Ka wea bugh magazin ne nahan, ka kwa me ka u ôr a ishima you, shin u kaa mbagenev wer “nenge foto laa?” Ka i due a ufoto mba doon ashe, mba i zough a ve sha ican kpishi la ken ityakerada yase nahan ka ityôkyaa je. Ufoto mban ka ikyav mbi tomov mba tesen kwagh a mi, mbi ka mbi wase se u nengen a kwagh u i lu tesen la shi henen sha mi yô. Ka ve hemba wasen se cii zum u ka sea wa iyol sha mkombo u Iyoukura i Henen shi sea wa zwa ker yô.

Ikyav i tesen yô, vande tôôn shighe gbidyen kwar fan er i hii ve yange i tsua ma foto ér a̱ lu foto u hiihii ken ma ngeren u henen yô. Foto la tese nyi? A zua sha itinekwagh shin ivur Bibilo i ngeren shon a har sha mi la nena? Hanma foto ugen u u nenge a mi cii yô, hen er a zough sha kwagh u i lu timen sha mi zan la, shi a bende a uma wou yô.

Ortamen u hemen Iyoukura i Henen a nenge ér un na tiônnongo ian i pasen kwagh u hanma foto, sha er anmgbianev vea tese er foto shon a zough sha kwagh u i lu henen la shin a bende a ve ayol a ve yô. Ashighe agen yô, ka i nger kwagh hen ma foto u tesen ikyumhiange i foto shon a te iwanger sha mi la jighilii. Ufoto mbagen di yô, ortamen u hemen Iyoukura una fatyô u tsuan shighe u i hembe doon un u a ta iwanger sha hanma foto yô. Aluer i er nahan yô, hanma or nana zua a iwasen kpishi ken kwagh u i er sha u wasen se u nengen a kwagh u i tese ken Mkaanem ma Aôndo la.

Anmgbian ugen pase wener: “Or ka nana ôron ngeren u i nger un tsembelee la nana been yô, ufoto mba ve lu ken ngeren shon la ve na ngeren la a hemba doon cii.”