U na jighjigh wer Yesu yange lu Ortesen u hemban sha tar cii kpa? Alaghga u vande nôngon wer u dondo igbenda i yange tesen ior la, er u pinen ve mbampin shin ôron ve anzaakaa nahan. Nahan kpa, u gema u fa er ashighe kpishi yange a er tom a asember a tesen mkposo u kwagh ugen a ugen la ken ityesen na kpa?

Ior kpishi ka vea lamen yô, ve er tom a asember a tesen mkposo u kwagh ugen ugen la. Alaghga we kpa ka u er kwagh ne acin imôngo, kpa u fa ga. Adooga ka u kaa wer, “Ve kaa ér atamaikyon la cii via, kpa nenge ase angan nga kôugh her.” Shin u kaa wer, “Sha shighe u lu yev la cian ashe, kpa hegen ka lu un ican u biishi a ior ga cii.”

Ka sea lamen sha imba gbenda la yô, se hii ôron kwagh, maa se tese mkposo u kwagh u se ôron la, sha u eren tom a asember er kpa, shin nahan kpa, shin nahan cii kpa, shin sha vegher ugen yô nahan. Shin alaghga u tese mkposo ne sha u seer mkaanem ma gen sha ma u er la. Ka wea lam nahan yô, kwagh u u er la a kuma ken atô, shi a wase mbagenev ve hemba kaven kwagh u u lu ôron la kpaa.

Aluer ijô i ior ve lamen la, shin aeren a ityôô ve na yô, mba fe eren tom a asember a tesen mkposo ne ga je kpa, doo u se fa er asember ne a lu a inja yô. Sha ci u nyi? Sha ci u asember ne kpishi nga ken Mkaanem ma Aôndo a ne i nger la. Yesu yange eren tom a asember a tesen mkposo u kwagh ugen a ugen la. Nenge ase angan: “Mba te imenger mba cirin kapu sha mi ga, kpa ka i ver sha daar u pendan imenger sha mi.” “M va sha u bunden a bunde [atindiakaa] ga, kpa ka u eren sha mi vough.” “Ne ungwa er i kaa er: De eren idya ga. Kpa Mo yô, M kaan ne Mer, hanma or u nana kenger kwase . . . ” “Ne ungwa i kaa er: Ishe sha ishe, inyigh sha inyi; kpa Mo yô, M kaan ne Mer: De hendan nen a or u ifer ga; kpa hanma or u nana ta u sambe sha hengegh ku yanegh yô, gema nan kugenegh kpaa.”—Mat. 5:15, 17, 27, 28, 38, 39.

Ken ityakerada i Bibilo igen kpa asember ne nga. Asember ne a wase u u kaven kwagh u i lu ôron la tsembelee shin aa shiishi pasen gbenda u u hembe doon u eren kwagh yô. Aluer u ngu ormaren yô, gbidye ase kwar sha ishember i tesen mkposo ngin ne: “Ne uter kpaa, de eren nen a ônov enev er vea yuwe ga kpa yese nen ve sha mkôôm man kwaghwan u Ter.” (Ef. 6:4) Luun er apostoli Paulu yange una gba kaan tsô ér ter (shin ngô) nana yese wan u nan sha kwaghwan u Aôndo kpa, ma lu mimi shi ma lu sha inja kpaa. Nahan kpa, er a kaa ér ‘de eren nen a ve er vea yuwe ga kpa yese nen ve sha mkôôm man kwaghwan u Yehova’ yô, kwagh u ôr la hemba wanger cii.

Paulu nger hen ivur igen ken hemen wener: “Ka awambe man inyam se lu nôngon ityav a ve ga, kpa ka . . . ujijingi mba aferev mba sha ajiir a Sha.” (Ef. 6:12) A shi nan kpa mkposo ne wase u u kaven er ityav mbi u lu a mi u nôngon la mbi lu mbi kiriki ga yô. Ka uumace se nôngon ityav a ve ga, kpa ka u ujijingi mba aferev.

Ken takerada u Mbaefese ne môm môm, Paulu er tom a asember a tesen mkposo ne sha ajiir kpishi. Aluer se mba henen sha asember ne yô, aa wase se u kaven kwagh u Paulu lu ôron la, shi alaghga aa wase se se hemba fan kwagh u i doo u se er la wang.

Aluer u time sha kwaghkpelan u ken ngeren ne, u a lu a asember agen a tesen mkposo u kwagh ugen a ugen, a i nger ken Mbaefese ityough 4 man 5 la yô, a doo u kpishi shi a wase u kpaa. Wea ôr hanma ishember yô, hen er ia wase uma wou la. Pine iyou wer: ‘Ka ieren i nyi jim m lu a mini? Luun er kwagh ne shin ma kwagh ugen erem nahan, ma m er nena? Aluer i tese mkposo u a lu hen atô u akaa ahar nahan, ka vegher u han mbagenev vea hen ér mo m nguu?’ Aluer u nenge wer mkposo u i tese la pon kwagh u i doo u u sôr ken uma wou yô, nôngo er tom sha kwagh shon. De mkposo la a wase u.

Shi u fatyô u eren tom a kwaghkpelan la shighe u ú lu eren mcivir wou u hen tsombor yô. Mba hen tsombor ve hii ôron asember a tesen mkposo la. A been yô, mô wen nana pase vegher u hiihii la, mba hen tsombor mbagenev di ve nôngo u umbur kwagh u vesen u i lu tesen ken vegher u sha uhar la. Kwagh ne una na yô, a doo mba hen tsombor kpishi u lamen sha igbenda i vea hemba dondon kwagh u i lu ôron ken vegher u sha uhar la. Mimi yô, aluer se mba timen sha asember a tesen mkposo u kwagh ugen a ugen la sha imba gbenda ne yô, aa wase mbayev man mbaganden cii u lun a ieren i Orkristu hen tsombor man ijiir igen kpaa.

U seer fan er asember a tesen a mkposo u kwagh ugen a ugen la a lu a inja yô, u hemba fan u kaven a zum u u nenge a ken Bibilo yô, nahan u nenge er asember ne aa fatyô u wasen we kpishi ken tom wou u pasen kwagh la yô. Ikyav i tesen yô, u fatyô u kaan a orya wer: “Ior kpishi ka ve kaa ér hanma or ngu a uma u a kpen ga yô, nahan kpa nenge kwagh u Mkaanem ma Aôndo ma er heen ne.” Shin shighe u u lu henen Bibilo a or yô, u fatyô u pinen nan wer: “Ior kpishi hen ijiir ne na jighjigh ér Aôndo man Yesu cii kohol ka or môm; nahan kpa, ka nyi Bibilo i er se? Man we ka nyi u ne jighjigh a mini?”

Mimi yô, Ruamabera ngu a asember a tesen mkposo u kwagh ugen a ugen la kpishi, a aa fatyô u wasen se u zan sha gbenda u Aôndo yô. Shi se fatyô u eren tom a asember ne sha u wasen mbagenev u fan mimi u a lu ken Bibilo la.