Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mbamlumun sha mbampin mban yô:

Lu hanma shighe Yesu “za ôr ujijingi mba ve lu ken uikyangen la kwaghaôndo”? (1 Pet. 3:19)

Ka inja er yange mba nderen Yesu shin mbakpenev kera yô, a za pase ujijingi mba bov mban kwagh ér ve kuma u a tsaha ve, nahan mtsaha una va sha a ve nahan.​—6/15, peeji 23.

Ka hanma shighe Yesu una ôr ior ijir ér mba iyôngo shin ivo? (Mat. 25:32)

A lu shighe u Yesu una va u ôron ior ijir sha shighe u zegecan, zum a tim kwaghaôndo u aiegh a kar kera la.​—7/15, peeji 6.

Ka hanma shighe mbavendanatindi mba i er kwagh ve ken injakwagh i uwua man ivor i bo la vea vaa shi vea ya anyi? (Mat. 13:36, 41, 42)

Vea er kwagh ne sha shighe u zegecan, zum u vea kav er gbenda u lu u vea war mtim ga la.​—7/15, peeji 13.

Mkaanem ma Yesu yange ôr sha kwagh u wanakiriki u jighjigh man u fan kwagh la kure hanma shighe? (Mat. 24:45-47)

Yange ma hii u kuren shighe u Pentekosti u ken inyom i 33 la ga, kpa lu sha mbee u inyom i 1914 la. Ken inyom i 1919 la, i na wanakiriki la tom u nengen sha ya. Ya ne kua Mbakristu jimin cii, mba i lu kôson ve ken jijingi la.​—7/15, peeji 21-23.

Ka hanma shighe Yesu una wa wanakiriki u jighjigh akaa a na cii sha ikyeve?

Kwagh ne una er ken hemen, zum u a na wanakiriki u jighjigh la injar sha Tartor, sha shighe u zegecan la.​—7/15, peeji 25.

Dugh tahav mbu Aôndo sha yô, lu nyi igen kpa i wase Mbashiada iorov 230 u waren zende u kuugh ken purusu u ken Sachsenhausen la?

Shin er ijen man angev na tume ve iyol nahan kpa, ve za hemen u taver hanmô ve ishima ér nana de vôron ga, nana za hemen u zenden her.​—8/15, peeji 18.

Kwagh u Bibilo i er sha kwagh u Ifi u Yordan u Mbaiserael yange ve per ve nyôr ken Tar u Ityendezwa la, na se ishimataver sha ci u nyi?

Shin er ifi la lu kuwan taveraa nahan kpa, Yehova na yô ifi la de u kuwan, sha u ior nav ve per yô. Kwagh ne yange una taver jighjigh ve u nan shi una na vea seer suur sha Yehova, man se kpa kape kwagh ne una fatyô u taver se ishima je la.​—9/15, peeji 16.

Kwaghôron u profeti u i er ken Mika 5:5 sha kwagh u mbatarev man mbakuranilev la ngu kuren nyian nena?

Se kav ser ‘mbakuranilev utaankaruhar man mbatarev anigheni’ mba i ter kwagh ve ken Mika 5:5 la ka mbatamen mba ken tiônnongo, mba ve lu taver ior mba Aôndo asema sha er shighe u a va ta num sha a ve, er i tsengaôron nahan la kpa, vea tile dông yô.​—11/15, peeji 20.

Aôndo “sangen a sange” ior sha dooshimaa?

Ishember i ken zwa Grika i í gem ér “sangen a sange” la, inja na yô, ka u “kenger ior sha ishi, maa tsuan mba i soo la.” Aôndo hembe soon or môm a mbagenev sha ci u nan ngu a kwagh a ve shin sha ci u zwa u nan, shin tar u nan shin ambaakaa la ga.—7/1, peeji 11.

Se fatyô u kaan ser Yehova kôr kwagh u ufoto mba jimbagh ihyom sha ci u nyi?

Ka atôakyaa agen je ne: Yehova fa ér ufoto mba jimbagh vea fatyô u vihin uuma asev. Se doo un ishima shi a soo u kuran se sha ikyev i kwaghbo u a lu ken ieren i nengen ufoto mba jimbagh la. Shi a soo kuran avese man icombor.—9/1, peeji 6.

Gba u se deen mbagenev kwaghbo sha ci u nyi?

Ka ityôkyaa i hemban cii, i i gbe u se deen mbagenev kwaghbo je ne: Yehova Aôndo den se kwaghbo. Shi ityôkyaa igen yô, adooga ken hemen a va gba u se zamber a mbagenev ser ve de se kwaghbo.—11/1, peeji 13.