1, 2. Aluer se soo ser Aôndo a lumun se yô, gba u se lu ambaaior a nyi?

SE CII ka se soo u fan kwagh u mbagenev ve henen sha avese la. Nahan kpa, er se lu Mbakristu yô, doo u a hemba gban se ishima u fan er Yehova a nengen se la. Doo u a lu nahan sha ci u a hembe sha won cii, shi ka hen a na kpa “imbor i uma i lu ye.”—Ps. 36:9.

² Apostoli Peteru yange pase ambaaior a Yehova a soo ér se lu yô, a taver se ishima ér se lu ken ‘icighanmlu shi se civir Aôndo.’ (Ôr 2 Peteru 3:11.) Cii man Aôndo a lumun se yô, gba u se lu ken “icighanmlu,” inja na yô, se lu wang sha hanma gbenda cii, sha mhen man sha ieren man ken jijingi. Heela tseegh ga, gba u se “civir Aôndo,” sha u nan un icivir tsung shi lun kôôsôô a na. Nahan u se keren ser Aôndo a lumun se la, wa ieren yase kua or u se lu kimi la cii ker. Er i lu Yehova a ‘karen ishima’ yô, ka sea lu a aeren a wang shi sea civir un tseegh, shin sea eren nahan ga kpa a fa.—1 Kron. 29:17.

3. Ka mbampin mba nyi i doo u se pine sha kwagh u ikyaryan yase vea Aôndo?

³ Satan Diabolo soo ér Aôndo a lumun se ga. Jighilii yô, una er hanma kwagh u a fetyô cii sha u se de u civir Yehova. Satan ka a eren mbaaie sha u una tsugh se se de u civir Aôndo yô. (Yoh. 8:44; 2 Kor. 11:13-15) Sha nahan yô, doo u se pine ayol a ase ser: ‘Satan tsughun ior nena? Me er nan ve me kura ikyar i i m ye vea Yehova laa?’

4. Ka nyi Satan ka a nôngo ér una er sha u vihin ikyar i se ye vea Aôndo la, man ka sha ci u nyi?

⁴ Orhenen Yakobu yange nger wener: “Hanma or ka i mee nan zum u asaren a nan iyol i nan ka a urugh nan a hôn nan la. Zum u isharen ka i jile  iyol kera yô, i gema i mar isholibo. Isholibo di ia va vese yô i gema i dugh ku.” (Yak. 1:14, 15) Satan ka a nôngo ér una bende a ishima yase, ape asaren a ase a dugh la, sha u una vihi ikyar i se ye vea Aôndo la.

5, 6. (a) Satan ka a nôngo ér una mee se nena? (b) Ka sha igbenda i nyi Satan ka a wa asaren a bo ken asema a ase, man a fa u eren tom a igbenda ne nena?

⁵ Satan ka a nôngo sha u una bende a ishima yase nena? Bibilo kaa ér “tar cii ngu sha ikyev i Orbo.” (1 Yoh. 5:19) Satan ngu a mee se sha “akaa a [a] lu shin tar” ne la. (Ôr 1 Yohane 2:15, 16.) Satan due a akaa kposo kposo shin tar ne a tsughun ior a mi anyom udubu imôngo hegen. Er se lu shin tar ne yô, gba u se kura ayol a ase sha ayom a na la.—Yoh. 17:15.

⁶ Satan ka a nôngo ér una wa asaren a bo ken ishima yase. Apostoli Yohane pase igbenda ityar i Satan ka a urugh se yô. Ka (1) “isharen i iyolough,” (2) “isharen i ashee,” man (3) “ihyagh i uma.” Satan yange er tom a akaa ne sha u meen Yesu ken taaikyôngo. Er Satan a er tom a uhôn mban anyom imôngo yô, a fa u eren tom a ve tsema tsema, nahan hanma or yô, a fa hôn u una mee nan a mi yô. Cii man se hen er se er ve se kura ayol a ase yô, de se nenge er Diabolo yange fatyô u tsughun Ifa, kpa gema fatyô u tsughun Wan u Aôndo ga yô.

7. Satan yange er tom a “isharen i iyolough” sha u meen Ifa nena?

⁷ Kwagh u vesen u uumace ka ve er ve ve za hemen u lun uma yô, ka u yan kwagh. Aôndo yange gba tar ne ér u naan se kwaghyan mgbeghaa. Satan una fatyô u meen se sha isharen i kwaghyan i i lu ken a vese la sha u una nôngo se de u civir Aôndo yô. Nenge ase er yange er kwagh ne a Ifa yô. (Ôr Genese 3:1-6.) Satan kaa a Ifa ér, una ya “kon u mfe u fan kwagh u dedoo man kwagh u bo” la kpa una kpe ga. A kaa a Ifa ér, sha iyange i una ya u la, una hingir er Aôndo nahan. (Gen. 2:9) Nahan Diabolo lu kaan a Ifa ér saa una ungwa imo i Aôndo ve una lu uma ga. Kwagh ne lu côr aie! Satan we mhen ne ken Ifa yô, gba u Ifa una tsua kwagh môm ken akaa ahar keng; una tsua u vendan mhen la, shin una tsua u henen sha mi, nahan den ér isharen la i ume ityamegh ken a na. Shin er ikyon igen lu ken sule la i una ya atam a i nahan kpa, a tsua u henen sha kwagh u Satan ôr un sha kwagh u kon u hen atô sule la, nahan a “zôr atam a u, a ya.” Sha nahan yô, Satan na Ifa hingir u lun a isharen sha kwagh u Orgban na wa un tindi sha mi la.

8. Satan yange nôngo ér una mee Yesu sha “isharen i iyolough” nena, man yange kôrcio ga sha ci u nyi?

 ⁸ Satan yange er tom a gbenda ne môm shighe u nôngo ér una mee Yesu ken taaikyôngo la kpaa. Yesu yange tse ijen ayange 40 man aime 40 yô, Satan ker u meen un sha isharen i kwaghyan. Satan kaa ér: “Aluer Wea lu Wan u Aôndo je yô, kaa iwen ne i̱ hingir bredi.” (Luka 4:1-3) Yange gba u Yesu una tsua kwagh môm ken akaa ahar: Lu u una tsua u eren tom a tahav mbu lu a mi u eren uivande la sha u kuren isharen na i yan kwagh la, shin una tsua u eren nahan ga. Yesu fa ér doo u una er tom a tahav mbun sha ci u gbayol na tseegh ga. Shin er lu ijen nahan kpa, a nenge ér doo u una hemba veren ishima sha isharen na i kwaghyan la a ikyaryan na a Yehova ga. Nahan Yesu gema kaa a na ér: “I nger er: Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.”—Mat. 4:4.

9. Ishember i “isharen i ashee” la tese nyi, man Satan yange mee Ifa sha isharen ne nena?

⁹ Yohane shi kaa ér “isharen i ashee” kpa ka hôn u Satan ugen. Ishember la tese ér or a kenger sha kwagh tseegh kpa una hii u saren nan. Satan yange mee Ifa sha isharen ne, a kaa ér: “Ashe aa bugh ne.” Er Ifa lu hemban kenger sha kon la yô, u lu hemban saren un cii. Nahan Ifa nenge ér kon la ‘doo ashe shi ngu kwagh u saren.’

10. Satan yange mee Yesu sha “isharen i ashee” nena, man Yesu gema kaa a na ér nyi?

¹⁰ Satan yange mee Yesu sha isharen ne nena? Satan “tese [Yesu] ityartor i sha won cii fese. Tsô diabolo kaa a Na er: Me na U tahav mbun cii kua icivir i mbu kpaa.” (Luka 4:5, 6) Yesu yange nenge a ityartor ne sha ashe kpôô kpôô ga, kpa lu icivir i mbu nenge a mi sha mpase u sha mnenge ye. Alaghga tsô Satan hen er kwagh u Yesu una nenge a mi la una sar un. Nahan a kaa a Yesu ér: “Aluer Wea gure inya Wea civir mo yô, á hingir kwagh Wou cii.” (Luka 4:7) Mayange Yesu soo u lun imbaor u Satan yange soo ér a lu la ga. Nahan a na Satan imo fese je. A kaa a na ér: “I nger er: Civir Ter Aôndo wou, ka Un tseegh er Un tom ye.”—Luka 4:8.

11. Satan yange mee Ifa nena?

¹¹ Yohane mase kaan ér “ihyagh i uma” kpa môm ken akaa a taregh. Er lu Adam man Ifa tseegh ve lu shin tar yô, lu u vea fatyô u tesen “ihyagh i uma” ér ior mbagenev ve nenge ga. Kpa ihyagh lu ken a ve. Shighe u Satan lu meen Ifa la, a kaa ér Aôndo ngu nyumen un kwagh u dedoo. Diabolo kaa a na ér sha iyange i una ya  “kon u mfe u fan kwagh u dedoo man kwagh u bo” la, una “hingir er Aôndo nahan, [una] gba fan kwagh u dedoo man kwagh u bo.” (Gen. 2:17; 3:5) Nahan Satan lu kaan ér Ifa una fatyô u hingir sha tseeneke na, a hemen u Yehova shio. Ihyagh lu kwagh ugen u yange na ve ungwa aie la yô. Nahan a ya kon u i kaa ér a de ye ga la, a na jighjigh ér una ya u kpa una kpe ga. Nahan kpa, kwagh za er hen la cuku ga!

12. Lu gbenda ugen u nyi Satan nôngo ér una mee Yesu, man Yesu na un imo nena?

¹² Yesu gema ver ikyav i kpilighyol, i hiden a iyol ijime, i i kaha a kwagh u Ifa yange er la yô! Satan yange mee un sha gbenda ugen kpaa, kpa a venda, kua mhen u eren kwagh sha u i doo ior la je kpaa. A lumun u karen Aôndo ga. Una er nahan yô, a lu ihyagh! Kpa Yesu kaa a Satan wang ér: “I kaa er: De karen Ter, Aôndo wou, ga.”—Ôr Luka 4:9-12.

13, 14. Pase igbenda igen i Satan a meen se nyian yô.

¹³ Nyian ne, Satan ngu meen se sha akaa a yange mee Ifa man Yesu a mi la. Ngu eren tom a “isharen i iyolough” sha u meen ior ér ve er idya shin ve ya kwagh shi ve ma kwagh i kar ikyaa inya. Shi ngu meen ior sha “isharen i ashee” ér ve nenge ufoto mba ijimbagh, hemban je yô, mba ve lu sha Intanet la. Heela tseegh ga, ngu eren tom a “ihyagh i uma” sha u una na ior ve hingir mbamoron iyol man mba soon tahav man itizan, shi ve ombon uyôughyôughmbaakaav ve seer a seer.

¹⁴ Satan ka a er tom a “akaa a [a] lu shin tar” la er orkôronishu ka nan er tom a inyam i sha tsuwe nahan. Inyam la ka i doo anishu, kpa tsuwe gema ngu ker. Nahan Satan kpa ngu a er tom a akaa a ior ve nengen ér ka mbamgbe mba ayange ayange la sha u una na ve hingir u peren atindi a Aôndo yô. Nahan kpa, ameen ne ka gbenda ugen u Satan a eren tom a mi sha u hôngor ishima yase shi nan se hingir u lun a asaren a bo yô. Jighilii yô, ngu nôngon ér se na jighjigh ser u keren ser se kuren mbamgbe asev shi se lu ken mkpeyol la hemba gban kwagh, a u eren ishima i Aôndo la. Se de ser Satan a tsugh se sha imba gbenda nee?

15. Se dondo ikyav i Yesu a ver i palegh imeen i Satan la nena?

 ¹⁵ Er Ifa yange gba ken imeen i Satan nahan kpa, Yesu yô palegh imeen la. Hanma shighe u Satan yange una mee Yesu cii yô, Yesu a ôr un kwagh u ken Ruamabera, ér: “I nger ér” shin, “I kaa ér.” Aluer se mba henen Bibilo kpoghuloo yô, se fa Ruamabera tsema tsema, nahan shighe u se tagher a imeen yô, se fatyô u umbur avur a aa wase se u eren kwagh u vough yô. (Ps. 1:1, 2) Ka sea umbur ior mbalun a jighjigh u nan mba Ruamabera a er kwagh ve ér yange ve civir Aôndo sha mimi la yô, kwagh ne a wase se u dondon ikyav ve la. (Rom. 15:4) Aluer se mba civir Yehova sha mimi, soon kwagh u un kpa a soo la, shi kwagh u a ker un ihyom la se kpa se kôr un ihyom yô, kwagh ne una kura se.—Ps. 97:10.

16, 17. Kwagh u se henen ken ishima yase la ka a bende a imbaor i se la nena?

¹⁶ Bibilo taver se ishima ér se gbidyen kwar sha kwagh u se hen ken Ruamabera la sha er se hingir u lun a mhen u Aôndo, a lu u taregh ga yô. Paulu yange pase var var er i gbe u se wa ikyo tsung sha akaa a se henen sha mi la yô. A kaa ér, se mba “vihin mbamhen kera man shi hanma kwagh u taven u i kende a mi sha, sha u yisan kwaghfan u Aôndo; se mba haan hanma mhen abata sha u a̱ wa Kristu ikyo” yô. (2 Kor. 10:5) Akaa a se henen la ka a bende a or u se lu la tsung je, nahan gba u se za hemen u ‘veren ishima’ sha akaa a maan se a maa la.—Fil. 4:8.

¹⁷ Aluer se mba henen akaa a kpee shi se mba a asaren a vough ga yô, se fatyô u lun wang ga. Gba u se soo Yehova a “ishima i wang.” (1 Tim. 1:5) Kpa er ishima i we atseregh yô, alaghga se kav er “akaa a [a] lu shin tar” la a lu benden a vese tsung ga. (Yer. 17:9) Sha nahan yô, doo u se ‘karen ayol a ase sha u se fa aluer sea lu ken jighjigh u nan yô, se timen ken ayol a ase’ sha u gbidyen kwar nengen sea lu eren kwagh u se hen ken Bibilo la sha mimi yô.—2 Kor. 13:5.

18, 19. Gba u se kange ishima u lun imbaor i Yehova a soo ér se lu la sha ci u nyi?

¹⁸ Kwagh ugen u ka a wase se u palegh “akaa a [a] lu shin tar” la yô, ka u umbur mkaanem ma Yehova yange mgbegha Yohane nger la, ér: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yoh. 2:17) Tar u Satan ngu inja er ua kar kera ga nahan. Nahan kpa, iyange igen kwagh u u a bee. Kwagh môm ken tar u Satan ne una tsôr ga. Aluer se mba umbur kwagh ne yô, una wase se se kera gba ken ameen a Diabolo ga.

¹⁹ Apostoli Peteru wa se kwagh ér doo u se lu ambaaior a Aôndo a lumun a yô, “er [se] keghen mve u iyange i Aôndo, man [se] eren sha u i̱ va fefa yô; sha iyange la yô, Usha vea yegh vea saa kera man asemaakaa cii aa hia aa sough kera.” (2 Pet. 3:12) Ica a gba ga tsô, iyange la ia va, nahan Yehova una tim tar u Satan ne gburu gburu. Nahan kpa, cii man shighe la yô, Satan una za hemen u eren tom a “akaa a [a] lu shin tar” ne la sha u meen se, er yange mee Ifa man Yesu nahan. Mayange se lu er Ifa nahan ga, se palegh nen u keren ser se iv asaren a ase la. Aluer se ker u ivin asaren a ase yô, se mba kaan ser Satan ka aôndo wase. Gba u se lu er Yesu nahan, se palegh akaa a Satan a meen se a mi la, aa lu nan nan je kpaa. Yô, hanmô wase nana kange ishima u lun imbaor i Yehova a soo ér se lu la.