‘Iorvannya’ Mba Civir Aôndo Sha Mimi Ken Mzough
‘Iorvannya’ Mba Civir Aôndo Sha Mimi Ken Mzough
“Akur agen aa hingir mbashiren ne man mbaeren ne tom u ikyon i wain. Kpa ne yô, á yila ne er upristi mba TER.”—YES. 61:5, 6.
Ú NA MLUMUN WER NYI?
Ior mbagenev mba nengen mba ken akuraior agen nena, kpa mnenge u Bibilo kaha a u ve la nena?
Ka nyi i lehe akuraior cii ér a ere?
Er nan ve hegen je kpa se fatyô u kaan ser se mba ken tar u i nengen or môm ér nan due ken ikyurior igen ga?
1. Mbagenev mba nengen ior mba ken akuraior agen nena, kpa ieren ne i doo ga sha ci u nyi?
ER I tese ken ngeren u karen la nahan, mbagenev soo kwagh u ior mba ken akuraior agen shin ityar igen ga. Ieren i nengen ior mba ken akuraior agen ér ve yina sha a vese la tese icivir ga. Heela tseegh ga, ieren la tese ér se fa yina se. Takerada ugen kaa ér: “Uumace cii ka anmgbianev er Bibilo i tese nahan.” Ashighe kpishi anmgbianev ka ve kaha, kpa ngula tese ér kera mba anmgbianev ga ze.
2, 3. Yehova nengen ior mba ken akuraior agen nena?
2 Hanma ijiir i se lu cii, ior mba ken akuraior agen mba. Kape sha ayange a Mbaiserael la kpa kwagh lu je la. Mbaiserael yange ve ya ikyurior a Yehova ér vea kuran atindi a na, nahan ve hingir u lun vea na kôôsôô. Er mba ken akuraior agen lu a ian i eren akaa agen ga nahan kpa, yange i wa Mbaiserael tindi ér ve eren a ve doo doo man sha icivir kpaa. Kwagh ne ka ikyav i dedoo i se dondo yô. Mpav man kwagh u mbavia a mbavia ngu hen atô u Mbakristu mba mimi ga. Sha ci u nyi? Apostoli Paulu kaa ér: “Mimi je, m kav, Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan.”—Aer. 10:34, 35.
3 Ior mba ken akuraior agen mba ve lu hen atô u Mbaiserael sha ayange a tsuaa la, yange ve zua a mbamtsera sha mlu ve u kôôsôô a Mbaiserael la. Kape Yehova yange soo ér kwagh a lu je la. Sha ci u anyom nga kar yô, apostoli Paulu va nger kwagh pine ér: “Aôndo ka u Mbayuda tseeghe? Kera ka u atôatyev kpaa gaa? Mimi je, ka u atôatyev kpaa.”—Rom. 3:29; Yoel 2:32.
4. Se fatyô u kaan ser i nenge or môm ken “Iserael u Aôndo” la ér nan due ken ikyurior igen ga sha ci u nyi?
4 Yehova yange ya ikyurior a Mbakristu mba i shigh ve mkurem la, nahan ve hingir ikyurior i ia lu a na kangenaa yô. Ikyurior ne maa kar tile sha ityough ki Mbaiserael mba sha marami mbara. Ka nahan ve i yer ikyurior ne ér “Iserael u Aôndo” ye. (Gal. 6:16) Shi er Paulu a pase nahan, ken ikyurior i he ne yô, “or u Grika man or u Yuda kera ngu ga, shin icôngo man ipusu kpaa ga, ortyôtyev shin Sekuti shin kpan man wan kpaa ga, kpa Kristu gema hoghom cii ken ior cii.” (Kol. 3:11) Sha nahan yô, yange gba u a nenge or môm ken tiônnongo u Kristu ér nan ngu or u ken ‘akuraior’ ga.
5, 6. (a) Ka mpin u nyi se fatyô u pinen sha kwagh u i er ken Yesaia 61:5 laa? (b) “Upristi mba TER” man “akur agen” a i ter kwagh u a ken Yesaia 61:5 la, ka unô? (c) Ka tom u nyi iniongo ihiar ne cii i erene?
5 Nahan kpa, alaghga or a hôn ihyôwe sha takerada u Yesaia ityough 61, ape i nger kwaghôron u profeti u a lu kuren sha tiônnongo u Kristu la. Ivur 6 i ityough kira ôr kwagh ter mba vea lu eren tom u “upristi mba TER” la. Kpa ivur i sha 5 la, gema ôr kwagh ter “akur agen” aa a lu eren tom ken mzough vea “upristi” mbara yô. Doo u se kav kwagh ne nena?
6 “Upristi mba TER” mbara ka Mbakristu mba i shigh ve mkurem, ve lu a ci “sha mnder u hiihii” shi vea “lu upristi mba Aôndo man mba Kristu kpaa, vea tema tor a Na imôngo sha anyom dubu la.” (Mpa. 20:6) Heela tseegh ga, Mbakristu mba civir Aôndo sha mimi mbagenev kpishi kpa mba, mba ve lu a ishimaverenkeghen i va lun shin tar yô. Shin er kweior ne u lu eren tom ikyooso ikyooso vea mbayemen sha la nahan kpa, i nenge ve ér mba ior mba ken akuraior agen sha ci u mba yemen sha ga. Saan ve iyol u wasen mba ve lu “upristi mba TER” la, shi lun “mbashiren” ve man “mbaeren” ve tom. Mba wasen mba i shigh ve mkurem la u van Aôndo a icivir sha u pasen kwagh shi tesen mbagenev mimi. Jighilii yô, mba i shigh ve mkurem man mba ve lu “iyongo igen” la cii ka i doo ve u tesen mbaasemaamimi, mba i sar ve u civir Aôndo gbem sha won la, shi ve wase ve u eren kwagh u ve hen la.—Yoh. 10:16.
MBA ‘IORVANNYA’ ER ABERAHAM NAHAN
7. Mbakristu mba sha ayange a ase ne mba er Aberaham man mbajighjigh mbagenev mba sha ayange a tsuaa la nena?
7 Er se vande pasen ken ngeren u karen la nahan, Mbakristu mba mimi mba er akuraior shin iorvannya nahan ken botar ne. Sha nahan yô, mba er Aberaham man mbajighjigh mbagenev mba sha ayange a tsuaa, mba i er kwagh ve ér “ve lu mbavannya man ushirmbaiorov shin tar” la nahan. (Heb. 11:13) Sea lu a ishimaverenkeghen i yemen sha, shin i lun shin tar ne kpa, se cii se fatyô u yan ikyar a Yehova, er Aberaham nahan. Yakobu, u lu môm ken mbahemenev mba shin itine sha shighe u mbaapostoli la, pase ér: “Aberaham na Aôndo jighjigh nahan A gema kwagh la hingir perapera na je la, man shi er: I yila un er ikyar u Aôndo la.”—Yak. 2:23.
8. Lu ityendezwa i nyi i er a Aberaham, man yange na jighjigh er nyi?
8 Aôndo yange tôndo zwa ér una ver icombor i shin tar cii doo doo sha ci u Aberaham man tsombor na. (Ôr Genese 22:15-18.) Er lu u ityendezwa i Aôndo ne ia va kure ken hemen ica nahan kpa, Aberaham na jighjigh ér mayange ia bunde ga. Un vea tsombor na yange ve zende hurugh hurugh kuma anyom deri môm. Nahan cii kpa, Aberaham za hemen u lun vea Yehova kôôsôô.
9, 10. (a) Ka sha igbenda i nyi nahan se fatyô u dondon ikyav i Aberaham laa? (b) Ka loho u nyi se kpa se fatyô u yôônô?
9 Er Aberaham fa shighe u ityendezwa i í er a na la ia kure ga nahan kpa, Yehova doo un ishima her, shi a za hemen u civir un kpaa. Yange kwagh gba un u za lun hen ma tar ugen gbem sha won ga, a ver ishe na jighilii. (Heb. 11:14, 15) Aluer se dondo ikyav i Aberaham a ver la yô, se lu tesen ser se mba a kwaghfan. Gba u se eren akaa ken uma akuma akuma, shi se nenge uyôughyôughmbaakaav man itizan man tom u injaa ér ka kwagh u hemban cii ga. Er nan u lu nôngon wer u haa afo ken tar u ica a gba ga tsô a tim u kera nee? Er nan u lu nan ishima you cii sha u zendan kwagh u una tsôr ga yôô? Se kpa se mba keghen kwagh u a hembe doon a tar ne yô, er Aberaham nahan. Shi se se kegh iyol u wan ishima, keghen zan zan shighe u ishimaverenkeghen yase ia kure la, er Aberaham kpa er nahan.—Ôr Mbaromanu 8:25.
10 Yehova za hemen u lôhôn akuraior cii ér a va zua a iveren sha ikyev i vor u Aberaham la. Nahan “upristi mba TER” mba i shigh ve mkurem la, kua iyongo igen i i lu “akur agen” la, mba yôôn lôhô ne sha tar cii, ken ijô i hemban er 600 nahan.
IOR MBA KEN AKURAIOR AGEN CII VE DOO U ISHIMA
11. Solomon yange kaa ér mba ken akuraior cii vea va er nyi?
11 Yange mba tseghan tempel ken inyom i 1026 C.S.Y. (Cii man Shighe u Yesu) la mba been yô, Solomon kaa ér ior mba ken akuraior cii vea va kohol Mbaiserael u wuese Yehova, sha u kuren ityendezwa i Yehova er a Aberaham la. Yange er msen kaa ér: “Man shi or u ken nongo ugen u nan lu or u ior Ou Iserael ga yô, u nan dugh ken tar u icaa sha ci u iti You yô (gadia vea ungwa gwa u iti You i vesen, man uwegh Ough ku ageegh, man uwegh Ough ku naregh), zum u nana va er msen nana ver ishigh hen iyou ne, ungwa Sha, hen ijiir You i teman la, er akaa a orvanava la nan sen U cii; sha er akuraior sha won cii a̱ fa iti You man a̱ cia U, er ior Ou Iserael nahan” yô.—1 Utor 8:41-43.
12. Alaghga mbagenev vea nenge ér Mbashiada mba Yehova due kposo shin mba er ior mba ken “akur agen” nahan sha ci u nyi?
12 Or u nan dugh ken ikyurior igen yô, ka or u nan undu tar u nan, nan yem tar ugen yô. Kape kwagh u Mbashiada mba Yehova kpa a lu vough je la. Mba sha ajiir kposo kposo sha tar, kpa ka Tartor u Aôndo, u u lu gomoti u sha, u Kristu a hemen la tseegh ve suen un ye. Sha nahan yô, mba we ave ve sha akaa a patii cuku ga, ior ka vea nenge ve ér ve due kposo ken tar u ainge ne je kpaa.
13. (a) Se er nan ve se kera nengen orgen ser nan due ken ikyurior igen ga? (b) Yehova yange soo ér uumace cii ve nengen ayol a ve sha hiihii la nena? Ta iwanger.
13 Ashighe kpishi ka i fa ior mba ken akuraior agen sha aeren a ve. Alaghga a fa ve sha zwa u ve lamen la, shin sha mbaadini vev shin sha mluashe ve, gayô sha gbenda u ve woho iyol la je kpaa. Nahan cii kpa, akaa a a ne ve uumace cii ve lu kwaghmôm la, hemba ngan a inja, a akaa a se ter sha heen, a a ne ve ve lu kposo la. Jighilii yô, ka or u mlu u nan a kaha sha igbenda igen la, i nengen ér nan due ken ikyurior igen ye. Kpa aluer se ver ishima sha igbenda i or shon nan kaha a vese la ga yô, se kera nenge nan ser nan due ken ikyurior igen ga. Luun er tar ne cii ngu a gomoti môm shi ior cii mba tar môm yô, or ma nan nengen orgen ér nan due ken ikyurior igen ga. Sha hiihii la, Yehova yange wa ishima ér uumace cii ve lu tsombor môm, shi ve lu a gomoti môm, ka gomoti na je la. Kwagh a fatyô u lun nahan hen atô u ior mba shin tar, mba ve dugh ken akuraior kposo kposo la hegen je he?
14, 15. Ka nyi nongo u Mbashiada mba Yehova u fetyô u erene?
14 Er se lu ken tar u ior ve we hua shi ve nengen ér tar ve hemba doon a u ior mbagenev nahan kpa, ka kwagh u saan iyol kpishi er mbagenev ve lu a ieren ne ga yô. Sha mimi yô, gba u se nôngo kwagh kpoghuloo ve se dugh ieren i mbavia a mbavia la ken a vese kera ye. Orgen u yange tim ityôgh ki televishen yô, ôr kwagh u mbatomov nav kpishi mba fan tom tsembelee, mba ken ityar kposo kposo ér: “Yange m zua ishigh a ior mban nahan doom kpishi je, ka kwagh u a tsa a hungur mo ga cii. Sha nahan yô, m de u nengen mba ken ityar igen mer ve due ken ‘akuraior agen,’ kpa se cii se mba ken tar môm. Yange m hii u nengen ishember i ‘ikyurior igen’ la mer i doo ga, nahan m wa tindi hen ityôgh ki televishen yagh mer or a de er kwagh a ishember la shighe u nan lu nan abaver shin nan lu lamen vea mbagenev ken afishi ga, kpa i lu ishember i ‘ityar ityar’ la ve ôron kwagh a mi ye.”
15 Sha tar cii, ka nongo u Mbashiada mba Yehova tseegh u nengen ior cii er Aôndo a nengen ve nahan ye. Er Mbashiada ve hen u eren kwagh er Yehova nahan yô, ve fatyô u geman gbenda u ve henen kwagh u mbagenev shi ve nengen ve la. Mba kera hunan ior mba ve dugh ken ityar kposo kposo la shin kôron ve ihyom ga, kpa ve hen u nengen aeren man mfe u ior mban sha gbenda u injaa. U hen er Mbashiada mba Yehova ve gem gbenda u u nengen ior mba ken ityar igen la, man er kwagh ne a wase u u̱ eren a mbagenev doo doo la kpa?
TAR U OR A KERA NENGE ORGEN ÉR NAN DUE KEN IKYURIOR IGEN KPOSO GA LA
16, 17. Mkur u Mpase 16:16 man Daniel 2:44 la una va u a mtsera nena?
16 Ica a gba ga tsô akuraior cii a tagher ishigh a Yesu Kristu man akumautya na a sha la, ken ityav mbi masetyô mbi ior vea nôngo a hemen u Aôndo, mbi i “yer ken zwa u Heberu er Armagedon la.” (Mpa. 16:14, 16; 19:11-16) Aôndo yange mgbegha profeti Daniel tsengapasen kwagh u una tser ugomoti mba uumace, mba ve lu nôngon ér awashima u Aôndo a de kur ga la, ér: “Sha ayange a utor mbara, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikyev i ma ikyurior igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.” (Dan. 2:44) Daniel yange nger mkaanem man anyom kar hegen hemba er 2,500 nahan.
17 U fatyô u nengen a mtsera u u zua a mi shighe u kwagh ne una kure la kpa? Nyian ne uumace pav tar ne ker, ver akighir kposo kposo, nahan mba nengen mbagenev ér ve due ken akuraior agen. Kpa kwagh a va kera lu nahan ga. Mluashe shin mluyol wase una kaha a u orgen kpa, a lu u tesen di er Aôndo a gbe akaa a doon kposo kposo tseegh tsô. Doo u kwagh u dedoo u Aôndo a ver se ken hemen ne una mgbegha hanma wase u zan hemen u wuese shi nan Yehova, Orgban se la icivir, er se fetyô la.
18. Ka nyi se er semberee ne, i tesen ér Mbashiada mba Yehova mba nengen ayol a ve ér ve mba nongo mômo?
18 Aluer se mba a imba jighjigh u nan ne nahan se lu vihin a vihi shighe wasaa? Ei, se lu vihin a vihi shighe ga. Sha kpôô yô, doo kpishi u se na jighjigh ser kwagh a va lu nahan. Hegen je kpa, Mbashiada mba Yehova yô, mba nengen mbagenev ér ve due ken akuraior agen ga, kwagh gbe ve sha kwagh u ijiir i or nan dugh la joo ga. Ikyav i tesen yô, semberee ne, se magh ubranci asev mba kiriki mbagenev sha er se pande tom u nengen sha ubranci mban, shi se hemba eren tom u pasen loho u dedoo u Tartor la sha inja yô. (Mat. 24:14) Kwagh yange gba se sha kwagh u ikighir i tar u ngun vea u ngula shighe u se lu maghen ubranci sha mbagenev la ga, saa di ape tindi kaa ér i lu nahan keng keng la tseegh. Kwagh ne kpa ka ikyav igen i tesen ér Yesu Kristu, u Yehova a ver un Tor la ngu geman uumace cii hingir nongoior môm, shi ica a kera gba ga tsô, “una hemba” ityav, una bee a kwagh u mbavia a mbavia la cii kera.—Mpa. 6:2.
19. Zwa u wang u Mbashiada mba Yehova ve lamen la wase ve u eren nyi?
19 Er Mbashiada mba Yehova ve lu ken ityar kpishi shi ve lamen ijô kposo kposo nahan kpa, ve cii mba lamen zwa u wang. Kwagh ne na yô, mba ken mzough u or môm kpa nana fatyô u vihin un ga yô. (Ôr Sefania 3:9.) Se hingir tsombor môm ken botar ne, kpa se mba kposo a u. Tsombor wase u u lu ken mzough hegen ne, tese ér ken tar u he la, a nenge or môm ér nan due ken ikyurior igen ga. Hen shighe la, hanma or nana lumun a kwagh u takerada u se vande teren u sha heen u kaa la, ér: “Uumace cii ka anmgbianev er Bibilo i tese nahan.”
[Mbampin Mba Ngeren u Henen]
[Mkaanem ma sha peeji 28]
U ngu keghen shighe u uumace vea de u nengen mbagenev ér ve due ken akuraior agen, shi akighir a tar a i ver kposo kposo la kpa aa kera lu ga la kpa?
[Foto u sha peeji 25 la]
Ú za hemen u veren ishima sha mkur u uityendezwa mba Aôndo mbara, er Aberaham nahan kpa?
[Foto u sha peeji 27 la]
Yehova nengen or môm ér nan due ken ikyurior igen ga
