Sha iyange i Tomatar pepe, Setemba 5, 2012 la, i yôô hen tsombor u Betel u ken tar u Amerika man u hen tar u Kanada la ér i seer or u he sha Mbahemenev mba Shin Itine, mba Mbashiada mba Yehova. Sha iyange i Setemba 1, 2012 la anmgbian Mark Sanderson hii u eren tom u Mbahemenev mba Shin Itine.

Mbamaren mba anmgbian Sanderson yange ve yese un ken mimi hen gar u San Diego, kpentar u California, ken tar u Amerika, zan zan i kar eren un batisema sha iyange i Febewari 9, 1975. Shighe kar yô, a hii u eren tom u pania hen tiôntar u Saskatchewan, ken tar u Kanada, sha iyange i Setemba 1, 1983. Mba ker Disemba 1990 yô, a bee Makeranta u Tsaase Mbashiren Tom la ken tar u Amerika, klase u sha utaankaruhar la. Mba yer makeranta ne hegen ér Makeranta u Henen Bibilo Ú Anmgbianev mba Nomso mba Lun Kwav. Ken uwer u Aipor 1991 la, i tsua anmgbian Sanderson ér a er tom u ikpur pania hen icile i Newfoundland, ken tar u Kanada. Yange er tom u wasen ortamen u sôron atôônanongo, maa i va yila un ken uwer u Febewari 1997 hingir môm ken tsombor u Betel u ken Kanada la. Ken uwer u Novemba 2000 la, i musan un i hide a mi hen branci u ken tar u Amerika, a er tom hen Ijiir i nan Iwanger sha Kwagh u Iyouci, shi ken masejime va er tom vea Gbaatom u Nengen sha Tomshiren.

Ken uwer u Setemba 2008 la, anmgbian Sanderson za Makeranta u Anmgbianev Mba ken Kômatii u Nengen sha Branci la, been yô, i tsua un za lu môm ken Kômatii u Nengen sha Branci u ken tar u Philippines la. Mba ker ken uwer u Setemba 2010 yô, i yila un hide ken branci u ken tar u Amerika la, maa i na un tom u wasen Kômatii u Nengen sha Tomshiren u Mbahemenev mba Shin Itine la.