin mba hana?
6 Alaghga u hii u lun a isharen i hingir ornyar a mfe wou shio. U tesen ikyav yô, tôô wer orvesen u hen ijiir i u eren tom la va kaa a we ér: “M ngu a loho u dedoo sha ci wou! Gomoti na kômpeni wase ijodo, man ka ikyumen tom u numben a mi ga. Se hiin tom shon uwer u ua kôr la yô, me soo u seer we tom. A gba u ashighe kpishi ú eren tom ne tugh coroaa, kpa kwagh u a lu di yô, u gema u zua a inyaregh kpishi.” Aluer i na u imba tom la nahan, u er nena? Shin er i lu hange hange u ú nengen sha mbamgbe mba tsombor wou nahan kpa, ka cii tom u i gbe u ú er la ga. (1 Tim. 5:8) Gba u ú hen sha kwagh u mbamgbe mbagenev kpaa. U er tom tugh coroaa a kuma shighe nena? Tom la ua na u ian i civir Aôndo shi zan mbamkombo mba tiônnongo shi eren mcivir u hen tsombor wou kpa?
7 Hen ase sha kwagh u a hembe lun kwagh u hange hange la. Ka inyaregh ki a seer nan wer la ki hembe gban we kwagh shin ka ikyaryan you vea Yehova? U de u vanden keren Tartor u Aôndo ken uma wou sha ci u ú soo u seer zuan a inyaregh yumuu? U nenge er u tume ityough keren uyôughyôughmbaakaav, u kera wa ikyo sha ikyar i we man tsombor wou ne ye vea Yehova la ga ve, ne vihi mlu wen vea na kpa? Aluer kape kwagh wou a lu hegen la yô, u er nan ve u tile dông, uyôughyôughmbaakaav vea kera imbishi we ga?—Ôr 1 Timoteu 6:9, 10.
8. Ka akav a ken Bibilo a han aa wase se u gbidyen kwar sha akaa a se eren ken uma wase laa?
8 Aluer u soo wer uyôughyôughmbaakaav ve imbishi we ga yô, gbidyen kwar sha akaa a u eren ken uma wou la hanma shighe cii. Mayange de lun er Isou u yange laha uityendezwa mba Aôndo la nahan ga. (Gen. 25:34; Heb. 12:16) Shi mayange de lun er ornyar u ngise Yesu kaa a na ér a za tee akaa a na, a na mbaatsanev nahan a hide a va dondo sha a na la nahan ga. U or la ma er nahan la yô, a “yem a ishima i vihin, gadia lu a inyaregh kpishi.” (Mat. 19:21, 22) Er hôn u inyar imbishi or ne yô, a venda ian i icivirigh i lun orhenen u Yesu, or u hemban sha won cii, u lu uma shin tar yange na un la! Wa ikyo sha er u venda ian i icivirigh i lun orhenen u Yesu Kristu la ga yô.
9, 10. Ruamabera kaa ér se nengen uyôughyôughmbaakaav mba keren nena?
9 Aluer se soo ser ishima i zer nyian se sha kwagh u mbamgbe asev mba sha iyol mbara ga yô, gba u se ungwa icin i Yesu ta la. A kaa ér: “Asema a̱ de nyian ne, kaan nen ner: Sé ya nyi? Shin: Sé ma nyi? Shin: Sé zer nyi? ga. Gadia akaa ne cii atôatyev nga keren a, kpa Ter wen u Sha fa er kwagh a gbe ne sha akaa ne cii yô.”—Mat. 6:31, 32; Luka 21:34, 35.
10 De keren u gban ken imeen i icugh i inyar ga, kpa gema nôngo kpoghuloo lu a mnenge u orngeren Bibilo, Agur, kpa yange lu a mi la. Yange nger wener: “De nem ibanave ga, shin inyaregh kpishi kpaa ga, kosom sha kwaghyan u una kuma sha gbayol wam yô.” (Anz. 30:8) Agur yange fa er inyaregh ki lu a inja la wang, nahan kpa, shi yange fa er icugh i inyar i taver kpishi yô. Fa wer anzughul a tar ne a nyian ishima man icugh i inyar ia na u vihi ikyar i u ye vea Yehova la. Aluer ishima ngi nyian we sha akaa a iyolough ka karen inya yô, ishimanyian la ia ya u shighe cica shi ia uma u agee iyol puru, nahan u kera lu a tahav mbu eren akaa a suen Tartor u Aôndo ga. Sha nahan yô, kange ishima wer mayange u gba ken hôn u Satan, sha kwagh u uyôughyôughmbaakaav la ga!—Ôr Mbaheberu 13:5.
IDYA NGI ER IHUNGWA I KEN MYER NAHAN
11, 12. Orkristu nana fatyô u eren idya hen ape nan eren tom la nena?
11 Mbatatoo ka vea soo u kôron ma inyam i lun a agee kpishi yô, ve time ihyungwa sha gbenda u inyam la i karen sha mi faa faa yô. Ka vea timen ihyungwa la cii yô, ve tera ayegher a ikyon sha ihyungwa shon, maa ve kura inya ve urugh sha ayegher a ikyon shon. Hôn ugen u Satan a eren tom a mi tsema tsema yô, ngu vough er hôn u mbatatoo ne nahan. Hôn la ka idya. (Anz. 22:14; 23:27) Mbakristu mbagenev gba ken hôn ne sha ci u ve nyôr iyol ken mbamlu mba vea na vea ngôôr eren idya ga yô. Mbakristu mba ve vese kasev shin noov mbagenev hingir u hian a or u nan lu nom shin kwase ve ga yô, nahan ve hingir u eren idya.
12 Alaghga u hii u hian a ma or hen ape u eren tom yô. Kwaghtôvon ugen kaa ér kasev man nomso kpishi mba ve er idya cii, ka or u nan eren tom a ve imôngo ve er idya a nan ye. Gba u ú eren tom vea or u nan lu kwase wou shin nomou ga yôô? Aluer ka nahan yô, mlu wou vea nan ngu nena? U ver ikighir sha er mlu wen la una va due ken idya i eren ga kpa? U tesen ikyav yô, alaghga anmgbian u kwase lamen vea orgen u ve eren tom imôngo yô, acin imôngo. Adooga anmgbian u kwase la hingir u nan or la jighjigh, je yô, ngu a pase un mbamzeyol nav mba ken ivese kpaa. Ikyav igen yô, anmgbian u nomso kôr ijende vea kwase ugen hen ijiirtom na. Alaghga anmgbian la una hen ér: “Ka mea ôr un mnenge wam sha kwagh nahan a wuese kpishi shi a er tom sha mi kpaa. Shi kwagh wam doo un kpen kpen. Kwase wam una eren a mo nahan ma i doom je!” U nenge er mlu u Mbakristu mban una na vea er idya a ngôôr ga kpa?
13. Or a fatyô u hian a or u nan vese nan ga la ken tiônnongo nena?
13 Ken tiônnongo kpa, or a fatyô u hian a or u nan vese nan ga yô. Nenge ase kwagh u yange er kpôô kpôô ne. Orgen vea kwase na, mba se yila ve ser Daniel man Sarah * yô, yange ve lu upania mba keke. Daniel lu ortamen u vendan tom môm ken tiônnongo ga yô. Yange hen Bibilo a agumaior ataan, mba utar ken a ve za hemen je er batisema. Gba u a taver anmgbianev mba ve sember eren batisema mban ishima kpishi. Er Daniel uve ityough u eren ityom i ken tiônnongo yô, Sarah di gema lu nan ve ishimataver i gba u a na ve la. Ica i gbe ga yô, Sarah kpa va gba u a taver un ishima, man lu agumaior a Daniel yange hen Bibilo a ve la taver un ishima ye. Kwagh ne yange hingir hôn u bo je gande. Daniel kaa ér: “Kwase wam yange lu wasen ior sha afatyô na cii, iwer ngi kar imôngo yô, gba u un kpa a wase un ken jijingi shi a taver un ishima. Kpa m kera lu veren ishima sha mbamgbe nav hen shighe ne ga, nahan kwaghbo hingir u va duen ker. Kwase wam yange er idya vea wanyenomso ugen ken mbayev nomso mba m henen Bibilo a ve mbara. Yange m uve ityough ken ityom i ken tiônnongo, nahan m kera fa mer a vôr ken jijingi tsô kpaa ga.” U palegh imba kwaghbo ne nena?
14, 15. Ka akaa a nyi nahan aa wase nom man kwase u palegh idya i erene?
14 Aluer u soo u gban shin ihyungwa i idya i eren la ga yô, hen sha kwagh u a lu u eren kwagh a or u ú vese nan sha mimi la zulee. Yesu yange kaa ér: “Kwagh u Aôndo je zua yô, or a̱ de kera paven un ga.” (Mat. 19:6) Mayange de henen wer, ityom i u eren ken tiônnongo la hemba gban kwagh a kwase wou shin nomou ga. Heela tseegh ga, aluer u ngu undun kwase wou shin nomou sha u za eren akaa a ikyoo ga hanma shighe yô, tese ér ivaa you ngi a zayol, man ieren ne ia fatyô u gbihin we vea or u ú vese la ken kwaghbo u vesen je kpaa.
15 Aluer u ngu ortamen yô, gba u ú nengen sha tiônnongo. Apostoli Peteru kaa ér: “Kura nen ikyumuile i Aôndo i i lu hen ven la, er ka sha ci u Aôndo nahan, i̱ de lu er i kighir ne a kighir ga, kpa i̱ lu sha asema a en; i̱ de lu sha ci u mtsera u dang ga, kpa i̱ lu sha gbashima je.” (1 Pet. 5:2) Kwagh u mba ken tiônnongo wou a de hungur we ga. Nahan kpa, de eren tom kpoghuloo wer u lu ortamen u dedoo ken tiônnongo, geman kanen shio u lun nom u dedoo ga. Aluer u ngu wasen anmgbianev ken tiônnongo, kpa u kera ngu wasen kwase wou hen ya ga yô, ka a inja ga cii. Ieren la ia gbihi tsombor wou ken kwaghbo. Daniel u i vande ôron kwagh na la kaa ér: “Mayange de tumen ityough eren ityom i u lu a mi ken tiônnongo la, geman gbihin tsombor wou ga.”
16, 17. (a) Ka nyi i doo u Orkristu u nan vese kwase shin nom nana er hen ijiirtom i nan sha u tesen wang ér nan kegh iyol i hian a or her ga? (b) Takerada u “Dooshima u Aôndo” la, ityough 11, ikyumhiange i sha 17 la wa Mbakristu mba ve vese ayol a ve la kwagh ér nyi?
16 Se zua a akaawan a injaa kpishi ken Iyoukura man Awake!, a aa wase Mbakristu mba ve vese ayol a ve mbara u palegh idya i eren yô. U tesen ikyav yô, yange i wa se kwagh ken Iyoukura i Oktoba 1, 2006 ér: “Aluer ú ngu shin sha ijiirtom kpishi, eren tom imôngo vea kwase shin nomsoor shighe u i kur tom yô, ú ngu wan iyol you ken kwaghbo. Er ú vese kwase shin nom yô, pase ior mba ú eren tom a ve imôngo la wang sha mkaan man sha ieren you wer ú hia a orgen môm ga. Er ú lu Orkristu yô, mayange je ú soo u sôôr kwaghbo sha u hian a mbagenev shin sha hwe man iyolwuhan you ga. . . . Aluer ú ver ufoto mba kwase wou shin nomou man mba ônov ou hen ijiirtom you yô, kwagh ne una wase u kua mba u eren tom a ve imôngo la u fan ér kwagh u tsombor wou gba u ishima. Mayange je de eren kwagh u una na or a soo u hian a we ga, shi de lumun wer or a hia a we kpaa ga.”
17 I kaa ken takerada u “Dooshima u Aôndo” la, ityough 11, ikyumhiange i sha 17 la ér, nom u nan yaven a kwase u i lu u nan ga shin kwase u nan yaven a or u nan lu nom u nan ga cii yô, nan ngu peren atindi a Aôndo a we sha kwagh u aeren a wang la sha apera. Ior kpishi nyian tôô ér idya i eren ka kwaghbo ga. Nahan kpa, doo u gbenda u mbagenev ve nengen idya la ua bende a mnenge u se Mbakristu se lu a mi sha kwagh u idyaa la ga. Sha ci u se fa ser ka ‘Aôndo una ôr mbaerenijimba man mbavihin ivaa sha idya la ijir’ ye, ka orumace ga. (Mbaheberu 10:31; 12:29) Aluer u ngu a kwase shin nom yô, doo u ne ôron ngeren mba ve er kwagh sha itinekwagh ne mbara imôngo sha ashighe ashighe. Ka Yehova iyol na yange hii ivese ye, man ivese ka icighankwagh je. Ver shighe sha er we vea kwase wou shin nomou ne lamen sha kwagh u ivese yen yô. Aluer u er nahan yô, u lu tesen wer akaa a a lu Aôndo icighankwagh la gba u kwagh tsung.—Gen. 2:21-24.
18, 19. (a) Ka akaabo a nyi a lu ken idya i erene? (b) Ka mbamtsera mba nyi or a eren kwagh a kwase u nan shin nom u nan sha mimi ve nana zua a mi?
18 Aluer u tagher a imeen i hian a or u nan lu kwase wou shin nomou ga yô, hen sha mvihi u ijimba man idya ka i va a mi la. (Anz. 7:22, 23; Gal. 6:7) Ior mba ve er idya ka ve vihi ikyaryan ve a Yehova kua mlu ve a or u ve vese la, shi ka ve va a kwaghbo sha ayol a ve kpaa. (Ôr Malaki 2:13, 14.) Nahan kpa, hen ase sha mbamtsera mba ior mba ve lu a aeren a wang ka ve zua a mi la. Ka ve lu a ishimaverenkeghen i va lun uma gbem sha won, shi ve ember uma hegen je kpaa, shi ve lu a imo i wang i ken ishima.—Ôr Anzaakaa 3:1, 2.
19 Orpasalmi yange wa icam kaa ér: “Mba atindiakaa a Ou a doo ve ishima yô, mba a bem kpishi je, ma kwagh u nan ve gbev mbu nôngon kera ngu ga.” (Ps. 119:165) Sha nahan yô, mimi a doo u ishima ken ashighe a bo ne, shi “nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan.” (Ef. 5:15, 16) Gbenda u se lu zan sha mi ne ngu a uhôn mba Satan kpishi mba a soo u kôron mbacivir Aôndo a mi nyian yô. Nahan kpa, Yehova na se hanma kwagh u i gbe u se lu a mi sha u kuran ayol a ase, nahan “tilen dông” shi “pirin avaan a usu a orbo la a mi cii yô.”—Ef. 6:11, 16.
[Ngeren u shin kpe]
^ I gema ati a ve.
[Mbampin Mba Ngeren u Henen]
[Ufoto mba sha peeji 26 la]
Uyôughyôughmbaakaav vea fatyô u vihin ikyar i or ye vea Yehova la. Mayange de lumun wer imba kwagh la i er u ga
[Ufoto mba sha peeji 29 la]
Ieren i hian a or shin den wer nana hia a we la ia fatyô u duen ken idya i eren
