Er Se Za Hemen U Lun “Iorvannya” yô
Er Se Za Hemen U Lun “Iorvannya” yô
“Ne mba ne lu ushirmbaiorov man iorvannya kpaa, m ngu zamber a ven mer: Nyagh nen asaren a iyolough.”—1 PET. 2:11.
Ú NA MLUMUN WER NYI?
I yila mba i shigh ve mkurem mbara ér iorvannya sha ci u nyi?
Mba ve lu “iyongo igen” la mba iorvannya inja nena?
Ka nyi u lu keghen ken hemene?
1, 2. Lu unô Peteru yila ve ér “mba i tsough ve,” shi yange yila ve ér “iorvannya” sha ci u nyi?
YESU yange kôndo yem sha, anyom nga kar er 30 nahan yô, apostoli Peteru nger washika ugen hen “ushirmbaiorov mba ve sambe ve lu ken Pontu man Galatia man Kapadoshia man Ashia man shi Bitinia la, ka mba i tsough ve” je la. (1 Pet. 1:1) Ishember i “mba i tsough ve” la tese ér Peteru lu ôron kwagh na kua mbagenev mba i tsegha ve sha jijingi, shin i ‘mar ve hegh sha ishimaverenkeghen i i lu uma,’ ér ve za tema tor sha vea Kristu imôngo la. (Ôr 1 Peteru 1:3, 4.) Kpa Peteru shi yila mba i tsough ve mban ér “ushirmbaiorov man iorvannya” sha ci u nyi? (1 Pet. 2:11) Er i lu Mbashiada shin tar kpuaa tseegh ve kaa ér i tsegha ve shin i tsua ve nahan kpa, er nan ve i doo u se cii kwagh a gba se sha kwagh ne?
2 Sha ayange a mbaapostoli la, i yila mba i shigh ve mkurem la ér “iorvannya” nahan lu sha inja je. Yange lu u vea saa shin tar ne ga, er nyian kpa i lu u asande a ve a a shi her ne, aa saa shin tar ne ga nahan. Apostoli Paulu, u un iyol na kpa lu môm ken “anikumuile u kpeghee” la pase ér: “Gadia se yô, tar wase ngu Sha, ka sha her kpaa se lu keghen ser Oryiman Una va ye, ka Ter Yesu Kristu je la.” (Luka 12:32; Fil. 3:20) Er ‘tar u mba i shigh ve mkurem la u lu sha’ yô, ka vea kpeen yô, ve undu tar ne, ve yem sha, ve za ngohol kwagh u hemban doon cii, ka uma u kpen ga je la. (Ôr Mbafilipi 1:21-23.) Sha nahan yô, se fatyô u kaan ser mba “iorvannya” shin tar u Satan a hemen u ne.
3. Ka mpin u nyi a dugh sha kwagh u “iyongo igen” laa?
3 Hide “iyongo igen” la di ye? (Yoh. 10:16) Bibilo tese ér vea va lu shin tar ne igbekeke. Inja na yô, vea va lu shin tar ne gbem sha won! Nahan cii kpa, hegen yô, ve kpa a fatyô u ôron kwagh ve ér, mba iorvannya. Sha ci u nyi?
“AKAA A I GBE A SHA WON CII LA NGA KINEN”
4. Ka nyi uumace ve kanshio u been a mini?
4 Er Satan yange hemba Yehova ato, shi Yehova a de ér botar u satan ne a za hemen her je, hanma or nana za hemen u yan ican i i dugh ken ihyembeato i Satan la, kua Mbakristu kpaa cii. Mbaromanu 8:22 kaa ér: “Se fa akaa a i gbe a sha won cii la nga kinen imôngo nga toghor zan zan hegen.” Mbahemen tar man mbatôvon kwaghfan u sainsi man mbawasenior nôngo sha afatyô ve cii ér vea bee a ican ne, kpa ve kanshio.
5. Hii ken inyom i 1914 la je, ka nyi kwagh ior umiliôn imôngo ve lu erenee, man ka sha ci u nyi?
5 Hii ken inyom i 1914 la je, ior mba geman ayol a ave wan sha ikyev i hemen u Kristu Yesu, u Aôndo a ver un Tor la. Sar ve u lun ior i tar u Satan ne ga. Ve venda u dondon tar u Satan ne. Kpa ve gema ve na uuma vev man akaa a ve lu a mi la cii sha u suen Tartor u Aôndo, eren kwagh u ú soo la.—Rom. 14:7, 8.
6. A fatyô u yilan Mbashiada mba Yehova ér iorvannya sha ci u nyi?
6 Mbashiada mba Yehova ka ior mba kuran tindi, mba ve lu ken ityar i hemban er 200 nahan yô. Nahan cii kpa, ape ve lu cii, ka ve lu er iorvannya nahan. Mba we ave ve sha kwagh u patii man mbamzeyol mba hen ijiir i ve lu la ga. Hegen je kpa, mba nengen ayol a ve ér ve mba ior mba ken tar u he, u Aôndo una va a mi la. Ka vea nenge er ayange a botar u ve lu mbavannya ker ne, a lu yemen leva leva u za been la nahan, i saan ve iyol kpen kpen.
7. Mbacivir Aôndo vea va lu ken paradiso gbem sha won nena, man a lu hana?
7 Ica a gba ga tsô, Kristu una tim botar u Satan ne sha tahav mbu a lu a mi la. Gomoti u Kristu u vough la, una kar a isholibo man ijungwen sha tar kera. Una tim hanma or u nan hendan kwagh a hemen u Yehova cii. Kpa mba ve civir Aôndo sha mimi la yô, vea zua a ian i lun uma ken Paradiso, shin tar, gbem sha won. (Ôr Mpase 21:1-5.) Hen shighe la, akaa a i gbe a la á “pase a sha ikyev i mlu u hôôn la á tuhwa, á za a mi ken mlu u engem u lun a ikyangenev ga u ônov mba Aôndo la.”—Rom. 8:21.
KA IEREN I NYI I GBE U MBAKRISTU MBA MIMI VEA LU A MINI?
8, 9. Zum u Peteru kaa ér “nyagh nen asaren a iyolough” la, yange ver ishigh ér nyi?
8 Peteru pase ieren i i gbe u Mbakristu vea lu a mi la. A kaa ér: “Ne mbadoon mo ishima, ne mba ne lu ushirmbaiorov man iorvannya kpaa, m ngu zamber a ven mer: Nyagh nen asaren a iyolough a a nenge ityav a uma u ken ishima la.” (1 Pet. 2:11) Kwaghwan ne ngu sha ci u Mbakristu mba i shigh ve mkurem la tseegh ga, ngu sha ci u iyôngo igen i Yesu la kpaa.
9 Aluer se iv asaren ase agen sha gbenda u Orgban se a tese la yô, kwaghbo ngu sha mi ga. Sha kpôô yô, ka sea iv asaren ne nahan i saan se iyol kpen kpen. Ikyav i tesen yô, se cii ka i sar se u yan kwagh shi man kwagh u a doo yô. Shi ka sea er akaa a nan se msaanyol vea mbagenev imôngo, shi sea lu vea azende a ase a injaa nahan i doo se. Isharen i yaven a kwase wou shin nomu la kpa i vihi ga, shi Aôndo lumun a mi kpaa. (1 Kor. 7:3-5) Kpa jighilii yô, Peteru lu ôron kwagh u “asaren a iyolough” a a “nenge ityav a uma u ken ishima” yase la. Kwagh ne tese wang ér gba kpee u se palegh hanma isharen i Yehova a vende, i ia fatyô u vihin mlu wase vea na la cii. Aluer Orkristu er nahan yô, nana zua a ku.
10. Ka sha igbenda i nyi nahan Satan ka a nôngo ér una gema Mbakristu ve hingir ior i tar nee?
10 Awashima u Satan yô, ka u una nôngo Mbakristu mba mimi ve de kera ze hemen u lun “iorvannya” ken tar ne ga. Ka uhôn mba Satan mba i gbe kpee u se fa je ne: Ieren i zendan uyôughyôughmbaakaav man idya man u keren itizan man ieren i keren ér or a de vanden a mo ga, kua ieren i or tan ave vanger a tar u nan la kpaa. Aluer se mba palegh asaren a bo ne yô, se lu tesen wang ser se soo u lun ior i tar u Satan ne ga. Se lu tesen ser se mba shin tar ne ka hila. Kwagh u a hembe gban se kwagh shi se lu nôngon kpoghuloo ser se zua a mi yô, ka u nyôron ken tar u he man u perapera, u Aôndo la, lun ker gbem sha won.
IEREN I DEDOO
11, 12. Ashighe agen ka i nenge mba ve yem twev hen ijiir igen la nena, man ka nyi ior vea fatyô u ôron sha Mbashiada mba Yehova?
11 Peteru za hemen u pasen kwagh u i gbe kpee u Mbakristu mba ve lu “iorvannya” la vea er yô. A ôr ken ivur i sha 12 la ér: “Zende wen u hen atôatyev u̱ lu wanger wanger, sha u aluer mba lamen sha a ven er ka mbaaferev yô, ve̱ nenge aeren a en a dedoo man ve̱ civir Aôndo sha iyange i Una va sôron ne la.” Ior ka vea yem twev ken tar u u lu u ve ga yô, ashighe agen mba i lu tar ve la ve puu ve. Er ve lu kposo a mbawan ndor a ve yô, alaghga a nenge ve ér mba aferaior je kpaa. Alaghga kwaghôron ve man ieren ve man iyolwuhan ve, shin mluashe ve je kpaa, una kaha. Kpa aluer inja ve doo yô, mbawan ndor a ve vea kera puu ve er ve lu kposo la ga.
12 Kape kwagh u Mbakristu mba mimi kpa a lu je la. Ve kaha a mbawan ndor a ve sha igbenda igen, er sha iliam shin iemberyolough nahan. Ashighe kpishi hwe ve man iyolwuhan ve ka i na yô, ve due kposo a ior mba hen ijiir i ve lu la. Ashighe agen mbamkposo mban ka ve na yô, mba ve fe kwagh ve tsembelee ga la, ve wa ve akaa iyol shin ve nenge ér mba mbaaferev. Nahan cii kpa, alaghga ieren ve ia na yô, mbagenev vea wuese ve.
13, 14. Mfe ‘zough a ishô sha aeren a na’ nena? Tese ikyav.
13 Aluer inja yase doo yô, mbagenev vea gba puun se tsô ga. Yesu u orgen môm nan hembe un jighjigh u nan ga la je kpa yange i puu un a ityôkyaa shio. Mbagenev yange ve yila un ér “or u kumbul hua sha kwaghyan, man or u eren hua sha msôr, ka huror u mbangoholkpandev kua u mbaasorabo.” Nahan cii kpa, a er kwagh sha kwaghfan, a tese sha ieren na i injaa la ér un ngu imba or u i hen ér un ngu la ga. Yesu kaa ér: “Mfe zua a ishô sha aeren a na.” (Mat. 11:19) Kape nyian kpa i lu vough je la. Ikyav i tesen yô, ior mbagenev mba ve lu ikyua a iyagh ki Betel ki hen gar u Selters, ken tar u Jamani la ka vea nenge gbenda u anmgbianev asev mba ken Kristu, mba ve eren tom hen ijiir ne la ve eren akaa ken uma la nahan i taver ve kpishi. Kpa tor u hen gar ne gema ta ikyaa a anmgbianev asev mban. A kaa ér: “Mbashiada mba ve eren tom hen ijiir ne la mba a gbenda ve u eren kwagh, kpa gbenda u ve eren kwagh ne ngu ve mbagenev a zayol hen gar wase ne ga.”
14 Semberee ne, i ôr imba kwagh u doon ne sha Mbashiada mba Yehova mba hen gar u Mosuko, ken tar u Russia. Yange ior wa Mbashiada akaa iyol kpishi a ve er ga yô. Kpa ken uwer u Jun 2010 la, Atejir u Yuropa u̱ Nan Or Ian i Eren Kwagh sha Ishima i Nan, u ken tar u France la kure ijir, kaa ér: “Atejir nenge ér gomoti er kwagh a Mbashiada mba Yehova mba hen gar u Mosuko sha inja ga, er a lu nan ve ian i civir Aôndo sha ishima ve ga yô. Mbaatejir mba hen gar u Mosuko na atôakyaa a kuman ken ato, a a tese ér Mbashiada mba Yehova” per tindi sha u paven ior a icombor ve, shi taver ior asema ér ve sende ayol a ve shin ve venda twersôron ga. Sha nahan yô, “mbaatejir mbara kure ijir sha inja ga, ve ôr Mbashiada mba Yehova ijir tsoomoon sha atindi a gar u Mosuko, sha mimi ga.”
GBA U SE UNGWAN IMO I GOMOTI U A HEMEN SE LA
15. Ka kwaghwan u Bibilo u han Mbakristu mba mimi sha tar cii ve dondono?
15 Mbashiada mba Yehova sha tar cii, kua mba ve lu ken gar u Mosuko la kpaa, mba dondon kwaghwan ugen u Peteru a we Mbakristu la. A nger wener: “Waan nen hanma tindi u ior ve we la ikyo sha ci u Ter—shin a lu tor u a hembe cii” kpaa. (1 Pet. 2:13, 14) Se mba ior i tar ne ga. Nahan kpa, er Paulu a kaa a vese nahan, aluer atindi a ugomoti mba ve hemen se la hendan a atindi a Aôndo ga yô, a gba u se kura a.—Ôr Mbaromanu 13:1, 5-7.
16, 17. (a) Ka nyi i tese ér se mba hendan a ugomoti ga? (b) Mbapatii mbagenev ôr kwagh u Mbashiada mba Yehova sha mimi ér nyi?
16 Mbashiada mba Yehova mba er “iorvannya” nahan ken tar ne, sha ci u ve soo u hunan gomoti shin puun kwagh u mbagenev ve eren ga. Shi kwagh u mbagenev ve tsough u eren sha gbaa u patii shin sha gbaa u sôron mbamzeyol mba uumace la kpa, mba we zwa ve sha mi ga. Er iniongo i kwaghaôndo igen i we ave sha akaa a patii nahan kpa, Mbashiada mba Yehova yô, mba eren nahan ga. Mba tesen gomoti er una hemen kpaa ga. Nahan taver kpishi u lumun ér mba hendan kwagh a gomoti shin mba numun ior ér ve er ayôôso.
17 Aluer Mbakristu mba ungwan imo i ugomoti er Peteru a we ve kwagh ér ve ‘waan tor ikyo’ la yô, vea lu nan mbahemenev mba tar ne icivir. (1 Pet. 2:17) Ashighe agen mbahemenev ka ve ôr kwagh u Mbashiada mba Yehova sha mimi; ka ve kaa ér ve gba pendan Mbashiada vanger a ityôkyaa shio tsô. Ikyav i tesen yô, orpatii ugen ken tar u Jamani, u ngise er tom vea gomoti u kpentar ugen ken tar la, shi ken masejime za er tom shin iyou idyu i tar shon la, kaa ér: “Shighe u Mbanazi wuhe Mbashiada mba Yehova, lu tôvon ve a ican la, Mbashiada mba Yehova tese inja i dedoo, man zan zan nyian kpa i nenge ér inja ve la ia lu hanma tar cii a iwasen. Er dasenda na ve ican kpishi nahan kpa, ve tile sha mimi her dông, shi ve za hemen u eren a mbagenev mba i wuhe ve imôngo la kpa dedoo. Er i lu tswamen ior mba ken ityar igen seer a seer, kua mba mnenge ve a lu kposo, shin ve lu ken pati ugen la yô, hingir hange hange u hanma or u nan lu marnya u tar u Jamani yô, nana lu a ieren i dedoo i Mbashiada mba Yehova ne.”
TESEN DOOSHIMA
18. (a) Er nan ve se soo anmgbianev asev ciili? (b) Mbagenev mba ve lu Mbashiada ga ôr nyi sha Mbashiada mba Yehova?
18 Apostoli Peteru nger wener: “Anmgbianev ve̱ doo ne ishima, cian nen Aôndo.” (1 Pet. 2:17) Mbashiada mba Yehova mba cie u eren kwagh u a doo Aôndo ga yô, shi ka ieren ne kpa ka i mgbegha ve u eren ishima na ye. Saan ve iyol er ve lu civir Yehova vea anmgbianev vev mba nomso man mba kasev sha tar cii, mba ve kpa i lu ishima ve u civir Yehova la nahan. Ka nahan ve ‘anmgbianev vev ve doo ve ishima’ ye. Er imba dooshima ne i ban ken tar u ior ve soo ayol a ve tseegh ne yô, ka i kpiligh mba ve lu Mbashiada mba Yehova ga la iyol a mlu u Mbashiada ne. Ikyav i tesen yô, kwase ugen u zenden tesen ior ajiir, u eren tom vea kômpeni u nengen sha kwagh u zende, ú tar u Amerika u bugh ken tar u Jamani yô, yange nenge dooshima u lu hen atô u anmgbianev asev sha mkohol u ityar ityar, u i er ken tar u Jamani, ken inyom i 2009 la, nahan kpiligh un iyol. Kwase la kaa wener ken anyom a un er tom u zenden a ior nengen ajiir ne cii, un ngu a vande nengen a imba dooshima ne ga. Shighe kar yô, Orshiada ugen kaa ér: “Hanma kwagh u kwase la a er sha a vese cii, a ôr sagher sagher man sha iyol i kpiligh kpaa.” I lu nahan u za ma mkohol, nahan u ungwa ior ôr imba kwagh ne sha Mbashiada vee?
19. Doo u se kange ishima ser se er nyi, man ka sha ci u nyi?
19 Mbashiada mba Yehova mba tesen sha mimi ér mba “iorvannya” ken tar u Satan ne, sha igbenda i se ter sha heen ne kua igen kpaa. Shi ve kange ishima ér vea za hemen u eren nahan saan saan. Mba a atôakyaa a injaa a a ne ve ve lu a ishimaverenkeghen taveraa ér ica a gba tsô vea nyôr ken tar u perapera u he, u Aôndo una va a mi la yô. Ka ishimaverenkeghen you la ga he?
[Mbampin Mba Ngeren u Henen]
[Foto u sha peeji 20 la]
Se mba nôngon ser se yima tar u Satan ne ga
[Foto u sha peeji 20 la]
Se mba suen tar u he u Aôndo una va mi la
[Foto u sha peeji 22 la]
Mimi u Bibilo wase anmgbianev mba ken tar u Russia u eren kwagh ken mzough
