HII shighe u i hii tesen vidio i “Photo-Drama of Creation” la, anyom kar hegen ka inyom i sha 100 je ne. Yange i er vidio ne ér i wase ior ve na jighjigh ér Bibilo ka Mkaanem ma Aôndo. Hen shighe u ior kpishi na jighjigh ér akaa a uma cii gba duen tsô, shi ior puun akaa kpoghuloo shi anyimanakaa na ior kera na Aôndo jighjigh ga la, vidio i “Photo-Drama” lu tesen ér ka Yehova a gbe akaa cii ye.

Anmgbian Charles T. Russell, u lu hemen Mbahenen Bibilo hen shighe shon la, za hemen u keren gbenda u hemban doon u samber a mimi u Bibilo fele fele. Hen shighe ne, Mbahenen Bibilo lu vanden pasen kwagh a ityakerada yase hemba anyom 30. Yange senema dugh yô, Mbahenen Bibilo nenge ér vea fatyô u pasen kwagh a mi.

Ken kwavanyom u 1890 la, senema due, kpa luun a ikyenge shin iov ga. Yange i hii tesen ior fiim i kwaghaôndo igen tsuaa, ken inyom i 1903 la, ken côôci igen hen gar u New York. Shighe u Anmgbian Russell hii u wan iyol sha vidio i “Photo-Drama” ken inyom i 1912 la, senema sember duen. Anmgbian Russell nenge ér “Photo-Drama” ka gbenda u dedoo u a pase ior mimi u Bibilo a hemba er i pasen kwagh a ityakerada yase la yô.

Vidio i “Photo-Drama,” i i lihe kuma ahwa anigheni ne lu a avegher ker anyiin, a i tesen yô. I gema i kura akaaôron 96 ker. Anmgbian Russell nger akaaôron la, ornankwaghôron ugen, u ior kpishi fa un shi doo ikyenge yô, ôr akaaôron la, i kura ken vidio la. I kuhwa ityogholov mbi dedoo i wa sha ufoto kpishi ken vidio la. Mbahenen Bibilo mbafan ityogholov wa atsam, i kura sha mbaanar mba i yilan ér phonograph la, maa i nungwa sha ufoto mba sha akaa a ken Bibilo, a ior kpishi fa la, i kura ken vidio i “Photo-Drama” la.

Ufoto mba ken vidio ne kpishi, yange i zua a mi sha ajiir a kuran vidio. Nomso man kasev mba kperan akaa ken gar u Philadelphia man New York man  Paris kua London, hide kpera ufoto mbara ken inya, môm môm, i kura ken vidio la. Mbakperanakaa mba shin Betel kpa kpera ufoto mba ken ufiim mbara kpishi, shi ashighe kpishi foto una vihi yô, ve hide ve kpera un. Shi i za a mba shin Betel mbagenev ikyua ikyua a gar u Yonkers, ken kpentar u New York, ve za er iniumbe sha iti i Aberaham man Isaka, kua ortyom u venda a Aberaham ér a de ne nagh sha wan na ga la, i kura ken fiim.—Gen. 22:9-12.

Orhenen Bibilo ugen yange kaa a mbatôônabaver ér, gbenda u pasen kwagh ne ua “na ior udubu udubu vea soo Ruamabera, a hemba hanma gbenda ugen u [i vande] pasen kwaghaôndo a mi ken ashighe a karen la cii.” Mbahemenev mba aduav wuese iniôngon i dedoo i koson ior ken jijingi ne kpa? Ei. Ve cii yange ve puu vidio i “Photo-Drama” ne, mbagenev je yô lu yangen ior myer ér ve de nengen i ga, mbagenev di lu yangen ken igbar. Hen ijiir igen la, mzough u mbahemenev mba aduav tôndo usu shighe u i lu tesen vidio ne yô.

Kpa yange ior ve iv sha ajiir a tesen senema la sha u nengen vidio i “Photo-Drama” i í tesen gbilin la. Hanma sev i tese ior “Photo-Drama” sha ugeri mba vesen 80 ken tar u Amerika. Ior kpishi lu hiin ve u nengen ‘vidio i ior lu lamen ker’ je la, nahan kpiligh ve iyol. Er i lu tesen ufoto mba i tôô ciligh ciligh la fele fele yô, ior nenge er ankyegh tsev tie tie, due gba ken inya yô, man er ikpalen sagh tie tie hingir imondon yô. Mfe u sainsi u sha ayange la tese er kwaghfan u Yehova a kpiligh iyol yô. Er se ter ken mhii u ngeren ne nahan, orgen yange nenge a Anmgbian Russell ken “Photo-Drama” lu pasen vidio shon yô, a kaa ér, un “ngu nengen a Anmgbian Russell ken vidio ne, kpa [ka un] er ka un iyol na a lu lamen ga nahan!”

Orgen u ngeren ityakerada shi timen sha ufiim kaa ér, “Photo-Drama” lu “vidio i vesen i hiihii, i ior lu zenden ker shi i lu ungwan iliam ve shi ufoto lu duen ker mondon er usu nahan, hen shighe môm yô.” Uvidio mba ve vande duen a “Photo-Drama” la, hemban je yô uvidio mba sha akaa a ken Bibilo mbara, tesen akaa ne cii hen shighe môm nahan ga. Shi vidio i môm kpa ior nenge i kpishi er “Photo-Drama” nahan ga. Ken inyom i i due a mi la tseegh, ior mba ken North Amerika man Yuropa man Australia kua tar u New Zealand nenge i kuma iorov miliôn 9!

Yange i hii tesen ior vidio i “Photo-Drama” la sha iyange i Janawari 11, 1914, hen gar u New York. Iwer ngi kar 7 yô, Ityav mbi Tar cii Mbi Hiihii mbira pev. Kpa ikpelaior za hemen u kohol sha ajiir kposo kposo sha tar, nengen “Photo-Drama.” Nahan ufoto mba tesen akaa a dedoo a Tartor u Aôndo ua er, mba ior lu nengen la lu surun ve asema. Ken inyom i 1914 la tsô yô, ma vidio i môm kpa kuma sha “Photo-Drama” ga.